Ka lukʼ Jesús yéetel u disipuloʼob Galileaeʼ, tu chʼaktoʼob le Jordanoʼ ka binoʼob tu luʼumil Perea. Le u tsʼook ka taal Jesús Pereaoʼ tu yáax aʼalaj tiʼ le fariseoʼob bix u yilik Dios le divorciooʼ (Lucas 16:18). Beoraaʼ meyajnajtiʼob utiaʼal u túuntkoʼob u yóol Jesús.

U Ley Moiseseʼ ku yaʼalikeʼ jeʼel u páajtal u divorciarkuba máak tiʼ u yatan wa «maʼ uts tu tʼaan» baʼax ku beetkeʼ (Deuteronomio 24:1). Baʼaleʼ maʼ junpʼéeliliʼ baʼax ku tuklaʼal yoʼolal le baʼax oʼolal jeʼel u páajtal u divorciarkuba máakoʼ. Yanoʼobeʼ ku yaʼalikoʼobeʼ jach mejentak le baʼax oʼolal ku chaʼabal u divorciarkuba máakoʼ. Le oʼolal le fariseoʼoboʼ tu kʼáatoʼob: «¿Maʼalob wa ka u divorciartuba juntúul xiib tiʼ u yatan tu yoʼolal jeʼel baʼalakeʼ?» (Mateo 19:3).

Jesuseʼ maʼ tu yaʼalajtiʼob le baʼax ku tuklik chéen wíinikoʼ, baʼaxeʼ le bix u yilik Dios le tsʼoʼokol beeloʼ. Tu yaʼalajtiʼob: «¿Maʼ wa ta xokeʼexeʼ, le máax beet wíinik desde tu káajbaloʼ tu beetaj xiib yéetel x-chʼuup, yéetel tu yaʼalaj: ‹Tu yoʼolal lelaʼ, le xiiboʼ yaan u pʼatik u taata yéetel u maama utiaʼal u nupkuba yéetel u yatan, yéetel tu kaʼatúulaloʼobeʼ yaan u suutoʼob junpʼéeliliʼ wíinklil›? Bey túunoʼ maʼ kaʼatúuloʼobiʼ, baʼaxeʼ junpʼéeliliʼ wíinkliloʼob. Le oʼolaleʼ le baʼax tsʼoʼok u nuʼupul tumen Diosoʼ, mix máak unaj u jatsik» (Mateo 19:4-6). Ka tsʼoʼoksaʼab u beel Adán yéetel Eva tumen Dioseʼ maʼ tu yaʼalaj wa yaan u pʼatkubaʼobiʼ.

Le fariseoʼob túunoʼ tu yaʼaloʼob tiʼ Jesús: «¿Baʼaxten túun Moiseseʼ tu yaʼalaj ka tsʼaʼabak u juʼunil divorcio tiʼ le atantsil utiaʼal ka xiʼikoʼ?» (Mateo 19:7). Jesuseʼ tu núukajtiʼob: «Tumen chich a puksiʼikʼaleʼexeʼ, Moiseseʼ tu yaʼalaj jeʼel u páajtal a divorciarkabaʼex tiʼ a wataneʼexeʼ, baʼaleʼ tu káajbaleʼ maʼ bey kaʼachiʼ» (Mateo 19:8). Le u «káajbal» tu yaʼaloʼ maʼ táan u tʼaan tiʼ u kʼiiniloʼob Moisesiʼ, baʼaxeʼ táan u tʼaan le ka káajsaʼab le tsʼoʼokol beel tu jardinil Edenoʼ.

Ka tsʼoʼokeʼ Jesuseʼ tu yaʼalaj: «Teneʼ kin waʼalikteʼexeʼ jeʼel máaxak ka u divorciartuba tiʼ u yatan baʼaleʼ maʼ tu yoʼolal núupkʼeban [ich griegoeʼ pornéya], yéetel ku tsʼoʼokol u beel yéetel uláakʼ koʼoleleʼ, ku lúubul tiʼ adulterio» (Mateo 19:9). Chéen yoʼolal núupkʼeban jeʼel u páajtal u divorciarkuba máak tiʼ u núupeʼ.

Ka tu yuʼubaj le disipuloʼob lelaʼ tu yaʼaloʼob: «Wa bey unaj u beetik máak yéetel u yataneʼ, maas maʼalob túun maʼ u tsʼoʼokol u beel» (Mateo 19:10). Lelaʼ ku yeʼesikeʼ ken tsʼoʼokok u beel máakeʼ utiaʼal tuláakal u kʼiinil u kuxtal.

Ka tsʼoʼokeʼ Jesuseʼ tu yaʼaleʼ yaan máakoʼobeʼ maʼatech u tsʼoʼokol u beeloʼob tumen desde ken síijkoʼobeʼ yaan baʼax uchaʼan tiʼ u xiibiloʼob yéetel yanoʼobeʼ xotʼaʼan u xiibiloʼob. Baʼaleʼ yanoʼob xaneʼ tu juunaloʼob ku chʼaʼtuklik maʼ u tsʼoʼokol u beeloʼob, utiaʼal u tsʼáaikoʼob táanil le Reino ichil u kuxtaloʼoboʼ. Jesuseʼ tu yaʼalaj: «Le máax jeʼel u páajtal u beetik beyoʼ, ka u beete» (Mateo 19:12).

Beoraaʼ le máakoʼoboʼ joʼopʼ u taasik u mejen paalaloʼob yiknal Jesús. Baʼaleʼ le disipuloʼoboʼ joʼopʼ u kʼeykoʼob, tumen ku tuklikoʼobeʼ minaʼan tiempo tiʼ utiaʼal u yantal tu yéeteloʼob. Ka tu yilaj Jesús baʼax ku beetkoʼobeʼ kʼuuxilnajeʼ ka tu yaʼalajtiʼob: «Chaʼex u taal le mejen paalal tin wiknaloʼ; maʼ a kʼatikeʼex u beeloʼob, tumen u Reino Dioseʼ u tiaʼal máakoʼob jeʼex letiʼobeʼ. Tu jaajil kin waʼalikteʼex: Le máax maʼ tu kʼamik u Reino Dios jeʼex u beetik juntúul chan paaleʼ, junpuliʼ maʼ kun ookliʼ» (Marcos 10:14, 15; Lucas 18:15).

¿Máasaʼ jach maʼalob le baʼax tu kaʼansajtiʼoboʼ? Utiaʼal k-kʼamik u Reino Dioseʼ unaj k-eʼesik kabal óolal yéetel k-chaʼik k-kaʼansaʼal, jeʼex le mejen paalaloʼ. Jesuseʼ tu yeʼesaj u yaabiltmaj le mejen paalal le ka tu méekʼoʼob yéetel le ka tu bendecirtoʼoboʼ. Letiʼeʼ bey u yaabiltmil tuláakal le máaxoʼob «kʼamik u Reino Dios jeʼex u beetik juntúul chan paaleʼ» (Lucas 18:17).