XOOK 58
Ku yaʼabkuntik le waajoʼ yéetel ku tʼaan tiʼ levadura
MATEO 15:32–16:12 MARCOS 8:1-21
-
JESUSEʼ KU TSÉENTIK CUATRO MIL XIIBOʼOB
-
KU YAʼALIK KA U KANÁANTUBA MÁAK TIʼ U LEVADURA LE FARISEOʼOBOʼ
Yaʼabkach máakoʼobeʼ taaloʼob yiknal Jesús tu luʼumil Decápolis, tu chiikʼin u kʼáaʼnáabil Galilea. Taaloʼob u yuʼuboʼob u kaʼansaj yéetel utiaʼal ka tsʼaʼakakoʼob. Letiʼobeʼ u taasmoʼob nukuch xaakoʼob tuʼux ku tsʼaʼabal baʼal jaantbil.
Baʼaleʼ Jesuseʼ tu yaʼalaj tiʼ u disipuloʼob: «Kin chʼaʼik óotsilil tiʼ le yaʼabkach máakoʼobaʼ, tumen tsʼoʼok óoxpʼéel kʼiin pʼáatkoʼob tin wiknal yéetel minaʼan baʼal u jaantoʼob. Wa ka in túuxtoʼob tu yotochoʼob mix baʼal u jaantoʼobeʼ jeʼel u desmayaroʼob teʼ bejoʼ. Tsʼoʼoleʼ yaan tiʼ letiʼobeʼ jach náach u taaloʼob». Baʼaleʼ u disipuloʼobeʼ tu yaʼaloʼob: «Wayeʼ mix máak yaan, ¿tuʼux jeʼel u maʼanal waaj utiaʼal u láaj tséentaʼaloʼobeʼ?» (Marcos 8:2-4).
Jesuseʼ tu núukaj: «¿Jaypʼéel waaj yaanteʼex?». Letiʼobeʼ tu núukoʼob: «Siete yéetel wa jaytúul mejen kayoʼob» (Mateo 15:34). Jesús túuneʼ tu yaʼalaj tiʼ le máakoʼob ka kulakoʼob teʼ luʼumoʼ. Tu chʼaʼaj le siete waajoʼob yéetel le kayoʼoboʼ ka tu tsʼáaj gracias tiʼ Dios, ka tsʼoʼokeʼ tu tsʼáaj tiʼ u disipuloʼob utiaʼal ka u tʼoxoʼob tiʼ le máakoʼoboʼ. Tuláakloʼob láaj naʼajchajoʼob. Le u yalab molaʼaboʼ tsʼaʼaboʼob tiʼ siete nukuch xaakoʼob, tsʼoʼoleʼ le máaxoʼob jaanoʼoboʼ kex óoliʼ cuatro mil xiiboʼob, bey xan koʼoleloʼob yéetel paalaloʼob.
Ka tsʼoʼok u bin le máakoʼoboʼ, Jesús yéetel u disipuloʼobeʼ tu chʼaktoʼob u kʼáaʼnáabil Galilea utiaʼal u binoʼob Magadán. Teʼelaʼ le fariseoʼob yéetel jujuntúul saduceoʼoboʼ joʼopʼ u yaʼalikoʼob tiʼ Jesús ka u beet junpʼéel señal teʼ kaʼan utiaʼal u túuntkoʼob u yóoloʼ.
Tumen u yojel Jesús baʼax ku tuklikoʼobeʼ tu yaʼalajtiʼob: «Ken éeʼsameʼenchajkeʼ, teʼexeʼ suuk a waʼalikeʼex: ‹Yaan u beetik maʼalob kʼiin tumen chakjoleʼen u nakʼ kaʼan›; jaʼatskabeʼ ka waʼalikeʼex: ‹Bejlaʼeʼ yaan u kʼáaxal jaʼ yéetel yaan u beetik keʼel, tumen chakjoleʼen u nakʼ kaʼan baʼaleʼ nookoy xan›. A wojel a naʼateʼex u yich kaʼan, baʼaleʼ maʼ a wojel a naʼateʼex u chíikulaloʼob le kʼiinoʼoboʼ» (Mateo 16:2, 3). Ka tsʼoʼokeʼ Jesuseʼ tu yaʼalaj tiʼ le fariseoʼob yéetel le saduceoʼob chéen u señalil Jonás ken u tsʼáatiʼoboʼ.
Jesús yéetel u disipuloʼobeʼ naʼakoʼob teʼ barcooʼ ka binoʼob Betsaida, tu xaaman u kʼáaʼnáabil Galilea. Le táan u binoʼoboʼ kʼaʼaj tiʼ le disipuloʼob maʼ tu chʼaʼajoʼob waaj u bisoʼoboʼ. Chéen junpʼéel tu chʼaʼajoʼobiʼ. Yoʼolal le baʼax tu yaʼalaj Jesús tiʼ le fariseoʼob yéetel le saduceoʼoboʼ, tu yaʼalaj tiʼ u disipuloʼob: «Jach pʼil a wicheʼex mantatsʼ; kanáantabaʼex tiʼ u levadura le fariseoʼoboʼ bey xan tiʼ u levadura Herodes». Le oʼolal le disipuloʼoboʼ káaj u baʼateltʼaanoʼob tu baatsiloʼob tu yoʼolal le waaj maʼ tu bisoʼoboʼ. Ka tu yuʼubaj Jesús lelaʼ tu yaʼalajtiʼob: «¿Baʼaxten maʼ tu xuʼulul a waʼalikeʼex minaʼan waaj?» (Marcos 8:15-17).
Jesuseʼ maʼ sáam u yaʼabkúunt le waaj utiaʼal u jaant le yaʼabkach máakoʼoboʼ. Le oʼolal le disipuloʼoboʼ unaj u kʼaʼajaltiʼobeʼ maʼ chiʼichnak Jesús yoʼolal jach waajoʼobiʼ. Letiʼeʼ tu kʼáatajtiʼob: «¿Maʼ wa tu páajtal a wuʼuyikeʼex mix baʼal kex yaan Marcos 8:18-20).
a xikneʼex? [...] ¿Maʼ wa kʼajaʼanteʼex xan jaypʼéel xaakoʼob ta chupeʼex le ka tin xetʼaj le cinco waajoʼob utiaʼal le cinco mil xiiboʼobeʼ?». Letiʼobeʼ tu núukoʼob: «Doce». «Le ka tin xetʼaj le siete waajoʼob utiaʼal le cuatro mil xiiboʼobeʼ, ¿jaypʼéel xúuxakoʼob chuʼup ka ta moleʼex le u xéexetʼal pʼáatoʼ?». Letiʼobeʼ tu núukoʼob: «Siete» (Jesuseʼ tu kʼáatajtiʼob: «¿Baʼaxten maʼ ta naʼatkeʼex maʼ tiʼ waaj tʼaanajeniʼ? Baʼaxeʼ kanáantabaʼex tiʼ u levadura le fariseoʼob yéetel le saduceoʼoboʼ» (Mateo 16:11).
Chéen bey úuchik u naʼatik le disipuloʼoboʼ. Le levaduraoʼ ku meyaj utiaʼal u suʼutsʼtal u juuchʼil le waajoʼ. Jesuseʼ táan u ketik le u suʼutsʼtal le juuchʼ yéetel u kʼastal wa baʼaxoʼ. Bey túunoʼ táan u yaʼalik tiʼ u disipuloʼob ka u kanáantubaʼob «tiʼ u kaʼansaj le fariseoʼob yéetel le saduceoʼoboʼ», tumen ku beetkoʼob u kʼastal u tuukul máak (Mateo 16:12).