Jesuseʼ tsʼoʼok u invitartik kantúul disipuloʼob, Pedro, Andrés, Santiago yéetel Juan, utiaʼal ka u beetubaʼob j-chuk wíinikiloʼob. Tu kʼiinil sabadoeʼ binoʼob tu sinagogail Capernaum. Jesuseʼ kaʼansajnaj teʼ sinagogaoʼ, le máakoʼob túunoʼ jaʼakʼ u yóoloʼob yoʼolal le bix u kaʼansajoʼ. Letiʼeʼ tu kaʼansoʼob bey juntúul máax tsʼaʼan autoridad tiʼeʼ, maʼ jeʼex le escribaʼoboʼ.

Teʼ sábado jeʼeloʼ bijaʼan teʼ sinagoga juntúul máak chukaʼan tumen juntúul demoniooʼ, letiʼeʼ awatnajeʼ ka tu yaʼalaj: «¿Baʼax yaan k-il ta wéetel Jesús Nazaretil? ¿Taalech wa a xuʼulsoʼon? Teneʼ jach in wojel máaxech, teech le j-Kiliʼich túuxtaʼan tumen Diosoʼ». Baʼaleʼ Jesuseʼ tu kʼeyaj le demonio chukmil le máakoʼ: «¡Mak a chiʼ, jóokʼen tiʼ le máakoʼ!» (Marcos 1:24, 25).

Le demoniooʼ tu beetaj u baʼlikuba le máak teʼ luʼumoʼ, tsʼoʼoleʼ kʼaʼam awatnajeʼ ka tu pʼataj. Baʼaleʼ «mix baʼal tu beetaj tiʼ» (Lucas 4:35). Tuláakal túun le máakoʼoboʼ jach jaʼakʼ u yóoloʼob, ka joʼopʼ u yaʼalikoʼob: «¿Baʼax lelaʼ? [...] Le máakaʼ yéetel autoridad ku tʼanik le demonioʼoboʼ yéetel letiʼobeʼ ku beetkoʼob baʼax ku yaʼalik» (Marcos 1:27). Bey túunoʼ, u tsikbalil le baʼax tu beetoʼ tu séebaʼanil ojéeltaʼab tiʼ tuláakal tuʼux tu luʼumil Galilea.

Ka lukʼ Jesús yéetel u disipuloʼob teʼ sinagogaoʼ binoʼob tu yotoch Simón wa Pedro. Baʼaleʼ u suegra Simoneʼ chilikbal táan u chokwil. Ka aʼalaʼab tiʼ Jesús ka u yáante. Ka náatsʼ tu yiknaleʼ tu machaj tu kʼabeʼ ka tu líiʼsaj. Ka tsʼoʼok u síistal u chokwileʼ joʼopʼ u beetik baʼal u jaant Jesús yéetel u disipuloʼob.

Le táan u tʼúubul Kʼiinoʼ yaʼab máakoʼobeʼ tu bisoʼob u kʼojaʼanoʼob tu yotoch Pedro. Maʼ xáanchajeʼ óoliʼ tuláakal u kajnáaliloʼob le kaaj binoʼob tu jool u yotochoʼ. ¿Baʼaxten? Tumen u kʼáatoʼob ka tsʼaʼakakoʼob. Bey túunoʼ «tuláakal le máakoʼob yaan máax kʼojaʼan tiʼobeʼ tu bisoʼob yiknal Jesús. Letiʼ túuneʼ tu tsʼáaj u kʼab tu yóokʼol cada juntúuleʼ ka tu tsʼakoʼob» (Lucas 4:40). Kex jeʼel baʼalak kʼojaʼanil yaantiʼobeʼ láaj tsʼaʼakoʼob tumen Jesús, jeʼex u yaʼalik le profecíaoʼ (Isaías 53:4). Tu jóoʼsaj tak le demonioʼob chukmil le máakoʼoboʼ. Le ken jóokʼok le demonioʼoboʼ ku yaʼalikoʼobtiʼ: «Techeʼ u Paalech Dios» (Lucas 4:41). Baʼaleʼ letiʼeʼ ku kʼeykoʼob utiaʼal maʼ u seguer u yaʼalikoʼob mix baʼal. Letiʼobeʼ u yojloʼob Jesuseʼ letiʼ le Cristooʼ. Le oʼolal Jesuseʼ maʼ u kʼáat ka u yeʼesoʼob bey táan u adorartikoʼob Jéeoba Dioseʼ.