XOOK 6
Yéey tubeel baʼax yéetel ken a náays a wóol
«Beeteʼex tuláakal baʼal utiaʼal ka alabartaʼak Dios» (1 CORINTIOS 10:31).
1, 2. ¿Baʼaxten unaj k-kanáantik baʼax yéetel ken k-náays k-óol?
KOʼOX aʼalikeʼ jach nakaʼaj a níichʼ junpʼéel manzana, chéen baʼaleʼ ka tsʼáaik cuentaeʼ yaan junxéetʼ tsʼoʼok u káajal u tuʼutaliʼ. ¿Baʼax ken a beete? ¿Yaan wa a jaantik? ¿Yaan wa a pulik? Wa ¿yaan a luʼsik le junxéetʼ maʼ patal utiaʼal a jaantik le maʼaloboʼ?
2 Lelaʼ bey xan u yúuchul yéetel le baʼaloʼob yaan utiaʼal u náaysik u yóol máakoʼ. Yaneʼ maʼalobtak, yaan xaneʼ maʼ maʼalobtakiʼ tumen yaan yil yéetel núupkʼeban, yéetel u beetaʼal loob wa yéetel espiritismo. Techeʼ, ¿baʼax ka chʼaʼik en cuenta utiaʼal a yéeyik baʼax yéetel ken a náays a wóol? ¿Ka tuklik wa mix máak unaj u yaʼaliktech baʼax unaj a beetik? ¿Ka tuklik wa jeʼel u páajtal a náaysik a wóol yéetel jeʼel baʼaxak a kʼáateʼ? Wa ¿ka tuklik mix baʼal maʼalob yaan utiaʼal u náaysik u yóol máak? ¿Ka yéeyik wa maʼalob baʼax yéetel ken a náays a wóol utiaʼal maʼ a beetik baʼax kʼaas?
3. Kéen k-yéey tiʼ baʼax ken k-náays k-óoleʼ, ¿baʼax unaj k-tuklik?
3 Tuláakloʼon kʼaʼabéet k-náaysik k-óol wa baʼax kʼiin. Chéen baʼaleʼ unaj k-kanáantik bix ken k-beetil. Unaj k-tuklik wa le bix ken k-náays k-óoloʼ jeʼel u natsʼkoʼon tiʼ Jéeobaeʼ wa jeʼel u náachkuntkoʼon tiʼ letiʼeʼ.
«BEETEʼEX TULÁAKAL BAʼAL UTIAʼAL KA ALABARTAʼAK DIOS»
4. ¿Baʼax tekstoil áantkoʼon k-il jach kʼaʼabéet k-yéeyik tubeel baʼax yéetel ken k-náays k-óol?
4 Le ka t-kʼubaj k-kuxtal tiʼ Jéeobaeʼ t-aʼalajtiʼ yaan u meyajtoʼon k-kuxtal utiaʼal k-meyajtik (xok Eclesiastés 5:4). T-aʼalajtiʼ yaan k-beetik «tuláakal baʼal utiaʼal ka alabartaʼak» (1 Corintios 10:31). Le oʼolaleʼ maʼ chéen kéen xiʼikoʼon muchʼtáambal wa kéen jóokʼkoʼon k-tsikbalt u tʼaan Dios k-ilik k-beetik baʼax u kʼáatiʼ, baʼaxeʼ tak kéen k-náays k-óol.
5. ¿Bix le adoración unaj k-tsʼáaik tiʼ Jéeobaoʼ?
5 Tuláakal baʼax k-beetkeʼ ku yeʼesik wa jach tu jaajil táan k-adorartik Jéeoba jeʼex u kʼáateʼ. Le oʼolal Pabloeʼ tu yaʼalaj: «Kʼub a wíinklileʼex yéetel a kuxtaleʼex tiʼ Dios, kʼubeʼex bey junpʼéel sacrificio santo yéetel kʼambeʼen tu táaneʼ» (Romanos 12:1). Jesús xaneʼ tu yaʼalaj: «Kʼaʼabéet xan a yaabiltik Jéeoba a Dios yéetel tuláakal a puksiʼikʼal, yéetel tuláakal a kuxtal, yéetel tuláakal a tuukul bey xan yéetel tuláakal a muukʼ» (Marcos 12:30). Toʼoneʼ k-ilik k-tsʼáaik u maas maʼalobil tiʼ Jéeoba. Úuchjeakileʼ le israelitaʼoboʼ le kéen u kʼuboʼob juntúul baʼalcheʼ tiʼ Jéeobaeʼ unaj u yéeyikoʼob u maas tʼaʼajil. Wa yaan baʼax uchaʼan tiʼ le baʼalcheʼ ku kʼubkoʼoboʼ Jéeobaeʼ maʼ tu kʼamik (Levítico 22:18-20). Bejlaʼa xaneʼ Jéeobaeʼ jeʼel u pʼáatal maʼ u kʼamik le adoración k-tsʼáaiktiʼoʼ, ¿baʼaxten?
6, 7. ¿Baʼax jeʼel u yúuchul wa k-náaysik k-óol yéetel baʼaxoʼob maʼ maʼalobtakeʼ?
6 Jéeobaeʼ ku yaʼaliktoʼon: «Teʼexeʼ unaj a pʼáatleʼex santoil, tumen teneʼ santoen» (1 Pedro 1:14-16; 2 Pedro 3:11). Le adoración k-tsʼáaik tiʼ Jéeobaoʼ unaj santo wa limpio, beyoʼ yaan u kʼamik (Deuteronomio 15:21). Wa k-beetik baʼaloʼob kʼaastak jeʼex núupkʼeban, wa k-oksikba tiʼ espiritismo bey xan tiʼ u sen beetaʼal loobeʼ Jéeobaeʼ maʼ ken u kʼam le adoración k-tsʼáaiktiʼoʼ (Romanos 6:12-14; 8:13). Baʼaleʼ maʼ chéen leloʼ Jéeobaeʼ maʼ u kʼáat xan ka k-náays k-óol yéetel uláakʼ baʼaloʼob yaan yil yéetel le baʼaloʼob kʼaastakaʼ. Le baʼaloʼob beyoʼ jeʼel u beetik maʼ u kʼaʼamal tumen Jéeoba le adoración k-tsʼáaiktiʼoʼ, tsʼoʼoleʼ jeʼel u beetik xan u xuʼulul k-bisikba tu yéeteleʼ.
7 ¿Baʼax jeʼel u yáantkoʼon k-yéey maʼalob baʼax yéetel ken k-náays k-óoleʼ? ¿Baʼax tekstoiloʼob tiʼ le Biblia jeʼel u yáantkoʼon k-il baʼax yéetel maʼalob ka k-náays k-óol yéetel tiʼ baʼaxoʼob kʼaʼabéet k-náachkuntikbaoʼ?
UNAJ K-PʼEKTIK BAʼAX KʼAAS
8, 9. ¿Yéetel baʼaxoʼob maʼatech k-náaysik k-óol, yéetel baʼaxten?
8 Teʼ kʼiinoʼobaʼ jach yaʼab baʼaloʼob yaan utiaʼal u náaysik u yóol máak. Yaneʼ maʼalobtak, baʼaleʼ u maas yaʼabileʼ maʼ maʼalobtakiʼ. Yáaxeʼ koʼox tʼaan tiʼ le maʼ maʼalobtakoʼ.
9 Yaʼab películaʼob, páginas ich Internet, le baʼaxoʼob ku máansaʼaloʼob teʼ televisión, videojuegoʼob yéetel kʼaayoʼobeʼ ku tʼaanoʼob tiʼ núupkʼeban, tiʼ u sen beetaʼal loob bey xan tiʼ espiritismo. Le baʼaloʼob kʼaastakaʼ ku beetaʼal u yilaʼal bey maʼ kʼaastakeʼ, hasta ku beetaʼal utiaʼal u cheʼej máak. Chéen baʼaleʼ toʼoneʼ unaj k-kanáantik maʼ k-náaysik k-óol yéetel baʼaxoʼob ku bin tu contra le baʼaxoʼob ku yaʼalik Jéeobaoʼ (Hechos 15:28, 29; 1 Corintios 6:9, 10). Le kéen k-beet beyoʼ k-eʼesik tiʼ Jéeoba k-pʼekmaj le baʼax kʼaasoʼ (Salmo 34:14; Romanos 12:9).
10. ¿Baʼax jeʼel u yúuchultoʼon wa maʼ t-yéeyik tubeel baʼax yéetel ken k-náays k-óoleʼ?
10 Yaan máakoʼob aʼalikeʼ maʼ kʼaas ka u náays u yóol máak yéetel baʼaxoʼob yaan yil yéetel núupkʼeban, u sen beetaʼal loob bey xan yéetel espiritismoiʼ. Maʼ xaaneʼ ku tuklikoʼob: «Leloʼ maʼ kʼaasiʼ, teneʼ chéen táan in chaʼantikoʼob, maʼ ken in beete». Wa bey xan k-tuukuloʼ chéen táan k-tusikba. Le Bibliaoʼ ku yaʼalik: «Minaʼan uláakʼ baʼax maas séeb u tuus yéetel jach kʼasaʼan ke le puksiʼikʼaloʼ» (Jeremías 17:9). Wa ku náaysik u yóol máak yéetel baʼaloʼob maʼ maʼalobtakeʼ, ¿jeʼel wa u páajtal u yaʼalik u pʼekmaj baʼax kʼaaseʼ? Wa mantatsʼ k-náaysik k-óol yéetel baʼaloʼob beyoʼ yaan u pʼáatal maʼ kʼaas k-ilkoʼobiʼ. Le kéen máanak kʼiineʼ k-concienciaeʼ yaan u xuʼulul u meyaj maʼalob, yéetel maʼ ken u yaʼaltoʼon wa kʼaas baʼax táan k-beetik (Salmo 119:70; 1 Timoteo 4:1, 2).
11. ¿Bix u yáantkoʼon Gálatas 6:7 utiaʼal k-ilik jach kʼaʼanaʼan k-yéeyik tubeel baʼax yéetel ken k-náays k-óol?
11 U Tʼaan Dioseʼ ku yaʼaliktoʼon: «Jeʼel baʼaxak ka u pakʼ máakeʼ le xan ken u joche» (Gálatas 6:7). Le tekstoaʼ ku yeʼesiktoʼoneʼ wa ku joʼopʼol k-chaʼantik, k-xokik wa k-uʼuyik baʼaloʼob maʼ maʼalobtakeʼ le kéen máanak kʼiineʼ jeʼel xan u káajal k-beetik baʼaloʼob kʼaastakeʼ. Yaan sukuʼunoʼobeʼ ikil u chaʼantikoʼob baʼaloʼob kʼaastakeʼ tsʼoʼok u lúubloʼob tiʼ núupkʼeban. Chéen baʼaleʼ Jéeobaeʼ jeʼel u yáantkoʼon k-yéey baʼax yéetel ken k-náays k-óoleʼ. Koʼox ilik jujunpʼéeliʼ.
KʼAʼABÉET K-CHʼAʼIK EN CUENTA BAʼAX KU YAʼALIK LE BIBLIAOʼ
12. ¿Baʼax jeʼel u yáantkoʼon k-il baʼax yéetel jeʼel u páajtal k-náaysik k-óoleʼ?
12 Yaan kʼiineʼ séeb k-tsʼáaik cuenta maʼ uts tu tʼaan Jéeoba ka k-náays k-óol yéetel wa baʼaxiʼ, chéen baʼaleʼ yaan horaeʼ maʼatech k-jáan tsʼáaik cuenta. Kéen úuchuk lelaʼ, ¿baʼax túun jeʼel u yáantkoʼon k-il baʼax ken k-beeteʼ? Jéeobaeʼ maʼ u tsʼaamajtoʼon junpʼéel lista tiʼ le baʼaxoʼob maʼ tu páajtal k-chaʼantik, k-xokik wa k-uʼuyikoʼ tumen letiʼeʼ u kʼáat ka meyajnaktoʼon k-conciencia k-kaʼansmaj yéetel le Bibliaoʼ (xok Gálatas 6:5). Jéeobaeʼ u tsʼaamajtoʼon nuʼuktajoʼob teʼ Bibliaoʼ, leloʼobaʼ ku yáantkoʼon k-naʼat baʼax ku tuklik yoʼolal wa baʼax. Le baʼax ku yaʼalik le tekstoʼobaʼ ku yáantkoʼon k-kaʼans k-conciencia. Le nuʼuktajoʼobaʼ ku yáantkoʼon k-il «baʼax u kʼáat Jéeoba» ka k-beet utiaʼal maʼ u xuʼulul u biskuba t-éetel (Efesios 5:17).
Le baʼax ku yaʼalik le Bibliaoʼ ku yáantkoʼon k-yéey baʼax yéetel ken k-náays k-óol
13. 1) ¿Baʼaxten cada máakeʼ yaanal bix u náaysik u yóol? 2) ¿Baʼax unaj k-chʼaʼik en cuenta?
13 U suukileʼ cada máakeʼ yaanal baʼax yéetel ku náaysik u yóol. ¿Baʼaxten? Tumen cada juntúuleʼ yaanal baʼax uts tu yich. Tsʼoʼoleʼ le baʼax maʼalob u yilaʼal tumen juntúuleʼ maʼ maʼalob u yilaʼal tumen uláakʼiʼ. Le oʼolaleʼ unaj k-chʼaʼik en cuenta baʼax ku yaʼalik le Biblia le kéen k-náays k-óoloʼ (Filipenses 1:9). Beyoʼ yaan k-yéeyik junpʼéel baʼax kʼambeʼen tu táan Jéeoba (Salmo 119:11, 129; 1 Pedro 2:16).
14. 1) ¿Baʼax uláakʼ kʼaʼabéet k-chʼaʼik en cuenta kéen k-náays k-óol? 2) ¿Baʼax tu yaʼalaj apóstol Pablo unaj k-beetik?
14 Uláakʼ baʼax unaj k-chʼaʼik en cuentaeʼ letiʼe bukaʼaj tiempo ken k-náays k-óoloʼ. Lelaʼ yaan u yeʼesik baʼax maas kʼaʼanaʼan k-tiaʼal. Toʼoneʼ k-tsʼáaik táanil ichil k-kuxtal k-meyajtik Dios (xok Mateo 6:33). Chéen baʼaleʼ wa maʼ t-kanáantikbaeʼ chéen kéen k-ileʼ maas yaʼab tiempo k-máansik táan k-náaysik k-óol. Pabloeʼ tu yaʼalaj: «Kanáanteʼex maʼ a máaneʼex bey máaxoʼob minaʼan u naʼatoʼobeʼ, baʼaxeʼ bey máaxoʼob yaan u naʼatoʼobeʼ. Ilawil u meyajteʼex tubeel le tiempo yaanteʼexoʼ» (Efesios 5:15, 16). Le oʼolal kʼaʼabéet k-tsʼáaik u pʼiis le tiempo k-máansik táan k-náaysik k-óoloʼ, beyoʼ yaan u seguer k-tsʼáaik táanil ichil k-kuxtal k-meyajtik Jéeoba (Filipenses 1:10).
15. ¿Bix jeʼel k-kanáantikba tiʼ le baʼaxoʼob jeʼel u beetkoʼob k-náachtal tiʼ Jéeobaoʼ?
15 Tuláakloʼon k-ojel maʼ unaj k-náaysik k-óol yéetel baʼaxoʼob u pʼeek Jéeobaiʼ. Chéen baʼaleʼ, ¿kux túun wa maʼ k-jach ojel wa maʼalob ka k-náays k-óol yéetel wa baʼaxiʼ? ¿Yaan wa k-náaysik k-óol tu yéetel? Koʼox aʼalikeʼ tiaʼanech tiʼ junpʼéel lugar jach kaʼanaleʼ, ¿jeʼel wa a waʼatal jach tu jáalikeʼ? ¿Máasaʼ maʼatan? Wa a yaabiltmaj a kuxtaleʼ yaan a náachkuntikaba teʼ tuʼux jeʼel u yúuchultech looboʼ. Leloʼ bey xan unaj k-beetik le kéen k-yéey baʼax yéetel ken k-náays k-óoloʼ. Le Bibliaoʼ ku yaʼaliktoʼon: «Náachkuntaba tiʼ baʼax kʼaas» (Proverbios 4:25-27). Le oʼolaleʼ maʼ chéen unaj k-náachkuntikba tiʼ le baʼaloʼob k-ojel kʼaastakoʼ baʼaxeʼ unaj k-náachkuntikba tak tiʼ le baʼaloʼob bey kʼaastakoʼ yéetel maʼ xaaneʼ jeʼel u náachkuntkoʼon tiʼ Jéeobaeʼ.
UNAJ K-TUUKUL JEʼEX JÉEOBAEʼ
16. 1) ¿Baʼaxoʼob u pʼekmaj Jéeoba? 2) ¿Bix k-eʼesik k-pʼekmaj le baʼaxoʼob u pʼekmaj Jéeobaoʼ?
16 Juntúul salmistaeʼ tu yaʼalaj: «Teʼex a yaabiltmeʼex Jéeobaeʼ, pʼekteʼex baʼax kʼaas» (Salmo 97:10). Le Bibliaoʼ ku kaʼansiktoʼon bix u tuukul Jéeoba yéetel bix u yuʼubikuba. Maʼalob ka k-tukle: «Le baʼax kin kanik teʼ Bibliaoʼ, ¿bix jeʼel u yáantken in wil le baʼaloʼob jeʼex u yilik Jéeobaoʼ?». Le Bibliaoʼ ku yaʼalikeʼ Jéeobaeʼ u pʼekmaj «junpʼéel aakʼ ku tuus, kʼaboʼob ku wekikoʼob u kʼiʼikʼel juntúul máax mix baʼal kʼaas u beetmaj, junpʼéel puksiʼikʼal ku chʼaʼtuklik u beetik baʼaloʼob kʼaastak yéetel ookoʼob chich u yáalkaboʼob utiaʼal u bin u beetoʼob baʼax maʼ maʼalobiʼ» (Proverbios 6:16-19). Ku yaʼalik xaneʼ unaj k-pʼektik baʼaloʼob kʼaastak jeʼex «núupkʼeban», «u adorartaʼal imagenoʼob, j-meenil, pʼekbail», «séeb pʼuʼujul», «u tsʼíiboltaʼal baʼal u tiaʼal yaanal, káaltalil, kʼiinbesajoʼob tuʼux mix baʼal ku tsʼaʼabal u pʼiis, bey xan uláakʼ baʼaloʼob jeʼex leloʼobaʼ» (Gálatas 5:19-21). ¿Ka tsʼáaik cuenta wa bix jeʼel u yáantkech le tekstoʼob utiaʼal a chʼaʼtuklik baʼax yéetel ken a náays a wóoloʼ? Toʼoneʼ k-kʼáat chʼaʼ en cuenta baʼax ku yaʼalik le Biblia tiʼ tuláakal baʼax k-beetkoʼ, kex t-juunal yanoʼon wa yéetel uláakʼ máakoʼob (2 Corintios 3:18). Le baʼaxoʼob k-beetik kéen yanakoʼon t-juunaloʼ ku yeʼesik wa jach tu jaajil k-chʼaʼik en cuenta bix u tuukul Jéeoba (Salmo 11:4; 16:8).
17. ¿Tiʼ baʼaxoʼob unaj k-tuukul táanil tiʼ k-ilik baʼax yéetel ken k-náays k-óol?
17 Le oʼolaleʼ le kéen k-yéey baʼax yéetel ken k-náays k-óoleʼ maʼalob ka k-tukle: «Le baʼax ken in beetaʼ, ¿jeʼel wa u natsʼken tiʼ Jéeobaeʼ wa jeʼel u náachkuntken tiʼ letiʼeʼ? ¿Jeʼel wa u yáantken utiaʼal in kaʼansik maʼalob in concienciaeʼ?». Koʼox ilik baʼax uláakʼ ku yaʼalik le Biblia jeʼel u yáantkoʼon k-il baʼax yéetel ken k-náays k-óoloʼ.
18, 19. 1) ¿Baʼax tu yaʼalaj apóstol Pablo unaj k-beetik? 2) ¿Baʼax tekstoiloʼob jeʼel u yáantkoʼon k-il baʼax yéetel ken k-náays k-óoleʼ?
18 Le kéen u yéey máak baʼax yéetel ken u náays u yóoleʼ u jaajileʼ táan u yéeyik baʼax ken u tsʼáa ichil u tuukul. Apóstol Pabloeʼ tu yaʼalaj: «Seguernak a tuukuleʼex tiʼ jeʼel baʼalak jaajtakeʼ, tiʼ jeʼel baʼalak kʼaʼanaʼaneʼ, tiʼ jeʼel baʼalak toj tu táan Dioseʼ, tiʼ jeʼel baʼalak limpioeʼ, tiʼ jeʼel baʼalak ku lúubul utsileʼ, tiʼ jeʼel baʼalak ku yúuchul maʼalob tʼaan tu yoʼolaleʼ, tiʼ jeʼel baʼalak maʼalob yéetel tiʼ jeʼel baʼalak ku náajmatik u alabartaʼaleʼ» (Filipenses 4:8). Wa k-tuukul tiʼ le baʼaloʼobaʼ jeʼel u páajtal k-aʼalik tiʼ Jéeoba lelaʼ: «Jéeoba Dios, bukaʼaj maʼalobil ka utschajak ta tʼaan le baʼax ku jóokʼol tin chiʼ bey xan le baʼax kin tuklikoʼ» (Salmo 19:14).
19 Tukult lelaʼ: «¿Baʼax yéetel kin chupik in tuukul? Le kéen tsʼoʼokok in chaʼantik junpʼéel película wa junpʼéel baʼax ku máansaʼal teʼ televisiónoʼ, ¿kin tuukul wa tiʼ baʼaloʼob maʼalobtak? ¿Maʼalob wa in wuʼuyikinba tumen maʼ chiʼichnak in concienciaiʼ? (Efesios 5:5; 1 Timoteo 1:5, 19). ¿Kin wuʼuyik wa jeʼel u páajtal in orar tiʼ Jéeobaeʼ wa ku chiʼichnaktal in conciencia kéen in beete? Le baʼax tin chaʼantoʼ, ¿ku beetik wa in tuukul tiʼ baʼaloʼob maʼ maʼalobtakiʼ? (Mateo 12:33; Marcos 7:20-23). Le baʼax yéetel kin náaysik in wóoloʼ, ¿ku yeʼesik wa táan u káajal in tuukul ‹jeʼex u máakiloʼob le yóokʼol kaabaʼ›?» (Romanos 12:2). Le bix ken k-núukil le kʼáatchiʼobaʼ jeʼel u yáantkoʼon k-il baʼax kʼaʼabéet k-beetik utiaʼal maʼ u xuʼulul k-bisikba yéetel Jéeobaeʼ. Unaj k-kʼáatik xan tiʼ Jéeoba le baʼax tu kʼáataj le salmistaaʼ: «Maʼ a chaʼik u chʼíikil in paakat tiʼ baʼaloʼob mix baʼal u biilal» (Salmo 119:37). *
UNAJ K-CHʼAʼIK EN CUENTA U MAASIL
20, 21. ¿Baʼaxten unaj k-chʼaʼik en cuenta u conciencia u maasil kéen k-yéey baʼax yéetel ken k-náays k-óol?
20 Unaj xan k-chʼaʼik en cuenta baʼax ku yaʼalik le tekstoaʼ: «Tuláakal baʼal jeʼel u páajtal u beetik máakeʼ, chéen baʼaleʼ maʼ tuláakal baʼal ku taasik utsiliʼ. Tuláakal baʼal jeʼel u páajtal u beetik máakeʼ, chéen baʼaleʼ maʼ tuláakal baʼal ku líiʼsik u yóol máakiʼ» (1 Corintios 10:23, 24). Kex k-tuklik yaantoʼon u derechoil k-beetik wa baʼaxeʼ maʼ u kʼáat u yaʼal wa maʼalob ka k-beetiʼ. Unaj k-tuukul tiʼ bix ken u yuʼubiluba u maasil yoʼolal le baʼax ken k-beetoʼ.
21 U jaajileʼ maʼ junpʼéeliliʼ bix u meyaj u conciencia máakiʼ. Maʼ xaaneʼ a concienciaeʼ jeʼel u chaʼiktech a chaʼantik junpʼéel u programail televisióneʼ, chéen baʼaleʼ ka wojéeltikeʼ juntúul sukuʼun wa juntúul kiikeʼ maʼ maʼalob u yilik le programaoʼ, ¿baʼax jeʼel a beetkeʼ? Maʼ xaaneʼ jeʼel a chʼaʼtuklik maʼ a chaʼantikeʼ, ¿baʼaxten? Tumen maʼ a kʼáat ‹kʼebantal tu contra a sukuʼunoʼobiʼ› mix «tu contra Cristo[iʼ]» (1 Corintios 8:12). Toʼoneʼ maʼ k-kʼáat k-beet u tʼóochpajal le sukuʼunoʼoboʼ (Romanos 14:1; 15:1; 1 Corintios 10:32).
22. ¿Bix k-eʼesik k-yaabiltmaj yéetel k-chʼaʼik en cuenta le sukuʼunoʼoboʼ?
22 Chéen baʼaleʼ, ¿kux túun wa a concienciaeʼ maʼ tu chaʼik a beetik junpʼéel baʼal maʼ kʼaas u yilaʼal tumen uláakʼ sukuʼuniʼ? Tumen a yaabiltmaj a sukuʼuneʼ maʼ ken a obligart utiaʼal ka tuukulnak jeʼex techoʼ. Tuukulnen tiʼ lelaʼ: juntúul máax ku manejareʼ u yojleʼ yaan máaxoʼobeʼ maas chich u binoʼob wa maas chaambel u binoʼob ke letiʼ, baʼaleʼ leloʼ maʼ u kʼáat u yaʼal wa maʼ u yojloʼob manejariʼ. Bey xan u yúuchul le kéen horachajak u chʼaʼtuklik máak baʼax yéetel ken u náays u yóol, maʼ xaaneʼ teech yéetel uláakʼ sukuʼuneʼ maʼ igual bix a tuukuleʼexiʼ, kex beyoʼ mix juntúul ku bin tu contra le baʼax ku yaʼalik le Bibliaoʼ (Eclesiastés 7:16; Filipenses 4:5).
23. ¿Baʼax kun áantkoʼon k-yéey baʼax yéetel ken k-náays k-óol?
23 ¿Baʼax kun áantkoʼon k-yéey maʼalob baʼax yéetel ken k-náays k-óol? Kʼaʼabéet k-chaʼik k-nuʼuktaʼal tumen k-conciencia k-kaʼansmaj yéetel le Bibliaoʼ, bey xan k-kaxtik u yutsil le sukuʼunoʼoboʼ. Wa k-beetik beyoʼ yaan u kiʼimaktal k-óol tumen táan k-áantaj «utiaʼal ka alabartaʼak Dios».
^ Lelaʼ uláakʼ tekstoʼob jeʼel u yáantkoʼon k-il baʼax yéetel maʼalob ka k-náays k-óoleʼ: Proverbios 3:31; 13:20; Efesios 5:3, 4 yéetel Colosenses 3:5, 8, 20.