Jairoeʼ tu yilaj úuchik u tsʼaʼakal le koʼolel ku máan kʼiʼikʼ kaʼach tiʼoʼ. Le oʼolal tu maas creertaj jeʼel u páajtal u tsʼaʼakal u hijaeʼ, kex beyoʼ joʼopʼ u tuklik: «In hijaeʼ tsʼoʼok wal u kíimil beoraaʼ» (Mateo 9:18). ¿Láayliʼ wa ta tʼaan jeʼel u páajtal u yáantaʼaleʼ?

Le táan u tʼaan Jesús yéetel le koʼolel tu tsʼakoʼ taal jujuntúul máakoʼob lukʼoʼob tu yotoch Jairoeʼ ka tu yaʼaloʼobtiʼ: «¡A hijaeʼ tsʼoʼok u kíimil! ¿Baʼax tiaʼal ku seguer a waʼalik tiʼ le j-Kaʼansaj ka taalakoʼ?» (Marcos 5:35).

¡Bukaʼaj wal yaachajik u yóol ka tu yuʼubeʼ! Le máak jach ku yeʼesaʼal tsiikil tiʼ tumen le máakoʼob yoʼolal le áantaj ku tsʼáaikoʼ, beoraaʼ maʼ tu páajtal u beetik mix baʼal. U juntúuliliʼ hijaeʼ tsʼoʼok u kíimil. Baʼaleʼ kex maʼ u yóoliliʼ Jesuseʼ tu yuʼubaj le baʼax aʼalaʼabtiʼoʼ, le oʼolal tu yaʼalajtiʼ: «Maʼ a chʼaʼik saajkil, chéen eʼes yaantech fe» (Marcos 5:36).

Jesuseʼ joʼopʼ u bin yéetel Jairo tu yotoch. Ka kʼuchoʼobeʼ tu yuʼuboʼob táan u sen juum u tʼaan le máakoʼoboʼ. Yanoʼobeʼ táan u yokʼoloʼob yéetel táan u yawatoʼob. Ka ook Jesuseʼ tu yaʼalaj junpʼéel baʼax maʼ jáan creertaʼabiʼ: «Le chan x-chʼúupaloʼ maʼ kimeniʼ, chéen táan u wenel» (Marcos 5:39). Le máakoʼob túunoʼ káaj u cheʼejtikoʼob Jesús. Tumen letiʼobeʼ u yojloʼob jach tu jaajil kimen. Yoʼolal le poder tsʼaʼantiʼ tumen Diosoʼ, Jesuseʼ yaan u yeʼesik jeʼel u kaʼa kuxkíintaʼal le kimenoʼob chéen jeʼex u yajsaʼal juntúul máax táan u weenleʼ.

Jesuseʼ tu yaʼalaj tiʼ u maasil máakoʼob ka jóokʼkoʼoboʼ. Baʼaleʼ tu chaʼaj u pʼáatal Pedro, Santiago, Juan, u taata yéetel u maama le chan x-chʼúupaloʼ. Jesús túuneʼ tu natsʼuba yéetel le cinco máakoʼob yiknal le chan x-chʼúupaloʼ. Ka tu machaj tu kʼabeʼ ka tu yaʼalajtiʼ: «Tálita kúmi», lelaʼ u kʼáat u yaʼal: «Chan x-chʼúupal, kin waʼaliktech: ‹¡Líikʼen!›» (Marcos 5:41). Tu séebaʼanileʼ líikʼeʼ ka káaj u xíimbal. Chéen máans ta tuukul bix tu yuʼubiluba Jairo yéetel u yatan ka tu yiloʼob. Tu yiloʼob jach tu jaajil u hijaʼobeʼ maʼ kimeniʼ, Jesús túuneʼ tu yaʼalajtiʼob ka u tsʼáaʼob baʼal u jaante.

Táanil tiʼ lelaʼ, Jesuseʼ ku yaʼalik tiʼ le máaxoʼob ku tsʼakik maʼ u tsikbaltikoʼob tiʼ mix máak le baʼax ku beetik tu yoʼolaloʼoboʼ, lelaʼ bey xan tu yaʼalil tiʼ Jairo yéetel u yatan. Baʼaleʼ tumen jach kiʼimak u yóoloʼobeʼ tu tsikbaltoʼob «tiʼ tuláakal le kaajoʼob yanoʼob naatsʼoʼ» (Mateo 9:26). Techeʼ, ¿maʼ wa ta tsikbaltik yéetel kiʼimak óolal wa ka wil u kaʼa kuxtal juntúul a láakʼtsil? Lelaʼ letiʼe u kaʼatúul máax kaʼa kuxkíintaʼak tumen Jesusoʼ.