Ka sáaschaj tuláakʼ kʼiin tsʼoʼokok u kaʼansaj Jesús teʼ puʼukoʼ joʼopʼ u bin tu kaajil Capernaum. Teʼeloʼ náatsʼ tu yiknal jujuntúul u nuuktakil le judíoʼoboʼ. Letiʼobeʼ túuxtaʼaboʼob tumen juntúul u nojchil u soldadoiloʼob Roma, letiʼeʼ ku nuʼuktik cien soldadoʼob.

U palitsil u nojchil le soldadoʼoboʼ jach táaj kʼojaʼan, taʼaytak u kíimil. Kex maʼ judío u nojchil le soldadoʼoboʼ tu túuxtaj kʼáatbil áantaj tiʼ Jesús. U nuuktakil le judíoʼoboʼ tu yaʼaloʼob tiʼ Jesuseʼ le máakoʼ táan u yaʼalik: «In palitsileʼ chilikbal tin najil tumen minaʼan u muukʼ u wíinklil, yéetel táan u sen muʼyaj» (Mateo 8:6). U nuuktakil le judíoʼob túunoʼ tu yaʼaloʼob tiʼ Jesús jach ku náajmatik u nojchil le soldadoʼob ka u yáantoʼ, tu yaʼaloʼob: «Tumen u yaabiltmaj le kaajaʼ yéetel letiʼ beet le sinagoga yaantoʼonoʼ» (Lucas 7:4, 5).

Tu séebaʼanileʼ Jesuseʼ káaj u bin yéetel u nuuktakil le judíoʼob tu yotoch le máakoʼ. Le táan u náatsʼloʼoboʼ, u nojchil le soldadoʼoboʼ tu túuxtaj aʼalbiltiʼ: «Yuumtsil, maʼ tsaaj ka kʼuchkechiʼ tumen maʼ in náajaltmaj ka ookkech tin wotochiʼ. Le oʼolal maʼ taalen ta wiknaliʼ» (Lucas 7:6, 7). Le baʼax tu beetoʼ ku yeʼesik kabal óolal, tumen letiʼeʼ suukaʼan u nuʼuktik u maasil. Tsʼoʼoleʼ ku yeʼesikeʼ letiʼeʼ maʼatech u tratartik kʼaas u palitsiloʼob, jeʼex u beetik u maasil romailoʼoboʼ (Mateo 8:9).

U nojchil le soldadoʼoboʼ u yojel le judíoʼoboʼ maʼatech u muchʼkuba yéetel le máaxoʼob maʼ judíoʼoboʼ (Baʼaxoʼob 10:28). Maʼ xaaneʼ le oʼolal tu túuxtaj u amigoʼob aʼalik tiʼ Jesús: «Aʼal ka utschajak in palitsil, letiʼ túuneʼ yaan u tojtal u yóol» (Lucas 7:7).

Jesuseʼ jaʼakʼ u yóol ka tu yuʼubaj, le oʼolal tu yaʼalaj: «Kin waʼalikteʼex: Mix tu luʼumil Israel in kaxt juntúul máak jach nojoch u fe jeʼex le máakaʼ» (Lucas 7:9). Ka suunajoʼob tu yotoch le u nojchil le soldadoʼoboʼ tu yiloʼobeʼ le palitsil jach kʼojaʼan kaʼachoʼ tsʼoʼok u yutstal.

Ka tsʼoʼok u tsʼakik le palitsiloʼ, Jesuseʼ tu yeʼesaj tak le máaxoʼob maʼ judíoʼob yaan u fejoʼoboʼ yaan u kʼamkoʼob yaʼab bendicionoʼob, tu yaʼalaj: «Yaan u taal yaʼab máakoʼob j-lakʼiniloʼob yéetel j-chikʼiniloʼobeʼ yéetel yaan u múul kutaloʼob janal yéetel Abrahán, Isaak yéetel Jacob teʼ tu Reinoil le kaʼanoʼ». Baʼaleʼ Jesuseʼ tu yaʼaleʼ le judíoʼob maʼatech u beetkoʼob baʼax uts tu tʼaan Diosoʼ «yaan u píikchʼintaʼaloʼob teʼ táankab tuʼux éeʼjochʼeʼenoʼ. Teʼeloʼ tiʼ kun okʼoloʼobiʼ yéetel tiʼ ken u karachʼt u kojoʼobiʼ» (Mateo 8:11, 12).

Bey túunoʼ maʼ kun kʼambil le jach judíoʼob yáax tsʼaʼabtiʼob u páajtalil u táakpajloʼob teʼ Reino yéetel Cristooʼ. Baʼaleʼ le maʼ judíoʼoboʼ yaan u kʼaʼamloʼob utiaʼal ka múul kulakoʼob «teʼ tu Reinoil le kaʼanoʼ».