KEN a kʼaj óolt wa máaxeʼ, ¿baʼax ku yáax aʼalaʼaltech tu yoʼolal?... Ku yaʼalaʼaltech bix u kʼaabaʼ. Tuláakloʼon yaan k-kʼaabaʼ. Le yáax wíinikoʼ, Adán tsʼaʼab u kʼaabaʼt tumen Dios, yéetel u yataneʼ u kʼaabaʼeʼ Eva.

² Baʼaleʼ maʼ chéen wíinikoʼob yaan u kʼaabaʼobiʼ. Tuukulnen tiʼ uláakʼ baʼaloʼob yaan xan u kʼaabaʼob. Ken siʼibiktech junpʼéel muñeca wa juntúul chan baʼalcheʼeʼ, ¿máasaʼ ka tsʼáaik u kʼaabaʼ?... Ka tsʼáaik, tumen le kʼaabaʼoʼ junpʼéel baʼax jach kʼaʼanaʼan.

³ Tuukulnen tiʼ le bukaʼaj eekʼoʼob wa estrellaʼob yaan teʼ kaʼanoʼ. A tuklikeʼ, ¿yaan wa u kʼaabaʼob?... Yaan, Dios tsʼáa u kʼaabaʼ cada junpʼéel. Le Bibliaoʼ ku yaʼalikeʼ ‹u yojel jaypʼéel eekʼoʼob yaan, yéetel u tsʼaamaj u kʼaabaʼ cada junpʼéel› (Salmo 147:4).

⁴ ¿Máax a tuklik maas yaan u páajtalil tiʼ tuláakal baʼal?... Beyoʼ, Dios. A tuklikeʼ, ¿yaan wa u kʼaabaʼ?... Jesuseʼ tu yaʼaleʼ yaan. Juntéenjeakileʼ Jesuseʼ tu yaʼalaj ich oración: ‹Tsʼoʼok in tsʼáaik a kʼaabaʼ u kʼaj óolt in disipuloʼob› (Juan 17:26). ¿A wojel wa bix u kʼaabaʼ Dios?... Letiʼeʼ tu yaʼalaj bixi: «Teen Yahveh [wa Jéeoba], lelaʼ letiʼ in kʼaabaʼ». Jeʼex túun k-ilkoʼ u kʼaabaʼ Dioseʼ, JÉEOBA (Isaías 42:8).

⁵ ¿Bix a wuʼuyikaba ken aʼalaʼak a kʼaabaʼ tumen u maasil?... ¿Máasaʼ ku kiʼimaktal a wóol?... Jéeobaeʼ u kʼáat xan ka ojéeltaʼak u kʼaabaʼ, le oʼolal unaj k-tsʼáaik u yojéelt u maasil. Jesús, le Maʼalob j-Kaʼansajoʼ, meyajnajtiʼ u kʼaabaʼ Dios ka tu kaʼansaj le máakoʼoboʼ. Juntéenjeakileʼ tu yaʼalaj: «Kʼaʼabéet xan a yaabiltik Jéeoba  a Dios yéetel tuláakal a puksiʼikʼal» (Marcos 12:30).

⁶ Jesuseʼ u yojel u kʼaabaʼ Dioseʼ jach kʼaʼanaʼan, yéetel Jéeobaeʼ u kʼáat xan ka kʼaj óoltaʼak tumen tuláakal máak. Le oʼolal tu kaʼansaj tiʼ u disipuloʼob ka u chʼaʼchiʼitoʼob u kʼaabaʼ ken orarnakoʼob.

⁷ Úuchjeakileʼ Dioseʼ tu yeʼesaj tiʼ Moisés, juntúul israelita, u kʼaʼanaʼanil u kʼaj óoltaʼal u kʼaabaʼ. Le israelitaʼoboʼ tiʼ palitsiltaʼanoʼob kaʼach Egiptoeʼ, teʼeloʼ jach kʼaas bix u tratartaʼaloʼob. Ka nojochchaj Moiseseʼ tu yóotaj u yáant juntúul israelita. Baʼaleʼ Faraón, u reyil Egiptoeʼ, kʼuuxilnaji ka tu yóotaj u kíims Moisés. Le oʼolal Moiseseʼ lukʼ Egipto.

⁸ Moiseseʼ bin tu luʼumil Madián. Tiʼ tsʼoʼok u beeliʼ, anchaj u paalal, yéetel meyajnaj bey j-kanan tamaneʼ. Junpʼéel kʼiin táan u kanáantik u yalakʼ  tamanoʼob naatsʼ tiʼ junpʼéel witseʼ, tu yilaj junpʼéel baʼal jelaʼan: tu yilaj junkúul chan cheʼ táan u tóochʼbal u kʼáakʼil, baʼaleʼ maʼ tu jáabal. Ka náatsʼ u yile.

⁹ ¿A wojel wa baʼax úuchi?... Moiseseʼ tu yuʼubaj junpʼéel tʼaan ku jóokʼol chúumuk tiʼ le chan cheʼ táan u tóochʼoʼ: «Moisés, Moisés». ¿Máax le tʼaanajoʼ?... Dios. Letiʼeʼ tu tsʼáaj junpʼéel nojoch meyaj u beete, tu yaʼalajtiʼ: ‹Nikaʼaj in túuxtech tu táan Faraón utiaʼal ka jóoʼs le israelitaʼob tu luʼumil Egiptooʼ›. Dioseʼ tu yaʼalaj tiʼ Moisés yaan u yáantik u beete.

¹⁰ Baʼaleʼ Moiseseʼ tu yaʼalaj: ‹Wa kin bin in waʼal tiʼ le israelitaʼob Dios túuxtenoʼ, ¿baʼax ken in beet wa ku kʼáatoʼobten bix a kʼaabaʼ? ¿Baʼax ken in waʼaltiʼob?›. Dioseʼ tu yaʼalajtiʼ ka u yaʼal tiʼ le israelitaʼoboʼ: ‹Jéeoba túuxten. Jéeoba in kʼaabaʼ utiaʼal mantatsʼ› (Éxodo 3:1-15, NM). Le baʼax ku yaʼalik le tekstoaʼ ku yeʼesikeʼ mix bikʼin kun kʼexpajal u kʼaabaʼ Dios. Yaan u seguer u  kʼaabaʼtik Jéeoba yéetel letiʼeʼ bey u kʼáat ka kʼaj óoltaʼak mantatsʼoʼ.

¹¹ Le ka suunaj Moisés Egiptoeʼ, le egipcioʼoboʼ tu tukloʼobeʼ Jéeoba, u dios le israelitaʼoboʼ, chéen juntúul dios minaʼan u páajtalil. Maʼ tu tukloʼob wa letiʼ u Diosil tuláakal le Luʼumoʼ. Le oʼolal Jéeobaeʼ tu yaʼalaj tiʼ u reyil Egipto: ‹Yaan in beetik u kʼaj óoltaʼal in kʼaabaʼ tiʼ tuláakal le Luʼumaʼ› (Éxodo 9:16). Bey tu beetiloʼ. ¿A wojel wa bix úuchik u beetik?...

¹² Tu túuxtaj Moisés jóoʼsik u kaajil Israel tu luʼumil Egipto. Le ka kʼuch le israelitaʼob tu jáal le Chak Kʼáaʼnáaboʼ, Jéeobaeʼ tu jeʼekʼabtaj junpʼéel tikin bej tu chúumuk le jaʼoʼ. Bey páajchajik u máanoʼob tak tuláakʼ juntséel le kʼáaʼnáaboʼ. Baʼaleʼ le ka ook Faraón yéetel u soldadoʼob ichileʼ, le jaʼoʼ suunaj jeʼex yanil kaʼachoʼ, ka láaj kíimoʼob.

¹³ Maʼ xáanchaj ka ojéeltaʼab tuláakal tuʼux le baʼax tu beetaj Jéeoba teʼ Chak Kʼáaʼnáaboʼ. ¿Bix k-ojéeltik lelaʼ?... Cuarenta jaʼaboʼob tsʼoʼokkeʼ le israelitaʼoboʼ kʼuchoʼob tu luʼumil Canaán. Lelaʼ letiʼe luʼum u yaʼalmaj Jéeoba u tsʼáaiktiʼoboʼ. Teʼelaʼ juntúul koʼolel ku kʼaabaʼtik Rahabeʼ, tu yaʼalaj tiʼ kaʼatúul israelitaʼob:  «K-ojel le ka jóokʼeʼex Egiptoeʼ, Dioseʼ tu tikinkúuntaj u jaʼil Chak Kʼáaʼnáab utiaʼal ka a chʼakteʼex» (Josué 2:10).

¹⁴ Bejlaʼa xaneʼ yaʼab máakoʼob beyoʼob jeʼex le egipcioʼoboʼ. Maʼ tu creertikoʼob wa Jéeoba u Diosil tuláakal le Luʼumaʼ. Le oʼolal Jéeobaeʼ u kʼáat ka tsikbaltaʼak tiʼ uláakʼ máakoʼob tumen u kaajal. Jesuseʼ bey tu beetiloʼ. Le táan u náatsʼal u kʼiinil u xuʼulul u kuxtal way Luʼumeʼ, tu yaʼalaj tiʼ Jéeoba ich oración: «Teneʼ tsʼoʼok in tsʼáaik u kʼaj óoltoʼob a kʼaabaʼ» (Juan 17:26).

 ¹⁵ ¿A kʼáat wa a beet jeʼex Jesuseʼ? Wa beyoʼ tsikbalt tiʼ u maasileʼ u kʼaabaʼ Dioseʼ Jéeoba. Maʼ xaaneʼ yaan a tsʼáaik cuentaeʼ yaʼab máaxoʼob maʼ u yojloʼobiʼ. Jeʼel u páajtal a weʼesiktiʼob teʼ Biblia le baʼax ku yaʼalik Apocalipsis 4:11. Koʼox kaxtik le tekstoaʼ. Teʼeloʼ ku yaʼalik: «K-Dios Jéeoba, techeʼ jach ka náajmatik a kʼamik nojbeʼenil, tsiikil bey xan páajtalil, tumen teech beet tuláakal baʼal, yéetel ta woʼolaleʼ kʼuchoʼob antal yéetel beetaʼaboʼob».

¹⁶ ¿Baʼax k-kanik tiʼ lelaʼ?... K-kanikeʼ Jéeobaeʼ letiʼe kʼaabaʼ maas kʼaʼanaʼan u kʼaj óoltaʼaloʼ, tumen bey u kʼaabaʼ le Dios yaan tuláakal páajtalil tiʼoʼ, u Taata Jesús yéetel le Máax beetmil tuláakal baʼaloʼ. Maʼ u tuʼubul xan techeʼ, Jesuseʼ tu yaʼaleʼ kʼaʼabéet k-yaabiltik Jéeoba Dios yéetel tuláakal k-puksiʼikʼal. Techeʼ, ¿a yaabiltmaj wa?...

¹⁷ ¿Bix jeʼel u páajtal k-eʼesik k-yaabiltmeʼ?... Junpʼéel bixeʼ letiʼe k-kʼaj óoltikoʼ yéetel k-amigotik. Uláakʼ bixeʼ letiʼe ken k-kaʼans tiʼ u maasil u kʼaabaʼoʼ. Jeʼel u páajtal k-kaʼansiktiʼob yéetel le Bibliaoʼ. Jeʼel u páajtal xan k-tsikbaltiktiʼob le baʼaxoʼob jatsʼutstak u beetmoʼ. Jéeobaeʼ jach yaan u kiʼimaktal u yóol, tumen u kʼáat ka kʼaj óoltaʼak tumen tuláakal máak. ¿Jeʼel wa u páajtal k-beetkeʼ?...

¹⁸ Maʼ tuláakal máak kun uʼuyikoʼon ken tʼaanakoʼon tiʼ Jéeobaiʼ. Ka tʼaanaj Jesús, le Maʼalob j-Kaʼansaj, tiʼ Jéeobaoʼ yaʼab máaxoʼob maʼ tu yuʼuboʼobiʼ. Baʼaleʼ Jesuseʼ maʼ tu xulaj u tʼaan tiʼ Jéeobaiʼ.

¹⁹ Le oʼolal maʼalob ka k-beet jeʼex Jesuseʼ. Maʼ u xuʼulul k-tʼaan tiʼ Jéeoba. Wa k-beetkeʼ, Jéeobaeʼ yaan u kiʼimaktal u yóol, tumen táan k-eʼesik k-yaabiltmaj u kʼaabaʼ.