XOOKIL 37
Unaj k-kʼaʼajsik Jéeoba bey xan u Hijo
KOʼOX aʼalikeʼ ku siʼibiltech junpʼéel baʼal jach koʼoj u tojol. ¿Bix ken a wuʼuyilaba?... ¿Chéen wa teʼ súutukil ken a tsʼáa u diosboʼotikiloʼ tsʼoʼoleʼ ka tuʼubsik? ¿Wa yaan a kʼaʼajsik le máax síitech bey xan le baʼax siʼibtechoʼ?...
2 Jéeoba Dioseʼ tu síiajtoʼon junpʼéel baʼal jach koʼoj u tojol. Tu túuxtaj u Hijo utiaʼal u kʼub u kuxtal t-oʼolal. ¿A wojel wa baʼaxten kʼaʼabéetchaj u kʼubik u kuxtal t-oʼolal?... Leloʼ junpʼéel baʼax jach kʼaʼabéet k-naʼatik tubeel.
3 Jeʼex t-kanil teʼ xookil 23, Adaneʼ kʼebanchaji, tumen maʼ tu yuʼubaj u tʼaan Diosiʼ. Yéetel letiʼeʼ tu máansajtoʼon le kʼebanoʼ, tumen u paalaloʼon. ¿Baʼax a tuklik túun kʼaʼabéettoʼon?... Jeʼel u páajtal u yaʼalaʼaleʼ kʼaʼabéet u jeel k-taata, juntúul máax minaʼan u kʼeban kuxlaj way Luʼumeʼ. ¿Máax a tuklik jeʼel u páajtal u beetkeʼ?... Jesús.
4 Jéeobaeʼ tu túuxtaj Jesús way Luʼum utiaʼal ka kʼuchuk u beetuba k-taata tu jeel Adaneʼ. Le Bibliaoʼ ku yaʼalik: «‹Adán, le yáax wíinikoʼ, suunaj juntúul kuxaʼan máak›. Le u tsʼook Adanoʼ kʼuch u beetuba juntúul kaʼanilbeʼen máak ku tsʼáaik kuxtal». ¿Máax le yáax Adanoʼ?... Letiʼe máax beetaʼab tumen Dios yéetel luʼumoʼ. ¿Máax le u kaʼatúul Adanoʼ?... Jesús. Le Bibliaoʼ bey u yeʼesik le ken u yaʼal: «Le yáax wíinikoʼ [Adán] tiʼ luʼum u taal, tumen yéetel luʼum beetaʼabi; le uláakʼ juntúuloʼ [Jesús] teʼ kaʼan taaloʼ» (1 Corintoiloʼob 15:45, 47; Génesis 2:7).
5 Dioseʼ tu chʼaʼaj u kuxtal Jesús yaan kaʼach teʼ kaʼanoʼ ka tu máansaj ichil u nakʼ María. Le oʼolal le ka síij Jesuseʼ maʼ páakʼ u kʼeban Adán tiʼiʼ (Lucas 1:30-35). Le oʼolal le ka síijoʼ juntúul angeleʼ tu yaʼalaj tiʼ le j-kanan tamanoʼoboʼ: ‹Bejlaʼeʼ tsʼoʼok u síijil juntúul a Salvadoreʼex› (Lucas 2:11). Baʼaleʼ utiaʼal ka páajchajak u salvartikoʼon le chaambalaʼ, ¿baʼax unaj u yáax úuchul?... Kʼaʼabéet u nojochtal yéetel u chukik u nojoch máakil jeʼex Adán kaʼacheʼ. Beyoʼ yaan u kʼuchul u beetuba le ‹u kaʼatúul Adanoʼ›.
6 Jesús, le k-Salvadoroʼ, yaan u kʼuchul u beetuba ‹k-Taata utiaʼal mantatsʼ› jeʼex u yaʼalik le Bibliaoʼ (Isaías 9:6, 7). Bey túunoʼ Jesuseʼ tumen minaʼan u kʼebaneʼ yaan u pʼáatal letiʼ k-taata, maʼ Adaniʼ tumen letiʼeʼ kʼebanchaji. Jeʼex k-ilkoʼ jeʼel u páajtal k-yéeyik le ‹u kaʼatúul Adán› utiaʼal k-taataintoʼ. Jesuseʼ yaan xan u Taata, Jéeoba Dios.
¿Tiʼ baʼax kaʼach chíikpaj Adán yéetel Jesús, yéetel baʼaxten leloʼ jach maʼalob?
7 Ken kaanbalnakoʼon tiʼ Jesuseʼ, k-kʼamik bey k-Salvadoreʼ. ¿Kʼajaʼan wa tech tiʼ baʼax unaj k-salvartaʼal?... Tiʼ le kʼeban yéetel tiʼ le kíimil tu máansajtoʼon Adanoʼ. Le u kuxtal Jesús tu kʼubaj t-oʼolaloʼ, ku yaʼalaʼaltiʼ u boʼolil jel maan. Jéeobaeʼ tu tsʼáaj le boʼol utiaʼal u tupik k-kʼebanoʼ (Mateo 20:28; Romailoʼob 5:8; 6:23).
8 ¿Máasaʼ maʼ k-kʼáat k-tuʼubs le baʼax tu beetaj Dios yéetel u Hijo t-oʼolaloʼ?... Jesuseʼ tu yeʼesaj tiʼ u disipuloʼob bix unaj u kʼaʼajsikoʼob le baʼax tu beetoʼ. Koʼox ilik bixi.
9 Tukulteʼ tiaʼanech tiʼ junpʼéel cuarto yaan tu kaʼapʼéel pisoil junpʼéel naj tu kaajil Jerusaleneʼ. Tsʼoʼok u yáakʼabtal. Jesús yéetel u apostoloʼobeʼ kulukbaloʼob tu baʼpach junpʼéel mesa tuʼux tsʼaʼan kʼáaʼtbil taman, jaajay pakʼachtbil waaj yéetel chak vino. U muchʼmubaʼob utiaʼal junpʼéel kʼiinbesaj jach kʼaʼanaʼan. ¿A wojel wa baʼaxten?...
10 Lelaʼ ku meyaj utiaʼal u kʼaʼajsikoʼob le baʼax tu beetaj Jéeoba tu yoʼolal le israelitaʼob palitsiltaʼanoʼob kaʼach Egiptooʼ. Teʼ kʼiin jeʼeloʼ Jéeobaeʼ tu yaʼalaj tiʼ u kaajal: ‹Cada familiaeʼ unaj u kíimsik juntúul taman yéetel unaj u witsʼik u kʼiʼikʼel tu marcoil u yotoch›. Tsʼoʼoleʼ tu yaʼalajtiʼob: ‹Ookkeʼex ta wotocheʼex a jaanteʼex le tamanoʼ›.
¿Bix kanáantaʼabik le israelitaʼob tumen le u kʼiʼikʼel le tamanoʼ?
11 Le israelitaʼoboʼ bey tu beetiloʼoboʼ, yéetel teʼ áakʼab jeʼeloʼ u ángel Dioseʼ ook tu kaajil Egipto. Óoliʼ tiʼ tuláakal le najoʼoboʼ le angeloʼ tu kíimsaj le yáax paaloʼ. Baʼaleʼ le ken u yil yaan kʼiʼikʼ tu marcoil le joonajoʼ, maʼatech u yookliʼ yéetel mix juntúul paal ku kíimiliʼ. Faraón, u reyil Egiptoeʼ, jach jaʼakʼ u yóol yoʼolal le baʼax tu beetaj u ángel Jéeobaoʼ, ka tu yaʼalaj tiʼ le israelitaʼoboʼ: ‹Xeeneʼex. ¡Jóokʼeneʼex tiʼ le kaajaʼ!›. Letiʼob túuneʼ tu chʼaʼaj u nuʼukuloʼobeʼ ka tu naʼaksoʼob yóokʼol u yalakʼ camelloʼob yéetel u yalakʼ burroʼob.
12 Jéeobaeʼ maʼ u kʼáat ka tuʼubsaʼak tumen u kaajal bix úuchik u jóoʼsik Egiptoiʼ. Le oʼolaleʼ tu yaʼalajtiʼob: ‹Juntéen tiʼ cada jaʼabeʼ unaj a kʼiinbeskeʼex le áakʼabaʼ›. Lelaʼ kʼuch kʼaj óoltbil bey u kʼiinbesajil Pascuaeʼ, yéetel ku kʼaʼajaltiʼobeʼ teʼ áakʼab jeʼeloʼ u ángel Dioseʼ «tu tséeltaj» le najoʼob tuʼux bonaʼan u marcoiloʼob yéetel kʼiʼikʼoʼ (Éxodo 12:1-13, 24-27, 31).
13 Jesús yéetel u apostoloʼobeʼ tu kʼaʼajsoʼob le ka tu kʼiinbesoʼob le Pascuaoʼ. Ka tsʼoʼokeʼ Jesuseʼ tu káajsaj junpʼéel túumben kʼiinbesaj. Baʼaleʼ táanileʼ, Judas, le apóstol traicionartoʼ, lukʼ ichiloʼob. Tsʼoʼoleʼ Jesuseʼ tu chʼaʼaj junpʼéel tiʼ le waaj pʼaatloʼ, ka tsʼoʼok u beetik junpʼéel oracioneʼ tu xetʼaj le waajoʼ ka tu tsʼáaj tiʼ u disipuloʼob. Tu yaʼalajtiʼob: «Chʼaʼex, jaanteʼex». Tsʼoʼoleʼ tu yaʼalaj xan tiʼob: ‹Lelaʼ u kʼáat u yaʼal in wíinklil ken in kʼub ta woʼolaleʼex ken kíimken›.
14 Ka tsʼoʼokeʼ Jesuseʼ tu chʼaʼaj junpʼéel copa vino. Ka tsʼoʼok u beetik uláakʼ oracioneʼ, tu tsʼáaj le copa tiʼoboʼ, ka tu yaʼalaj: «Ukʼeʼex tuláakleʼex». Yéetel tu yaʼalaj: ‹Le vinoaʼ u kʼáat u yaʼal in kʼiʼikʼel ken in wek maʼ kun xáantal utiaʼal in salvartikeʼex tiʼ a kʼebaneʼex. Beeteʼex mantatsʼ utiaʼal a kʼaʼajsikeneʼex› (Mateo 26:26-28; 1 Corintoiloʼob 11:23-26).
¿Bix jeʼel u yáantkoʼon u kʼiʼikʼel Jesús tu ketaj yéetel le vinooʼ?
15 ¿Ta tsʼáaj cuenta wa Jesuseʼ tu yaʼalaj tiʼ u disipuloʼob unaj u seguer u beetkoʼob utiaʼal u kʼaʼajsikoʼob?... Desde teʼ kʼiin jeʼeloʼ, xuʼul u beetaʼal le Pascuaoʼ, tumen letiʼe baʼax tu beetaj Jesús kun seguer u kʼaʼajsaʼaloʼ. Le kʼiinbesajil jeʼelaʼ kʼaj óolaʼan bey u Ookʼin Janal Yuumtsileʼ. Bejlaʼeʼ kʼaj óolaʼan xan bey Kʼaʼajsajileʼ. ¿Baʼaxten?... Tumen ku meyaj utiaʼal k-kʼaʼajsik le baʼax tu beetaj Jesús yéetel Jéeoba Dios t-oʼolaloʼ.
16 Le waajoʼ unaj u beetik k-tuukul tiʼ u wíinklil Jesús tu kʼubaj utiaʼal ka béeychajak u yantaltoʼon kuxtal minaʼan u xuuloʼ. ¿Kux túun le vinooʼ?... Le vinooʼ unaj u kʼaʼajsiktoʼon u tojol u kʼiʼikʼel Jesús. U kʼiʼikʼeleʼ maas yaan u tojol tiʼ u kʼiʼikʼel le taman kíimsaʼab teʼ Pascua tu luʼumil Egiptooʼ. ¿A wojel wa baʼaxten?... Le Bibliaoʼ ku yaʼalikeʼ tu yoʼolal u kʼiʼikʼel Jesuseʼ ku páajtal u perdonartaʼal k-kʼeban. Le ken láaj luʼsaʼak le kʼebanoʼ, mix máak kun kʼojaʼantal, kun chʼíijil, mix kun kíimil. Lelaʼ letiʼe baʼax unaj k-máansik t-tuukul teʼ Kʼaʼajsajiloʼ.
17 ¿Tuláakal wa le máax ku bin teʼ Kʼaʼajsajil unaj u jaantik le waaj yéetel u yukʼik le vinooʼ?... Jesuseʼ tu yaʼalaj tiʼ le máaxoʼob ku jaantkoʼob le waaj yéetel ku yukʼikoʼob le vinooʼ: ‹Teʼexeʼ yaan a wantaleʼex tin reino yéetel yaan a kutaleʼex tiʼ tronoʼob teʼ kaʼanoʼ› (Lucas 22:19, 20, 30). Lelaʼ u kʼáat u yaʼaleʼ yaan u beetik u reyiloʼob teʼ kaʼan yéetel Jesusoʼ. Le oʼolaleʼ chéen le máaxoʼob kun binoʼob gobernar yéetel Jesús teʼ kaʼan jeʼel u páajtal u jaantkoʼob le waaj yéetel u yukʼikoʼob le vinooʼ.
18 Baʼaleʼ tak le máaxoʼob maʼatech u jaantkoʼob le waaj yéetel maʼatech u yukʼikoʼob le vino kʼaʼabéet u binoʼob teʼ Kʼaʼajsajiloʼ. ¿A wojel wa baʼaxten?... Tumen Jesuseʼ tu tsʼáaj u kuxtal yoʼolal tuláakal. Ken xiʼikoʼon teʼ Kʼaʼajsajiloʼ, k-eʼesik maʼ tubaʼantoʼoniʼ. Yéetel k-kʼaʼajsikeʼ Dioseʼ tu síiajtoʼon junpʼéel baʼal jach koʼoj u tojol.
Jujunpʼéel tekstoʼob ku yeʼeskoʼob le bukaʼaj koʼojil u tojol le u kuxtal Jesús tu tsʼáaj t-oʼolaloʼ 1 Corintoiloʼob 5:7; Efesoiloʼob 1:7; 1 Timoteo 2:5, 6, yéetel 1 Pedro 1:18, 19.
Maʼ xaaneʼ jeʼel u yutstal xan ta wicheʼ
JESÚS: LE BEJOʼ, LE JAAJOʼ YÉETEL LE KUXTALOʼ
U Ookʼin Janal Yuumtsil
Jesuseʼ tu káajsaj junpʼéel kʼiinbesaj unaj u beetaʼal cada jaʼab tu kʼiinil 14 tiʼ nisán tumen u disipuloʼob.
U libroi tsikbaliloʼob tiʼ le Bibliaoʼ
