Le Bibliaoʼ ku yaʼalikeʼ u Kʼaasilbaʼaleʼ táan u «tusik tuláakal yóokʼol kaab» (Apocalipsis 12:9). Satanás yéetel u kʼasaʼan angeloʼobeʼ maʼ u kʼáatoʼob ka k-creert le baʼax ku yaʼalik le Bibliaoʼ. Ku beetkoʼob u creertaʼal yaan baʼax ku pʼáatal kuxaʼanil tiʼ máak ken kíimik. Koʼox ilik bix u beetkoʼob.

Yaʼab religionoʼobeʼ ku kaʼanskoʼobeʼ tuláakal máak yaan u pixan, yéetel ken kíimik máakeʼ le pixanaʼ ku jóokʼol tiʼ le wíinkliloʼ yéetel ku bin kuxtal yaanal tuʼux. Ku yaʼalikoʼobeʼ le wíinkliloʼ ku kíimil, baʼaleʼ le pixanoʼ maʼatech. Tsʼoʼoleʼ ku yaʼalikoʼobeʼ le pixanoʼ maʼ tu páajtal u xuʼulsaʼal.

Baʼaleʼ le Bibliaoʼ maʼ bey u kaʼanskiʼ. Le ka beetaʼab Adaneʼ, le Bibliaoʼ ku yaʼalik: «Jéeoba Dios túuneʼ tu chʼaʼaj le luʼumoʼ ka tu beetaj le máakoʼ, ka tsʼoʼokeʼ tu yustaj iikʼ tu niʼeʼ ka suunaj juntúul kuxaʼan máak» (Génesis 2:7). Jeʼex k-ilkoʼ maʼ tsʼaʼab upʼéel pixan tiʼ Adán ka pʼáatak kuxaʼanil ken kíimik u wíinkliliʼ.

 Le Bibliaoʼ ku yaʼalikeʼ mix baʼal ku pʼáatal kuxaʼanil tiʼ utúul máak ken kíimik. Le máax tsʼoʼok u kíimloʼ maʼ tu páajtal u beetik kʼaas mix uts tiʼ le máaxoʼob kuxaʼanoʼoboʼ. Le Bibliaoʼ ku yaʼalik:

• «Le kéen xuʼuluk u chʼaʼik u yiikʼoʼobeʼ ku suutoʼob teʼ luʼumoʼ. Ku pʼáatal maʼ tu páajtal u béeykuntkoʼob le baʼax u tukultmoʼoboʼ» (Salmo 146:4).

• «Le máaxoʼob kuxaʼanoʼoboʼ u yojloʼob yaan u kíimloʼob, pero le kimenoʼoboʼ maʼ u yojloʼob mix baʼaliʼ, mix baʼal xan ken u kʼamoʼob, yéetel yaan u tuʼubsaʼaloʼob. [...] Tuláakal baʼax tiaʼan ta kʼab a beetkeʼ, beet yéetel u jaajil a wóol, tumen teʼ Muknal tuʼux ka binoʼ minaʼan meyajiʼ, minaʼan tuukuliʼ, minaʼan kaanbaliʼ yéetel minaʼan naʼatiʼ» (Eclesiastés 9:5, 10).

Le Bibliaoʼ ku yeʼesik xaneʼ le baʼax ku yúuchul tiʼ wíinik ken kíimkeʼ le xan ku yúuchul tiʼ le baʼalcheʼob ken kíimkoʼoboʼ (Eclesiastés 3:19, 20). Le máaxoʼob tsʼoʼok u kíimloʼoboʼ maʼ u yojloʼob mix baʼaliʼ. Tumen ken kíimik máakeʼ mix baʼal ku pʼáatal kuxaʼanil tiʼ u wíinklil.

 Wa ka a láaj xok le Bibliaoʼ yaan a wilik mix tuʼux ku yaʼalik wa yaan upʼéel pixan wa upʼéel baʼax ku pʼáatal kuxaʼanil ken kíimik máak. Le Bibliaoʼ maʼatech u kaʼansik wa ku jóokʼol u pixan máak ken kíimik. Leloʼ upʼéel kaʼansaj ku taal tiʼ Satanás yéetel tiʼ u kʼasaʼan angeloʼob. Jéeobaeʼ u pʼekmaj le baʼaloʼob maʼ jaajtak ku kaʼansaʼal tumen le religionoʼoboʼ (Proverbios 6:16-19; 1 Timoteo 4:1, 2).

Tiʼ Satanaseʼ ku meyaj xan le j-meenoʼob utiaʼal u yilik u tusik máakoʼ. Utúul j-meeneʼ ku yaʼalaʼal jeʼel u páajtal u tʼaan yéetel le máaxoʼob tsʼoʼok u kíimloʼoboʼ. Yaʼabach máakoʼobeʼ, yéetel tak le j-meenoʼ, ku tuklikoʼobeʼ yéetel u pixan le kimenoʼob ku tʼaanoʼoboʼ. Baʼaleʼ, jeʼex tsʼoʼok k-ilkoʼ, le Bibliaoʼ ku yeʼesikeʼ minaʼan u pixan le kimenoʼoboʼ (Eclesiastés 9:5, 6, 10).

¿Máax túun yéetel ku tʼaanoʼob? ¡Yéetel le kʼasaʼan angeloʼoboʼ! Le kʼasaʼan angeloʼoboʼ ku jach ilkoʼob bix máak; jach u yojloʼob bix u tʼaan, bix u wíinklil, baʼax u beetmaj yéetel baʼax u yojel. Le oʼolal, maʼ talam u beetkubaʼob bey jeʼex le máaxoʼob tsʼoʼok u kíimloʼoboʼ (1 Samuel 28:3-19).

Satanaseʼ ku beetik xan u yantal tsikbaloʼob maʼ jaajtak utiaʼal ka creertaʼak yaan u pixan le kimenoʼoboʼ. Le tsikbaloʼobaʼ ku beetkoʼob maʼ u creertaʼal le baʼax ku yaʼalik le Bibliaoʼ (2 Timoteo 4:4).

Tu luʼumil Africaeʼ yaʼab u tsikbaltaʼal ku yilaʼal le máaxoʼob tsʼoʼok u kíimloʼoboʼ. U suukileʼ, le máax kimen ku yaʼalaʼal ku yilaʼaloʼ, ku yilaʼal náach tiʼ tuʼux kajaʼan kaʼach. Baʼaleʼ, tukult lelaʼ: «Wa letiʼe máax kimen ku kaʼa suutoʼ, ¿jeʼel wa u kaʼa suut náach tiʼ u familia yéetel tiʼ u amigoʼobeʼ?».

Tsʼoʼoleʼ, le máax ku yaʼalik tu yilaj utúul máax kimenoʼ, ¿maʼ wa chéen tu yilaj utúul máak jach chíikaʼan tiʼ le máax kíimoʼ? Upʼéel baʼax eʼesik jeʼel yúuchul beyaʼ, letiʼe baʼax úuch tiʼ kaʼatúul máakoʼob táan u máanoʼob predicar tiʼ upʼéel chan kaaj. Le táan u predicaroʼoboʼ xáanchaj táan u tsaypachtaʼaloʼob tumen utúul máak chʼijaʼan. Le ka tu kʼáatoʼobtiʼ baʼaxten ku bin tu paachoʼobeʼ, le máakoʼ tu yaʼaleʼ ku tuklikeʼ utúul tiʼ letiʼobeʼ u sukuʼun úuch kíimik. Le baʼax ku tuklik kaʼachoʼ maʼ jaajiʼ, kex beyoʼ letiʼeʼ maʼ tu yóotaj u éejemtiʼ. ¡Chéen tukult baʼax tu tsikbaltaj tiʼ u amigoʼob yéetel tiʼ u vecinoʼob yoʼolal le baʼax ku tuklik kaʼachoʼ!

Maʼ xaaneʼ techeʼ a wuʼuymaj u tsikbaltaʼal baʼaloʼob jelaʼantak tsʼoʼok u yilaʼal, u yuʼubal wa u wayakʼtaʼal tumen wa máax. Le baʼaloʼob jelaʼantakaʼ ku beetik u sajaktal le máaxoʼob ilik wa uʼuyikoʼ. Marein, utúul koʼolel kajakbal kaʼach Africaeʼ, ken áakʼabchajkeʼ mantatsʼ kaʼach u yuʼubik u tʼaʼanal tumen animáas u abuela. Tumen ku jach sajaktaleʼ, Mareineʼ ku joʼopʼol u yawat yéetel ku yajsik tuláakal u láakʼtsiloʼob. Ka máan kʼiineʼ, chocochaj u pool.

Wa jach tu jaajil láayliʼ kuxaʼan le máaxoʼob kimenoʼoboʼ, ¿jeʼel wa u sajakkúunskoʼob le máaxoʼob u yaabilmoʼoboʼ? ¿Máasaʼ maʼatan? Le máaxoʼob ku yuʼubaʼal u tʼaanoʼoboʼ letiʼe kʼasaʼan angeloʼoboʼ.

Baʼaleʼ ¿láayliʼ wa letiʼe kʼasaʼan angeloʼob beetik u yuʼubaʼal wa u yilaʼal baʼaloʼob ku tuklaʼal jeʼel u yáantik wa u líiʼsik u yóol máakeʼ? Gbassay, utúul koʼolel kajaʼan kaʼach Sierra Leonaeʼ, jach kʼojaʼan kaʼachi. Tiʼ upʼéel wayakʼeʼ tu yilaj animáas u taata. U taataeʼ tu yaʼalajtiʼ ka xiʼik u tʼok u leʼ ukúul cheʼ, ka u tsʼam ich jaʼ yéetel ka u yukʼe. Baʼaleʼ tu yaʼalajtiʼeʼ maʼ u yaʼalik tiʼ mix máak baʼax ken u beete. Le koʼolelaʼ tu beetaj jeʼex aʼalaʼabiktiʼoʼ ka utschaji.

Uláakʼ utúul koʼoleleʼ tu yaʼalaj xaneʼ tiʼ upʼéel áakʼabeʼ tu yilaj animáas u yíicham. Tu yaʼaleʼ u yíichameʼ jach maʼalob u yilaʼal yéetel u búukintmaj upʼéel nookʼ jach jatsʼuts.

 Le baʼax ku yuʼubaʼal wa ku yilaʼalaʼ bey maʼalobtakeʼ, yéetel bey jeʼel u yáantkoʼob máakeʼ. Baʼaleʼ ¿tiʼ Dios wa u taaloʼob? Maʼatech; maʼ tiʼ letiʼ u taaloʼobiʼ. Jéeobaeʼ utúul Dios maʼatech u tusik máak (Salmo 31:5). Chéen le kʼasaʼan angeloʼob jeʼel u tuskoʼonoʼoboʼ.

Baʼaleʼ ¿yaan wa túun kʼasaʼan angeloʼob taak u yáantkoʼonoʼob? Minaʼan. Kex ku yeʼeskoʼob bey taak u yáantkoʼonoʼobeʼ, chéen táan u tuusoʼob. Le ka tʼaanaj le Kʼaasilbaʼal yéetel Evaoʼ, tu yeʼesaj bey jach utseʼ (Génesis 3:1). Baʼaleʼ ¿baʼax úuch tiʼ Eva úuchik u yuʼubik yéetel u beetik le baʼax aʼalaʼabtiʼoʼ? Kíimi.

Techeʼ a wojeleʼ yaan kʼiineʼ utúul máak kʼasaʼaneʼ ku yeʼesikuba jach uts tiʼ le máax u kʼáat u tus wa u luʼs wa baʼax tiʼoʼ. Jeʼex u yaʼalaʼaleʼ «Tu táan máakeʼ uts, baʼaleʼ tu paach máakeʼ kʼasaʼan». Yéetel le Bibliaoʼ ku yaʼalik: «Satanáseʼ maʼ tu xuʼulul u yeʼeskuba bey juntúul u ángelil sáasileʼ» (2 Corintios 11:14).

Teʼ kʼiinoʼobaʼ Dioseʼ maʼatech u tʼanik wíinik yéetel maʼatech u beetik u wayakʼtaʼal mix u yilaʼal baʼaloʼob utiaʼal u tsʼáaik ojéelbil wa baʼax. Letiʼeʼ ku nuʼuktik wíinik yéetel le baʼax ku yaʼalik le Bibliaoʼ, tsʼoʼoleʼ le kaʼansaj ku tsʼáaikoʼ ku beetik u noʼojaʼantal wíinik utiaʼal «u páajtal u beetik jach tubeel tuláakal maʼalob meyaj» (2 Timoteo 3:17).

Jeʼex k-ilkoʼ, Jéeobaeʼ u yaabiltmoʼon, le oʼolal ku yaʼaliktoʼon ka k-kanáantba tiʼ le baʼaxoʼob ku meyaj tiʼ u Kʼaasilbaʼal utiaʼal u tuskoʼonoʼ. U yojleʼ le kʼasaʼan angeloʼoboʼ jach jeʼel u beetkoʼobtoʼon loobeʼ.