Le doce apostoloʼoboʼ jach kiʼimak u yóoloʼob, tumen tsʼoʼok u láakʼintikoʼob Jesús kʼaʼaytaj tu luʼumil Galilea. Ka suunajoʼobeʼ tu tsikbaltoʼob tiʼ Jesús «tuláakal le baʼaxoʼob tsʼoʼok u beetkoʼob yéetel tsʼoʼok u kaʼanskoʼoboʼ». Le oʼolal kaʼanaʼanoʼob. Tsʼoʼoleʼ minaʼan mix tiempo utiaʼal u kutaloʼob janal, tumen yaʼabkach máakoʼob ku taaloʼob utiaʼal ka kaʼansaʼakoʼob. Jesús túuneʼ tu yaʼalajtiʼob: «Koʼoteneʼex, ka a chan jeʼelsabaʼex tiʼ junpʼéel kúuchil tuʼux mix máak yaniʼ» (Marcos 6:30, 31).

Letiʼobeʼ naʼakoʼob tiʼ junpʼéel barco, maʼ xaaneʼ, naatsʼ tiʼ u kaajil Capernaum, ka binoʼob lakʼin, maʼ xaaneʼ tu chʼaktoʼob Betsaida. Baʼaleʼ ilaʼab u binoʼob tumen yaʼabkach máakoʼob yéetel uláakʼoʼobeʼ tu yuʼuboʼob u yaʼalal tuʼux binoʼob. Ka bin u yáalkaboʼob tu jáal le kʼáaʼnáaboʼ, ka kʼuch le barco teʼ tséelik jeʼeloʼ tiaʼanoʼobiʼ.

Ka éem teʼ barcooʼ Jesuseʼ tu yilaj le máakoʼoboʼ ka tu chʼaʼaj óotsilil tiʼob, tumen beyoʼob tamanoʼob minaʼan máax kanáantkoʼobeʼ. Ka káaj «u kaʼansiktiʼob yaʼabkach baʼaloʼob» yoʼolal le Reinooʼ (Marcos 6:34). Tsʼoʼoleʼ «tu tsʼakaj le máaxoʼob kʼojaʼanoʼoboʼ» (Lucas 9:11). Tumen tsʼoʼok u tardechajleʼ, aʼalaʼabtiʼ tumen le disipuloʼoboʼ: «Táan u yáakʼabtal, ku tsʼoʼokoleʼ mix máak kajakbal wayeʼ; aʼal tiʼ le máakoʼoboʼ jeʼel u páajtal u binoʼobeʼ, beyoʼ ka u manoʼob baʼal u jaantoʼob teʼ mejen kajtaliloʼoboʼ» (Mateo 14:15).

Jesuseʼ tu yaʼalajtiʼob: «Maʼ kʼaʼabéet ka xiʼikoʼobiʼ; teʼex ka a tsʼáaʼex baʼal u jaantoʼob» (Mateo 14:16). Kex u yojel Jesús baʼax ken u beeteʼ tu kʼáataj tiʼ Felipe utiaʼal u túuntik u yóol: «¿Tuʼux ken k-man waaj utiaʼal u jaant le máakoʼobaʼ?». Tiʼ Felipe tu kʼáataj tumen letiʼeʼ Betsaida u taal, maʼ náach teʼ tuʼux yanoʼoboʼ. Baʼaleʼ kex ka yanak tuʼux u manikoʼobeʼ maʼ kun chúukpajal utiaʼal tuláakal. Tumen yaan maas tiʼ cinco mil xiiboʼobiʼ. Tsʼoʼoleʼ ken xoʼokok tak le koʼoleloʼob yéetel le mejen paalaloʼ jeʼel u chukik kex diez mileʼ. Felipeeʼ tu núukaj: «Kex ka k-man doscientos denarios waajeʼ, maʼ ken u tsʼáa utiaʼal ka u jaantoʼob kex chéen junpʼíit cada juntúuliʼ» (Juan 6:5-7).

Maʼ xaaneʼ utiaʼal u yeʼesik Andrés maʼ tu páajtal u tsʼaʼabal baʼal u jaant le bukaʼaj máakoʼoboʼ, tu yaʼalaj: «Jeʼel juntúul chan xiʼipal yaan cinco u waajil cebada tiʼaʼ bey xan kaʼatúul mejen kayoʼob. Baʼaleʼ leloʼobaʼ maʼ kun chúukpajal utiaʼal le bukaʼaj máakoʼobaʼ» (Juan 6:9).

Maʼ yaʼab u bin u kʼiinbesajil le Pascua tiʼ u jaʼabil 32, le oʼolal láayliʼ yaʼax le suʼukoʼoboʼ. Jesuseʼ tu yaʼalaj tiʼ u disipuloʼob ka u yaʼaloʼob tiʼ le máakoʼob ka kulakoʼob yóokʼol le suʼukoʼob a cincuentail yéetel a cieniloʼ. Jesuseʼ tu chʼaʼaj  le cinco waajoʼob yéetel le kaʼatúul kayoʼoboʼ ka tu tsʼáaj gracias tiʼ Dios. Ka joʼopʼ u xetʼik le waaj yéetel le kayoʼoboʼ. Letiʼeʼ tu tsʼáaj tiʼ u disipuloʼob utiaʼal ka u tʼoxoʼob tiʼ le máakoʼoboʼ. Tuláakloʼob láaj jaanoʼob yéetel naʼajchajoʼob.

Ka tsʼoʼokeʼ Jesuseʼ tu yaʼalaj tiʼ u disipuloʼob: «Moleʼex le u xéexetʼal pʼáatoʼ utiaʼal maʼ u puʼulul mix baʼal» (Juan 6:12). Letiʼobeʼ tu moloʼob doce xaakoʼob ka tsʼoʼok u janal le máakoʼoboʼ.