LE KA nojochchaj Jesús yéetel le ka tu yojéeltaj bix kanáantaʼabik tu paalil tumen Jéeobaeʼ, ¿tu tsʼáaj wa u graciasil tiʼ?... ¿Baʼax a tuklik tu yaʼalaj tiʼ María yéetel José le ka bisaʼab tu kaajil Egipto utiaʼal maʼ u kíimsaʼaloʼ?...

² Bejlaʼeʼ Jesuseʼ maʼ juntúul chaambaliʼ yéetel maʼ way Luʼum kajakbaleʼ. Baʼaleʼ ¿tsʼoʼok wa a tsʼáaik cuentaeʼ utiaʼal yaʼab máakeʼ Jesuseʼ láayliʼ juntúul chaambal chilikbal tiʼ junpʼéel pesebreeʼ?... Yaʼab tuʼuxoʼobeʼ bey u tuklaʼal yanil Jesusoʼ, maases utiaʼal Navidad.

³ Kex minaʼan Jesús way Luʼumeʼ, a tuklikeʼ, ¿láayliʼ wa kuxaʼaneʼ?... Beyoʼ, Dios kaʼa kuxkíinte, yéetel bejlaʼeʼ juntúul Rey jach yaan u páajtalil tiaʼan teʼ kaʼanoʼ. Baʼaleʼ ¿bix a tuklik jeʼel u páajtal u kanáantik le máaxoʼob meyajtikoʼ?... Le ka taal Jesús way Luʼumeʼ, tu yeʼesaj jeʼel u páajtal u kanáantik le máaxoʼob yaabiltmiloʼ. Koʼox ilik bix úuchik u beetik juntéenjeakil le tiaʼan yéetel u disipuloʼob tiʼ junpʼéel barcooʼ.

 ⁴ Jach taʼaytak u yáakʼabtal. Teʼ kʼiin jeʼeloʼ Jesuseʼ óoliʼ bul kʼiin táan u kaʼansaj tu jáal u kʼáaʼnáabil Galilea, lelaʼ cinco leguas (veinte kilómetros) chowakil yéetel óoxpʼéel leguas (doce kilómetros) kóochil. Jesús túuneʼ tu yaʼalaj tiʼ u disipuloʼob: «Koʼoneʼex tuláakʼ u tséel le jaʼoʼ». Ka naʼakoʼob tiʼ junpʼéel barcoeʼ ka jóokʼ u binbaloʼob. Tumen kaʼanaʼaneʼ Jesuseʼ bin wenel ka tu tʼalkúuntaj u pool yóokʼol le kʼáanjoʼoloʼ. Ka tʼúub u wenel.

⁵ Le disipuloʼoboʼ maʼ weenoʼob utiaʼal u nuʼuktikoʼob le barcooʼ. Maʼalob yaniloʼob kaʼachi, baʼaleʼ chéen ka káaj junpʼéel kʼaʼamkach iikʼ. Jujunpʼíitil úuchik u bin u maas kʼaʼamtal. Ka túun joʼopʼ u jatsʼkuba le olas teʼ barcooʼ yéetel ka joʼopʼ u yokol le jaʼ ichiloʼ.

⁶ Le disipuloʼoboʼ sajakchajoʼob u buulul le barcooʼ. Teʼ súutuk jeʼeloʼ Jesuseʼ táan u wenel. Ka bin le disipuloʼob ajsikoʼ, ka tu yaʼaloʼobtiʼ: ‹¡J-Kaʼansaj, j-Kaʼansaj, salvartoʼoniʼ, táan k-búulul yoʼolal le kʼaʼamkach iikʼaʼ!›. Le ka tu yuʼubaj Jesús lelaʼ, tu yaʼalaj tiʼ le iikʼ yéetel tiʼ le jaʼoʼ: «¡Mak a chiʼ! ¡Jetsʼkúuntaba!».

 ⁷ Le iikʼoʼ jéetsʼi yéetel le kʼáaʼnáaboʼ xuʼul u woʼoltikuba. Le disipuloʼoboʼ jaʼakʼ u yóoloʼob tumen mix juntéen u yiloʼob junpʼéel baʼal beyaʼ. Ka joʼopʼ u yaʼalikoʼob tu baatsiloʼob: «¿Máax jach tu jaajil le máakaʼ? Tumen tak iikʼ yéetel kʼáaʼnáab uʼuyik u tʼaan» (Lucas 8:22-25; Marcos 4:35-41).

⁸ Techeʼ, ¿a wojel wa máax Jesús?... ¿Tuʼux u taal le páajtalil yaantiʼ kaʼachoʼ?... Le disipuloʼoboʼ maʼ unaj u sajaktaloʼob kaʼachiʼ tumen tiaʼan Jesús tu yiknaloʼobeʼ, tumen maas yaan páajtalil tiʼ, maʼ jeʼex u maasil máakoʼobeʼ. Ku páajtal u beetik kaʼach yaʼab baʼaloʼob maʼ tu páajtal u beetik chéen wíinik. Paʼatik in tsikbaltiktech baʼax tu beetaj uláakʼ juntéen ka taal xan junpʼéel kʼaʼamkach iikʼ.

⁹ Lelaʼ úuch le maʼ yaʼab kʼiinoʼob u yáax salvart u disipuloʼoboʼ. Junpʼéel kʼiin taʼaytak u yáakʼabtaleʼ, Jesuseʼ tu yaʼalaj tiʼ u disipuloʼob ka xiʼikoʼob yéetel le barco tu láakʼ u tséel le kʼáaʼnáaboʼ, yéetel  tu yaʼalajtiʼobeʼ tiʼ ken u yilubaʼobiʼ. Ka naʼak tu juunal teʼ wits utiaʼal u orar tiʼ Jéeoba Diosoʼ, tumen teʼeloʼ minaʼan baʼax náaysik u yóoliʼ.

¹⁰ Le disipuloʼoboʼ naʼakoʼob teʼ barcooʼ ka káaj u binoʼob. Baʼaleʼ maʼ sáam tiʼ leloʼ ka joʼopʼ u kʼaʼamtal le iikʼoʼ. Teʼ súutuk jeʼeloʼ tsʼoʼok u yáakʼabtal. Ka túun tu chúuchkʼaxtoʼob u nookʼil le barcooʼ ka joʼopʼ u remaroʼob, baʼaleʼ istikyaj u binoʼob tumen tu táan iikʼ ku binoʼob. Le barcooʼ ku naʼakal yéetel ku yéemel yoʼolal u nukuch olasil le jaʼoʼ. Le disipuloʼoboʼ joʼopʼ u yilkoʼob bix jeʼel u jóokʼloʼob tu jáal le jaʼoʼ, baʼaleʼ maʼ tu páajtaloʼob.

¹¹ Jesuseʼ tsʼoʼok u chan xáantal yanak chéen tu juunal teʼ witsoʼ. Baʼaleʼ le ka tu yilaj taʼaytak u búulul u amigoʼobeʼ, éem tu jáal le kʼáaʼnáaboʼ. Tumen u kʼáat u yáantoʼobeʼ, joʼopʼ u xíimbal yóokʼol le kʼáaʼnáab táan u woʼoltikubaoʼ.

¹² ¿Baʼax jeʼel u yúuchultech wa ka a wóot xíimbal yóokʼol le jaʼoʼ?... Jeʼel a búululeʼ. Baʼaleʼ Jesuseʼ maʼ búuliʼ, tumen yaan páajtalil tiʼ. Utiaʼal ka kʼuchuk yiknal le barcooʼ, chan yaʼab tu xíimbaltaj. Le oʼolal táan u taal u sáastal ka ilaʼab tumen le disipuloʼob táan u xíimbal yóokʼol le jaʼoʼ. Le disipuloʼoboʼ jaʼakʼ u yóoloʼob ka tu yiloʼob. Ka joʼopʼ u yawatoʼob. Jesús túuneʼ tu yaʼalajtiʼob: «¡Maʼ a sajaktaleʼex! Teen; maʼ a chʼaʼikeʼex saajkil».

¹³ Chéen pʼel úuchik u naʼakal Jesús teʼ barcooʼ, jéetsʼ le iikʼoʼ. Le disipuloʼoboʼ jaʼakʼ u yóoloʼob. Xolajoʼob tu táan Jesuseʼ ka tu yaʼaloʼob: «Jach tu jaajil u Paalech Dios» (Mateo 14:22-33; Juan 6:16-21).

¹⁴ ¿Máasaʼ jach jatsʼuts wa ka kuxlakoʼon tu kʼiiniloʼob Jesús utiaʼal k-ilik le milagroʼob tu beetoʼ?... ¿A wojel wa baʼaxten tu beetaj?... Tumen u yaabiltmaj u disipuloʼob yéetel u kʼáat u yáantoʼob. Tsʼoʼoleʼ tu yeʼesaj le páajtalil yaantiʼ yéetel kun meyajtiʼ le ken u beet u Reyil tiʼ u Reino Diosoʼ.

 ¹⁵ Teʼ kʼiinoʼobaʼ yéetel le páajtalil tsʼaʼantiʼoʼ, Jesuseʼ ku kanáantik le máaxoʼob tsaypachtik utiaʼal maʼ u xuʼulsaʼal u kʼaʼaytikoʼob u Reino Dios tumen Satanasoʼ. Baʼaleʼ maʼatech u meyaj le páajtalil tiʼ utiaʼal maʼ u chaʼik u kʼojaʼantal yéetel u tsʼakik u disipuloʼoboʼ. Tak u apostoloʼobeʼ kíimoʼob. Santiago, u sukuʼun Juaneʼ, kíimsbil beetaʼabik, yéetel Juaneʼ kʼaʼal cárcel (Baʼaxoʼob 12:2; Apocalipsis 1:9).

¹⁶ Bejlaʼa xaneʼ láayliʼ bey u yúuchloʼ. Tuláakal máak, kex wa ku meyajtik Jéeoba wa maʼeʼ, ku kʼojaʼantal yéetel ku kíimil. Maʼ kun xáantal, ken káajak u reinar Jesús tu Reino Dioseʼ, yaan u xuʼulsaʼal tiʼ le baʼaloʼobaʼ. Mix máak kun sajaktal, tumen Jesuseʼ yaan u bendecirtik tuláakal le máaxoʼob beetik baʼax ku yaʼalikoʼ (Isaías 9:6, 7).