Sukuʼuneʼex yéetel kiikeʼex:

Koʼoneʼex tuklikeʼ toʼoneʼ apóstoloʼon, tiʼ waʼalakbaloʼon tu Montañail le Olivoʼoboʼ. Táant u chíikbeskuba Jesús tiʼ toʼoneʼ, antes tiʼ u bin teʼ kaʼanoʼ ku yaʼaliktoʼon: «Yaan a kʼamkeʼex páajtalil kéen kʼuchuk le espíritu santo ta wóokʼoleʼexoʼ, yéetel yaan a tʼaaneʼex tin woʼolal tu kaajil Jerusalén, tiʼ tuláakal u luʼumil Judea, tu luʼumil Samaria bey xan tak tu maas náachil le luʼumaʼ» (Hech. 1:8). ¿Bix jeʼel k-uʼuyikba wa tiʼ toʼon ka u yaʼal leloʼ?

Maʼ xaaneʼ jeʼel k-sajaktal yoʼolal le nojoch meyajaʼ yéetel jeʼel k-aʼalikeʼ: «¿Bix jeʼel u páajtal k-kʼaʼaytaj ‹tak tu maas náachil le luʼumaʼ›? Si maʼ yaʼaboʼoniʼ». Maʼ xaan xaneʼ jeʼel u kʼaʼajaltoʼon le baʼax tu yaʼalaj Jesús le áakʼab antes u kíimsaʼaloʼ: «Le esclavooʼ maʼ maas nojoch tiʼ u tsʼuuliliʼ. Wa teen tsʼoʼok in chʼaʼpachtaʼal tumen le máakoʼoboʼ teʼexeʼ yaan xan a chʼaʼpachtaʼaleʼex. Wa letiʼob tsʼoʼok u beetkoʼob baʼax kin waʼalikeʼ yaan xan u beetkoʼob baʼax ka waʼalikeʼex. Chéen baʼaleʼ tuláakal le baʼaloʼobaʼ yaan u beetkoʼob ta contraʼex tu yoʼolal in kʼaabaʼ, tumen letiʼobeʼ maʼ u kʼaj óoloʼob le Máax túuxtenoʼ» (Juan 15:20, 21). Yoʼolal leloʼ maʼ xaaneʼ jeʼel k-aʼalikeʼ: «¿Bix ken k-kʼaʼaytaj wa yaan máaxoʼob pʼekmiloʼon yéetel táan k-sen chʼaʼpachtaʼal?».

Teʼ kʼiinoʼobaʼ toʼoneʼ k-tuukul xan tiʼ le kʼáatchiʼob tsʼoʼok k-aʼalikoʼ. Jéeobaeʼ u kʼubéentmajtoʼon ka k-kʼaʼayt tubeel u Reino «tak tu maas náachil le luʼumaʼ» yéetel ka kʼuchuk «tu yiknal u kajnáaliloʼob tuláakal le kaajoʼoboʼ» (Mat. 28:19, 20). Le Bibliaoʼ ku yaʼalikeʼ yaan k-sen chʼaʼpachtaʼal. Le oʼolaleʼ, ¿bix túun jeʼel u páajtal k-beetik le nojoch meyaj kʼubéentaʼantoʼonoʼ?

U libroil Hechoseʼ ku tsikbaltik bix úuchik u yáantaʼal le apóstoloʼob tumen Jéeoba yéetel u maasil cristianoʼob teʼ yáax siglooʼ. Letiʼobeʼ áantaʼaboʼob utiaʼal ka u tsʼoʼokbesoʼob le meyaj kʼubéentaʼantiʼoboʼ. Le libroaʼ beetaʼan utiaʼal u yáantkoʼon k-xakʼalxokt u libroil Hechos yéetel utiaʼal ka tuukulnakoʼon tiʼ le baʼax úuch tiʼ le yáax cristianoʼoboʼ. Yaan xan k-ilik tiʼ baʼaxoʼob chíikaʼan le yáax cristianoʼob tiʼ le máaxoʼob meyajtik Dios teʼ kʼiinoʼobaʼ, jeʼex tiʼ bix u kʼaʼaytajoʼob yéetel tiʼ bix u nuʼuktaʼal le meyaj ku beetkoʼoboʼ. Le kéen k-xakʼalt tuláakal le jeʼelaʼ yaan u yáantkoʼon maas confiar de ke Jéeoba nuʼuktik le meyaj ku beetaʼal ichil u kaajal teʼ kʼiinoʼobaʼ.

U libroil Hechoseʼ yaan u yáantkoʼon k-maas kʼub k-óol de ke Jéeobaeʼ yaan u yáantkoʼon yéetel u espíritu santo utiaʼal u chúukpajal k-óol. K-ojel xaneʼ yaan u yáantkoʼon utiaʼal ka seguernak k-kaʼansik «tubeel u Reino Dios» yéetel k-áantik uláakʼ máakoʼob utiaʼal ka u salvartubaʼob (Hech. 28:23; 1 Tim. 4:16).