Maʼ xaaneʼ u kettʼaanil le paal tu xuʼuxupaj u taakʼin tu yaʼalaj Jesusoʼ tu líiʼsaj u yóol le máaxoʼob cobrartik impuestoʼoboʼ. Le fariseoʼob yéetel le escribaʼoboʼ maʼ xaaneʼ taakchaj u perdonartikoʼob le máaxoʼob kʼebanchajaʼanoʼoboʼ (Lucas 15:1-7, 11). Beoraaʼ Jesuseʼ tu tʼanaj u disipuloʼobeʼ ka tu tsikbaltajtiʼob junpʼéel kettʼaan, lelaʼ ku tʼaan tiʼ juntúul máak ayikʼal tu yojéeltaj yaan baʼax maʼ maʼalob ku beetik le máax u tsʼaamaj kanáantik le baʼaxoʼob yaantiʼoʼ.

Jesuseʼ tu yaʼaleʼ tsʼoʼok u taʼakal u pool le j-kanan ayikʼaliloʼ, tumen maʼ maʼalob bix u tratartik u j-meyajoʼob le tsʼuuloʼ. Le j-kanan ayikʼaliloʼ tu kʼáataj: «¿Baʼax túun ken in beet bey tumen in tsʼuulil yaan u luʼsikten in meyajtik le baʼaxoʼob yaantiʼoʼ? Minaʼanten u muukʼil utiaʼal in páanik luʼum, tsʼoʼoleʼ suʼlaken in kʼáat caridad». Le oʼolal tu yaʼalaj: «In wojel baʼax ken in beete, beyoʼ ken luʼsaʼakten le meyajoʼ, yaan u yantal máaxoʼob jeʼel u kʼamkenoʼob tu yotochoʼobeʼ». Letiʼeʼ tu tʼanaj le máaxoʼob pʼaaxnajaʼanoʼoboʼ ka tu yaʼalajtiʼob: «¿Bukaʼaj a pʼaxmaj tiʼ in tsʼuulil?» (Lucas 16:3-5).

Le yáaxoʼ tu núukaj: «Dos mil doscientos litros u aceiteil oliva». Maʼ xaaneʼ le máakaʼ yaʼab u paakʼalil oliva yaantiʼ wa juntúul máax ku konik oliva. Le j-kanan ayikʼaliloʼ tu yaʼalajtiʼ: «Chʼaʼ tu kaʼatéen le u juʼunil a pʼaaxoʼ yéetel kulen a jáan tsʼíibt mil cien litrosiʼ» (Lucas 16:6).

Ka tsʼoʼokeʼ tu kʼáataj tiʼ uláakʼoʼ: «Kux túun teech, ¿bajux a pʼaxmaj?». Letiʼeʼ tu núukaj: «Cien costaloʼob trigo». Lelaʼ u kʼáat u yaʼaleʼ 22 mil kilos trigo. Le j-kanan ayikʼaliloʼ tu yaʼalaj xan tiʼ: «Chʼaʼ tu kaʼatéen le u juʼunil a pʼaaxoʼ, ka a tsʼíibt ochenta costaloʼobiʼ». Letiʼeʼ tu perdonartaj junjaats le u pʼaax xan le máakoʼ (Lucas 16:7).

Le j-kanan ayikʼaliloʼ láayliʼ letiʼ kanáantik le baʼaxoʼob yaantiʼ u tsʼuuliloʼ, le oʼolal yaan u páajtalil u junpʼíitkuntik u pʼaaxoʼob. Le j-kanan ayikʼaliloʼ tu beetuba amigoil tiʼ letiʼob úuchik u junpʼíitkuntik u pʼaaxoʼoboʼ, beyoʼ jeʼel u beetaʼal uts tiʼ ken luʼsaʼak meyajtiʼeʼ.

Ka máan kʼiineʼ le tsʼuuloʼ tu yojéeltaj le baʼax úuchoʼ. Kex tu peʼertaj u taakʼineʼ kiʼimakchaj u yóol yoʼolal le baʼax tu beetaj le máax u tsʼaamaj u kanáant le baʼaxoʼob yaantiʼoʼ, «tumen kex kʼasaʼan máakeʼ tu yeʼesaj jach yaan u naʼat». Jesús túuneʼ tu yaʼalaj: «U paalal le yóokʼol kaabaʼ yoʼolal bix u tratartikoʼob u yéet kʼiiniloʼobeʼ ku chíikpajal maas yaan u naʼatoʼob ke u paalaloʼob le sáasiloʼ» (Lucas 16:8).

Letiʼeʼ maʼ táan u yaʼalik wa maʼalob le baʼax tu beetaj le j-kanan ayikʼaliloʼ. ¿Baʼax túun tu yóotaj u yaʼale? Letiʼeʼ tu yaʼalaj tiʼ u disipuloʼob: «Meyajnakteʼex le ayikʼaliloʼob yaan teʼ yóokʼol kaab utiaʼal a beetkeʼex amigoʼoboʼ, beyoʼ ken pʼáatak minaʼanteʼex le ayikʼaliloʼobaʼ, ka kʼaʼamkeʼex teʼ kúuchiloʼob mix bikʼin kun xuʼulultiʼoboʼ» (Lucas 16:9). Jeʼex k-ilkoʼ, letiʼeʼ táan u kaʼansik ka yanak u naʼat máak yéetel ka meyajnaktiʼ tubeel. Le máaxoʼob meyajtik Dios wa «u paalaloʼob le sáasiloʼ», kʼaʼabéet u meyajtiʼob tubeel u taakʼinoʼob  le táan u páaʼtkoʼob le kuxtal minaʼan u xuuloʼ.

Chéen Jéeoba Dios yéetel u Hijo jeʼel u páajtal u kʼamkoʼob máak reinar teʼ kaʼanoʼ wa ka kuxlak máak teʼ Paraíso yáanal u nuʼuktaj le Reinooʼ. Le oʼolal utiaʼal k-amigotikoʼobeʼ, unaj u meyajtoʼon u ayikʼaliloʼob le yóokʼol kaab utiaʼal u maas yaʼabtal le baʼaxoʼob yaan tiʼ le Reinooʼ. Beyoʼ ken xuʼuluk u meyaj le plata, le oro wa u maasil ayikʼaliloʼoboʼ, toʼoneʼ yaan u seguer k-kuxtal utiaʼal mantatsʼ.

Jesuseʼ tu yaʼaleʼ le máaxoʼob u yojel u kanáant u taakʼinoʼob yéetel uláakʼ baʼaxoʼob yaantiʼoboʼ yaan u tsʼaʼabal u kanáantoʼob junpʼéel baʼax maas maʼalob. Tu yaʼalaj: «Le oʼolaleʼ wa teʼex maʼ ta weʼeskeʼex chúukaʼan a wóoleʼex tiʼ le ayikʼaliloʼob yaan teʼ yóokʼol kaabaʼ, ¿máax túun kun kʼubéentikteʼex le maas maʼalob ayikʼaliloʼob [wa le baʼaxoʼob yaan tiʼ le Reinooʼ]?» (Lucas 16:11).

Jesuseʼ tu beetaj u tuklik u disipuloʼob wa yaan u kʼaʼamloʼob «teʼ kúuchiloʼob mix bikʼin kun xuʼulultiʼoboʼ». Maʼ tu páajtal u meyajtik máak Dios yéetel u chʼíikil tu paach u ayikʼaliloʼob le yóokʼol kaabaʼ. Jesuseʼ ku yaʼalik: «Mix juntúul j-kʼoos ku páajtal u meyajtik kaʼatúul tsʼuuloʼob bey palitsileʼ, tumen yaan u pʼektik le juntúuloʼ yéetel yaan u yaabiltik le uláakʼ juntúuloʼ, wa yaan u suuktal yiknal juntúuliʼ yéetel yaan u náachtal tiʼ le uláakʼ juntúuloʼ. Le oʼolaleʼ maʼ tu páajtal a beetkabaʼex palitsil tiʼ Dios bey xan palitsil tiʼ le ayikʼaliloʼoboʼ» (Lucas 16:9, 13).