Le ka suunaj Jesús teʼ Decápolisoʼ jach séebaʼan ojéeltaʼabik tumen le judíoʼob kajaʼanoʼob teʼ tu jáal u kʼáaʼnáabil Galileaoʼ. Maʼ xaaneʼ yaʼabeʼ tsʼoʼok u yojéeltikoʼob úuchik u beetaʼal u jéetsʼel le kʼaʼamkach iikʼ tumen Jesusoʼ yéetel u beetik u xuʼulul u woʼoltikuba le kʼáaʼnáaboʼ. Maʼ xaan xaneʼ yaan máaxoʼob tsʼoʼok u yojéeltikoʼob le úuchik u tsʼakik le máakoʼob okaʼan demonio tiʼoboʼ. Le oʼolal «yaʼabkach máakoʼob tu muchʼubaʼob tu yiknal» tu jáal le kʼáaʼnáaboʼ, maʼ xaaneʼ aktáan tiʼ Capernaum (Marcos 5:21). Le táan u xíimbal tu jáal le jaʼoʼ letiʼobeʼ jach taak u tʼaanoʼob tu yéetel.

Juntúul tiʼ le máaxoʼob taak u tʼaan yéetel Jesusoʼ, Jairo, letiʼeʼ u nojchil junpʼéel sinagoga, maʼ xaaneʼ letiʼe yaan tu kaajil Capernaumoʼ. Letiʼeʼ xolaj yiknal u yook Jesuseʼ ka joʼopʼ u sen aʼaliktiʼ: «In chan hijaeʼ jach táaj kʼojaʼan. Koʼox ka a tsʼáa a kʼab tu yóokʼol utiaʼal ka utsak yéetel maʼ u kíimil» (Marcos 5:23). ¿Baʼax tu beetaj Jesús ka tu yilaj bix u kʼáat óoltaʼal tiʼ tumen Jairo ka u yáant u juntúuliliʼ hija yaan 12 jaʼaboʼob tiʼoʼ? (Lucas 8:42).

Le táan u bin Jesús tu yotoch Jairooʼ úuch uláakʼ junpʼéel baʼal. Yaʼab tiʼ le máakoʼob ku binoʼob tu yéetel Jesusoʼ jach kiʼimak u yóoloʼob, tumen taak u yilkoʼob u beetik uláakʼ junpʼéel milagro. Baʼaleʼ juntúul koʼolel yaan ichil le máakoʼoboʼ joʼopʼ u tuklik bix jeʼel u yutstal tiʼ le talam kʼojaʼanil yaantiʼoʼ.

Le koʼolel judíaaʼ, tsʼoʼok doce jaʼaboʼob káajak u sen máan kʼiʼikʼ tiʼ. Letiʼeʼ tsʼoʼok u bin yiknal jejeláas doctoroʼob yéetel tsʼoʼok u xupik tuláakal u taakʼin tiʼ jejeláas tsʼaakoʼob ku yaʼalaʼaltiʼ ka u mane. Baʼaleʼ maʼ utschaji, baʼaxeʼ «maas kʼaschaj u kʼojaʼanil» (Marcos 5:26).

Jeʼex a wilkoʼ, le kʼojaʼanil yaantiʼoʼ maʼ chéen ku beetik u lúubul u muukʼiʼ, baʼaxeʼ junpʼéel kʼojaʼanil ku beetik u suʼlaktal. Maʼatech u jáan tsikbaltik tiʼ mix máak baʼax ku yúuchultiʼ. Tsʼoʼoleʼ u Ley Moiseseʼ ku yaʼalikeʼ juntúul koʼolel ku máan kʼiʼikʼ tiʼeʼ sucia tu táan Dios. Tsʼoʼoleʼ ken maʼachak letiʼ wa u nookʼ boonol yéetel le kʼiʼikʼoʼ ku pʼáatal máak sucioil tu táan Dios tak ken áakʼabchajak (Levítico 15:25-27).

Le koʼoleloʼ tu yuʼubaj «baʼaxoʼob ku yaʼalaʼal ku beetik Jesuseʼ» ka bin u yile. Yoʼolal le baʼax ku yaʼalik le Leyoʼ jujunpʼíitil úuchik u yokol ichil le máakoʼoboʼ, ka joʼopʼ u tuklik: «Wa ka in mach kex chéen u nookʼeʼ, jach jeʼel in wutstaleʼ». Le ka tu machaj u chiʼ u nookʼ Jesuseʼ tu séebaʼanil «tu yuʼubaj tsʼoʼok u yutstal le yaayaj kʼojaʼanil ku muʼyajtik kaʼachoʼ» (Marcos 5:27-29).

Jesuseʼ tu yaʼalaj: «¿Máax machen?». ¿Bix a tuklik tu yuʼubiluba le koʼolel ka tu yuʼubaj baʼax tu yaʼaloʼ? Pedroeʼ tu yaʼalajtiʼ: «Baʼpachtaʼanech tumen yaʼabkach máakoʼob yéetel táan u sen peʼepechʼkechoʼob». Le oʼolaleʼ, ¿baʼaxten túun tu yaʼalaj Jesús: «¿Máax machen?». Jesuseʼ tu yaʼalaj: «Yaan máax machen, tumen in wojel yaan páajtalil tsʼoʼok u jóokʼol tiʼ teen» (Lucas 8:45, 46). Jeʼex k-ilkoʼ u poder Jesús tsʼak le koʼoleloʼ.

Ka tu yilaj tsʼaʼab cuenta le baʼax tsʼoʼok u beetkoʼ, taal yiknal Jesuseʼ ka xolaj yiknal u yook táan u kikilankil. Ka tu yaʼalaj u jaajil tu táan tuláakal yoʼolal le kʼojaʼanil yaan kaʼach tiʼoʼ yéetel bix úuchik u yutstal. Jesús túuneʼ tu yaʼalajtiʼ: «Hija, tu yoʼolal a fejeʼ tsʼoʼok a wutstal, xeen yéetel jeetsʼelil, utschajkech tiʼ le yaayaj kʼojaʼanil yaantechoʼ» (Marcos 5:34).

Jeʼex túun k-ilkoʼ le máax yéeyaʼan tumen Dios utiaʼal u gobernar way Luʼumaʼ jach yaan u yaabilaj yéetel ku chʼaʼik óotsilil tiʼ le máakoʼoboʼ, tsʼoʼoleʼ yaan u páajtalil u yáantkoʼob.