JESUSEʼ okʼolnaj le ka kíim Lázaro, u amigooʼ. A tuklikeʼ, ¿yaachaj wa u yóol Jéeoba ka tu yilaj u muʼyaj yéetel u kíimil u Hijo?... Le Bibliaoʼ ku yaʼalikeʼ yaan baʼaxoʼob beetik «u muʼyaj» yéetel u yaatal u yóol Dios (Salmo 78:40, 41; Juan 11:35).

² ¿Tsʼoʼok wa a máansik ta tuukul bix úuchik u muʼyaj Jéeoba le ka tu yilaj u kíimil u Hijo jach u yaabiltmoʼ?... Jesuseʼ u yojel maʼ kun tuʼubsbil tumen Dios. Le oʼolal le taʼaytak u kíimiloʼ tu yaʼalaj: «In Yuum, ta kʼab kin kʼubéentik in kuxtal» (Lucas 23:46).

³ Jesuseʼ u yojel yaan u kaʼa kuxkíintaʼal tumen Dios yéetel maʼ kun pʼatbil teʼ «muknaloʼ». Ka tsʼoʼok u kaʼa kuxkíintaʼal Jesuseʼ, apóstol Pedroeʼ tu chʼaʼchiʼitaj le baʼax ku yaʼalik le Biblia yoʼolal le Maʼalob j-Kaʼansajoʼ: «Cristoeʼ mix xúumpʼattaʼab teʼ Muknaloʼ mix chaʼab u kʼastal u wíinkliliʼ» (Baʼaxoʼob 2:31 Salmo 16:10). U wíinklil Jesuseʼ jach maʼ xáanchaj teʼ muknaloʼ, le oʼolal maʼ kʼaschajiʼ mix yanchaj u bookiʼ.

 ⁴ Le kuxaʼan kaʼach Jesús way Luʼumoʼ, tu yaʼalaj tiʼ u disipuloʼobeʼ maʼ kun xáantal kimen. Tu tsolajtiʼobeʼ ‹yaan u kíimsaʼal yéetel tu yóoxpʼéel kʼiineʼ yaan u kaʼa kuxkíintaʼal› (Lucas 9:22). Le oʼolal maʼ unaj u jaʼakʼal u yóol kaʼach le disipuloʼob ken kaʼa kuxlak Jesusoʼ. Baʼaleʼ ¿jaʼakʼ wa u yóoloʼob?... Koʼox ilik.

⁵ Jesús, le Maʼalob j-Kaʼansajoʼ, kíim tu kʼiinil viernes kex bey láas tres u chíinil Kʼiineʼ. José, juntúul máak táakaʼan ichil le Sanedrinoʼ, ku creertik Jesús, baʼaleʼ chéen letiʼ u yojel. Le ka tu yojéeltaj tsʼoʼok u kíimil Jesuseʼ, bin tu yiknal Pilato, u gobernadoril Roma, ka tu kʼáatajtiʼ wa jeʼel u páajtal u yéemsik u wíinklil chʼuykíintaʼan utiaʼal ka u mukoʼ. Ka túun tu bisaj u muk teʼ muknal yaan ichil junpʼéel parcelaoʼ.

⁶ Ka tsʼoʼok u yoksik u wíinklil Jesús ichil le muknaloʼ, tu makaj yéetel junpʼéel nojoch tuunich jaay. Ka sáaschaj túun domingo tu yóoxpʼéel kʼiineʼ, táanil tiʼ u tíipʼil le Kʼiinoʼ láayliʼ tiaʼan le soldadoʼob túuxtaʼanoʼob tumen u nuuktakil le sacerdoteʼoboʼ. ¿A wojel wa baʼaxten?...

⁷ Le sacerdoteʼoboʼ u yuʼubmoʼob u yaʼalaʼal yaan u kaʼa kuxtal Jesús. Le oʼolal tu túuxtoʼob máaxoʼob kanáantik utiaʼal maʼ u yoklaʼal tumen u disipuloʼob utiaʼal ka u yaʼaloʼob tsʼoʼok u kaʼa kuxtal. Baʼaleʼ chéen ka káaj u tíitkuba le luʼumoʼ, ka juulnaj junpʼéel sáasil ichil le éeʼjochʼeʼeniloʼ. ¡Juntúul u ángel Jéeoba! Le soldadoʼoboʼ jaʼakʼ u yóoloʼob, le oʼolal mix páajchaj u péekoʼobiʼ. Le angeloʼ bin yiknal le muknaloʼ ka tu luʼsaj le tuunich tu jooloʼ. Baʼaleʼ minaʼan u wíinklil Jesús ichil.

⁸ Úuch le baʼax tu yaʼalaj apóstol Pedroaʼ: «Le Jesusaʼ Dios kaʼa kuxkíinte» (Baʼaxoʼob 2:32). Dioseʼ tu kaʼa kuxkíintaj Jesús yéetel tu tsʼáajtiʼ le wíinklil yaan kaʼach tiʼ táanil tiʼ u taal way Luʼumeʼ. Tu kaʼa kuxkíintaj utiaʼal ka kuxlak teʼ kaʼan jeʼex u maasil angeloʼoboʼ (1 Pedro 3:18). Utiaʼal u béeytal u yilaʼal tumen le máakoʼoboʼ kʼaʼabéet u chíikbeskuba tiʼob yéetel u wíinklil wíinik. ¿Tu beetaj wa?... Koʼox ilik.

 ⁹ Táan kaʼach u jóokʼol le Kʼiinoʼ. Le soldadoʼoboʼ tsʼoʼok u binoʼob, María Magdalena yéetel uláakʼ koʼoleloʼob tsaypachtik kaʼach Jesuseʼ táan u binoʼob teʼ tuʼux yaan le muknaloʼ. Táan u bin u yaʼalikoʼob: ‹¿Máax kun balkʼesik le tuunich tsʼaʼan tu jool le muknal jach aaloʼ?› (Marcos 16:3). Baʼaleʼ ka kʼuchoʼobeʼ tu yiloʼob tsʼoʼok u luʼsaʼal le tuunichoʼ. Tu yiloʼob xaneʼ minaʼan u wíinklil Jesús ichil. María Magdalenaeʼ bin áalkabil u yaʼal tiʼ u apostoloʼob Jesús.

¹⁰ Le uláakʼ koʼoleloʼob pʼáatoʼob yiknal le muknaloʼ joʼopʼ u tuklikoʼob tuʼux yaan u wíinklil Jesús. Teʼ súutukoʼ chíikpaj kaʼatúul máakoʼob táan u léembal u nookʼoʼob. ¡Letiʼobeʼ angeloʼob! Le angeloʼob túunoʼ tu yaʼaloʼob tiʼ le koʼoleloʼoboʼ: ‹¿Baʼaxten ka kaxtikeʼex Jesús wayeʼ? Tsʼoʼok u líiʼsaʼal. Xeeneʼex áalkabil a waʼaleʼex tiʼ u disipuloʼob›. Chéen máans ta tuukul bix úuchik u bin u yáalkaboʼob. Le táan u binoʼoboʼ tu yilubaʼob yéetel juntúul máak. ¿A wojel wa máax?...

¹¹ Jesús, letiʼeʼ tu chíikbesuba tiʼob bey juntúul wíinikeʼ. Tu yaʼalajtiʼob: ‹Xeeneʼex ka a waʼaleʼex tiʼ in disipuloʼob›. Le koʼoleloʼoboʼ jach kiʼimakchaj u yóoloʼob. Le ka kʼuchoʼob tuʼux yaan le disipuloʼoboʼ, tu yaʼaloʼobtiʼob: ‹¡Jesuseʼ kuxaʼan! ¡Tsʼoʼok k-ilik!›. María Magdalenaeʼ tsʼokaʼaniliʼ u yaʼalik tiʼ Pedro yéetel tiʼ Juan minaʼan u wíinklil Jesús teʼ muknaloʼ, yéetel jeʼex a wilik teʼ dibujooʼ, letiʼobeʼ bin u yiloʼob wa jach jaaj. Pedro yéetel Juaneʼ joʼopʼ u paktikoʼob le nookʼ de lino meyajnaj utiaʼal u piʼixil Jesusoʼ, baʼaleʼ xaʼakʼpajaʼan u tuukuloʼob. U kʼáat u tukloʼob tsʼoʼok u kaʼa kuxtal Jesús, baʼaleʼ maʼ tu jach creertikoʼob wa jeʼel u yúuchleʼ.

¹² Láayliʼ teʼ domingo jeʼeloʼ, Jesuseʼ chíikpaj tiʼ kaʼatúul tiʼ u disipuloʼob táan u binoʼob tu chan kaajil Emaús. Kex táan u xíimbal Jesús yéetel táan u tsikbal tu yéeteloʼobeʼ maʼ páajchaj u kʼaj óoltkoʼobiʼ. Baʼaleʼ ka kulaj tu yéeteloʼob jaanleʼ, tu kʼaj óoltoʼob le ka tu beetaj u oracionoʼ. Le disipuloʼoboʼ jach kiʼimakchaj u yóoloʼob, ka suunajoʼob Jerusalén, kex óoliʼ óoxpʼeel leguas (11 kilómetros) yanil teʼ tuʼux  yanoʼob kaʼachoʼ. Maʼ xaaneʼ tsʼokaʼaniliʼ u lukʼul tu yiknaloʼob ka tu chíikbesuba tiʼ Pedroeʼ.

¹³ Ka áakʼabchajeʼ yaʼab tiʼ u disipuloʼob Jesuseʼ tu muchʼubaʼob ichil junpʼéel naj, kex u kʼalmoʼob le joonajoʼoboʼ chíikpaj Jesús ichiloʼob. Beoraaʼ tu creertoʼob jach tu jaajil tsʼoʼok u kaʼa kuxtal. ¡Chéen tukult bukaʼaj kiʼimakchajik u yóoloʼob! (Mateo 28:1-15; Lucas 24:1-49; Juan 19:38-20:21.)

¹⁴ Ich cuarenta kʼiinoʼobeʼ Jesuseʼ tu chíikbesuba tiʼ u disipuloʼob utiaʼal u yeʼesiktiʼob tsʼoʼok u kaʼa kuxtal. Tsʼoʼoleʼ tu pʼataj le Luʼumaʼ ka bin yiknal u Taata teʼ kaʼanoʼ (Baʼaxoʼob 1:9-11). Le disipuloʼoboʼ joʼopʼ  u tsikbaltikoʼob tiʼ tuláakal máak tsʼoʼok u kaʼa kuxkíintaʼal Jesús tumen Dios. Kex ku jaʼatsʼaloʼob yéetel ku túuxtaʼal kíimsbil jujuntúul tiʼ letiʼob tumen le sacerdoteʼoboʼ, letiʼobeʼ maʼ tu xulaj u kʼaʼaytajoʼobiʼ. U yojloʼob wa ku kíimloʼobeʼ, maʼ kun tuʼubsbiloʼob tumen Dios, jeʼex u Hijoeʼ.

¹⁵ Le máakoʼob bejlaʼaʼ maʼatech u beetkoʼob le baʼaxoʼob tu beetaj le yáax disipuloʼoboʼ. Yaan luʼumiloʼobeʼ, ken kʼuchuk u kʼiinil u kʼaʼajsaʼal úuchik u kaʼa kuxtal Jesuseʼ, chéen ku tuukuloʼob tiʼ tʼuʼuloʼob yéetel jeʼ boʼonaʼanoʼob utiaʼal Pascua (huevos de Pascua). Baʼaleʼ le Bibliaoʼ maʼatech u tʼaan tiʼ tʼuʼuloʼob mix tiʼ jeʼob bonaʼanoʼob utiaʼal le Pascuaoʼ. Baʼaxeʼ ku yaʼaliktoʼon ka k-adorart Dios.

¹⁶ Toʼoneʼ unaj k-tsikbaltik tiʼ uláakʼ máakoʼob bix úuchik u kaʼa kuxkíintaʼal Jesús tumen Dios, jeʼex beetaʼabik tumen le disipuloʼoboʼ. Maʼ unaj k-sajaktal kex ka aʼalaʼak yaan k-kíimsaʼaliʼ. Wa ka kíimkoʼoneʼ, Jéeobaeʼ maʼ ken u tuʼubsoʼon yéetel yaan u kaʼa kuxkíintikoʼon, jeʼex úuchik u kaʼa kuxkíintik Jesuseʼ.

¹⁷ ¿Máasaʼ jach ku kiʼimaktal k-óol k-ojéeltik Dioseʼ maʼ ken u tuʼubs le máaxoʼob meyajtik yéetel yaan u kaʼa kuxkíintikoʼoboʼ?... Le ken k-kan le baʼaloʼob beyaʼ, unaj u péeksikoʼon k-il bix jeʼel k-kiʼimakkúuntik u yóol Dioseʼ. ¿A wojel wa jeʼel u páajtal k-beetik u kiʼimaktal u yóoleʼ?... Teʼ tuláakʼ xookoʼ yaan k-ilik lelaʼ.