XOOKIL 25
¿Jeʼel wa u kʼexik u kuxtal le máaxoʼob beetik baʼaloʼob kʼaastakoʼ?
¿MÁASAʼ jach jatsʼuts wa tuláakal máak ka u beet baʼax maʼalob?... Baʼaleʼ u jaajileʼ óoliʼ mix máak beetik baʼax maʼalob mantatsʼ. ¿A wojel wa baʼaxten k-beetik baʼaxoʼob kʼaastak kex maʼ k-kʼáatiʼ?... Tumen j-kʼebanoʼon ken síijikoʼon. Baʼaleʼ yaʼab máaxeʼ ku beetkoʼob baʼaloʼob jach kʼaastak. Ku pʼektikoʼob u maasil yéetel ku beetkoʼob loob tiʼob. A tuklikeʼ, ¿jeʼel wa u kʼexik u kuxtaloʼob utiaʼal ka u beetoʼob baʼax maʼalobeʼ?...
2 Ilawil le xiʼipal kanáantik u nookʼ le máaxoʼob chʼinik Estebanoʼ. U kʼaabaʼ ich hebreoeʼ Saulo, baʼaleʼ u kʼaabaʼ ich romanoeʼ, Pablo. Letiʼeʼ uts tu tʼaan u kíimsaʼal Esteban, juntúul u disipulo Jesús, le Maʼalob j-Kaʼansajoʼ. Koʼox ilik baʼaxten jach kʼasaʼan Saulo kaʼachi.
3 Sauloeʼ tiaʼan kaʼach ichil u religión le fariseoʼoboʼ. Kex yaan kaʼach le Kiliʼich Tsʼíiboʼob tiʼoboʼ, maas ku beetkoʼob baʼax ku yaʼalik le máaxoʼob nuʼuktik u religionoʼoboʼ. Le oʼolal Sauloeʼ ku beetik kaʼach baʼaloʼob kʼaastak.
4 Sauloeʼ tiaʼan kaʼach Jerusalén le ka maʼach Esteban utiaʼal bisbil tu táan le juezoʼoboʼ. Ichil le juezoʼoboʼ yaan fariseoʼobiʼ. Kex sen aʼalaʼab baʼaloʼob kʼaastak tu contra Estebaneʼ, letiʼeʼ maʼ tu chʼaʼaj saajkiliʼ. Le oʼolal tʼaanaj tiʼ Jéeoba Dios yéetel tiʼ Jesús.
5 Baʼaleʼ le juezoʼoboʼ maʼ utschaj tu tʼaanoʼob le baʼax tu yaʼaloʼ. Letiʼobeʼ yaʼab baʼax u yojloʼob kaʼach tu yoʼolal Jesús. Tumen maʼ úuch tak u yaʼaloʼob ka kíimsaʼakiʼ. Tsʼoʼoleʼ Jéeobaeʼ tu kaʼa bisaj Jesús teʼ kaʼanoʼ. Baʼaleʼ le juezoʼoboʼ maʼ tu kʼexaj u tuukuloʼobiʼ, baʼaxeʼ káaj u chʼaʼpachtikoʼob u disipuloʼob Jesús.
6 Le juezoʼoboʼ tu machoʼob Estebaneʼ ka tu bisoʼob paach kaaj, tu lúuʼsoʼobeʼ ka tu muruxtuntoʼob. Jeʼex a wilik teʼ dibujooʼ, Sauloeʼ táan u yilik baʼax ku beetaʼaliʼ. Letiʼeʼ maʼ kʼaas úuchik u yilik u kíimsaʼal Estebaniʼ.
¿Baʼaxten Sauloeʼ maʼalob u yilik kaʼach ka kíimsaʼak Esteban?
7 ¿A wojel wa baʼaxten bey u tuukul kaʼach Saulooʼ?... Tumen fariseo desde tu chichnil yéetel ku tuklikeʼ maʼalob le baʼax ku kaʼansaʼal tu religión kaʼachoʼ. Letiʼeʼ ku beetik kaʼach le baʼaxoʼob ku beetaʼal tumen le máaxoʼob nuʼuktik u religionoʼ (Baʼaxoʼob 7:54-60).
8 ¿Baʼax tu beetaj Saulo le ka tsʼoʼok u kíimsaʼal Estebanoʼ?... Tu chʼaʼtuklaj u láaj xuʼulsik tiʼ u disipuloʼob Jesús. Ku jóoʼsik le xiiboʼob yéetel le koʼoleloʼob tu yotochoʼoboʼ yéetel ku beetik u kʼaʼalaloʼob cárcel. Yaʼab disipuloʼobeʼ lukʼoʼob Jerusalén, baʼaleʼ maʼ tu xulaj u kaʼansajoʼob tiʼ Jesusiʼ (Baʼaxoʼob 8:1-4).
9 Leloʼ tu beetaj u maas pʼektaʼal u disipuloʼob Jesús tumen Saulo. Ka bin tʼaan yéetel Caifás, le nojoch sacerdoteoʼ, letiʼ túuneʼ tu yaʼalaj ka maʼachak le cristianoʼob kajaʼanoʼob kaʼach Damascooʼ. Sauloeʼ u kʼáat kaʼach u bisoʼob kʼalbil Jerusalén utiaʼal ka castigartaʼakoʼob. Baʼaleʼ le táan u bin tu bejil Damascooʼ juulnaj junpʼéel sáasil teʼ kaʼanoʼ.
¿Máax táan u tʼaan yéetel Saulo, yéetel baʼax ku yaʼalaʼaltiʼ ka u beete?
10 Ka tu yuʼubaj u yaʼalaʼal: «Saulo, Saulo, ¿baʼaxten táan a chʼaʼpachtiken?». Jesús tʼanik desde teʼ kaʼanoʼ. Le sáasil juulnaj teʼ kaʼanoʼ tu beetaj u chʼóoptal Saulo, ka bisaʼab tu kaajil Damasco tumen le máaxoʼob láakʼintikoʼ.
11 Óoxpʼéel kʼiin úuchuk lelaʼ, Ananías, juntúul disipulo kajaʼan Damascoeʼ, tu yilaj Jesús tiʼ junpʼéel náay. Ka aʼalaʼabtiʼ ka xiʼik u yil Saulo utiaʼal u sutik u sáasil yéetel utiaʼal ka tʼaanak tu yéetel. Le ka tʼaanaj Ananías yéetel Sauloeʼ, letiʼeʼ tu creertaj u jaajil yoʼolal Jesús, ka suunaj u sáasil. Tu kʼexaj u kuxtal yéetel tu meyajtaj Dios yéetel chúukaʼan óolal (Baʼaxoʼob 9:1-22).
12 ¿Beoraaʼ tsʼoʼok wa a naʼatik baʼaxten Sauloeʼ ku beetik kaʼach baʼaloʼob kʼaastak?... Tumen maʼ maʼalob baʼaxoʼob kaʼansaʼantiʼ kaʼachiʼ. Ku beetik kaʼach le baʼaxoʼob ku yilik u beetaʼal tumen le máaxoʼob maʼatech u meyajtikoʼob Diosoʼ yéetel táakaʼan ichil junjaats máakoʼob chéen ku beetkoʼob baʼax ku kaʼansik wíinik, maʼ le baʼax ku yaʼalik le Kiliʼich Tsʼíiboʼoboʼ. ¿Baʼaxten túun Sauloeʼ tu kʼexaj u kuxtal kex u maasil fariseoʼob seguernaj u binoʼob tu contra Diosoʼ?... Tumen letiʼeʼ maʼ u pʼekmaj u jaajiliʼ, le oʼolal ka kaʼansaʼabtiʼeʼ tu tsʼáaj ichil u kuxtal.
13 ¿A wojel wa bix kʼaj óoltaʼabik Saulo ka tsʼoʼoki?... Juntúul u apóstol Jesús: apóstol Pablo. Maʼ unaj xan u tuʼubultecheʼ, Pabloeʼ maas yaʼab libroʼob tiʼ le Biblia tu tsʼíibtoʼ.
14 Yaʼab máakoʼob jeʼex Sauloeʼ jeʼel u kʼexik xan u kuxtaloʼobeʼ. Baʼaleʼ ku talamtal u beetkoʼob, tumen yaan juntúul máax péeksik máak u beet baʼaloʼob kʼaastak. ¿A wojel wa máaxiʼ?... Jesuseʼ tu yaʼalaj máax le ka chíikpaj tiʼ Saulo tu bejil Damascooʼ. Jesuseʼ tu yaʼalaj tiʼ Saulo desde teʼ kaʼanoʼ: ‹Kin túuxtikech a jeʼekʼabt u yich le máakoʼoboʼ, utiaʼal ka lukʼkoʼob tiʼ le éeʼjochʼeʼeniloʼ ka taalakoʼob tiʼ le sáasiloʼ, ka lukʼkoʼob xan yáanal u páajtalil Satanás yéetel ka taalakoʼob tu yiknal Dios› (Baʼaxoʼob 26:17, 18).
15 Satanás, le Kʼaasilbaʼaloʼ, táan u péeksik tuláakal máak u beet baʼaloʼob kʼaastak. ¿Yaan kʼiin wa ku talamtal a wuʼuyik tʼaan?... U jaajileʼ tiʼ tuláakloʼon ku talamtal, tumen Satanaseʼ maʼ u kʼáat ka k-beet baʼax maʼalobiʼ. Baʼaleʼ yaan uláakʼ baʼax talamkúuntik k-beetik baʼax maʼalob. ¿A wojel wa baʼax?... Tumen j-kʼebanoʼon ken síijikoʼon.
16 Le oʼolal maas maʼ talam u beetik máak baʼax kʼaasiʼ. ¿Baʼax túun kʼaʼabéet k-beetik?... Kʼaʼabéet k-xachikba k-beet baʼax maʼalob. Wa k-beetik beyoʼ yaan u yáantkoʼon Jesús, tumen u yaabiltmoʼon.
17 Le ka taal Jesús way Luʼumeʼ, tu yaabiltaj le máakoʼob u beetmoʼob baʼaloʼob kʼaastakoʼ, tumen tu kʼexaj u kuxtaloʼob. Letiʼeʼ u yojel maʼ chéen chʼaʼabil úuchik u kʼexik u kuxtaloʼobiʼ. Ichiloʼobeʼ yaan koʼoleloʼob ku núupchitaloʼob (ku yantal relaciones sexuales tiʼob) yéetel yaʼab xiiboʼobiʼ. Leloʼ maʼ maʼalobiʼ. Le Bibliaoʼ ku yaʼalikeʼ le koʼoleloʼob beyoʼ x-káakbachoʼob wa chéen bey u máanoʼoboʼ.
¿Baʼaxten Jesuseʼ tu perdonartaj le koʼolel beetmil baʼaloʼob kʼaastakoʼ?
18 Juntéenjeakileʼ, juntúul tiʼ le koʼoleloʼobaʼ tu yuʼubaj u yúuchul tʼaan tiʼ Jesús, ka bin u yil tu yotoch juntúul fariseo, tumen tiaʼan kaʼach Jesusiʼ. Le koʼoleloʼ tu yalaj aceite tu yook Jesús yéetel tu choʼaj yéetel u tsoʼotsel u pool le u jaʼil u yich chʼáajoʼ. Jach arrepentirnajaʼan, le oʼolal perdonartaʼabi. Baʼaleʼ le fariseooʼ ku tuklik kaʼach maʼ unaj u perdonartaʼaliʼ (Lucas 7:36-50).
19 ¿A wojel wa baʼax tu yaʼalaj Jesús tiʼ jujuntúul fariseoʼob juntéenjeakil?... Tu yaʼalajtiʼob: «Le koʼoleloʼob chéen bey u máanoʼoboʼ maas naatsʼ yaniloʼob tiʼ u Reino Dios ke teʼex» (Mateo 21:31). Jesuseʼ tu yaʼalaj lelaʼ, tumen le koʼoleloʼoboʼ tsʼoʼok u creertikoʼob le baʼaxoʼob ku kaʼansikoʼ yéetel tsʼoʼok u kʼexik u kuxtaloʼob, baʼaleʼ le fariseoʼoboʼ láayliʼ táan u chʼaʼpachtik u disipuloʼob Jesuseʼ.
20 Bey túunoʼ, wa le Biblia aʼalik táan k-beetik baʼax maʼ maʼaloboʼ, unaj k-kʼexik k-kuxtal. Tsʼoʼoleʼ ken k-kan baʼax u kʼáat Jéeoba ka k-beeteʼ, unaj k-beetik. Beyoʼ yaan k-kiʼimakkúuntik u yóol Jéeoba yéetel yaan u tsʼáaiktoʼon le kuxtal minaʼan u xuuloʼ.
Koʼox xokik jujunpʼéel tekstoʼob jeʼel u yáantkoʼon utiaʼal maʼ k-beetik baʼax kʼaaseʼ: Salmo 119:9-11; Proverbios 3:5-7, yéetel 12:15.
Maʼ xaaneʼ jeʼel u yutstal xan ta wicheʼ
UʼUY U TʼAAN DIOS UTIAʼAL A KUXTAL MANTATSʼ
¿Baʼax unaj k-beetik utiaʼal u kʼamkoʼon Dios?
Le Bibliaoʼ ku yaʼalik baʼax uts tu tʼaan Dios yéetel baʼaxoʼob u pʼekmaj.
LE MÁAX KU KANANOʼ
¿Jeʼel wa u páajtal k-lúubul utsil tiʼ Dioseʼ?
Kex yaan tuʼux fallarnajoʼobeʼ, u tsikbalil Job, Lot yéetel Davideʼ ku yeʼesik baʼax ku páaʼtik Dios tiʼ wíinik.
U libroi tsikbaliloʼob tiʼ le Bibliaoʼ
