DIOSEʼ tu tsʼáaj Adán yéetel Eva tu jardinil Edén. Kex tu kaʼatúulaloʼob maʼ tu yuʼuboʼob tʼaan yéetel kíimoʼobeʼ, tu tsʼáaj u páajtalil tiʼ u paalaloʼob u kuxtaloʼob utiaʼal mantatsʼ tiʼ junpʼéel Paraíso. Le Bibliaoʼ ku yaʼalik: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Salmo 37:29).

² Le Bibliaoʼ ku tʼaan tiʼ «túumben kaʼanoʼob» yéetel tiʼ junpʼéel «túumben luʼum» (Isaías 65:17; 2 Pedro 3:13). Le «kaʼanoʼob» ku yaʼalik yanoʼob bejlaʼoʼ letiʼe u gobierno wíinikoʼ, baʼaleʼ teʼ «túumben kaʼanoʼob» kun antaloʼ Jesucristo yéetel uláakʼ máakoʼob kun nuʼuktik. ¡Bukaʼaj jatsʼutsil ken k-kuxtal ken nuʼuktaʼak le Luʼum tumen le túumben kaʼanoʼob wa u Reino Diosoʼ!

³ ¿Baʼax túun le ‹túumben luʼumoʼ›?... Letiʼe máaxoʼob utsoʼob yaabiltmil Jéeobaoʼ. Teʼ Bibliaoʼ le tʼaan «luʼumoʼ», yaan horaeʼ ku meyaj utiaʼal u chʼaʼchiʼitaʼal le máakoʼob kajaʼanoʼob ichiloʼ (Génesis 11:1; Salmo 66:4; 96:1). Bey túunoʼ le máaxoʼob kun kuxtaloʼob teʼ túumben luʼumoʼ, way yóokʼol kaab kun yantaloʼobeʼ.

⁴ Teʼ kʼiinoʼob jeʼeloʼ yaan u xuʼulsaʼal tiʼ tuláakal le kʼasaʼan máakoʼoboʼ. Kʼaʼajaktecheʼ le ka taal le Búulkabal tu kʼiiniloʼob Noeoʼ láaj xuʼulsaʼab tiʼ le kʼasaʼan máakoʼoboʼ. Yéetel jeʼex tsʼoʼok k-kanikoʼ, le máaxoʼob kʼasaʼanoʼob yanoʼob teʼ kʼiinoʼobaʼ yaan u xuʼulsaʼaloʼob teʼ Armagedonoʼ. Beoraaʼ koʼox ilik bix le kuxtal kun antal teʼ túumben luʼum ken u tsʼáa Diosoʼ.

 ⁵ ¿A kʼáat wa kuxtal utiaʼal mantatsʼ teʼ jatsʼuts luʼum ken u tsʼáa Diosoʼ?... Bejlaʼeʼ mix juntúul doctor jeʼel u yáantkoʼon utiaʼal ka kuxlakoʼon mantatsʼeʼ. Minaʼan xan mix junpʼéel tsʼaak jeʼel u yáantkoʼon utiaʼal maʼ k-kíimileʼ. Chéen baʼax jeʼel u yáantkoʼon utiaʼal maʼ k-kíimileʼ letiʼe k-natsʼikba tiʼ Diosoʼ. Jesús, le Maʼalob j-Kaʼansajoʼ, ku yaʼalik bix jeʼel u páajtal k-beetkeʼ.

⁶ Koʼox kaxtik teʼ Biblia u libroil Juan, capítulo 17, versículo 3. Teʼeloʼ k-ilik baʼax ku yaʼalik Jesusiʼ: «Lelaʼ letiʼe baʼax ku tsʼáaik kuxtal minaʼan u xuuloʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ».

⁷ Jeʼex tu yaʼalil Jesusoʼ, ¿baʼax unaj k-beetik utiaʼal k-kuxtal minaʼan u xuul?... Yáaxeʼ unaj k-kʼaj óoltik Jéeoba, k-Taata yaan teʼ kaʼanoʼ, yéetel k-kʼaj óoltik u Hijo, le máax tu tsʼáaj u kuxtal t-oʼolaloʼ. Leloʼ u kʼáat u yaʼaleʼ unaj k-xokik le Bibliaoʼ. Le libro ka xokik, ku kʼaabaʼtik, KAANBALNAKOʼON TIʼ LE MAʼALOB J-KAʼANSAJOʼ, ku yáantkoʼon k-beete.

⁸ K-kʼaj óoltik Jéeobaeʼ, ¿bix jeʼel u yáantkoʼon utiaʼal k-kuxtal minaʼan u xuuleʼ?... Jeʼex u kʼaʼabéetil k-janal sáamsamaleʼ, bey xan kʼaʼabéetil k-kaanbal tiʼ Jéeoba sáamsamal. Le Bibliaoʼ ku yaʼalik: «Maʼ chéen yéetel waaj unaj u kuxtal wíinikiʼ, baʼaxeʼ tak yéetel tuláakal tʼaan ku jóokʼol tu chiʼ Jéeoba» (Mateo 4:4).

⁹ Kʼaʼabéet xan k-kʼaj óoltik Jesucristo, tumen Dios túuxt utiaʼal u luʼsik k-kʼeban. Le Bibliaoʼ ku kaʼansikeʼ «minaʼan salvación tu yoʼolal uláakʼ máak», yéetel ku yaʼalik xaneʼ «le máax ku tsʼáaik u fe tiʼ le Paaloʼ yaan u yantal kuxtal minaʼan u xuul tiʼ» (Baʼaxoʼob 4:12; Juan 3:36). Baʼaleʼ ¿baʼax u kʼáat u yaʼal u ‹tsʼáaik u fe máak› tiʼ Jesús?... U kʼáat u yaʼal k-creertik chéen letiʼ, yéetel k-naʼatik chéen tu yoʼolal letiʼ jeʼel u yantaltoʼon kuxtal minaʼan u xuuleʼ. ¿Jach wa tu jaajil k-creertik leloʼ?... Wa beyoʼ, maʼ kun xuʼulul k-kaanbal sáamsamal tiʼ Jesús, le Maʼalob j-Kaʼansajoʼ, yéetel yaan k-beetik baʼax ku yaʼalik.

 ¹⁰ Junpʼéel bix jeʼel a maas kaanbal tiʼ Jesuseʼ, letiʼ a xokik yaʼab u téenel le libroaʼ. Jach ilawil tuláakal le dibujoʼoboʼ yéetel tukult baʼax u kʼáat u kaʼanse. Ilawil a núukik le kʼáatchiʼob ku taaskoʼ. Xok xan le libro yéetel a maama wa a papaoʼ. Wa mix juntúul tiʼ letiʼob ku páajtal u xokikoʼob ta wéeteleʼ, xok yéetel máax maas yaan u jaʼabil tiʼ teech wa yéetel uláakʼ mejen paalal. Beyoʼ maʼ xaaneʼ jeʼel a wáantik wa máax u kan baʼax ku yaʼalik Jesús unaj u beetik utiaʼal u kuxtal teʼ túumben luʼum ken u tsʼáa Jéeoba Diosoʼ. ¿Máasaʼ lelaʼ jach jatsʼuts?...

¹¹ Le Bibliaoʼ ku yaʼalikeʼ «le yóokʼol kaabaʼ táan u bin u xuʼulul», baʼaleʼ ku kaʼansik xan bix jeʼel u páajtal k-kuxtal utiaʼal mantatsʼ teʼ túumben luʼum ken u tsʼáa Diosoʼ. Ku yaʼalikeʼ «le máax ku beetik baʼax u kʼáat Dioseʼ yaan u pʼáatal utiaʼal mantatsʼ» (1 Juan 2:17). Bey túunoʼ, ¿baʼax unaj k-beetik utiaʼal k-antal teʼ túumben luʼum ken u tsʼáa Diosoʼ?... K-kʼaj óoltik tubeel Jéeoba yéetel Jesús, u Hijo, yéetel k-beetik le baʼaxoʼob k-kanikoʼ. K-páaʼtik ka u yáantech u xookil le libroaʼ utiaʼal ka kuxlakech teʼ Paraísooʼ.