Ka tsʼoʼok u tsʼakik u palitsil u nojchil le soldadoʼoboʼ, Jesuseʼ lukʼ Capernaumeʼ ka bin tu kaajil Naín, kex 8 leguas (32 kilómetros). Baʼaleʼ maʼ chéen tu juunal biniʼ. Bin tak u disipuloʼob yéetel uláakʼ yaʼabkach máakoʼob. Maʼ xaaneʼ ka kʼuchoʼob tu yookbal le kaajoʼ táan u bin u chíinil kʼiin. Teʼeloʼ nupʼlan ichnajoʼob yéetel u jaats judíoʼob táan u bin u mukoʼob juntúul kimen. Le kimenoʼ juntúul táankelem xiʼipal.

Le máax maas yaachajaʼan u yóol ichil le máakoʼoboʼ u maama le táankelem paal kíimoʼ. Letiʼeʼ kimen u yíicham, beoraaʼ tsʼoʼok u kíimil xan u juntúuliliʼ hijo. Le ka kíim u yíichamoʼ maʼ jach chéen tu juunal pʼáatiʼ, tumen kuxaʼan kaʼach u hijo. Chéen máans ta tuukul bukaʼaj u yaabiltmil kaʼach u hijo, tumen ku tuklik letiʼ kun áantik ken maas chʼíijik. Baʼaleʼ beoraaʼ tak letiʼ tsʼoʼok u kíimil. Beoraaʼ minaʼan máax utiaʼal láakʼintik yéetel utiaʼal áantik.

Jesuseʼ yaachaj u yóol ka tu yilaj jach lubaʼan u yóol le koʼoleloʼ. Yéetel yaabilajeʼ tu yaʼalajtiʼ: «Xuʼuluk a wokʼol». Ka tu natsʼubaeʼ ka tu machaj le camilla tuʼux ku bisaʼal le kimenoʼ (Lucas 7:13, 14). Le baʼax tu beetoʼ tu péeksaj u yóol le máakoʼoboʼ, ka jeʼeloʼob. Maʼ xaaneʼ yanoʼobeʼ joʼopʼ u tuklikoʼob: «¿Baʼax u kʼáat u yaʼal le máakaʼ? ¿Baʼax ken u beete?».

¿Kux túun le máaxoʼob ku binoʼob tu yéetel tsʼoʼok u yilkoʼob u beetik milagroʼob bey xan u tsʼakik yaʼab kʼojaʼanoʼoboʼ? Letiʼobeʼ mix juntéen u yiloʼob u kaʼa kuxkíintaʼal mix máak tumen Jesús. ¿Jeʼel wa u páajtal u kaʼa kuxkíintik Jesús le kimen jeʼex tu beetil le máaxoʼob meyajt Dios úuchjeakiloʼ? (1 Reyes 17:17-23; 2 Reyes 4:32-37.) Jesuseʼ tu yaʼalaj: «Xiʼipal, teneʼ kin waʼaliktech: ¡Líikʼen!» (Lucas 7:14). Le xiʼipal túunoʼ kulajeʼ ka joʼopʼ u tʼaan. Ka tu kʼubaj tiʼ u maama, letiʼeʼ jach jakʼaʼan u yóol yéetel kiʼimak u yóol, tumen yaan máax láakʼintik tu kaʼatéen.

Ka ilaʼab tumen le máakoʼob tsʼoʼok u kaʼa kuxtal le táankelem xiʼipaloʼ joʼopʼ u kiʼikiʼtʼantikoʼob Jéeoba, le Máax tsʼáaik le kuxtaloʼ, ka tu yaʼaloʼob: «Tsʼoʼok u líiʼsaʼal juntúul nojoch profeta ichiloʼon».  Yanoʼob xaneʼ joʼopʼ u tʼaanoʼob maʼalob tiʼ le baʼax tu beetaj Jesusoʼ, ka tu yaʼaloʼob: «Dioseʼ tsʼoʼok u chʼaʼik óotsilil tiʼ u kaajal» (Lucas 7:16). Lelaʼ séebaʼan ojéeltaʼabik teʼ kaajoʼob yanoʼob naatsʼoʼ, maʼ xaaneʼ tak Nazaret, u kaajal Jesús, kex kaʼapʼéel leguas yéetel táanchumuk yanil (10 kilómetros). Kʼuch tak ojéeltbil tu luʼumil Judea.

Juan Bautistaeʼ láayliʼ tiaʼan carceleʼ, letiʼeʼ jach u kʼáat u yil bix u bin le meyaj ku beetik Jesusoʼ. Le oʼolal ku tsikbaltaʼaltiʼ tumen u disipuloʼob le milagroʼob ku beetik Jesusoʼ. ¿Baʼax túun ku beetik ken u yuʼubej?