1, 2. 1) ¿Baʼax u siimajtoʼon Jéeoba? 2) ¿Baʼaxoʼob u tsʼaamaj Jéeoba jeʼel u yáantkoʼon utiaʼal ka xiʼiktoʼon utsileʼ?

 JÉEOBAEʼ tsʼoʼok u síiktoʼon le kuxtaloʼ, lelaʼ junpʼéel baʼal jach táaj jatsʼuts (Génesis 1:27). Letiʼeʼ u kʼáat ka xiʼiktoʼon utsil. Le oʼolal u tsʼaamaj nuʼuktajoʼob teʼ Biblia utiaʼal u yáantkoʼon k-beet baʼaloʼob maʼalobtakoʼ. Le nuʼuktajoʼobaʼ unaj u meyajtoʼon utiaʼal k-kʼaj óoltik «baʼax maʼalob bey xan baʼax maʼ maʼalob[iʼ]» (Hebreos 5:14). Wa k-beetik beyoʼ táan k-chaʼik tiʼ Jéeoba ka u kaʼansoʼon tuukul maʼalob. Le kéen k-tsʼáa ichil k-kuxtal le baʼaxoʼob ku yaʼalik Dios yéetel le kéen k-il bix u yáantkoʼonoʼobeʼ k-tsʼáaik cuenta jach maʼalobtakoʼob.

² Yaan kʼiineʼ yaan baʼaloʼob beetik u jach yaatal le kuxtaloʼ. Yaan horaeʼ le Bibliaoʼ maʼatech u yaʼalik jach baʼax unaj u beetik máak kéen u aktáant wa baʼax problemail. Jeʼex le kéen kʼojaʼanchajak máakeʼ ku kʼaʼabéettal u chʼaʼtuklik wa yaan u kʼamik junpʼéel tratamiento tuʼux ku meyaj le kʼiʼikʼoʼ. ¿Baʼax jeʼel u yáantkoʼon k-beet baʼax uts tu tʼaan Dioseʼ? Le Bibliaoʼ ku taasik nuʼuktajoʼob ku yeʼesiktoʼon bix u yilik Jéeoba le kuxtal yéetel le kʼiʼikʼoʼ. Wa k-naʼatkoʼob tubeeleʼ yaan u yáantkoʼon k-beet baʼax maʼalob yéetel yaan u yáantkoʼon utiaʼal ka yanaktoʼon junpʼéel conciencia limpio tu táan Dios  (Proverbios 2:6-11). Koʼox ilik jujunpʼéel nuʼuktajoʼob ku yaʼalik le Biblia yoʼolal leloʼ.

3, 4. 1) ¿Bix tu yeʼesil Dios baʼax ku tuklik yoʼolal le kʼiʼikʼoʼ? 2) Utiaʼal Jéeobaeʼ, ¿baʼax u kʼáat u yaʼal le kʼiʼikʼoʼ?

³ Le Bibliaoʼ ku kaʼansikeʼ utiaʼal Jéeobaeʼ le kʼiʼikʼoʼ bey letiʼe kuxtaloʼ. Tsʼoʼoleʼ le kuxtaloʼ jach kiʼichkelem tu táan Jéeoba. Le ka tsʼoʼok u kíimsaʼal Abel tumen Caíneʼ Jéeobaeʼ tu yaʼalaj tiʼ Caín: «U kʼiʼikʼel a wíitsʼineʼ táan u sen kʼáatikten desde teʼ luʼumoʼ ka in beet justicia» (Génesis 4:10). Le kʼiʼikʼ ku kʼáatik ka beetaʼak justiciaoʼ letiʼe u kuxtal Abel luʼsaʼab tumen Caínoʼ.

⁴ Le ka tsʼoʼok le Diluviooʼ Jéeobaeʼ tu yaʼalaj tiʼ Noé yéetel tiʼ u familia jeʼel u páajtal u jaantikoʼob bakʼeʼ. Chéen baʼaleʼ tu yaʼalajtiʼob: «Bakʼ láayliʼ yaan u kʼiʼikʼeleʼ maʼ unaj a jaantikeʼexiʼ, tumen le kʼiʼikʼoʼ u kʼáat u yaʼal kuxtal» (Génesis 9:4). Desde teʼ kʼiin jeʼel tak bejlaʼoʼ tuláakal le máaxoʼob kun síijloʼoboʼ unaj u beetkoʼob le baʼax aʼalaʼab tiʼ Noéoʼ. Leloʼ ku yeʼesikeʼ utiaʼal Jéeobaeʼ le kʼiʼikʼoʼ u kʼáat u yaʼal kuxtal. Toʼoneʼ bey xan unaj k-ilkoʼ (Salmo 36:9).

5, 6. Le Ley tsʼaʼab tiʼ Moisésoʼ, ¿bix u yeʼesik santo u yilaʼal le kuxtal yéetel le kʼiʼikʼ tumen Jéeobaoʼ?

⁵ Teʼ Ley tu tsʼáaj Jéeoba tiʼ Moisésoʼ tu yaʼalaj: «Wa juntúul israelita wa juntúul j-táanxel luʼumil kajaʼan ichileʼex ku jaantik kʼiʼikʼeʼ, yaan in pʼuʼujul tu contra yéetel yaan in xuʼulsiktiʼ. Tumen u kuxtal junpʼéel baʼal kuxaʼaneʼ tiaʼan tu kʼiʼikʼeleʼ» (Levítico 17:10, 11).

⁶ U Ley Moiséseʼ ku yaʼalikeʼ wa ku kíimsaʼal juntúul baʼalcheʼ utiaʼal jaantbileʼ unaj u weʼekel u kʼiʼikʼel teʼ luʼumoʼ. Lelaʼ ku yeʼesikeʼ u kuxtal le baʼalcheʼoʼ u tiaʼal Jéeoba  yéetel santo tu táan (Deuteronomio 12:16; Ezequiel 18:4). Leloʼ maʼ u kʼáat u yaʼal wa jach mix junpʼíit u kʼiʼikʼel le baʼalcheʼ kun pʼáatloʼ. Chéen baʼaleʼ wa ku yilik u jóoʼskoʼob u kʼiʼikʼel tubeeleʼ maʼ kun yaatal u yóol u concienciaʼob kéen u jaantoʼob. Le kéen u beetoʼob beyoʼ ku yeʼeskoʼob ku respetarkoʼob Jéeoba, le máax tsʼaamil le kuxtaloʼ. Le Leyoʼ ku yaʼalik xaneʼ le israelitaʼoboʼ unaj u kíimskoʼob baʼalcheʼob utiaʼal u kʼuboʼob tiʼ Dios utiaʼal ka perdonartaʼak u kʼebanoʼob (ilawil nota 19 yéetel 20).

7. ¿Bix tu yeʼesil David santo u yilik le kʼiʼikʼoʼ?

⁷ Uláakʼ baʼax eʼesik santo le kʼiʼikʼoʼ letiʼe baʼax tu beetaj David le táan kaʼach u baʼateʼel yéetel le filisteoʼoboʼ. U soldadoʼob Davideʼ le ka tu yiloʼob jach ukʼajeʼ tu tsʼáaj u kuxtaloʼob tu táan kíimil utiaʼal u bin u chʼaʼob jaʼ teʼ tuʼux yaan u enemigoʼoboʼ. Chéen baʼaleʼ le ka tu taasoʼob tiʼ Davideʼ letiʼeʼ «maʼ tu yóotaj u yukʼiʼ, tu wekaj tu táan Jéeoba». Davideʼ tu yaʼalaj: «¡Kiʼichkelem Yuum Jéeoba, jach junpuliʼ maʼ tu páajtal in beetik lelaʼ! ¿Unaj wa in wukʼik u kʼiʼikʼel le máakoʼob tu tsʼáaj u kuxtaloʼob tu chiʼ kíimiloʼ?». Davideʼ ku naʼatik kaʼach le kuxtal yéetel le kʼiʼikʼoʼ jach koʼoj u tojoloʼob tu táan Dios (2 Samuel 23:15-17).

8, 9. Le máaxoʼob meyajtik Diosoʼ, ¿bix u yeʼeskoʼob santo u yilkoʼob le kʼiʼikʼoʼ?

⁸ Le ka tsʼoʼok u kíimil Jesúseʼ u discípuloʼobeʼ xuʼul u kíimskoʼob baʼalcheʼob utiaʼal u kʼubkoʼob tiʼ Dios. Chéen baʼaleʼ láayliʼ unaj kaʼach u yilkoʼob le kʼiʼikʼ jeʼex u yilik Diosoʼ. Junpʼéel tiʼ le baʼaxoʼob ku yaʼalik le Ley unaj u seguer u beetkoʼoboʼ letiʼ lelaʼ: «Náachkuntabaʼex tiʼ kʼiʼikʼ». Jeʼex u yaʼalik le Leyoʼ jach unaj u náachkuntkubaʼob tiʼ kʼiʼikʼ jeʼex u náachkuntkubaʼob tiʼ núupkʼeban yéetel tiʼ imagenoʼobeʼ (Hechos 15:28, 29).

 ⁹ Bejlaʼeʼ bey xan unaj k-beetkoʼ. Toʼoneʼ k-ojel tiʼ Jéeoba u taal le kuxtaloʼ yéetel letiʼ u yuumil u kuxtal tuláakal baʼal kuxaʼan. K-ojel xaneʼ utiaʼal Jéeobaeʼ le kʼiʼikʼoʼ bey letiʼe kuxtaloʼ. Le oʼolaleʼ k-chʼaʼik en cuenta baʼax ku yaʼalik le Biblia táanil tiʼ k-kʼamik junpʼéel tratamiento tuʼux ku meyaj kʼiʼikʼoʼ.

10, 11. 1) ¿K-kʼamik wa ka tsʼaʼabaktoʼon kʼiʼikʼ bey xan junpʼéel tiʼ le kanpʼéel baʼaloʼob ku jóoʼsaʼal tiʼ le kʼiʼikʼoʼ? 2) ¿Baʼax unaj u chʼaʼtuklik cada máak tiʼ baʼaxoʼob yaan yil yéetel le kʼiʼikʼoʼ?

¹⁰ Le kéen u yaʼal le Biblia ‹náachkuntabaʼex tiʼ le kʼiʼikʼoʼ› maʼ chéen táan u yaʼaliktoʼon maʼ k-jaantik mix k-ukʼikiʼ. Baʼaxeʼ u kʼáat u yaʼal xaneʼ maʼatech k-chaʼik u tsʼaʼabaltoʼon kʼiʼikʼ, maʼatech k-donartik yéetel maʼatech k-chaʼik u líiʼsaʼal utiaʼal ka jel tsʼaʼabaktoʼon. Tsʼoʼoleʼ maʼatech k-chaʼik u tsʼaʼabaltoʼon mix junpʼéel tiʼ le kanpʼéel baʼaloʼob ku jóoʼsaʼal tiʼ le kʼiʼikʼaʼ: glóbulos rojos, glóbulos blancos, plaquetas yéetel plasma.

¹¹ Tiʼ le kanpʼéel baʼaloʼobaʼ ku jóoʼsaʼal uláakʼ baʼaloʼob ku yaʼalaʼaltiʼob fracciones sanguíneas. Le fracciones sanguíneasoʼ cada juntúul tiʼ toʼon ken u chʼaʼtukult wa yaan u kʼamik wa maʼ. Bey u yúuchul xan yéetel le tratamientoʼob tuʼux ku meyaj u kʼiʼikʼel le máax ku tsʼaʼakaloʼ. Cada juntúul ken u chʼaʼtukult bix kun meyaj u kʼiʼikʼel le táan u operartaʼaloʼ, utiaʼal u beetaʼal junpʼéel análisis tiʼ wa utiaʼal junpʼéel tratamiento (ilawil nota 21).

12. 1) ¿Bix u yilik Jéeoba le baʼax k-chʼaʼtuklik k-beetkoʼ? 2) ¿Baʼax unaj k-beetik táanil tiʼ k-ilik baʼax tratamientoil ken k-kʼame?

¹² Jéeobaeʼ jach kʼaʼanaʼan u yilik le baʼax ku chʼaʼtuklik u beetik cada máakoʼ. Letiʼeʼ ku chʼaʼik en cuenta baʼax k-tuklik yéetel baʼax péeksikoʼon k-beet wa baʼax (xok Proverbios 17:3; 24:12). Le oʼolaleʼ táanil tiʼ k-chʼaʼtuklik  baʼax tratamientoil ken k-kʼameʼ kʼaʼabéet k-kʼáatik tiʼ Jéeoba ka u yáantoʼon, yéetel kʼaʼabéet k-xakʼaltik jach bix le tratamientooʼ. Le kéen tsʼoʼokkeʼ yéetel u yáantaj k-concienciaeʼ jeʼel u páajtal k-chʼaʼtuklik baʼax ken k-beete, maʼ unaj k-máan k-kʼáat tiʼ uláakʼ máakoʼob baʼax jeʼel u beetkoʼob letiʼobeʼ yéetel maʼ unaj k-chaʼik tiʼ mix máak u kʼexik le baʼax tsʼoʼok k-chʼaʼtuklikoʼ. Unaj u kʼaʼajaltoʼoneʼ «cada juntúuleʼ yaan u bisik u kuuch» (Gálatas 6:5; Romanos 14:12).

13. ¿Baʼax ku kaʼansiktoʼon yoʼolal Jéeoba le leyoʼob u tsʼaamaj yoʼolal le kʼiʼikʼoʼ?

¹³ Jeʼel baʼaxak ka u yaʼaltoʼon Jéeoba ka k-beeteʼ ku beetik tumen u yaabiltmoʼon yéetel tumen u kʼáat ka xiʼiktoʼon utsil (Salmo 19:7-11). Chéen baʼaleʼ toʼoneʼ k-beetik le baʼax ku yaʼaliktoʼonoʼ maʼ chéen tumen ku taasiktoʼon utsiliʼ baʼaxeʼ tumen k-yaabiltmaj Jéeoba. Tumen k-yaabiltmeʼ maʼatech k-óotik ka tsʼaʼabaktoʼon kʼiʼikʼ (Hechos 15:20). Tsʼoʼoleʼ lelaʼ ku yáantaj utiaʼal u kanáantik máak u toj óolal. Yaʼab máakeʼ u yojel le problemas ku taasik u tsʼaʼabal kʼiʼikʼ tiʼ máakoʼ, tsʼoʼoleʼ yaʼab doctoroʼob aʼalik maas maʼalob maʼ u tsʼáaikoʼob kʼiʼikʼ tiʼ máak kéen u operartoʼob. Lelaʼ ku yeʼesikeʼ Jéeobaeʼ jach yaan u naʼat yéetel u yaabiltmoʼon (xok Isaías 55:9; Juan 14:21, 23).

14, 15. 1) ¿Máakalmáak le leyoʼob tu tsʼáaj Jéeoba utiaʼal u kanáantkuba le israelitaʼoboʼ? 2) Teʼ kʼiinoʼobaʼ, ¿bix jeʼel k-beetik le baʼax ku yaʼalik le leyoʼobaʼ?

¹⁴ Le leyoʼob ku tsʼáaik Diosoʼ mantatsʼ utiaʼal u yutsil u kaajal. Úuchjeakileʼ Jéeobaeʼ tu tsʼáaj leyoʼob tiʼ le israelitaʼob  utiaʼal maʼ u jáan úuchul loob tiʼoboʼ. Junpʼéel tiʼ le leyoʼoboʼ ku yaʼalikeʼ le kéen u beet u yotochoʼobeʼ unaj u beetkoʼob junpʼéel pretil tu baʼpach le techooʼ (Deuteronomio 22:8). Uláakʼ junpʼéel leyeʼ ku yaʼalikeʼ wa jach tsʼíik u yalakʼ wakax máakeʼ kʼaʼabéet u kʼalik utiaʼal maʼ u beetik loob tiʼ mix máak (Éxodo 21:28, 29). Wa juntúul israelita maʼ tu beetik baʼax ku yaʼalik le leyoʼobaʼ tiʼ letiʼ yaan u culpail wa ku kíimil wa máax.

¹⁵ Le leyoʼobaʼ ku yeʼesikeʼ tu táan Jéeobaeʼ jach koʼoj u tojol le kuxtaloʼ. Le oʼolal toʼon xaneʼ yaan k-ilik k-kanáantik k-kuxtal bey xan u kuxtal u maasil. Utiaʼal lelaʼ unaj k-ilik wa maʼalob yanil k-otoch bey xan k-coche, unaj k-kanáantik bix k-manejar yéetel unaj k-kanáantik baʼax yéetel k-náaysik k-óol. Yaan máaxoʼobeʼ, maases le táankelmoʼoboʼ, ku tuklikoʼobeʼ mix baʼal jeʼel u yúuchultiʼobeʼ, le oʼolaleʼ ku beetkoʼob baʼaloʼob jeʼel u beetik u yúuchul loob tiʼobeʼ. Chéen baʼaleʼ Jéeobaeʼ maʼ u kʼáat ka k-beet beyoʼ. Letiʼeʼ u kʼáat ka k-kanáant k-kuxtal bey xan u kuxtal u maasil (Eclesiastés 11:9, 10).

16. ¿Bix u yilik Jéeoba le abortooʼ?

¹⁶ Jéeobaeʼ jach koʼoj u yilik u kuxtal juntúul chaambal maʼ síijikiʼ. U Ley Moiséseʼ ku yaʼalikeʼ wa juntúul máak ku beetik u kíimil juntúul koʼolel embarazada wa le u chaambal maʼ síijikoʼ, kex maʼ u yóoliliʼ u beetkeʼ, tu táan Jéeobaeʼ culpable. Le máak jeʼeloʼ unaj u kíimsaʼal kex maʼ u yóoliliʼ le baʼax tu beetoʼ, unaj u boʼotik yéetel u kuxtal (xok Éxodo 21:22, 23). Kex maʼ síijik le chaambaloʼ tu táan Jéeobaeʼ bey tsʼoʼok u síijileʼ. Yoʼolal lelaʼ, ¿bix a tuklik u yilik le abortooʼ? ¿Bix a tuklik u yuʼubikuba Jéeoba le kéen u yil u kíimsaʼal cada jaʼab u millonesil mejen chaambaloʼob maʼ síijikoʼobiʼ?

17. ¿Baʼax jeʼel u líiʼsik u yóol juntúul koʼolel abortarnaj antes tiʼ u kʼaj óoltik Jéeobaeʼ?

 ¹⁷ ¿Kux túun wa juntúul koʼoleleʼ abortarnaj táanil tiʼ u kanik bix u yilik Jéeoba le abortooʼ? Yoʼolal le u kuxtal Jesús tu kʼuboʼ jeʼel u perdonartaʼal tumen Jéeoba (Lucas 5:32; Efesios 1:7). Wa jach tu jaajil arrepentidaeʼ maʼ unaj u seguer u yaatal u yóol yoʼolal le baʼax tu beetoʼ. Le Bibliaoʼ ku yaʼalik: «Jéeobaeʼ ku chʼaʼik óotsilil, jach ku yeʼesik u yutsil [...]. Jeʼex bukaʼaj náachil yanil lakʼin tiʼ chikʼinoʼ, letiʼe bukaʼaj xan tsʼoʼok u náachkuntik tiʼ toʼon le baʼaxoʼob maʼ maʼalob k-beetmoʼ» (Salmo 103:8-14).

18. ¿Baʼaxten maʼ unaj k-pʼektik mix máakiʼ?

¹⁸ Desde tu puksiʼikʼal máak unaj u yeʼesik ku yilik le kuxtal jeʼex u yilaʼal tumen Jéeobaoʼ. Leloʼ u kʼáat u yaʼaleʼ tak ichil k-puksiʼikʼaleʼ maʼ unaj k-pʼektik mix máakiʼ. Apóstol Juaneʼ tu tsʼíibtaj: «Tuláakal máax u pʼekmaj u sukuʼuneʼ juntúul j-kiimsaj máak» (1 Juan 3:15). Kex maʼ t-tsʼáaik cuentaeʼ jeʼel u káajal k-pʼektik máax maʼatech u lúubul toʼon utsileʼ. Lelaʼ jeʼel tak u beetik maʼ k-eʼesik jatsʼuts modos tiʼeʼ, k-aʼalik baʼaloʼob maʼ jaajtak tu contra wa hasta jeʼel u beetik k-tsʼíiboltik ka kíimkeʼ. Jéeobaeʼ u yojel baʼax k-uʼuyik yoʼolal u maasil (Levítico 19:16; Deuteronomio 19:18-21; Mateo 5:22). Le oʼolal wa k-tsʼáaik cuenta tsʼoʼok u káajal k-pʼektik wa máaxeʼ unaj k-luʼsik t-puksiʼikʼal le tuukuloʼob beyoʼ (Santiago 1:14, 15; 4:1-3).

19. ¿Bix uláakʼ jeʼel k-eʼesik k-ilik le kuxtal jeʼex u yilik Diosoʼ?

¹⁹ Maʼ unaj xan u tuʼubultoʼoneʼ Jéeobaeʼ «u pʼekmaj le máaxoʼob uts tu tʼaan u beetkoʼob looboʼ» (Salmo 11:5). Wa k-chaʼantik baʼaloʼob tuʼux ku beetaʼal loobeʼ táan  k-eʼesikeʼ k-yaabiltmaj le baʼax u pʼekmaj Diosoʼ. Lelaʼ beyoʼ tumen toʼon k-tsʼáaik ichil k-tuukul baʼaloʼob kʼaastak. Chéen baʼaleʼ wa k-chupik k-tuukul yéetel baʼaloʼob maʼalobtakeʼ k-eʼesik k-ilik le kuxtal jeʼex u yilik Diosoʼ (xok Filipenses 4:8, 9).

20-22. 1) ¿Bix u yilik Jéeoba u kʼasaʼan yóokʼol kaab Satanás? 2) ¿Bix k-eʼesik ‹maʼ yóokʼol kaabiloʼoniʼ›?

²⁰ U kʼasaʼan yóokʼol kaab Satanáseʼ maʼatech u yilik le kuxtal jeʼex u yilik Jéeobaoʼ. Le oʼolal Jéeobaeʼ ku yilik bey asesinoʼobeʼ. Desde úuchjeakil tak bejlaʼeʼ le gobiernoʼoboʼ tsʼoʼok u beetkoʼob u kíimil u millonesil máakoʼob, ichiloʼobeʼ tiaʼan le máaxoʼob meyajt Jéeobaoʼ. Le Bibliaoʼ ku yaʼalikeʼ le gobiernoʼoboʼ beyoʼob tsʼíitsʼik baʼalcheʼob maʼatech u chʼaʼikoʼob óotsilil tiʼ mix máakeʼ (Daniel 8:3, 4, 20-22; Apocalipsis 13:1, 2, 7, 8). Teʼ kʼiinoʼobaʼ jach yaʼab taakʼin ku náajaltaʼal ikil u koʼonol armaʼob. Lelaʼ ku yeʼesikeʼ «u túulisil yóokʼol kaabeʼ tiaʼan yáanal u páajtalil le Kʼaasilbaʼaloʼ» (1 Juan 5:19).

²¹ Chéen baʼaleʼ u discípuloʼob Cristoeʼ «maʼ yóokʼol kaabiloʼobiʼ». Toʼoneʼ maʼatech k-oksikba tiʼ política mix tiʼ guerraʼob. Maʼatech k-kíimsik k-éet máakil yéetel maʼatech k-áantik le máaxoʼob ku kíimskoʼob u maasiloʼ (Juan 15:19; 17:16). Kex ka chʼaʼpachtaʼakoʼoneʼ maʼatech k-sutik u jeel le baʼax ku beetaʼaltoʼonoʼ. Jesúseʼ tu kaʼansajtoʼoneʼ unaj k-yaabiltik tak le máaxoʼob pʼekmiloʼonoʼ (Mateo 5:44; Romanos 12:17-21).

²² Le Nojoch Babilonia wa le religiónoʼob minaʼan u jaajil tiʼoboʼ tsʼoʼok u beetkoʼob u kíimil u millonesil máakoʼob. Le Bibliaoʼ ku yaʼalik yoʼolal le Nojoch  Babiloniaoʼ: «Teʼ kaajaʼ tiʼ weʼek u kʼiʼikʼel le profetaʼoboʼ, le máaxoʼob santoʼoboʼ bey xan tuláakal le máaxoʼob tsʼoʼok u kíimsaʼaloʼob way luʼumeʼ». Le oʼolal Jéeobaeʼ ku yaʼaliktoʼon: «In kaajal, jóokʼeneʼex tiʼ le kaajaʼ». Le máaxoʼob meyajtik Jéeobaoʼ maʼatech u yoksikubaʼob ichil le religiónoʼob maʼatech u kaʼanskoʼob u jaajiloʼ (Apocalipsis 17:6; 18:2, 4, 24).

23. ¿Bix u yeʼesik máak tsʼoʼok u jóokʼol tiʼ le Nojoch Babiloniaoʼ?

²³ Unaj u yeʼesik máak jach tu jaajil tsʼoʼok u jóokʼol tiʼ le Nojoch Babiloniaoʼ. Maʼ xaaneʼ yaan u kʼaʼabéettal u kʼáatik máak ka luʼsaʼak u kʼaabaʼ ichil le religión tuʼux yaan kaʼachoʼ. Tsʼoʼoleʼ unaj k-pʼektik yéetel k-náachkuntikba tiʼ le baʼaloʼob kʼaastak ku beetaʼal ichiloʼ. Le religiónoʼob maʼatech u kaʼanskoʼob u jaajiloʼ ku chaʼikoʼob u yoksikuba máak tiʼ política, tiʼ núupkʼeban bey xan ka chʼíikik máak u kaxt taakʼin (xok Salmo 97:10; Apocalipsis 18:7, 9, 11-17). Lelaʼ tsʼoʼok u beetik u kíimil yaʼab máakoʼob.

24, 25. ¿Baʼax beetik u yantaltoʼon jeetsʼelil yéetel junpʼéel maʼalob conciencia?

²⁴ Táanil tiʼ k-kʼaj óoltik Jéeobaeʼ kex maʼ t-tsʼáaj cuentaeʼ t-beetaj baʼaloʼob tu yeʼesaj tiaʼanoʼon kaʼach tu favor u kʼasaʼan yóokʼol kaab Satanáseʼ. Chéen baʼaleʼ t-xulaj k-beetik leloʼ. Bejlaʼeʼ k-tsʼáaik k-fe tiʼ le boʼol tu tsʼáaj Jesúsoʼ yéetel tsʼoʼok k-kʼubik k-kuxtal tiʼ Dios. Leloʼ ku taasiktoʼon «jeetsʼelil» yéetel ku beetik u yantaltoʼon junpʼéel maʼalob conciencia tu táan Dios tumen k-ojel táan k-beetik baʼax uts tu tʼaan (Hechos 3:19; Isaías 1:18).

²⁵ Kex k-apoyartik kaʼach le máaxoʼob maʼatech u respetarkoʼob le kuxtaloʼ k-ojel Jéeobaeʼ jeʼel u perdonarkoʼon yoʼolal u kuxtal Jesús tu kʼuboʼ. Toʼoneʼ jach koʼoj k-ilik le kuxtal u siimajtoʼon Diosoʼ. Le oʼolal jach k-ilik  k-áantik u maasil u kʼaj óoltoʼob Jéeoba, k-áantkoʼob utiaʼal ka jóokʼkoʼob tiʼ u kʼasaʼan yóokʼol kaab Satanás bey xan utiaʼal ka u beetubaʼob u amigoʼob Dios (2 Corintios 6:1, 2).

26-28. 1) ¿Baʼax tu yaʼalaj Jéeoba tiʼ Ezequiel ka u beete? 2) ¿Baʼax u kʼáat Jéeoba ka k-beete?

²⁶ Úuchjeakileʼ Jéeobaeʼ tu túuxtaj profeta Ezequiel utiaʼal ka tʼaanak yéetel le israelitaʼoboʼ. Ezequieleʼ unaj u yaʼaliktiʼob tsʼoʼok u náatsʼal u kʼiinil u xuʼulsaʼal Jerusalén, yéetel unaj xan u yaʼaliktiʼob baʼax unaj u beetkoʼob utiaʼal u salvarkubaʼob. Wa maʼ u beetik kaʼach Ezequiel le baʼax aʼalaʼabtiʼoʼ tiʼ letiʼ kun kʼáatbil cuenta tumen Jéeoba yoʼolal u kuxtal le máakoʼoboʼ (Ezequiel 33:7-9). Ezequieleʼ tu yeʼeseʼ jach koʼoj u yilik u kuxtal le máakoʼoboʼ, le oʼolaleʼ jach tu tsʼáaj u yóol u yaʼaltiʼob le baʼax u kʼáat Dios ka u yojéeltoʼoboʼ.

²⁷ Jéeobaeʼ u kʼáat ka k-aʼal tiʼ u maasil de ke tsʼoʼok u náatsʼal u kʼiinil u xuʼulsaʼal tiʼ u kʼasaʼan yóokʼol kaab Satanás. Unaj k-áantkoʼob u kʼaj óoltoʼob Jéeoba yéetel u yojéeltikoʼob baʼax unaj u beetkoʼob utiaʼal u salvarkubaʼob yéetel utiaʼal ka kuxlakoʼob teʼ túumben luʼumoʼ (Isaías 61:2; Mateo 24:14). K-kʼáat k-beet tuláakal le ku páajtal utiaʼal u yojéeltikoʼob leloʼ. Wa k-beetik beyoʼ yaan u páajtal k-aʼalik le baʼax tu yaʼalaj apóstol Pabloaʼ: «Dioseʼ maʼ ken u tsʼáa in kuch u kʼiʼikʼel mix máak. Teneʼ maʼ xuʼul in waʼalikteʼex tuláakal u tsolnuʼukoʼob Diosiʼ» (Hechos 20:26, 27).

²⁸ Uláakʼ baʼax ku páaʼtik Dios ka k-beete letiʼe ka pʼáatkoʼon limpioil tu táanoʼ. Lelaʼ letiʼe ken k-il teʼ tuláakʼ xookoʼ.