Utiaʼal máaxoʼob u yaabiltmoʼob Jéeoba bey xan le Bibliaoʼ:

Jesúseʼ tu yaʼalaj: «Yaan a kʼaj óoltikeʼex le jaajoʼ, le jaaj túunoʼ yaan u jáalkʼabtikeʼex» (Juan 8:32). ¿Kʼajaʼantech bix ta wuʼuyilaba ka ta kʼaj óoltaj u jaajil teʼ Bibliaoʼ? Jach kiʼimakchaj a wóol ka ta kanaj u jaajil tumen teʼ yóokʼol kaabaʼ chéen tuusoʼob ku beetaʼaliʼ (2 Timoteo 3:1).

Jéeobaeʼ u kʼáat ka k-kan u jaajil. Toʼon xaneʼ tumen k-yaabiltmaj le máakoʼoboʼ k-kʼáat k-kaʼanstiʼob u jaajil. Baʼaleʼ yaan uláakʼ baʼax unaj k-beetik utiaʼal k-meyajtik Dios. Tumen jach k-yaabiltmaj le baʼaxoʼob ku kaʼansiktoʼonoʼ unaj k-beetik tuláakal le ku páajtal utiaʼal k-kuxtal jeʼex uts tu tʼaanoʼ. Jesúseʼ tu kaʼansaj junpʼéel bix jeʼel k-eʼesik tiʼ Jéeoba k-yaabiltmeʼ. Letiʼeʼ tu yaʼalaj: «Teneʼ tsʼoʼok in beetik baʼax ku yaʼalik in Taata yéetel tsʼoʼok in pʼáatal ichil u yaabilaj. Le oʼolaleʼ wa ka beetkeʼex le baʼaxoʼob kin waʼalikteʼexoʼ yaan xan a pʼáatleʼex ichil in yaabilaj» (Juan 15:10).

Jesúseʼ jach u yaabiltmaj u Taata, le oʼolal ku beetik baʼax ku yaʼalaʼaltiʼ. Toʼon xaneʼ wa k-kuxtal jeʼex Jesúseʼ jach yaan u kiʼimaktal k-óol, tsʼoʼoleʼ yaan xan k-yaabiltaʼal tumen Jéeoba. Jesúseʼ tu yaʼalaj: «Beora tsʼoʼok a wojéeltikeʼex le baʼaloʼobaʼ yaan u kiʼimaktal a wóoleʼex wa ka beetkeʼex» (Juan 13:17).

Le libroaʼ yaan u yáantkech utiaʼal ka kuxlakech jeʼex u yaʼalik le Bibliaoʼ bey xan utiaʼal ka a maas bisaba yéetel Jéeoba. Dioseʼ yaan u yáantkech utiaʼal a maas yaabiltik bey xan utiaʼal ka pʼatkech «ichil u yaabilaj», beyoʼ yaan u yantaltech «le kuxtal minaʼan u xuuloʼ» (Judas 21).