Ka kʼuch Jesús yiknal Marta yéetel María naatsʼ tiʼ u kaajil Betaniaeʼ, bin tu yéeteloʼob teʼ tuʼux tsʼaʼab Lázarooʼ. Lelaʼ junpʼéel sajkab makaʼan yéetel junpʼéel tuunich. Jesuseʼ tu yaʼalaj: «Luʼseʼex le tuunichoʼ». Martaeʼ tu yaʼalaj, tumen maʼ tu naʼatik le baʼax ken u beet Jesusoʼ: «Yuumtsil, míin tsʼoʼok u káajal u yantal u book, tumen tsʼoʼok kanpʼéel kʼiin muʼukuk». Baʼaleʼ Jesuseʼ tu yaʼalajtiʼ: «¿Maʼ wa tin waʼalajtecheʼ, wa yaantech fejeʼ yaan a wilik u nojbeʼenil Dios?» (Juan 11:39, 40).

Ka luʼsaʼab le tuunich tu jool le sajkaboʼ. Jesuseʼ tu líiʼsaj u yicheʼ ka orarnaji, tu yaʼalaj: «In Yuum, kin tsʼáaiktech gracias tumen tsʼoʼok a wuʼuyik in oración. U jaajileʼ, teneʼ in wojel mantatsʼ ka wuʼuyik in oracionoʼob; baʼaleʼ lelaʼ tin waʼalaj yoʼolal le yaʼabkach máakoʼob waʼalakbaloʼob tin baʼpachaʼ,  utiaʼal ka u creertoʼob teech túuxtmilen». Le úuchik u orar Jesús tu táan le máakoʼoboʼ tu yeʼesajtiʼob le baʼax ken u beetoʼ yaan u béeytal chéen yoʼolal u poder Dios. Ka tsʼoʼokeʼ Jesuseʼ tu kʼaʼam aʼalaj: «¡Lázaro, jóokʼen!». Ka jóokʼeʼ bakʼaʼan u kʼaboʼob bey xan u yookoʼob yéetel nookʼ, tsʼoʼoleʼ pixaʼan u yich yéetel junxéetʼ nookʼ. Jesuseʼ tu yaʼalaj: «Luʼseʼex le nookʼoʼob bakʼaʼantiʼoʼ, ka a chaʼex u bin» (Juan 11:41-44).

Yaʼab judíoʼob taaljaʼanoʼob u líiʼsoʼob u yóol María yéetel Martaeʼ tu yiloʼob le milagrooʼ ka tu tsʼáaj u fejoʼob tiʼ Jesús. Baʼaleʼ yanoʼobeʼ binoʼob u yaʼaloʼob tiʼ le fariseoʼob le baʼax tu beetaj Jesusoʼ. Le fariseoʼob yéetel u nuuktakil le sacerdoteʼoboʼ tu muchʼubaʼob teʼ Sanedrinoʼ. Ichiloʼobeʼ tiaʼan Caifás, u nojchil le sacerdoteʼoboʼ. Ka joʼopʼ u yaʼalikoʼob: «¿Baʼax ken k-beete?, tumen le máakaʼ yaʼab milagroʼob ku beetik. Wa k-pʼatik chéen beyoʼ, tuláakal máak ken u tsʼáa u fe tiʼ letiʼ; le romanoʼob túunoʼ yaan u taaloʼob yéetel yaan u luʼskoʼobtoʼon le páajtalil yaantoʼon yóokʼol le templooʼ bey xan yóokʼol le kaajaʼ» (Juan 11:47, 48). Kex tsʼoʼok u yuʼubikoʼob u yaʼalaʼal «yaʼab milagroʼob ku beetik» Jesús yéetel u yáantaj Dioseʼ, maʼ kiʼimakchaj u yóoloʼobiʼ. Letiʼobeʼ maas chiʼichnakoʼob yoʼolal le puesto yéetel le autoridad yaantiʼoboʼ.

Le úuchik u kaʼa kuxkíintaʼal Lázarooʼ, bey junpʼéel jaatsʼ tsʼaʼab tiʼ le saduceoʼoboʼ, tumen letiʼobeʼ maʼatech u creertikoʼob le kaʼa kuxtaloʼ. Caifás, juntúul tiʼ le saduceoʼoboʼ, tu yaʼalaj: «Teʼexeʼ maʼ a wojleʼex mix baʼaliʼ, yéetel maʼ ta naʼatkeʼexeʼ maas maʼalob a tiaʼaleʼex ka kíimik juntúul máak yoʼolal le kaajaʼ ke ka xuʼulsaʼak tiʼ tuláakal le kaajaʼ» (Juan 11:49, 50; Baʼaxoʼob 5:17; 23:8).

Yoʼolal le puesto yaan tiʼ Caifasoʼ, Dioseʼ tu beetaj u yaʼalik lelaʼ, maʼ «chéen tu juunal u yóol» tu yaʼaliʼ. Caifaseʼ tu tukleʼ kʼaʼabéet u kíimsaʼal Jesús utiaʼal maʼ u luʼsaʼal le autoridad yéetel le puesto yaan tiʼ u nuuktakil le judíoʼoboʼ. Baʼaleʼ le baʼax tu yaʼalaj Caifasoʼ ku yeʼesikeʼ ken kíimik Jesuseʼ yaan u tsʼáaik junpʼéel boʼol maʼ chéen tiʼ le judíoʼoboʼ, baʼaxeʼ tak tiʼ u maasil «u paalaloʼob Dios kʼiʼitpajaʼanoʼoboʼ» (Juan 11:51, 52).

Caifaseʼ tu yoksaj tu tuukul tuláakal le máaxoʼob yanoʼob teʼ Sanedrín ka u kíimsoʼob Jesusoʼ. ¿Tiaʼan wa ta tʼaan Nicodemo, le máax ku respetartik Jesús, le ka joʼopʼ u tuklikoʼob u kíimskoʼoboʼ? Kex wa tiaʼan ichiloʼobeʼ, Jesuseʼ lukʼ Jerusalén, beyoʼ maʼ kíimsaʼab táanil tiʼ u kʼuchul le kʼiin aʼalaʼan tumen Diosoʼ.