Utiaʼal maʼ u kíimsaʼal Jesús jeʼex u tuklik le máakoʼob yanoʼob teʼ Sanedrinoʼ, bin tu kaajil Efraín, tu xaman-lakʼin Jerusalén. Teʼeloʼ tiʼ pʼáat yéetel u disipuloʼobiʼ, náach tiʼ le máaxoʼob pʼekmiloʼ (Juan 11:54). Baʼaleʼ tsʼoʼok u náatsʼal u kʼiinil le Pascua tiʼ u jaʼabil 33, le oʼolal maʼ kun xáantal ken kaʼa xiʼikiʼ. Letiʼeʼ bin maas xaman, tu yáamil Samaria yéetel Galilea, lelaʼ letiʼe u tsʼook úuchik u bin táanil tiʼ u kíimsaʼaloʼ.

Letiʼeʼ joʼopʼ u bin kajalkaaj, teʼ bejoʼ tu yilaj diez máakoʼob yaan lepra tiʼob. Le kʼojaʼanilaʼ jeʼel u beetik tak u peʼertik u yaal u kʼab, u yaal u yook wa u xikin máakeʼ (Números 12:10-12). U Ley Dioseʼ ku yaʼalikeʼ juntúul leprosoeʼ unaj u yaʼalik kʼojaʼan, le oʼolal maʼ tu páajtal u náatsʼal máak tu yiknal, tsʼoʼoleʼ unaj u náachkuntkuba tiʼ u maasil (Levítico 13:45, 46).

Le oʼolal le diez leprosoʼoboʼ waʼalajoʼob náach tiʼ Jesús. Ka joʼopʼ u kʼaʼam aʼalikoʼob: «¡Jesús, j-Kaʼansaj, chʼaʼtoʼon óotsilil!». Ka tu yilaj le leprosoʼoboʼ, tu yaʼalajtiʼob: «Xeeneʼex ka a weʼesabaʼex tiʼ le sacerdoteʼoboʼ» (Lucas 17:13, 14). Letiʼeʼ tu beetaj le baʼax ku yaʼalik u Ley Diosoʼ, tumen letiʼe sacerdoteʼob unaj u yaʼalikoʼob wa tsʼoʼok u yutstal le máaxoʼob yaan lepra tiʼoboʼ. Wa tsʼoʼok u yutstaloʼobeʼ jeʼel u páajtal u pʼáatloʼob ichil u maasil máakoʼobeʼ (Levítico 13:9-17).

Le diez leprosoʼobaʼ tu creertoʼob jeʼel u páajtal u tsʼaʼakaloʼob tumen Jesuseʼ. Letiʼobeʼ joʼopʼ u binoʼob yiknal le sacerdoteʼob kex maʼ utschajkoʼoboʼ. Le táan u binoʼoboʼ, utschajoʼob yoʼolal le fe tu yeʼesoʼob tiʼ Jesusoʼ. Ka joʼopʼ u paktikubaʼobeʼ, tu yiloʼob yéetel tu yuʼuboʼob tsʼoʼok u yutstaloʼob.

Nueve tiʼ letiʼobeʼ seguernaj u binoʼob. Baʼaleʼ juntúuleʼ suunaj u yil Jesús. Letiʼeʼ juntúul samaritano. ¿Baʼaxten suunaji? Utiaʼal u tsʼáaik u diosboʼotikil tiʼ úuchik u tsʼaʼakal. Ka suunaj le máak yaan lepra kaʼach tiʼoʼ «táan u kiʼikiʼtʼantik Dios jach kʼaʼam», tumen u yojel Dios beet u yutstal (Lucas 17:15). Ka kʼuch yiknal Jesuseʼ ka xolaj yiknal u yookeʼ ka tu tsʼáaj u diosboʼotikil tiʼ.

Jesuseʼ tu yaʼalajtiʼ: «Tu diezil tsʼaʼakoʼob, ¿máasaʼ? ¿Tuʼux túun tsʼoʼok le uláakʼ nueve máakoʼoboʼ? ¿Chéen wa le máak táanxel luʼumil suunaj u tsʼáa nojbeʼenil tiʼ Diosaʼ?». Jesús túuneʼ tu yaʼalaj tiʼ le samaritanooʼ: «Líikʼen ka xiʼikech; a fejeʼ tsʼoʼok u beetik a wutstal» (Lucas 17:17-19).

Le úuchik u tsʼakik Jesús le diez leprosoʼoboʼ ku yeʼesik táan u yáantaʼal tumen Jéeoba Dios. Beoraaʼ juntúul tiʼ letiʼobeʼ maʼ chéen utschajiʼ, baʼaxeʼ maʼ xaaneʼ yaan u yantal kuxtal minaʼan u xuul tiʼ. Kex bejlaʼa maʼatech u beetik milagroʼob Jesuseʼ, yoʼolal le fe k-tsʼáaiktiʼoʼ jeʼel xan u yantaltoʼon kuxtal minaʼan u xuuleʼ. ¿K-eʼesik wa k-tsʼáaik u diosboʼotik xan jeʼex le samaritano tsʼaʼakoʼ?