1, 2. ¿Baʼax oʼolal táan kaʼach u bin Saulo tu kaajil Damasco?

 JUNMÚUCHʼ máakoʼobeʼ jach pʼujaʼanoʼob táan u binoʼob tu kaajil Damasco. Letiʼobeʼ nukaʼaj u beetoʼob junpʼéel baʼal jach kʼaas. U chʼaʼtukultmoʼob u jóoʼskoʼob u discípuloʼob Jesús tu yotochoʼob, u mixbaʼalkúuntikoʼob, u jaʼajatsʼkoʼob yéetel u kʼaxkoʼob utiaʼal u jíiltik u bisoʼob tu táan le Sanedrín utiaʼal u castigartaʼaloʼoboʼ.

² Le máax nuʼuktik le máakoʼobaʼ Saulo. Maʼ sen úuch tiʼ lelaʼ letiʼeʼ tu apoyartaj u kíimsaʼal Esteban, juntúul u discípulo Jesús (Hech. 7:57–8:1). a Letiʼeʼ maʼ conforme kaʼach u chʼaʼpachtik chéen le discípuloʼob yanoʼob Jerusalénoʼ. Le oʼolal tu chʼaʼpachtaj xan le kajaʼanoʼob tiʼ uláakʼ lugaroʼoboʼ. Le baʼax ku tsʼíiboltik kaʼachoʼ letiʼe u xuʼulsik tiʼ tuláakal le máaxoʼob táakaʼanoʼob ichil «Le Bejoʼ», tumen ku tuklik kaʼacheʼ junpʼéel secta (Hech. 9:1, 2; ilawil le cuadro « ¿Baʼaxten bin Saulo tu kaajil Damasco?»).

3, 4. 1) ¿Baʼax úuch tiʼ Saulo? 2) ¿Baʼax kʼáatchiʼiloʼob ken k-il u núukil?

³ Le junmúuchʼ máakoʼob táan kaʼach u binoʼob Damascooʼ chéen ka tu yiloʼob u téek léembal tu baʼpach Saulo junpʼéel sáasil ku taal desde teʼ kaʼanoʼ. Letiʼobeʼ jach jaʼakʼ u yóoloʼob, pʼáat maʼ tu páajtal u tʼaanoʼob. Saulo túuneʼ bin u sáasilil u yicheʼ ka lúub teʼ luʼumoʼ. Teʼ súutukoʼ tu yuʼubaj junpʼéel tʼaan táan u yaʼaliktiʼ: «Saulo, Saulo, ¿baʼaxten táan a chʼaʼpachtiken?». Letiʼeʼ kex jach jakʼaʼan u yóoleʼ tu núukaj: «¿Máaxech, Yuumtsil?». Le baʼax núukaʼabtiʼoʼ tu beetaj u maas péek u yóol: «Teen Jesús, le máax ka chʼaʼpachtikoʼ» (Hech. 9:3-5; 22:9).

⁴ ¿Baʼax ku kaʼansiktoʼon le baʼax tu yáax aʼalaj Jesús tiʼ Saulooʼ? ¿Bix jeʼel u yáantkoʼon k-kʼaʼajsik le baʼaxoʼob úuch le ka tu beetuba cristianoil Saulooʼ? ¿Baʼax k-kanik tiʼ le baʼax tu beetaj le yáax cristianoʼob le ka yanchajtiʼob jeetsʼeliloʼ?

5, 6. ¿Baʼax ku kaʼansiktoʼon le baʼax tu yaʼalaj Jesús tiʼ Saulooʼ?

⁵ Jesúseʼ le ka tu tʼanaj Saulo tu bejil Damascoeʼ, maʼ tu yaʼalajtiʼ: «¿Baʼaxten táan a chʼaʼpachtik in discípuloʼob?». Baʼaxeʼ tu yaʼalajtiʼ: «¿Baʼaxten táan a chʼaʼpachtiken?» (Hech. 9:4). Lelaʼ ku kaʼansiktoʼoneʼ Jesúseʼ ku yuʼubik bey tiʼ letiʼ ku yúuchul le problemas ku máansik u discípuloʼoboʼ (Mat. 25:34-40, 45).

⁶ Wa teech táan a muʼyajtik wa baʼax ikil a beetik baʼax ku yaʼalik Cristoeʼ kʼaʼajaktecheʼ Jéeoba yéetel letiʼeʼ jach u yojloʼob baʼax ku yúuchultech (Mat. 10:22, 28-31). Maʼ xaaneʼ maʼ ken u jáan luʼsoʼobtech le baʼax beetik a muʼyajoʼ. Kʼaʼajaktoʼoneʼ Jesúseʼ tu yilaj tiaʼan kaʼach Saulo le ka kíimsaʼab Estebanoʼ yéetel tu yilaj xan bix tu jíiltil le sukuʼunoʼob yanoʼob Jerusalén utiaʼal u jóoʼskoʼob tu yotochoʼoboʼ (Hech. 8:3). Teʼ súutukoʼ maʼ tu salvartaj u discípuloʼobiʼ, pero yéetel u yáantaj u Taataeʼ tu tsʼáaj espíritu santo tiʼob utiaʼal u chúukpajal u yóoloʼob.

7. ¿Baʼax unaj k-beetik kéen chʼaʼpachtaʼakoʼon?

⁷ Utiaʼal u chúukpajal a wóol le kéen chʼaʼpachtaʼakecheʼ beet le kanpʼéel baʼaloʼobaʼ: 1) chʼaʼtukult u chúukpajal a wóol tiʼ Jéeoba kex jeʼel baʼaxak ka úuchkeʼ. 2) Kʼáat u yáantaj ich oración (Fili. 4:6, 7). 3) Pʼat tu kʼab Jéeoba le baʼax ku yúuchultechoʼ, maʼ a vengarkaba (Rom. 12:17-21). 4) Confiarnen tiʼ Jéeoba, letiʼeʼ yaan u tsʼáaiktech u muukʼil utiaʼal u chúukpajal a wóol tak ken u luʼs le baʼax beetik a sufriroʼ (Fili. 4:12, 13).

8, 9. ¿Bix wal tu yuʼubiluba Ananías ka tu yojéeltaj baʼax ken u beete?

⁸ Ka tsʼoʼok u yaʼalik Saulo: «¿Máaxech, Yuumtsil?». Jesúseʼ tu núukajtiʼ: «Líiʼkech ka ookkech teʼ kaajoʼ, teʼeloʼ tiʼ kun aʼalbiltech baʼax kʼaʼabéet a beetkiʼ» (Hech. 9:6). Como pʼáat minaʼan u sáasileʼ yanchaj u maʼachal tu kʼab utiaʼal u bisaʼal Damasco. Teʼeloʼ máan tres días táan u ayunar yéetel  táan u orariʼ. Jesús túuneʼ tu tʼanaj Ananías, juntúul discípulo kajaʼan Damasco, ka tu tsikbaltajtiʼ jujunpʼéel baʼaloʼob yoʼolal Saulo. Le Bibliaoʼ ku yaʼalikeʼ jach ku «yúuchul tʼaan maʼalob tu yoʼolal [Ananías] ichil tuláakal le judíoʼob kajaʼanoʼob» Damascooʼ (Hech. 22:12).

⁹ Maʼ xaaneʼ Ananíaseʼ jach kiʼimakchaj u yóol, chéen baʼaleʼ sajakchaj xan waleʼ. ¿Baʼaxten? Tumen Jesucristo, u Poolil le múuchʼuliloʼ, tʼaanaj tu yéetel utiaʼal u kʼubéentaʼaltiʼ junpʼéel meyaj jach especial. Chéen baʼaleʼ junpuliʼ maʼ táan u páaʼtik kaʼach le meyaj aʼalaʼabtiʼ ka u beetoʼ. Le oʼolal le ka aʼalaʼabtiʼ tumen Jesús ka xiʼik u yil Sauloeʼ tu yaʼalaj: «Yuumtsil, yaʼab baʼaloʼob tsʼoʼok in wuʼuyik u yaʼalaʼal tu yoʼolal le máakoʼ, bey xan bukaʼaj loob tu beetaj tiʼ le máaxoʼob  santoʼob yanoʼob tu kaajil Jerusalénoʼ. Wayeʼ tsʼaʼan páajtalil tiʼ tumen u nuuktakil le sacerdoteʼob utiaʼal ka u kʼal cárcel le máaxoʼob ku chʼaʼchiʼitkoʼob a kʼaabaʼoʼ» (Hech. 9:13, 14).

10. ¿Baʼax jeʼel k-kanik tiʼ le jatsʼuts modos tu yeʼesaj Jesús le ka tʼaanaj yéetel Ananíasoʼ?

¹⁰ Jesúseʼ maʼ tu kʼeyaj Ananías yoʼolal le baʼax tu yaʼaloʼ, baʼaxeʼ tu tsolajtiʼ tubeel baʼax ken u beete. Tsʼoʼoleʼ yéetel utsil tu tsolaj xan tiʼ baʼax oʼolal kun bin u yil Saulo. Tu yaʼalajtiʼ: «Letiʼeʼ bey junpʼéel nuʼukul in yéeymaj utiaʼal ka u bis in kʼaabaʼ tiʼ le j-táanxel luʼumiloʼoboʼ, tiʼ le reyoʼoboʼ bey xan tiʼ le israelitaʼoboʼ. Teneʼ yaan in weʼesiktiʼ bukaʼaj baʼaloʼob ken u muʼyajt yoʼolal in kʼaabaʼ» (Hech. 9:15, 16). Ananíaseʼ maʼ tu tuklaj kaʼatéeniʼ tu séebaʼanil bin u yil Saulo, le máax tsʼoʼok u sen chʼaʼpachtik le cristianoʼoboʼ. Ka kʼucheʼ tu yaʼalajtiʼ: «Saulo, in sukuʼun, Yuumtsil Jesús le máax tu chíikbesuba tiʼ teech teʼ bej tuʼux taalechoʼ, letiʼ túuxten utiaʼal ka suunak u sáasilil a wich bey xan utiaʼal ka chuʼupkech yéetel espíritu santo» (Hech. 9:17).

11, 12. ¿Baʼax k-kanik tiʼ le baʼaxoʼob úuch le ka túuxtaʼab Ananías u yil Saulooʼ?

¹¹ Yaʼab baʼax jeʼel k-kanik tiʼ le baʼaxoʼob úuch le ka túuxtaʼab Ananías tumen Jesús tu yiknal Saulooʼ. Por ejemploeʼ k-kanikeʼ Jesúseʼ ku nuʼuktik le kʼaʼaytaj jeʼex úuchik u prometerkoʼ (Mat. 28:20). Kex bejlaʼa maʼ tu tʼanik mix máakeʼ, láayliʼ táan u nuʼuktik yéetel le esclavo chúukaʼan u yóoloʼ (Mat. 24:45-47). Le esclavo wa le Cuerpo Gobernanteoʼ ku túuxtik publicadoroʼob yéetel precursoroʼob utiaʼal u yáantaʼal le máaxoʼob taak u kʼaj óoltikoʼob Cristooʼ. Tsʼoʼoleʼ jeʼex t-ilil teʼ xook máanikoʼ yaʼab tiʼ le máakoʼobaʼ páajchaj u yáantaʼaloʼob tumen u testigoʼob Jéeoba úuchik u beetkoʼob junpʼéel oración tiʼ Dios (Hech. 9:11).

¹² Ananíaseʼ tu beetaj baʼax aʼalaʼabtiʼ tumen Jesús, le oʼolal bendecirtaʼabi. Kux túun toʼon, ¿k-kʼaʼaytaj wa tiʼ le máakoʼob kex yaan hora maʼ chéen chʼaʼabiloʼ? Jujuntúul sukuʼunoʼobeʼ le kéen kʼaʼaytajnakoʼob joonaj joonajil yéetel le kéen tʼaanakoʼob yéetel máaxoʼob maʼ u kʼaj óoloʼobeʼ jach ku nerviosotaloʼob. Yaan xaneʼ maʼ chéen chʼaʼabil u yilik u kʼaʼaytaj teʼ negocioʼoboʼ, teʼ calleʼoboʼ, tiʼ teléfono wa tiʼ cartaʼob. Wa bey u yúuchultoʼonoʼ maʼalob ka k-beet jeʼex Ananíaseʼ. Kex chan sajak kaʼacheʼ confiarnaj tiʼ Jesús yéetel tu yáantaj Saulo utiaʼal u kʼamik le espíritu santooʼ. b Letiʼeʼ u yojel kaʼacheʼ Sauloeʼ jeʼel u beetkuba u discípulo Jesúseʼ. Toʼon xaneʼ utiaʼal maʼ k-chʼaʼik saajkil kʼaʼaytajeʼ unaj k-confiar de ke Jesús nuʼuktik le kʼaʼaytajoʼ, k-tsʼáaikba tu lugar le máakoʼoboʼ yéetel k-tuklik jeʼel u beetkubaʼob u discípulo Jesús tak le máaxoʼob beetik k-sajaktaloʼ (Mat. 9:36).

13, 14. Wa maʼ okjaʼanakecheʼ, ¿baʼax jeʼel a kanik tiʼ le baʼax tu beetaj Saulooʼ?

¹³ Sauloeʼ tu séebaʼanil joʼopʼ u beetik le baʼax tu kanoʼ. Le ka tsʼoʼok u suʼutul u sáasileʼ okjaʼanaji yéetel tu yilaj u maas kʼaj óoltik le discípuloʼob yanoʼob Damascooʼ. Tsʼoʼoleʼ tu séebaʼanil xan «bin teʼ sinagogaʼoboʼ ka joʼopʼ u tsikbaltik le maʼalob baʼaloʼob yaan yil yéetel Jesúsoʼ». Joʼopʼ xan u yaʼalikeʼ Jesúseʼ «u Paal Dios» (Hech. 9:20).

¹⁴ Wa táan u tsʼaʼabaltech xook yéetel le Bibliaoʼ, chéen baʼaleʼ maʼ okjaʼanakecheʼ, ¿baʼax jeʼel a kanik tiʼ le baʼax tu beetaj Saulooʼ? Jeʼel a kanik kʼaʼabéet a tsʼáaik ichil a kuxtal le baʼax táan a kanik teʼ Bibliaoʼ. Letiʼeʼ tu yilaj le milagro tu beetaj Jesúsoʼ, leloʼ le áant utiaʼal u chʼaʼtuklik u yokjaʼ. Chéen baʼaleʼ yanchaj uláakʼ máaxoʼob tu yiloʼob xan le milagroʼob tu beetaj Jesúsoʼ, pero mix baʼal tu beetoʼob, yanoʼobeʼ hasta tu pʼektoʼob. Por ejemploeʼ le fariseoʼoboʼ tu yiloʼob u tsʼaʼakal juntúul máak tikin u kʼab yéetel uláakʼ judíoʼobeʼ tu yiloʼob u kaʼa kuxkíintaʼal Lázaro (Mar. 3:1-6; Juan 12:9, 10). Chéen baʼaleʼ Sauloeʼ maʼ tu beetaj jeʼex letiʼoboʼ. ¿Baʼaxten? Tumen maas tu respetartaj Dios ke wíinik yéetel jach tu apreciartaj úuchik u chʼaʼabal óotsilil tiʼ tumen Cristo (Fili. 3:8). Jeʼex Sauloeʼ teech xaneʼ kʼaʼabéet a beetik tuláakal le ku páajtal utiaʼal a kʼaʼaytaj yéetel utiaʼal a beetik tuláakal le baʼax ku kʼáataʼal utiaʼal a wokjaʼoʼ.

15, 16. ¿Baʼax ku beetik kaʼach Saulo teʼ sinagogaʼoboʼ, yéetel bix kʼaʼamik tumen le judíoʼob yanoʼob Damasco le baʼax tu kaʼansoʼ?

¹⁵ ¡Chéen máans ta tuukul bix tu yuʼubilubaʼob le judíoʼob le ka tu yiloʼob táan u kaʼansaj Saulo yoʼolal Jesús teʼ sinagogaʼoboʼ! Yanoʼobeʼ jaʼakʼ u yóoloʼob yéetel uláakʼoʼobeʼ jach pʼuʼujoʼob. Letiʼobeʼ hasta tu yaʼaloʼob: «Le máakaʼ, ¿maʼ wa letiʼe máax xuʼulsik kaʼach tiʼ le máaxoʼob yanoʼob Jerusalén ku chʼaʼchiʼitkoʼob le kʼaabaʼaʼ?» (Hech. 9:21). Sauloeʼ tu tsolajtiʼobeʼ «Jesúseʼ jach tu jaajil letiʼ le Cristooʼ», le oʼolal tu tsʼáaj u fe tiʼ letiʼ (Hech. 9:22). Chéen baʼaleʼ kex maʼalob úuchik u tsolik baʼaxten tsʼoʼok u káajal u creertik Cristoeʼ maʼ páajchaj u kʼuchul tu puksiʼikʼal le máakoʼoboʼ tumen letiʼobeʼ jach kaʼanal u yichoʼob yéetel maʼ u kʼáat u pʼatoʼob le baʼaxoʼob suukaʼan u beetkoʼoboʼ. Kex beyoʼ Sauloeʼ maʼ xuʼul u kaʼansajiʼ.

¹⁶ Le ka máan tres añoseʼ le judíoʼob yanoʼob Damascooʼ láayliʼ maʼ u creertoʼob kaʼach le baʼax ku kaʼansik Saulooʼ, baʼaxeʼ hasta tu yóotaj u kíimsoʼob (Hech. 9:23; 2 Cor. 11:32, 33; Gál. 1:13-18). Ka tu yojéeltaj Saulo taak u kíimsaʼaleʼ tu chʼaʼtuklaj u lukʼul teʼ kaajoʼ. Lucaseʼ ku yaʼalikeʼ «le discípuloʼoboʼ» tu tsʼáajoʼob tiʼ junpʼéel xúuxakeʼ ka tu jalkʼesoʼob tiʼ junpʼéel jool yaan tu baʼpakʼil le kaajoʼ (Hech. 9:25). Lelaʼ ku yeʼesikeʼ yaan jujuntúul máakoʼob yanoʼob Damascoeʼ tu creertoʼob le baʼax tu kaʼansaj Saulooʼ ka tu beetubaʼob u discípuloʼob Cristo.

17. 1) ¿Baʼax jeʼel u beetik jujuntúul máakoʼob kéen k-tsikbalttiʼob le baʼax ku kaʼansik le Bibliaoʼ? 2) ¿Baʼax unaj u seguer k-beetik, yéetel baʼaxten?

¹⁷ Le ka káaj a xokik le Bibliaoʼ ta tsikbaltaj tiʼ a láakʼtsiloʼob bey xan tiʼ a amigoʼob le baʼax ka kanikoʼ. Tsʼoʼoleʼ maʼ xaaneʼ ta tuklaj yaan u creerkoʼob tumen  jach jaaj le baʼax ka kanikoʼ. Maʼ xaaneʼ yaneʼ tu creertoʼob, pero uláakʼoʼobeʼ hasta tu pʼektechoʼob (Mat. 10:32-38). Chéen baʼaleʼ kʼaʼajaktecheʼ wa ku seguer a tsʼáaik a wóol a kaʼans tubeel baʼax ku yaʼalik le Bibliaoʼ yéetel ka bisik junpʼéel toj kuxtaleʼ le máaxoʼob pʼektikechoʼ maʼ xaaneʼ jeʼel u kʼexik u tuukuloʼobeʼ (Hech. 17:2; 1 Ped. 2:12; 3:1, 2, 7).

18, 19. 1) ¿Baʼax utsil tu taasaj úuchik u yáantaʼal Saulo tumen Bernabé? 2) ¿Bix jeʼel k-beetik jeʼex Bernabé yéetel Saulo teʼ múuchʼuliloʼ?

¹⁸ Le ka bin Saulo Jerusaléneʼ maʼ chéen chʼaʼabil úuchik u creertaʼal tumen le discípuloʼob wa tsʼoʼok u kʼexik u kuxtaloʼ. Chéen baʼaleʼ Bernabéeʼ tu bisaj Saulo tu yiknal le apóstoloʼoboʼ ka tu tsolajtiʼob jach tu jaajil juntúul u discípulo Cristo. Letiʼob túuneʼ tu kʼamoʼob yéetel kiʼimak óolal. Ka tsʼoʼokeʼ Sauloeʼ pʼáat tu yéeteloʼob junpʼéel tiempo (Hech. 9:26-28). Le tiaʼan túun Jerusalénoʼ seguernaj u kaʼansaj, chéen baʼaleʼ jach tu kanáantaj bix tu beetil yéetel maʼ suʼlakchajiʼ (Rom. 1:16). Letiʼeʼ tu yeʼesaj jach maʼ sajak úuchik u kaʼansaj Jerusaléniʼ, le lugar tuʼux tu sen chʼaʼpachtaj u discípuloʼob Cristooʼ. ¡Chéen tukult bix wal tu yuʼubiluba le judíoʼob yanoʼob Jerusalénoʼ! Le ka tu yiloʼob Sauloeʼ tsʼoʼok xan u beetkuba u discípulo Cristoeʼ tu yóotoʼob tak u kíimsoʼob. Pero le ka tu yojéeltaj le sukuʼunoʼob «le baʼax taak u beetaʼal tiʼ Saulooʼ tu bisoʼob Cesarea, tsʼoʼoleʼ ka tu túuxtoʼob tu kaajil Tarso» (Hech. 9:30). Úuchik u chaʼik u nuʼuktaʼal Saulo tumen le máaxoʼob tsʼaʼan tumen Jesúsoʼ tu kʼamaj yaʼab utsiloʼob bey xan le múuchʼuliloʼ.

¹⁹ Bernabéeʼ jach tu yáantaj Saulo, leloʼ áantajnaj utiaʼal u maas biskubaʼob le táan u meyajtikoʼob Jéeobaoʼ. Kux túun teech, ¿ka beetik wa jeʼex Bernabéeʼ? ¿Ka múul kʼaʼaytaj wa yéetel le túumben publicadoroʼob utiaʼal a wáantkoʼob u maas meyajtoʼob Diosoʼ? Wa ka beetkeʼ jach yaan a bendecirtaʼal. Wa túumben publicadorecheʼ, ¿ka wilik wa a kʼamik le áantaj ku tsʼaʼabaltech jeʼex tu beetil Saulooʼ? Wa ka múul meyaj yéetel le sukuʼunoʼob úuch joʼopʼok u kʼaʼaytajoʼoboʼ yaan a maas maʼalobkíintik bix a kʼaʼaytaj, yaan u maas kiʼimaktal a wóol yéetel yaan a maas biskaba yéetel le sukuʼunoʼob teʼ múuchʼuliloʼ.

20, 21. 1) Úuchjeakileʼ ¿baʼax tu beetaj u kaajal Jéeoba le ka yanchaj jeetsʼelil tiʼoʼ? 2) Kux túun teʼ kʼiinoʼobaʼ, ¿baʼax tsʼoʼok u beetik u kaajal Dios?

²⁰ ¿Baʼax úuch le ka tsʼoʼok u púutsʼul Saulo tu kaajil Jerusalénoʼ? Tuláakal «le múuchʼuliloʼob yanoʼob Judea, Galilea yéetel Samariaoʼ, yanchaj jeetsʼelil tiʼob» (Hech. 9:31). ¿Baʼax túun tu beetoʼob le ka yanchajtiʼob ‹maʼalob kʼiinoʼoboʼ›? (2 Tim. 4:2). Le Bibliaoʼ ku yaʼalikeʼ le múuchʼuliloʼoboʼ u chʼaʼamoʼob kaʼach maʼalob «saajkilil tiʼ Jéeoba yéetel [...] ku chaʼik u muʼukʼaʼankúuntaʼaloʼob tumen le espíritu santooʼ». Le apóstoloʼob yéetel u maasil sukuʼunoʼob nuʼuktik le múuchʼuliloʼ jach tu muʼukʼaʼankúuntoʼob u fe le sukuʼunoʼoboʼ. Por ejemploeʼ Pedroeʼ tu yilaj u muʼukʼaʼankúuntik u fe le sukuʼunoʼob yanoʼob tu kaajil Lidaoʼ, junpʼéel kaaj yaan Sarón. Yoʼolal le baʼax tu beetoʼ yaʼab tiʼ le máaxoʼob kajaʼanoʼob teʼeloʼ «tu beetubaʼob u discípuloʼob Yuumtsil» (Hech. 9:32-35). Le  discípuloʼoboʼ maʼ náay u yóoloʼob yéetel uláakʼ baʼaloʼobiʼ, baʼaxeʼ tu paklan líiʼsaj u yóoloʼob yéetel tu tsʼáaj u yóoloʼob kʼaʼaytaj. Le oʼolal le múuchʼuliloʼoboʼ «seguernaj u maas yaʼabtaloʼob».

²¹ Tu tsʼoʼokbal le siglo 20, chéen ka téek xuʼul u sen pʼektaʼal u testigoʼob Jéeoba tiʼ yaʼab luʼumiloʼob. Tsʼoʼoleʼ xuʼul xan u prohibirtaʼal u kʼaʼaytajoʼob, le oʼolal yanchaj jeetsʼelil tiʼob. Yoʼolal leloʼ u milesil sukuʼunoʼobeʼ tu tsʼáaj u yóoloʼob kʼaʼaytaj. Leloʼ tu taasaj yaʼab utsil tiʼob.

22. Wa teʼ tuʼux kajaʼanoʼon ku chaʼabal k-meyajtik Diosoʼ, ¿bix jeʼel u meyajtoʼon tubeel le tiempooʼ?

²² Wa maʼ prohibirtaʼan a meyajtik Dios teʼ tuʼux kajaʼanechoʼ, ¿táan wa a wilik a aprovechartik? Kʼaʼajaktecheʼ Satanáseʼ taak u yoksik ta pool ka xiʼikech tu paach ayikʼalil tu lugar a tsʼáaik táanil u Reino Dios (Mat. 13:22). Maʼ a chaʼik u yúuchul leloʼ, baʼaxeʼ wa maʼ prohibirtaʼantech a meyajtik Dioseʼ ilawil a kʼaʼaytaj yéetel a paklan líiʼsik a wóol yéetel le sukuʼunoʼob yanoʼob teʼ múuchʼuliloʼ. Kʼaʼajaktecheʼ junsúutuk u jáan kʼexpajal tuláakal baʼal.

23, 24. 1) ¿Baʼax ku kaʼansiktoʼon le baʼax úuch tiʼ Tabitaoʼ? 2) ¿Baʼax unaj k-chʼaʼtuklik k-beetik?

²³ Ilawil baʼax úuch tiʼ Tabita wa Dorcas. Letiʼeʼ juntúul cristiana kajaʼan kaʼach Jope, junpʼéel kaaj naatsʼ yanil kaʼach tiʼ u kaajil Lida. Tabitaeʼ suuk u meyajtiʼ tubeel u tiempo bey xan le baʼaxoʼob yaantiʼoʼ. Letiʼeʼ «jach suuk kaʼach u yeʼesik u yutsil» yéetel u «yáantik le óotsiloʼoboʼ». Pero junpʼéel kʼiineʼ kʼojaʼanchajeʼ ka kíimi. c Le oʼolaleʼ le discípuloʼob yanoʼob kaʼach Jope bey xan le viudaʼoboʼ jach yaachaj u yóoloʼob. Le ka kʼuch Pedro teʼ tuʼux táan u preparartaʼal u wíinklil Tabita utiaʼal u muʼukloʼ tu beetaj junpʼéel milagro mix juntéen beetaʼak kaʼach tumen u maasil apóstoloʼoboʼ. Ka tsʼoʼok u orareʼ tu kaʼa kuxkíintaj Tabita. ¡Chéen tukult bix wal kiʼimakchajik u yóol le viudaʼob yéetel u maasil discípuloʼoboʼ! Le baʼax úuchaʼ jach tu muʼukʼaʼankúuntaj u fe le discípuloʼoboʼ, tsʼoʼoleʼ «ojéeltaʼab tiʼ tuláakal u kaajil Jope, yéetel yaʼab máakoʼob tu beetubaʼob u discípuloʼob Yuumtsil» (Hech. 9:36-42).

²⁴ Kaʼapʼéel baʼax k-kanik tiʼ le baʼax úuch tiʼ Tabitaoʼ: yáaxeʼ jach séeb jeʼel u perdertik u kuxtal máakeʼ, le oʼolal maʼalob ka meyajnaktoʼon tubeel le tiempo yaantoʼon utiaʼal k-meyajtik Diosoʼ (Ecl. 7:1); u kaʼapʼéeleʼ jach tu jaajil yaan u kaʼa kuxkíintaʼal le kimenoʼoboʼ. Jéeobaeʼ tu yilaj tuláakal le baʼaloʼob maʼalobtak tu beetaj Tabitaoʼ, le oʼolal tu  kaʼa kuxkíintaj. Tsʼoʼoleʼ táan xan u yilik tuláakal le baʼaloʼob maʼalobtak k-beetkoʼ, le oʼolaleʼ wa k-kíimil antes tiʼ le Armagedónoʼ jeʼel xan u kaʼa kuxkíintikoʼoneʼ (Heb. 6:10). Bey túunoʼ kex wa táan k-aktáantik «yaayaj kʼiinoʼob» bey xan wa yáantoʼon jeetsʼelileʼ maʼ unaj u xuʼulul k-tʼaan tu yoʼolal Cristoiʼ (2 Tim. 4:2).