Le táan u kaʼansik Jesús le máakoʼob tu luʼumil Cesarea tiʼ Filipo, kex junpʼíit maas tiʼ 6 leguas (25 kilómetros) tiʼ u puʼukil Hermón, letiʼeʼ tu yaʼalaj tiʼ u apostoloʼob: «Tu jaajil kin waʼalikteʼexeʼ, yaan jujuntúul tiʼ le máaxoʼob waʼalakbaloʼob wayeʼ maʼ kun kíimloʼob táanil tiʼ u yilkoʼob u taal u Paal máak yéetel u Reino» (Mateo 16:28).

Maʼ xaaneʼ le disipuloʼoboʼ joʼopʼ u tuklikoʼob baʼax tu yóotaj u yaʼal Jesús yéetel leloʼ. Kex junpʼéel semana tsʼoʼokkeʼ tu bisaj Pedro, Santiago yéetel Juan yóokʼol junpʼéel kaʼanal puʼuk. Maʼ xaaneʼ de áakʼab, le oʼolal taak u wenel le apostoloʼoboʼ. Le táan u orar Jesusoʼ jelpaj bix u yilaʼal. Le apostoloʼoboʼ tu yiloʼobeʼ u yichoʼob Jesuseʼ juulnaj jeʼex le Kʼiinoʼ yéetel u nookʼeʼ léembalnaj jeʼex le sáasiloʼ.

Ka tu yiloʼob u chíikpajal «Moisés yéetel Elías». Letiʼobeʼ joʼopʼ u tsikbaltikoʼob yéetel Jesús «le baʼaxoʼob ken u béeykunt Jesús tu kaajil Jerusalén yaan yil yéetel u lukʼul way yóokʼol kaabeʼ» (Lucas 9:30, 31). Ken u yaʼal «u lukʼul way yóokʼol kaabeʼ» táan u tʼaan tiʼ u kíimil yéetel u kaʼa kuxtal Jesús le tu yáax aʼalaj tiʼ u disipuloʼoboʼ (Mateo 16:21). Le baʼax tu tsikbaltoʼoboʼ ku yeʼesikeʼ maʼ kun páajtal u pʼáatal maʼ u muʼyaj yéetel u kíimsaʼal, jeʼex u tuklik kaʼach Pedroeʼ.

Le apostoloʼoboʼ jakʼaʼan u yóoloʼob yoʼolal le baʼax ku yilkoʼoboʼ, tsʼoʼoleʼ tu yuʼuboʼob junpʼéel tʼaan. Kex chéen táan u máan tu yichoʼobeʼ tu yiloʼob bey jach táan u yúuchleʼ. Le oʼolal Pedroeʼ tu táakbesuba ichil le tsikbaloʼ ka tu yaʼalaj: «J-Kaʼansaj, jach kiʼimak k-óol k-antal wayeʼ, le oʼolaleʼ koʼoneʼex beetik óoxpʼéel najoʼob de nookʼ: junpʼéel a tiaʼaliʼ, junpʼéel u tiaʼal Moisesiʼ yéetel junpʼéel u tiaʼal Elíasiʼ» (Marcos 9:5). Maʼ xaaneʼ Pedroeʼ taakchaj u beetik le najoʼob de nookʼ utiaʼal u maas xáantal le transfiguracionoʼ.

Le táan u tʼaan Pedrooʼ piʼixoʼob tumen junpʼéel múuyal ka tu yuʼuboʼob u yaʼalaʼal: «Lelaʼ in Paal, máax in yaabiltmaj, tu yoʼolal máax jach kiʼimak in wóol; uʼuyeʼex u tʼaan». Le ka tu yuʼuboʼob lelaʼ, le disipuloʼoboʼ noklajoʼob luʼum tumen jach sajakchajoʼob. Jesús túuneʼ náatsʼ tu yiknaloʼob, ka tu péetsʼkʼabtoʼobeʼ tu yaʼalajtiʼob: «Líikʼeneʼex, maʼ a sajaktaleʼex» (Mateo 17:5-7). Ka tsʼoʼokeʼ le apostoloʼoboʼ maʼ tu yiloʼob uláakʼ máakoʼobiʼ, chéen Jesús tu yiloʼob. Ka sáaschajeʼ éemoʼob teʼ puʼukoʼ, le táan u yéemloʼoboʼ aʼalaʼabtiʼob tumen Jesús: «Maʼ a waʼalikeʼex tiʼ mix máak le baʼax ta wileʼexoʼ tak ken líiʼsaʼak u Paal máak ichil le kimenoʼoboʼ» (Mateo 17:9).

Le úuchik u chíikpajal Elíasoʼ tu beetaj u kʼáataʼal tumen le apostoloʼoboʼ: «¿Baʼaxten túun le escribaʼoboʼ ku yaʼalikoʼobeʼ yáaxeʼ yaan u taal Elías?». Jesuseʼ tu núukaj: «Elíaseʼ jach yaan u taal yéetel yaan u yutskíintik tuláakal baʼal. Baʼaleʼ kin waʼalikteʼexeʼ Elíaseʼ tsʼoʼok u taal, chéen baʼaleʼ letiʼobeʼ maʼ tu kʼaj óoltoʼobiʼ, baʼaxeʼ tu beetoʼobtiʼ le baʼaxoʼob tu yóotoʼobeʼ» (Mateo 17:10-12). Jesuseʼ táan u tʼaan tiʼ Juan Bautista, letiʼeʼ tu beetaj junpʼéel meyaj jeʼex le tu beetaj Elíasoʼ. Elíaseʼ tu jeʼekʼabtaj u beel Eliseo, Juan xaneʼ tu jeʼekʼabtaj u beel Cristo.

Le úuchik u jelpajal u yilaʼal Jesusoʼ jach tu líiʼsaj u yóol le apostoloʼoboʼ. Letiʼobeʼ tu yiloʼob u nojbeʼenil Cristo tu Reino. Tu yiloʼob «u Paal máak yéetel u Reino» jeʼex aʼalaʼabik tumen Jesusoʼ (Mateo 16:28). Le oʼolal ku yaʼalikoʼob: «Jach yéetel k-ich t-ilaj le u kiʼichkelmil[oʼ]». Le fariseoʼoboʼ tu kʼáatoʼob junpʼéel señal tiʼ Jesús utiaʼal u yeʼesiktiʼob letiʼe Rey yéeyaʼan tumen Diosoʼ, baʼaleʼ letiʼeʼ maʼ tu yeʼesajtiʼob mix junpʼéeliʼ. Le disipuloʼoboʼ tsʼaʼab u páajtalil u yilkoʼob le transfiguración eʼes bix kun béeytal le profecíaʼob ku tʼaanoʼob tiʼ le Reinooʼ. Le oʼolal ka máan kʼiineʼ Pedroeʼ tu yaʼalaj: «Le baʼaxoʼob tu yaʼalaj le profetaoʼ tsʼoʼok u pʼáatal maas jaaj k-tiaʼal» (2 Pedro 1:16-19).