Le ka tsʼoʼok u tsʼakik Jesús le máak kʼojaʼan tiʼ hidropesíaoʼ maʼ jáan lukʼ tu yotoch le fariseooʼ. Jesuseʼ tu yileʼ le máaxoʼob invitadoʼoboʼ ku kaxtikoʼob u maas maʼalobil tuʼux u kutaloʼob, le oʼolal tu kaʼansaj kʼaʼabéet u yeʼesik máak kabal óolal.

Tu yaʼalaj: «Ken u invitartech juntúul máak tiʼ u kʼiinbesajil junpʼéel tsʼoʼokol beeleʼ, maʼ a bin kutal tiʼ le maas maʼalob kúuchiloʼ, tumen maʼ xaaneʼ letiʼeʼ u invitartmaj xan juntúul máak maas kʼaj óolaʼan tiʼ teech; tsʼoʼoleʼ wa ku taal ta wiknal le máax invitarteʼexoʼ yéetel ku yaʼaliktech: ‹Líikʼen utiaʼal ka kulak le máakaʼ›, teech túuneʼ yéetel suʼlakil kan lukʼul teʼeloʼ utiaʼal ka xiʼikech teʼ kúuchil yaan maas paachiloʼ» (Lucas 14:8, 9).

Jesuseʼ seguernaj u yaʼalik: «Le ken invitartaʼakecheʼ xeen kutal teʼ kúuchil yaan maas paachiloʼ, tumen beyoʼ ken taalak le máax invitartechoʼ yaan u yaʼaliktech: ‹Amigo, máankech way táanileʼ›. Bey túunoʼ yaan a nojbaʼalkúuntaʼal tu táan tuláakal le máaxoʼob invitartaʼanoʼob xanoʼ». Lelaʼ maʼ chéen táan u yaʼalik ka u yeʼes máak jatsʼuts modosiʼ. Jesuseʼ tu yaʼalaj: «Tumen le máax ku nojbaʼalkúuntkubaeʼ yaan u mixbaʼalkúuntaʼal, baʼaleʼ le máax ku mixbaʼalkúuntkubaeʼ yaan u nojbaʼalkúuntaʼal» (Lucas 14:10, 11). Jach beyoʼ, letiʼeʼ táan u yaʼalik tiʼ le máakoʼob ka u yeʼesoʼob kabal óolaloʼ.

Ka tsʼoʼokeʼ Jesuseʼ tu yaʼalaj tiʼ le máax invitart cenaroʼ, baʼax unaj u beetik utiaʼal u kʼaʼamal tumen Dios le baʼax tu beetoʼ. Tu yaʼalajtiʼ: «Le ken a beet junpʼéel janal wa junpʼéel cenaeʼ, maʼ a invitartik a amigoʼob, a sukuʼunoʼob, a láakʼtsiloʼob mix le a vecinoʼob ayikʼaloʼoboʼ. Tumen maʼ xaaneʼ tuláakʼ kʼiineʼ letiʼobeʼ yaan xan u invitartikechoʼob, lelaʼ bey ka u boʼotoʼobtech le baʼax ta beetoʼ. Baʼaleʼ ken a beet junpʼéel kʼiinbesajeʼ invitart le óotsiloʼoboʼ, le móochoʼoboʼ bey xan le chʼóopoʼoboʼ; beyoʼ yaan u kiʼimaktal a wóol, tumen tiʼ letiʼobeʼ minaʼan u modoil u boʼotkoʼobtech» (Lucas 14:12-14).

Jesuseʼ maʼ táan u yaʼalik wa kʼaas u invitartik máak janal u amigoʼob, u láakʼtsiloʼob yéetel u vecinoʼobiʼ. Baʼaxeʼ táan u yaʼalikeʼ wa ku invitartik máak le óotsiloʼob, le móochoʼob yéetel le chʼóopoʼoboʼ maas jeʼel u kʼamik u bendición Dioseʼ. Jesuseʼ tu yaʼalaj tiʼ le máax invitartoʼ: «Yaan u boʼotaʼaltech le ken kaʼa kuxkíintaʼak le máaxoʼob toj u kuxtaloʼoboʼ». Uláakʼ juntúul máax invitartaʼaneʼ tu yaʼalaj: «Kiʼimak u yóol le máax kun jaantik waaj tu Reino Diosoʼ» (Lucas 14:15). Letiʼeʼ tu tsʼáaj cuentaeʼ leloʼ junpʼéel nojoch privilegio. Baʼaleʼ maʼ tuláakal bey u yilkiʼ, le oʼolal Jesuseʼ tu yaʼalaj junpʼéel kettʼaan.

Tu yaʼalaj: «Juntúul máakeʼ le ka tu beetaj junpʼéel nojoch cenaeʼ tu invitartaj yaʼab máakoʼob. [...] Tu túuxtaj u palitsil u yaʼal tiʼ le máaxoʼob invitartaʼanoʼoboʼ: ‹Koʼoteneʼex tumen tsʼoʼok u listokíintaʼal tuláakal le baʼaloʼoboʼ›. Baʼaleʼ cada juntúul tiʼ letiʼobeʼ káaj u kaxtik baʼal u yaʼaloʼob utiaʼal maʼ u binoʼobiʼ. Le yáaxoʼ tu yaʼalajtiʼ: ‹Tin manaj junpʼéel kool yéetel kʼaʼabéet in bin in wile; kin kʼáatiktech ka a disculparten›. Uláakʼeʼ tu yaʼalaj xan: ‹Tin manaj diez wakaxoʼob utiaʼal u bukʼlaʼal luʼum yéetel kʼaʼabéet in bin in wil wa maʼalob u meyajoʼob; kin kʼáatiktech ka a disculparten›. Uláakʼeʼ tu yaʼalaj xan: ‹Táant u tsʼoʼokol in beeleʼ, le oʼolal maʼ tu páajtal in bin›» (Lucas 14:16-20).

¿Máasaʼ chíikaʼan maʼ jaaj le baʼaxoʼob tu yaʼaloʼoboʼ? Tumen táanil tiʼ u manik máak junpʼéel terrenoeʼ kun bin u yile, le oʼolal maʼ jach kʼaʼabéet u bin u yil ken tsʼoʼokok u manikiʼ. Le u yóoxtúul máakoʼ maʼ táan u líiʼskuba utiaʼal u tsʼoʼokol u beeliʼ, baʼaxeʼ tsʼokaʼan u tsʼoʼokol u beel. Le oʼolal jeʼel u páajtal kaʼach u bin le ka invitartaʼaboʼ.  Le ka tu yuʼubaj le tsʼuul le baʼaxoʼob tu yaʼaloʼoboʼ, jach kʼuuxilnajeʼ ka tu tʼanaj u palitsil.

Ka tu yaʼalajtiʼ: «Xeen tu séebaʼanil teʼ noj bejoʼoboʼ bey xan tu nuʼunutʼ bejiloʼob le kaajoʼ ka a taas le óotsiloʼoboʼ, le chʼóopoʼoboʼ bey xan le móochoʼoboʼ». Ka tsʼoʼok u invitartaʼaloʼob tumen le palitsiloʼ láayliʼ yaan lugar pʼaatleʼ. Ka aʼalaʼabtiʼ tumen le tsʼuuloʼ: «Xeen teʼ bejoʼoboʼ bey xan teʼ tuʼuxoʼob maʼ yaʼab u máan máakoʼ, yéetel beet u yookloʼob utiaʼal ka chuʼupuk in wotoch. Tumen kin waʼalikteʼex: Tiʼ le xiiboʼob tin yáax invitartoʼ mix juntúul ken u túunt le cena tin beetoʼ» (Lucas 14:21-24).

Le baʼax tu yaʼalaj Jesusoʼ ku yeʼesikeʼ Jéeobaeʼ u túuxmaj Jesucristo utiaʼal u invitart le máakoʼob utiaʼal ka ookkoʼob tu Reinoil le kaʼanoʼ. Le yáax invitartaʼaboʼoboʼ letiʼe u nuuktakil le judíoʼoboʼ. Baʼaleʼ letiʼobeʼ maʼ tu kʼamoʼob le invitación teʼ kʼiinoʼob táan u kʼaʼaytaj Jesusoʼ. Baʼaleʼ yaan uláakʼ máakoʼob invitartaʼaboʼob. Jesuseʼ tu yaʼaleʼ yaan u invitartaʼal xan u maasil judíoʼob kabal u yóoloʼoboʼ bey xan u maasil máakoʼob u kʼammaj u religión le judíoʼoboʼ. Baʼaleʼ u yóox jaats wa u tsʼook jaats kun invitartbiloʼoboʼ letiʼe máaxoʼob ku tuklaʼal tumen le judíoʼob maʼ kʼamaʼanoʼob tumen Diosoʼ (Baʼaxoʼob 10:28-48).

Jach beyoʼ, le baʼaxoʼob tu yaʼalaj Jesusoʼ ku yeʼesik jach jaaj le baʼax tu yaʼalaj le máak invitartaʼan xan cenar yéetel Jesusoʼ, tu yaʼalaj: «Kiʼimak u yóol le máax kun jaantik waaj tu Reino Diosoʼ».