Tumen Jesús minaʼan u kʼebaneʼ, maʼ chiʼichnakchaj jeʼex u maasil máakoʼobeʼ. Kex beyoʼ jach tu chʼaʼaj óotsilil tiʼ le máakoʼoboʼ. Letiʼeʼ tu xupuba utiaʼal u yáantkoʼob, tu beetaj tak le ku tuklaʼal maʼ tu páajtal u beetik utiaʼal u yáantkoʼobeʼ. Péeksaʼab u yáant u maasil yoʼolal le chʼaʼ óotsilaloʼ. Tuukulnen tiʼ le baʼaxoʼob ku yaʼalik le xookoʼob 32, 37, 57, 99.

Le táankelmoʼob yéetel le nukuch máakoʼoboʼ tu yiloʼob jeʼel u páajtal u natsʼkubaʼob tu yiknal Jesuseʼ, tumen maʼ tu tsʼáaj naʼatbil wa minaʼan tiempo tiʼ utiaʼal u yáantik u maasiliʼ. Le máakoʼoboʼ ku natsʼkubaʼob tu yiknal yoʼolal le yaabilaj ku yeʼesikoʼ. Utiaʼal a wilik u maasil yoʼolal lelaʼ ilawil le xookoʼob 25, 27, 95.

Jesuseʼ mantatsʼ orarnaj tiʼ u Taata chéen tu juunal bey xan yéetel u maasil máaxoʼob adorartik Dios. Letiʼeʼ orarnaj yaʼab u téenel, maʼ chéen tu yorail ken janakiʼ. Orarnaj utiaʼal u tsʼáaik gracias tiʼ u Taata, utiaʼal u tsʼáaik nojbeʼenil tiʼ yéetel utiaʼal u kaxtik u nuʼuktaj táanil tiʼ u chʼaʼtuklik u beetik wa baʼax. Ilawil le baʼaxoʼob tu beetaj teʼ xookoʼob 24, 34, 91, 122, 123.

Yaan kʼiineʼ kex taak u jeʼelel kaʼacheʼ, Jesuseʼ tu tsʼáaj táanil u yutsil u maasil. Mix juntéen tu tsʼáaj táanil chéen u yutsil. Beyoʼ tu yeʼesaj baʼax unaj k-beetik xan toʼon. Xok le baʼaxoʼob tu beetaj teʼ xookoʼob 19, 41, 52.

Jesuseʼ tu kaʼansaj baʼax unaj k-beetik yoʼolal le bix úuchik u tratartik u disipuloʼob yéetel uláakʼ máakoʼoboʼ. Tuukulnen tiʼ le baʼax ku yaʼalik le xookoʼob 26, 40, 64, 85, 131.

Aʼalaʼabeʼ u maas yaʼabil le judíoʼoboʼ maʼ ken u kʼamoʼob le Mesíasoʼ yéetel yaan u kíimsaʼal tumen le máaxoʼob pʼekmiloʼ. Le oʼolal wa u kʼáat kaʼacheʼ, Jesuseʼ jeʼel u beetik chéen junpʼíit baʼal utiaʼal u yáantkoʼobeʼ. Baʼaleʼ letiʼeʼ tu tsʼáaj u yóol u yáant le máakoʼob u adorartoʼob Diosoʼ. Tu tsʼáaj u yóol meyaj utiaʼal u kaʼansik tiʼ u disipuloʼob maʼ unaj u sajaktaloʼob ken joʼopʼok u chʼaʼpachtaʼaloʼobiʼ. Ilawil le xookoʼob 16, 72, 103.

Jesuseʼ jach yaʼab baʼax u yojel yéetel yaan u naʼat, maʼ jeʼex u maasil máakoʼoboʼ. Tumen perfectoeʼ ku páajtal u beetik yéetel u yilik le baʼaxoʼob maʼ tu páajtal u beetaʼal tumen u maasil máakoʼoboʼ. Baʼaleʼ letiʼeʼ tu yeʼesaj kabal óolal mantatsʼ. Jeʼel u páajtal a wilik u maasil teʼ xookoʼob 10, 62, 66, 94, 116.

Jesuseʼ tu yeʼesaj paciencia tiʼ u apostoloʼob bey xan tiʼ uláakʼ máaxoʼob maʼ tu séeb beetoʼob le baʼaxoʼob tu kaʼansoʼ. Tu kaʼansaj yaʼab u téenel baʼax kʼaʼabéet u beetik máak utiaʼal u natsʼkuba tiʼ Jéeoba. Tuukulnen tiʼ le paciencia tu yeʼesaj Jesús teʼ xookoʼob 74, 98, 118, 135.