¿KA TʼAAN wa yéetel Jéeoba Dios?... Letiʼeʼ u kʼáat ka a beete. Ken tʼaanakech yéetel Dioseʼ táan a orar. Jesuseʼ suuk kaʼach u tʼaan yéetel u Taata yaan teʼ kaʼanoʼ, yéetel yaan kʼiineʼ uts tu tʼaan u beetik chéen tu juunal. Le Bibliaoʼ ku yaʼalikeʼ juntéenjeakileʼ «naʼak orar tu juunal teʼ puʼukoʼ. Kex tsʼoʼok u jach áakʼabtaleʼ letiʼeʼ tiʼ yaan kaʼach tu juunaliʼ» (Mateo 14:23).

² ¿Tuʼux jeʼel u páajtal a orar tiʼ Jéeoba chéen ta juunaleʼ?... Maʼ xaaneʼ ichil a wotoch táanil tiʼ a chital wenel. Jesuseʼ tu yaʼalaj: «Ken orarnakecheʼ, ooken chéen ta juunal ta cuarto, ken tsʼoʼokok a kʼalik le joonajoʼ orarnen tiʼ a Taata yaan teʼ kaʼanoʼ» (Mateo 6:6). ¿Ka orar wa sáamsamal táanil tiʼ a wenel?... Maʼalob ka a beete.

³ Jesuseʼ ku orar ken yanak xan yéetel uláakʼ máakoʼob. Ka kíim Lázaro, u  amigoeʼ, orarnaj yéetel u maasil teʼ tuʼux mukaʼanoʼ (Juan 11:41, 42). Tsʼoʼoleʼ Jesuseʼ ku orar kaʼach ken u muchʼuba yéetel u disipuloʼob. ¿Ka bin wa teʼ muchʼtáambaloʼob tuʼux ku beetaʼal oracionoʼ?... U suukileʼ teʼ muchʼtáambaloʼobaʼ juntúul nojoch máak beetik le oracionoʼ. Kʼaʼabéet a jach chʼenxikintik le baʼaxoʼob ku yaʼalikoʼ, tumen táan u tʼaan ta woʼolal tu táan Dios. Ken tsʼoʼokok le oracionoʼ jeʼel u páajtal a waʼalik «amén», wa «ka béeyak». ¿A wojel wa baʼaxten k-aʼalik «amén», wa «ka béeyak»?... Utiaʼal k-eʼesik maʼalob úuchik k-uʼuyik yéetel utiaʼal k-eʼesik bey k-oración xaneʼ.

⁴ Tsʼoʼoleʼ Jesuseʼ ku orar kaʼach utiaʼal u tsʼáaik u graciasil tiʼ Jéeoba yoʼolal le baʼax ken u jaantoʼ. Kux túun teech, ¿suuk wa a orar táanil tiʼ a janal?... Maʼalob ka k-tsʼáa u graciasil tiʼ Jéeoba táanil tiʼ k-janal. Yaan kʼiineʼ yaanal máax beetik le oracionoʼ. Baʼaleʼ ¿baʼax unaj a beetik wa chéen ta juunal yanech bey xan wa tiaʼanech ichil uláakʼ máakoʼob maʼatech u tsʼáaikoʼob gracias tiʼ Jéeobaeʼ?... Techeʼ kʼaʼabéet a beetik a oración.

⁵ ¿Kʼaʼabéet wa k-orar kʼaʼam? ¿Jeʼel wa u yuʼubik Dios le oracionoʼob k-beetik ichil k-tuukuloʼ?... Koʼox ilik baʼax úuch tiʼ  Nehemías. Letiʼeʼ ku adorartik kaʼach Jéeoba yéetel tiʼ ku meyaj tu palacio Artajerjes, u reyil Persiaeʼ. Junpʼéel kʼiineʼ Nehemíaseʼ jach lúub u yóol ka tu yojéeltaj juutul u baʼpakʼiloʼob Jerusalén.

⁶ Le ka kʼáataʼabtiʼ tumen le rey baʼaxten lubaʼan u yóoloʼ, tu séebaʼanileʼ Nehemíaseʼ orarnaj ichil u tuukul. Tsʼoʼoleʼ ka tu tsolaj tiʼ le rey baʼaxten bey u yuʼubikubaoʼ yéetel tu kʼáataj wa jeʼel u páajtal u bin Jerusalén u kaʼa líiʼs u baʼpakʼiloʼobeʼ. ¿Baʼax túun úuchi?...

⁷ Dioseʼ tu núukaj u oración Nehemías. Le reyoʼ tu chaʼaj u bin yéetel tu tsʼáaj yaʼab cheʼob tiʼ utiaʼal u jel líiʼsik le baʼpakʼoʼoboʼ. Jeʼex túun k-ilkoʼ, Dioseʼ jeʼel u núukik  k-oracionoʼob kex chéen ichil k-tuukul ka k-beeteʼ (Nehemías 1:2, 3; 2:4-8).

⁸ ¿Unaj wa k-chintal ken orarnakoʼon? ¿Unaj wa k-xoltal? Techeʼ, ¿bix a wilik?... Jesuseʼ yaan horaeʼ xolaj orar, yaan hora xaneʼ pʼáat waʼatalil. Yaan kʼiin xaneʼ paakatnaj kaʼan utiaʼal u orar, jeʼex le ka kíim Lázaroeʼ.

⁹ ¿Baʼax ku yeʼesik lelaʼ?... Le bix yanil máakoʼ maʼ letiʼ u maas kʼaʼanaʼaniliʼ. Yaan horaeʼ maʼalob ka u chin u pool máak yéetel ka u mutsʼ u yich. Maʼ xaaneʼ yaan horaeʼ a kʼáat xoltal jeʼex tu beetil Jesuseʼ. Baʼaleʼ maʼ u tuʼubultecheʼ jeʼel u páajtal k-orar tiʼ Dios jeʼel baʼaxak súutukileʼ, tumen k-ojel letiʼeʼ jeʼel u yuʼubikoʼoneʼ. ¿Ka creertik wa?...

¹⁰ ¿Baʼax unaj k-aʼalik ken orarnakoʼon?... Le ken orarnakecheʼ, ¿baʼax ka waʼalik tiʼ Dios?... Jéeobaeʼ yaʼab baʼaloʼob maʼalobtak ku tsʼáaiktoʼon. ¿Máasaʼ unaj k-tsʼáaik u graciasil le baʼaloʼobaʼ?... Kex maʼalob ka a tsʼáa u graciasil le jaanloʼ, ¿ka tsʼáaik wa u graciasil le kaʼan jach jatsʼuts u azulil, le xíiwoʼob yéetel le jatsʼuts looloʼoboʼ?... Dios láaj beetoʼob.

¹¹ Juntéenjeakileʼ u disipuloʼob Jesús, le Maʼalob j-Kaʼansajoʼ, tu kʼáatoʼob ka kaʼansaʼakoʼob orar. Letiʼ túuneʼ tu kaʼansajtiʼob baʼax maas kʼaʼanaʼan u yaʼalikoʼob ken orarnakoʼob. ¿A wojel wa baʼax?... Wa ka  kaxtik Mateo, capítulo 6, versículo 9 tak 13, yaan a wilik le oración kʼaj óolaʼan bey padrenuestrooʼ. Koʼox xokik.

¹² Jeʼex tsʼoʼok k-ilkoʼ, yáaxeʼ Jesuseʼ tu yaʼalaj ka k-kʼáat ich oración ka kiliʼichkúuntaʼak u kʼaabaʼ Dios, wa ka santificartaʼak. ¿Bix u kʼaabaʼ Dios?... Beyoʼ, Jéeoba, kʼaʼabéet k-yaabiltik u kʼaabaʼ.

¹³ U kaʼapʼéeleʼ, Jesuseʼ tu kaʼansaj ka k-kʼáat ka taalak u Reino Dios. Le Reinoaʼ yaan u taasik jeetsʼelil way Luʼumeʼ yéetel yaan u sutik paraísoil.

¹⁴ U yóoxpʼéeleʼ, Jesuseʼ tu yaʼalaj ka orarnakoʼon utiaʼal k-kʼáatik ka beetaʼak baʼax u kʼáat Dios way Luʼum jeʼex u beetaʼal teʼ kaʼanoʼ. Wa k-kʼáatik lelaʼ, kʼaʼabéet xan k-beetik baʼax uts tu tʼaan Dios.

¹⁵ Ka tsʼoʼokeʼ Jesuseʼ tu kaʼansoʼon k-kʼáat ka tsʼaʼabaktoʼon baʼax k-jaant teʼ kʼiinoʼ. Tsʼoʼoleʼ tu yaʼaleʼ kʼaʼabéet k-arrepentir yéetel k-kʼáatik tiʼ Dios ka u perdonart le baʼaxoʼob maʼ maʼalobtak k-beetkoʼ. Baʼaleʼ wa k-kʼáat ka u perdonartoʼoneʼ, unaj xan k-perdonartik le máaxoʼob beetiktoʼon baʼax maʼ maʼaloboʼ. ¿Ku talamtal wa a wilik a perdonar?...

¹⁶ Tu tsʼookeʼ Jesuseʼ tu kaʼansaj ka k-kʼáat tiʼ Jéeoba Dios ka u kanáantoʼon tiʼ Satanás, le Kʼaasilbaʼaloʼ. Jeʼel u páajtal k-aʼalik ichil k-oración tuláakal le baʼaloʼobaʼ.

¹⁷ Kʼaʼabéet k-creertik Jéeobaeʼ jach ku yuʼubik k-oracionoʼob. Baʼaleʼ maʼ chéen unaj k-kʼáatik wa baʼax tiʼiʼ, unaj xan k-tsʼáaik gracias tiʼ. Letiʼeʼ ku kiʼimaktal u yóol ken u yuʼub k-aʼaliktiʼ bix k-uʼuyikba yéetel ken kʼáat baʼaxoʼob uts tu tʼaan. Letiʼ túuneʼ yaan u tsʼáaiktoʼon le baʼax k-kʼáatiktiʼoʼ. Techeʼ, ¿ka creertik wa lelaʼ?...