Le ka tsʼoʼok u salvartaʼal le disipuloʼob tiʼ le kʼaʼamkach iikʼoʼ kʼuchoʼob tu jáal le jaʼoʼ, teʼeloʼ tu yiloʼob uláakʼ baʼax beet u sajaktaloʼob. Kaʼatúul máakoʼob jach tsʼíikoʼob okaʼan demonio tiʼobeʼ jóokʼoʼob tiʼ junpʼéel cementerioeʼ ka joʼopʼ u taaloʼob yiknal Jesús. Baʼaleʼ joʼopʼ u maas paktaʼal juntúul tiʼ letiʼobiʼ, maʼ xaaneʼ tumen maas tsʼíik yéetel maas úuch okok le demonioʼob tiʼoʼ.

Le óotsil máakoʼ óoliʼ minaʼan mix junwáal u nookʼ. Letiʼeʼ «bul kʼiin yéetel bul áakʼab táan u máan ichil le muknaloʼob yéetel teʼ puʼukoʼoboʼ, táan u yawat yéetel táan u xoʼoxotik u wíinklil yéetel tuunichoʼob» (Marcos 5:5). Tumen jach tsʼíik yéetel jeʼel u beetik loobeʼ, le máakoʼoboʼ maʼatech u máanoʼob teʼ bej jeʼeloʼ. Yanoʼobeʼ tsʼoʼok u yóotik u kʼaxoʼob yéetel cadena tu yookoʼob yéetel tu kʼaboʼob, baʼaleʼ letiʼeʼ ku koʼokotsikoʼob. Mix máak ku páajtal u jetsʼkúuntik kaʼachi.

Ka náatsʼ yiknal Jesuseʼ chinlaj tu táan, le demonioʼob okaʼanoʼob tiʼoʼ tu beetoʼob u yaʼalik: «¿Baʼax yaan in wil ta wéetel Jesús, u Paal le j-Sen Kaʼanal Diosoʼ? Kin kʼáat óoltiktech tu kʼaabaʼ Dios maʼ a beetik in muʼyaj». Utiaʼal u yeʼesik Jesús maas yaan u páajtalil tiʼ le demoniooʼ, tu yaʼalaj: «Demonio, jóokʼen tiʼ le máakaʼ» (Marcos 5:7, 8).

U jaajileʼ yaʼab demonioʼob okaʼan tiʼ le máakoʼ. Jesuseʼ tu kʼáatajtiʼ: «¿Bix a kʼaabaʼ?». Letiʼeʼ tu núukaj: «In kʼaabaʼeʼ Legión tumen yaʼaboʼon» (Marcos 5:9). Junpʼéel legión tiʼ Romaeʼ yaan u milesil soldadoʼob ichil. Le oʼolal le máakoʼ yaʼab demonioʼob beetik u muʼyaj. Letiʼobeʼ tu yaʼaloʼob tiʼ Jesús «maʼ u túuxtaʼaloʼob teʼ taamkach chʼeʼenoʼ». Letiʼobeʼ u yojloʼob baʼax ku taal u kʼiin u yúuchultiʼob paʼteʼ yéetel Satanás, le máax nuʼuktikoʼoboʼ (Lucas 8:31).

Maʼ náach teʼeloʼ ku tséentaʼal kex dos mil kʼéekʼenoʼobiʼ, leloʼobaʼ maʼ limpioʼob tu táan le leyoʼ, le oʼolal maʼ tu páajtal u yalakʼtaʼal tumen le judíoʼoboʼ. Le demonioʼoboʼ tu yaʼaloʼob: «Chaʼa k-okol tiʼ le kʼéekʼenoʼoboʼ» (Marcos 5:12). Jesuseʼ tu yaʼalajtiʼob ka xiʼikoʼob, ka ookoʼob túun tiʼ le kʼéekʼenoʼoboʼ. Tuláakal túun le dos mil kʼéekʼenoʼoboʼ tu pulubaʼob desde teʼ kaʼanaloʼ ka búuloʼob ichil le kʼáaʼnáaboʼ.

 Le ka ilaʼab tumen le máaxoʼob kanáantik le kʼéekʼenoʼob le baʼax úuchoʼ bin u yaʼaloʼob teʼ kaajoʼ bey xan teʼ mejen kajtaliloʼoboʼ. Le máakoʼob túunoʼ bin u yiloʼob le baʼax úuchoʼ. Ka kʼuchoʼobeʼ tu yiloʼob le máak okaʼan le demonioʼob kaʼach tiʼoʼ tu yóol yaan. Tsʼoʼoleʼ u takmaj u nookʼ yéetel tiʼ kulukbal yiknal Jesuseʼ.

Le máaxoʼob uʼuy le baʼaxoʼob úuchoʼ sajakchajoʼob, tumen maʼ u yojloʼob baʼax jeʼel u yúuchultiʼobeʼ. Ka joʼopʼ u yaʼalikoʼob tiʼ Jesús ka jóokʼok tu luʼumiloʼob. Le táan u naʼakal Jesús teʼ barcooʼ, le máak chukaʼan kaʼach tumen demoniooʼ joʼopʼ u sen kʼáat óoltik tiʼ ka u chaʼa u bin tu yéetel. Baʼaleʼ Jesuseʼ tu yaʼalajtiʼ: «Xeen ta wotoch, yiknal a láakʼtsiloʼob ka a tsikbaltiʼob baʼaxoʼob tu beetaj Jéeoba ta woʼolal yéetel bix úuchik u chʼaʼiktech óotsilil» (Marcos 5:19).

U suukileʼ Jesuseʼ ku yaʼalik tiʼ le máakoʼob ku tsʼakikoʼob maʼ u yaʼalikoʼob tiʼ mix máakoʼ, tumen maʼ u kʼáat ka tuklaʼak baʼaloʼob maʼ jaajtak chéen yoʼolal baʼaxoʼob ku yaʼalik u maasiliʼ. Baʼaleʼ le máak tu jóoʼsaj le demonioʼob tiʼoʼ ku yeʼesik le páajtalil yaantiʼ Jesusoʼ yéetel jeʼel u yáantik u maasil u kʼaj óoltoʼob Jesús kex maʼ u binoʼob tu yiknaleʼ. Tsʼoʼoleʼ jeʼel u yáantaj utiaʼal u yojéeltaʼal u jaajil yoʼolal le kʼéekʼenoʼob kíimoʼoboʼ. Le oʼolal le máakoʼ joʼopʼ u tsikbaltik tiʼ tuláakal u luʼumil Decápolis bix úuchik u tsʼaʼakal tumen Jesús.