Ka éem Jesús, Pedro, Santiago yéetel Juan teʼ puʼukoʼ tu yiloʼob junmúuchʼ yaʼabkach máakoʼob. Yaan baʼax maʼ maʼalob ku yúuchliʼ. Baʼpachtaʼan le disipuloʼob tumen le escribaʼoboʼ yéetel táan u baʼateltʼaanoʼob tu yéeteloʼob. Ka tu yiloʼob Jesuseʼ bin u yáalkaboʼob tu yiknal. Letiʼeʼ tu kʼáatajtiʼob: «¿Baʼax ka baʼateltʼantikeʼex tu yéeteloʼob?» (Marcos 9:16).

Ka jóokʼ juntúul máak ichiloʼobeʼ ka xolaj tu táan Jesuseʼ ka tu yaʼalajtiʼ: «J-Kaʼansaj, tin taasajtech in paal tumen tiʼ letiʼeʼ okaʼan juntúul demonio ku beetik u toottal yéetel u kóoktal máak, yéetel jeʼel tuʼuxak ka u macheʼ ku lúuʼsik luʼum, le xiʼipaloʼ ku yóomankil u chiʼ, ku karachʼtik u koj yéetel ku lúubul u muukʼ. Tin waʼalaj túun tiʼ a disipuloʼob ka u jóoʼsoʼob le demonio tiʼoʼ, baʼaleʼ maʼ béeychajoʼobiʼ» (Marcos 9:17, 18).

Le escribaʼoboʼ táan u yaʼalikoʼob baʼal tiʼ le disipuloʼob tumen maʼ páajchaj u tsʼakikoʼob le xiʼipaloʼ, maʼ xaaneʼ táan u pʼaʼastikoʼob. Le oʼolaleʼ, Jesuseʼ maʼ tu núukaj le baʼax tu yaʼalaj le taatatsiloʼ, baʼaxeʼ tu yaʼalaj tiʼ le máakoʼoboʼ: «Kʼasaʼan máakeʼex minaʼan a fejeʼex, ¿tak baʼax kʼiin kʼaʼabéet in wantal ta wéeteleʼex? ¿Tak baʼax kʼiin kʼaʼabéet u chúukpajal in wóol in wáanteʼex? Taaseʼex way le xiʼipaloʼ» (Mateo 17:17).

Le ka joʼopʼ u náatsʼal le xiʼipal yiknal Jesusoʼ lúuʼsaʼab luʼum tumen le demoniooʼ ka joʼopʼ u pʼuʼupʼuchkuba. Táan u baʼlikuba teʼ luʼumoʼ yéetel táan u yóomankil u chiʼ. Jesuseʼ tu kʼáataj tiʼ u taata: «¿Bukaʼaj kʼiin káajak u yúuchultiʼ beyoʼ?». Letiʼeʼ tu núukaj: «Desde tu chichnil; yaʼab u téeneleʼ le demoniooʼ ku beetik u lúubul ich kʼáakʼ wa ich jaʼ utiaʼal u kíimsik». Le máak túunoʼ tu kʼáat óoltaj tiʼ: «Wa yaan baʼax jeʼel u páajtal a beetkeʼ, chʼaʼtoʼon óotsilil yéetel áantoʼoniʼ» (Marcos 9:21, 22).

Le taatatsiloʼ chiʼichnak, tumen u disipuloʼob Jesuseʼ maʼ páajchaj u tsʼakikoʼob le xiʼipaloʼ.  Utiaʼal u líiʼsik u yóol le taatatsil yoʼolal le baʼax tu yaʼaloʼ, Jesuseʼ tu yaʼalaj: «¿Baʼaxten ka waʼalik: ‹Wa jeʼel u páajtaleʼ›? Utiaʼal máax yaan u fejeʼ tuláakal baʼal jeʼel u páajtaleʼ». Tu séebaʼanileʼ le taatatsiloʼ tu yaʼalaj: «¡Yaan in fe! ¡Áanten tuʼux ku bineltikten fe!» (Marcos 9:23, 24).

Jesuseʼ tu yileʼ le máakoʼoboʼ táan u binoʼob teʼ tuʼux yanoʼ. Ka tu kʼeyaj le demonio tu táanoʼoboʼ: «Demonio kóok yéetel toot, teneʼ kin waʼaliktech: jóokʼen tiʼ le xiʼipalaʼ yéetel maʼ a suut okol tiʼ». Ka jóokʼ le demonio tiʼ le xiʼipaloʼ tu beetaj u yawat yéetel u pʼuʼupʼuchkuba luʼum. Ka pʼáat pektal le xiʼipaloʼ. Le máakoʼob túunoʼ joʼopʼ u yaʼalikoʼob: «¡Kimen!» (Marcos 9:25, 26). Baʼaleʼ ka maʼach u kʼab tumen Jesuseʼ líikʼi, «teʼ súutuk jeʼeloʼ le xiʼipaloʼ utschaji» (Mateo 17:18). Le máakoʼob túunoʼ jaʼakʼ u yóoloʼob yoʼolal le baʼaxoʼob ku beetik Jesusoʼ.

Le ka túuxtaʼab le disipuloʼob kʼaʼaytaj tumen Jesusoʼ páajchaj u jóoʼskoʼob demonioʼob. Le oʼolal ka ookoʼob chéen tu juunaloʼob ichil junpʼéel najeʼ tu kʼáatoʼob tiʼ Jesús: «¿Baʼaxten toʼoneʼ maʼ béeychaj k-jóoʼskiʼ?». Jesuseʼ tu yaʼalajtiʼobeʼ tumen jach junpʼíit u fejoʼob, tu yaʼalajtiʼob: «Le demonio beyaʼ chéen yéetel oración jeʼel u jóokʼoleʼ» (Marcos 9:28, 29). Jach kʼaʼabéettiʼob fe yéetel u oraroʼob tiʼ Dios utiaʼal páajtal u jóoʼskoʼob le demonio jach yaan u poderoʼ.

Ka tsʼoʼokeʼ Jesuseʼ tu yaʼalaj: «Tu jaajil kin waʼalikteʼex: Wa a fejeʼex bukaʼaj jeʼex junpʼéel u neekʼ mostazaeʼ jeʼel u páajtal a waʼalikeʼex tiʼ le puʼukaʼ: ‹Lukʼkech teʼelaʼ ka xiʼikech teʼeloʼ›, le puʼuk túunoʼ yaan u beetik, yéetel tuláakal baʼal kun páajtal a beetkeʼex» (Mateo 17:20). Bey túunoʼ, le fejoʼ jach táaj yaan u poder.

Le baʼaxoʼob jeʼel u beetik u talamtal k-meyajtik Jéeobaeʼ jeʼel u chíikpajal bey maʼ tu páajtal u péeksaʼaloʼob jeʼex junpʼéel puʼukeʼ. Baʼaleʼ wa muʼukʼaʼan k-fejeʼ jeʼel u béeytal k-aktáantik jeʼel baʼaxakeʼ.