YAAN máakoʼobeʼ ku yaʼalikoʼobeʼ chéen ku creertikoʼob le baʼax ku yilkoʼoboʼ, baʼaleʼ maʼ maʼalob le bix u tuukuloʼobaʼ. Yaʼab baʼaloʼob maʼ tu páajtal k-ilkoʼobeʼ k-ojel jach yaan. ¿Máakalmáakoʼobiʼ?...

² ¿Ka wuʼuyik wa u saltikech le iikʼoʼ?... Líiʼs a kʼab, beoraaʼ uste. ¿Baʼax ka wuʼuyik?... Beyoʼ, letiʼ le iikʼoʼ, baʼaleʼ ¿máasaʼ maʼ tu páajtal k-ilik?...

³ Teʼ xookoʼob tsʼoʼok k-ilkoʼ t-ilaj yaan espirituʼob maʼ tu páajtal k-ilkoʼob. T-kaneʼ yanoʼobeʼ utsoʼob yéetel yanoʼobeʼ kʼasaʼanoʼob. ¿Jeʼel wa u páajtal a waʼalik u kʼaabaʼ le espirituʼob utsoʼoboʼ?... Beyoʼ, ichiloʼobeʼ tiʼ yaan Jéeobaiʼ, Jesús yéetel uláakʼ utsul angeloʼob. A tuklikeʼ, ¿yaan wa xan kʼasaʼan angeloʼob?... Le Bibliaoʼ ku yaʼalikeʼ yaan. ¿Kʼajaʼantech wa baʼax ta kanaj tiʼ letiʼob?...

⁴ K-ojleʼ le angeloʼob utsoʼob bey xan le kʼasaʼanoʼoboʼ maas yaan u páajtaliloʼob tiʼ toʼon. Jesús, le Maʼalob j-Kaʼansajoʼ, yaan baʼax u yojel yoʼolal le angeloʼoboʼ tumen táanil tiʼ u taal way Luʼumeʼ letiʼeʼ juntúul ángel xan kaʼachi. Kajlaj yéetel u millonesil angeloʼob teʼ kaʼanoʼ. ¿Tuláakal wa le angeloʼob yaan u kʼaabaʼoboʼ?...

⁵ T-kaneʼ Dioseʼ tu tsʼáaj u kʼaabaʼ le estrellaʼoboʼ. Le oʼolal jeʼel u páajtal k-aʼalikeʼ tak le angeloʼob yaan u kʼaabaʼoboʼ. Tsʼoʼoleʼ k-ojleʼ ku tsikbaloʼob tumen le Bibliaoʼ ku tʼaan tiʼ le ‹idioma ku tʼanik le angeloʼoboʼ› (1 Corintoiloʼob 13:1). ¿Baʼax ta tʼaan ku tsikbaltikoʼob? ¿Ku tʼaanoʼob wa ta tʼaan tiʼ le máaxoʼob kajakbaloʼob way Luʼumaʼ?...

 ⁶ T-ileʼ u angeloʼob Satanaseʼ maʼ u kʼáatoʼob ka k-beet baʼax ku yaʼalik Jéeobaiʼ. Le oʼolal maʼ xaaneʼ ku tsikbaltikoʼob bix ken u beetoʼob. U kʼáatoʼob ka k-beetba jeʼex letiʼoboʼ utiaʼal maʼ k-beetik baʼax uts tu tʼaan Jéeoba. ¿Kux túun le angeloʼob utsoʼoboʼ? ¿Ku tʼaanoʼob wa ta tʼaan tiʼ toʼon?... Ku tʼaanoʼob, tumen u kʼáat u yáantoʼonoʼob. Paʼatik in tsikbaltiktech bix úuchik u yáantkoʼob jujuntúul máaxoʼob meyajt Jéeoba úuchjeakil.

⁷ Juntúul tiʼ letiʼobeʼ Daniel, letiʼeʼ tiʼ kajaʼan kaʼach Babiloniaeʼ. Teʼ kaaj jeʼeloʼ maʼ yaʼab kaʼach máaxoʼob meyajtik Jéeobaiʼ. Letiʼobeʼ tu beetoʼob tak junpʼéel ley ku yaʼalik unaj u castigartaʼal le máaxoʼob ku oraroʼob tiʼ Jéeobaoʼ. Baʼaleʼ Danieleʼ maʼ tu xulaj u orariʼ. ¿A wojel wa baʼax tu beetoʼobtiʼ?...

⁸ Junjaats kʼasaʼan máakoʼobeʼ tu beetoʼob u puʼulul Daniel ichil u saajkab leonoʼob. Danieleʼ tu juunal yanil ichil le tsʼíitsʼik baʼalcheʼob  wiʼijtakoʼoboʼ. ¿Baʼax túun úuchtiʼ?... Letiʼeʼ ku yaʼalik: «[Dioseʼ] tu túuxtaj u ángel, letiʼeʼ tu nupʼaj u chiʼ le leonoʼob[oʼ]». ¡Maʼ beetaʼab loob tiʼiʼ! Le angeloʼoboʼ jeʼel u páajtal u yáantkoʼob le máaxoʼob meyajtik Jéeobaoʼ (Daniel 6:18-22).

⁹ Juntéenjeakileʼ kʼaʼal cárcel Pedro, juntúul u amigo Jesús. Yaan tiʼ le máakoʼoboʼ kʼuuxilnajoʼob ka tu yuʼuboʼob u yaʼalaʼal tumen Pedro, Jesuseʼ u Hijo Dios. Le oʼolal kʼaʼal cárcel yéetel tsʼaʼab soldadoʼob kanáantik utiaʼal maʼ u púutsʼul. ¿Yaan wa máax jeʼel u páajtal u yáantikeʼ?...

¹⁰ Pedroeʼ táan kaʼach u wenel chúumuk tiʼ le soldadoʼoboʼ yéetel kʼaxaʼan u kʼab yéetel cadenaʼob. Baʼaleʼ le Bibliaoʼ ku yaʼalik: ‹¡Ile!, u ángel Jéeobaeʼ waʼalaji, ka juulnaj túun junpʼéel sáasil teʼ tuʼux yaan  Pedro ichil le carceloʼ. Le ángel túunoʼ tu kʼolaj Pedro tu chʼalaʼatel utiaʼal u yajsik, tsʼoʼoleʼ tu yaʼalajtiʼ: «¡Líikʼen tu séebaʼanil!»›.

¹¹ Teʼ súutuk jeʼeloʼ wáachʼ le cadena tu kʼab Pedrooʼ, ka aʼalaʼabtiʼ tumen le angeloʼ: ‹Búukint le uláakʼ u yáal a nookʼoʼ yéetel tak a xaanab›. Le soldadoʼoboʼ maʼ páajchaj u beetkoʼob mix baʼaliʼ, tumen juntúul ángel áant Pedro. Ka kʼuchoʼob yiknal junpʼéel joonaj de hierroeʼ jeʼekʼabpaj tu juunal. Bey úuchik u jáalkʼabtaʼal Pedro tumen le ángel utiaʼal ka seguernak u kʼaʼaytajoʼ (Baʼaxoʼob 12:3-11).

¹² ¿Jeʼel wa xan u páajtal u yáantkoʼon u angeloʼob Dioseʼ?... Jeʼeleʼ. ¿U kʼáat wa túun u yaʼal mix juntéen ken u chaʼob u yúuchultoʼon loob?... Maʼatech. Wa maʼ t-kanáantik k-kuxtaleʼ le angeloʼoboʼ maʼ xan ken u kanáantoʼonoʼob. Baʼaleʼ kex k-kanáantikbaeʼ yaan kʼiineʼ yaan k-muʼyaj. Dioseʼ maʼ u yaʼalmaj tiʼ mix juntúul ángel ka u kanáantoʼon mantatsʼiʼ. Baʼaleʼ u tsʼaamaj junpʼéel meyaj jach kʼaʼanaʼan u beetoʼob.

¹³ Le Bibliaoʼ ku tʼaan tiʼ juntúul ángel táan u yaʼalik tiʼ tuláakal máak ka u adorart Dios (Apocalipsis 14:6, 7). ¿Bix u beetik? ¿Desde teʼ kaʼan wa ku tʼaan utiaʼal ka uʼuyaʼak tumen tuláakal máakoʼ?... Maʼatech. Letiʼe máaxoʼob tsaypachtik Jesús way Luʼum tsikbaltik tiʼ uláakʼ máakoʼob le baʼax ku yaʼalik le Biblia yéetel u nuʼuktaj le angeloʼoboʼ. Le angeloʼoboʼ ku nuʼuktikoʼob máak utiaʼal ka áantaʼak le máaxoʼob jach u kʼáatoʼob kaanbal tiʼ Diosoʼ. Toʼoneʼ jeʼel u páajtal k-táakpajal teʼ meyajaʼ yéetel jeʼel u yáantkoʼon le angeloʼoboʼ.

¹⁴ Baʼaleʼ ¿baʼax ken k-beet wa k-pʼektaʼal tumen le máaxoʼob maʼ u yaabiltmoʼob Diosoʼ? ¿Kux túun wa k-kʼaʼalal cárcel? ¿Yaan wa u jáalkʼabtikoʼon le angeloʼoboʼ?... Jeʼel u páajtal u beetkoʼob loʼobaleʼ, baʼaleʼ yaan kʼiineʼ maʼatech u beetkoʼob.

¹⁵ Juntéenjeakileʼ Pablo, juntúul tiʼ u disipuloʼob Jesuseʼ, kʼaʼal cárcel. Le táan u bisaʼal tiʼ junpʼéel barcooʼ anchaj junpʼéel kʼaʼamkach iikʼ. Baʼaleʼ maʼ jáalkʼabtaʼabiʼ, tumen yaan uláakʼ máakoʼob kʼaʼabéet u  kaanbaloʼob tiʼ Dios. Juntúul angeleʼ tu yaʼalajtiʼ: «Maʼ a chʼaʼik saajkil, Pablo. Techeʼ yaan a wantal tu táan César». Pabloeʼ bisaʼab tu táan u emperadoril Roma utiaʼal u tsikbaltik le maʼalob péektsil tiʼoʼ. Le angeloʼoboʼ u yojloʼob tuʼux yaan Pablo kaʼachi yéetel tu yáantoʼob. Letiʼobeʼ, jeʼel xan u yáantkoʼonoʼob wa k-meyajtik Dios yéetel chúukaʼan óolaleʼ (Baʼaxoʼob 27:23-25).

¹⁶ Le angeloʼoboʼ yaan u láakʼ meyaj jach nojoch yaan u beetoʼob yéetel maʼ kun xáantal ken u beetoʼob. Tsʼoʼok u náatsʼal u kʼiinil u xuʼulsaʼal le kʼasaʼan máakoʼob maʼatech u adorartikoʼob Diosoʼ. Le máaxoʼob maʼatech u creertikoʼob wa yaan le angeloʼob tumen maʼ tu páajtal u yilkoʼoboʼ, maʼ kun xáantal ken u yiloʼob jach jaaj yanoʼob (2 Tesalonicailoʼob 1:6-8).

¹⁷ ¿Baʼax ku kaʼansiktoʼon lelaʼ?... Wa k-tsʼáaikba tu tséel u angeloʼob Dioseʼ, yaan u yáantkoʼonoʼob. Baʼaleʼ ¿tiaʼanoʼon wa tu tséeloʼobeʼ?... Wa k-meyajtik Jéeobaeʼ tiaʼanoʼon tu tséeloʼobeʼ. Tsʼoʼoleʼ wa k-meyajtikeʼ, yaan k-áantik uláakʼ máakoʼob u meyajtoʼob xan.