Jesuseʼ jach yaʼab meyaj tsʼoʼok u beetik, le oʼolal jach kaʼanaʼan. Ka tardechajeʼ tu yaʼalaj tiʼ u disipuloʼob: «Koʼoneʼex tuláakʼ u tséel le jaʼoʼ», lelaʼ letiʼe ku pʼáatal aktáan tiʼ u kaajil Capernaumoʼ (Marcos 4:35).

Tu laakʼin u kʼáaʼnáabil Galileaeʼ tiʼ ku pʼáatal u luʼumil le gerasenoʼoboʼ. Lelaʼ kʼaj óolaʼan xan yéetel le kʼaabaʼ Decápolisoʼ. Tu noj kaajiloʼob Decápoliseʼ letiʼe griegoʼob kajaʼanoʼoboʼ, baʼaleʼ yaan xan judíoʼob kajaʼanoʼobiʼ.

Le ka jóokʼ u binbal Jesús tu kaajil Capernaumoʼ yaʼab máaxoʼob ile. Yaan uláakʼ barcoʼob tsʼoʼok u káajal u binoʼob xan teʼ kʼáaʼnáaboʼ (Marcos 4:36). U jaajileʼ maʼ jach náach yanil uláakʼ juntséelil u kʼáaʼnáabil Galileaoʼ. Lelaʼ junpʼéel lago chʼujuk u jaʼil, yaan junpʼíit maas tiʼ 5 leguas (21 kilómetros) chowakil yéetel óoxpʼéel leguas (12 kilómetros) u kóochil. Baʼaleʼ maʼ jach taamiʼ.

Kex Jesús perfectoeʼ, láayliʼ ku kaʼanal yoʼolal le meyajoʼob ku beetkoʼ. Le oʼolal le ka joʼopʼ u bin le barcooʼ, letiʼeʼ bin paachileʼ ka tu tsʼáaj u kʼáanjoʼoleʼ ka weeni.

Yaan tiʼ le apostoloʼoboʼ jach u yojloʼob u manejartoʼob barcoʼob, baʼaleʼ le viajeaʼ yaan u talamtal. Yaan witsoʼob naatsʼ yéetel tu kʼáaʼnáabil Galileaeʼ jach ku beetik ooxol. Yaan kʼiineʼ le síisis iikʼ ku yéemel teʼ witsoʼoboʼ ku nupkuba yéetel le ooxol yaan yóokʼol le kʼáaʼnáaboʼ, lelaʼ ku beetik u yantal junpʼéel chak ikʼal. Lelaʼ jach letiʼe baʼax úuch le táan u binoʼoboʼ. Tu séebaʼanileʼ káaj u jatsʼkuba u olasil le jaʼ teʼ barcooʼ. Ka «joʼopʼ u yokol jaʼ teʼ barcooʼ, yéetel jach taʼaytak kaʼach u búululoʼob» (Lucas 8:23). Baʼaleʼ Jesuseʼ láayliʼ táan u weenleʼ.

Le disipuloʼoboʼ joʼopʼ u beetkoʼob tuláakal le ku páajtal utiaʼal u nuʼuktikoʼob le barco jeʼex suukaʼanil u beetkoʼobeʼ. Baʼaleʼ teʼ kʼiin jeʼeloʼ maʼ páajchaj u beetkoʼob mix baʼaliʼ. Tumen sajak u kíimloʼobeʼ bin u yajsoʼob Jesús ka tu yaʼaloʼobtiʼ: «¡Yuumtsil, salvartoʼoniʼ, tumen táan k-búulul!» (Mateo 8:25). Le disipuloʼoboʼ jach sajakchajoʼob.

Ka aaj Jesuseʼ tu yaʼalaj tiʼ u apostoloʼob: «¿Baʼaxten jach saajkeʼex?, ¿baʼaxten jach junpʼíit a fejeʼex?» (Mateo 8:26). Jesús túuneʼ tu yaʼalaj tiʼ le iikʼ yéetel tiʼ le kʼáaʼnáaboʼ: «¡Mak a chiʼ! ¡Jetsʼkúuntaba!» (Marcos 4:39). Le kʼaʼamkach iikʼoʼ jéetsʼi yéetel xuʼul u woʼoltikuba le jaʼoʼ. (Marcos yéetel Lucaseʼ tu tsikbaltoʼob le baʼax úuchaʼ, yáaxeʼ ku yaʼalikoʼob bix úuchik u jeʼelsaʼal le kʼaʼamkach iikʼ tumen Jesusoʼ, tsʼoʼoleʼ ku yaʼalikoʼob le úuchik u sajaktal le disipuloʼob tumen junpʼíitchaj u fejoʼoboʼ.)

¡Chéen máans ta tuukul bix tu yuʼubiluba le disipuloʼoboʼ! Letiʼobeʼ tu yiloʼob bix úuchik u jéetsʼel le kʼáaʼnáab ku woʼoltaʼal kaʼach tumen le kʼaʼamkach iikʼoʼ. Lelaʼ tu beetaj u maas sajaktaloʼob. Letiʼobeʼ joʼopʼ u yaʼalikoʼob tu baatsiloʼob: «¿Máax jach tu jaajil le máakaʼ? Tumen tak iikʼ yéetel kʼáaʼnáab uʼuyik u tʼaan». Maʼ xaaneʼ letiʼobeʼ kʼáatmáanoʼob tuláakʼ juntséelil le kʼáaʼnáaboʼ (Marcos 4:41–5:1). Baʼaleʼ le uláakʼ barcoʼoboʼ maʼ xaaneʼ suunajoʼob tu jáal le kʼáaʼnáab tuʼux lukʼoʼoboʼ.

K-ojéeltik u Hijo Dios yaan u páajtalil tak yóokʼol le iikʼoʼ jach ku líiʼsik k-óol. Le ken káajak u gobernartik le Luʼumaʼ mix junpʼéel loobil kun beetik u sajaktal máak.