Tiʼ junpʼéel u sinagogail Capernaumeʼ, Jesuseʼ joʼopʼ u kaʼansaj yoʼolal le kuxaʼan waaj éem teʼ kaʼanoʼ. Letiʼeʼ tu kʼaʼajsaj jujunpʼéel tiʼ le baʼaxoʼob tu yaʼalaj tiʼ le máakoʼob binoʼob tu laakʼin u kʼáaʼnáabil Galilea, le máaxoʼob jaant le waaj yéetel le kay tu tsʼáaj tiʼoboʼ.

Jesuseʼ seguernaj u yaʼalik: «A úuchben láakʼtsileʼexeʼ tu jaantoʼob le maná teʼ desiertooʼ, baʼaleʼ kíimoʼob». Baʼaleʼ letiʼeʼ tu yaʼalajtiʼob: «Teen le kuxaʼan waaj éem teʼ kaʼanoʼ, le máax kun jaantik le waajaʼ yaan u kuxtal mantatsʼ; tsʼoʼoleʼ le waaj ken in tsʼáaoʼ letiʼe in bakʼel ken in tsʼáa yoʼolal u kuxtal le yóokʼol kaaboʼ» (Juan 6:48-51).

Tu jaʼabil 30, Jesuseʼ tu yaʼalaj tiʼ Nicodemoeʼ, Dioseʼ jach tu yaabiltaj le yóokʼol kaabaʼ ka tu tsʼáaj u Hijo utiaʼal u salvartik. Bejlaʼeʼ Jesuseʼ táan u yaʼaliktiʼob ka u tsʼáa u fejoʼob tiʼ le u kuxtal ken u kʼuboʼ, lelaʼ bey ka u jaantoʼob u bakʼeleʼ. Chéen bey jeʼel u yantal kuxtal minaʼan u xuul tiʼoboʼ.

Baʼaleʼ le máakoʼoboʼ jelaʼan úuchik u yuʼubikoʼob le baʼax tu yaʼaloʼ. Letiʼobeʼ tu yaʼaloʼob: «Le máakaʼ, ¿bix jeʼel u páajtal u tsʼáaiktoʼon u bakʼel utiaʼal k-jaanteʼ?» (Juan 6:52). Le oʼolal Jesuseʼ tu tsolajtiʼob maʼ táan u yaʼalik wa jach yaan u jaantaʼal u bakʼeliʼ. Letiʼeʼ tu yaʼalajtiʼob baʼax u kʼáat u yaʼale.

«Wa maʼ ta jaantkeʼex u bakʼel u Paal máak yéetel wa maʼ ta wukʼikeʼex u kʼiʼikʼeleʼ, junpuliʼ minaʼanteʼex kuxtal. Le máax ku jaantik in bakʼel yéetel ku yukʼik in kʼiʼikʼeleʼ yaan u yantal kuxtal minaʼan u xuul tiʼ, yéetel teneʼ yaan in kaʼa kuxkíintik teʼ tu tsʼook kʼiinoʼ; tumen in bakʼeleʼ jach maʼalob utiaʼal jaantbil, yéetel in kʼiʼikʼeleʼ jach maʼalob utiaʼal ukʼbil. Le máax ku jaantik in bakʼel yéetel ku yukʼik in kʼiʼikʼeleʼ, yaan u pʼáatal tin wéetel.» (Juan 6:53-56.)

¡Chéen máans ta tuukul bukaʼaj kʼaasil úuchik u yuʼubik le judíoʼoboʼ! Letiʼobeʼ tu tukloʼobeʼ Jesuseʼ táan u yaʼaliktiʼob ka u jaantoʼob u yéet wíinikiloʼob wa ka u yukʼoʼob kʼiʼikʼ kex u Ley Dios ku yaʼalik maʼ u beetaʼal (Génesis 9:4; Levítico 17:10, 11). Baʼaleʼ Jesuseʼ maʼ táan u yaʼalik ka jaantaʼak u bakʼel yéetel ka ukʼaʼak u kʼiʼikʼeliʼ. Letiʼeʼ chéen táan u yaʼalik tiʼ tuláakal le máax u kʼáat kuxtal utiaʼal minaʼan u xuuleʼ unaj u tsʼáaik u fe tiʼ le u kuxtal ken u kʼuboʼ yéetel tiʼ le u kʼiʼikʼel ken u wekoʼ. Baʼaleʼ yaʼab tiʼ u disipuloʼobeʼ maʼ tu naʼatoʼobiʼ. Yanoʼobeʼ tu yaʼaloʼob: «Le kaʼansaj ku beetik le máakaʼ jach kʼaas u yuʼubaʼal, ¿máax jeʼel u páajtal u yuʼubikeʼ?» (Juan 6:60).

Tumen u yojel Jesús baʼax ku x-mukul aʼalikoʼobeʼ, tu yaʼalajtiʼob: «¿Ku beetik wa a tʼóochpajleʼex lelaʼ? ¿Kux túun wa ka a wileʼex u naʼakal u Paal máak teʼ tuʼux yaan kaʼachoʼ? U kiliʼich muukʼ Dioseʼ letiʼe baʼax ku tsʼáaik kuxtaloʼ, le bakʼoʼ mix baʼal u biilal. Le baʼaxoʼob tsʼoʼok in waʼalikteʼexoʼ tiʼ kiliʼich muukʼ u taaloʼob yéetel ku tsʼáaikoʼob kuxtal. Baʼaleʼ yaan jujuntúul tiʼ teʼexeʼ maʼ tu creertik» (Juan 6:61-64).

Jesús túuneʼ tu paktaj u doce apostoloʼobeʼ ka tu kʼáatajtiʼob: «Teʼexeʼ maʼ a kʼáateʼex bin xaniʼ, ¿máasaʼ?». Pedroeʼ tu núukaj: «Yuumtsil, ¿máax yiknal jeʼel k-bineʼ? Techeʼ ka kaʼansik baʼaloʼob ku bisik máak tiʼ kuxtal minaʼan u xuul; toʼon xaneʼ tsʼoʼok k-creertikech, yéetel tsʼoʼok k-kʼuchul ojéelteʼ, teech le j-Kiliʼich túuxtaʼan tumen Diosoʼ» (Juan 6:67-69). Lelaʼ ku yeʼesik jach ku kʼubik u yóol Pedro yéetel u maasil apostoloʼob tiʼ letiʼ, kex yaʼab tiʼ le baʼaxoʼob ku kaʼansik Jesús láayliʼ maʼ u jach naʼatoʼob kaʼachoʼ.

Jesuseʼ kiʼimakchaj u yóol yoʼolal le baʼax tu yaʼalaj Pedrooʼ, ka tu yaʼalajtiʼ: «Teen yéeyeʼex ta doceileʼex, ¿máasaʼ? Baʼaleʼ juntúul tiʼ teʼexeʼ bey  jeʼex le Kʼaasilbaʼaloʼ» (Juan 6:70). Jesuseʼ táan kaʼach u tʼaan tiʼ Judas Iscariote. Maʼ xaaneʼ desde teʼ kʼiin jeʼeloʼ Jesuseʼ tu tsʼáaj cuenta tsʼoʼok u káajal u kʼastal u tuukul Judas.

Baʼaleʼ Jesuseʼ jach kiʼimakchaj u yóol ka tu yilaj Pedro yéetel u maasil apostoloʼoboʼ u kʼáatoʼob pʼáatal tu yéetel utiaʼal u múul beetkoʼob le meyaj ku tsʼáaik salvacionoʼ.