Jéeobaeʼ yaan u yutskíintik tuláakal le loobil tsʼoʼok u beetik Satanasoʼ. Jéeobaeʼ tsʼoʼok u tsʼáaik Jesús utiaʼal u beetik u Reyil tu yóokʼol le Luʼumaʼ. Tu yáanal u gobernacioneʼ le Luʼumaʼ yaan u suʼutul paraísoi (Daniel 7:13, 14; Lucas 23:43).

Letiʼe baʼaxoʼob ku yaʼalik u beetik Jéeobaaʼ:

• JACH YAAN U YANTAL BAʼAL JAANTBIL: «Le luʼumoʼ yaan u tsʼáaik u yich, tumen yaan k-bendecirtaʼal tumen Dios». Yaan u sen tsʼáaik u yich le luʼumoʼ, tak tu maas kaʼanlil le montañaʼoboʼ» (Salmo 67:6; 72:16).

• MAʼ KUN YANTAL BAʼATELIL: «Koʼoteneʼex a wileʼex le baʼaxoʼob ku beetik Jéeobaoʼ, letiʼeʼ táan u beetik nukuch baʼaloʼob way luʼumeʼ. Ku beetik u xuʼulul u yantal baʼateʼel tiʼ tuláakal yóokʼol kaab» (Salmo 46:8, 9).

• MAʼ KUN YANTAL KʼASAʼAN MÁAKOʼOB: «Yaan u xuʼulsaʼal tiʼ le kʼasaʼan máakoʼoboʼ [...]. Ichil junpʼíit kʼiineʼ maʼ kun antal kʼasaʼan máakoʼob. Kéen paakatnakech tuʼux suuk u yantaloʼob kaʼachoʼ maʼ ken a wiloʼobiʼ» (Salmo 37:9, 10).

•  MAʼ KUN YANTAL KʼOJAʼANIL, MUʼYAJIL MIX KÍIMIL: «Teʼ kʼiin jeʼeloʼ yaan u sáasiltal u yich le máaxoʼob chʼóopoʼoboʼ yéetel yaan u jeʼepajal u xikin le máaxoʼob kóoktakoʼoboʼ. Teʼ kʼiin jeʼeloʼ le máax móochoʼ yaan u páajtal u síitʼ jeʼex le kéejoʼ, le mudooʼ yaan u yawat yéetel kiʼimak óolal» (Isaías 35:5, 6).

  «Dioseʼ yaan u yantal tu yéeteloʼob. Letiʼeʼ yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj. Le baʼaloʼob suuk u yúuchul kaʼachoʼ tsʼoʼok u máanoʼob» (Apocalipsis 21:3, 4).

Jéeobaeʼ maʼatech u tuus jeʼex u beetik Satanás yéetel u kʼasaʼan angeloʼobeʼ. Letiʼeʼ tuláakal baʼax ku yaʼalikeʼ ku béeytal (Lucas 1:36, 37). Jéeobaeʼ u yaabiltmech yéetel u kʼáat ka kuxlakech teʼ Paraíso kun yantaloʼ. Le oʼolaleʼ, aʼal tiʼ u j-jaajkunajoʼob Jéeoba ka u yáantechoʼob utiaʼal ka maas kaambalnakech tiʼ le jatsʼuts baʼaloʼob ku yaʼalik le Bibliaoʼ. Wa ka beetik le baʼax ken a kanoʼ, maʼ kan tusbil yéetel maʼ ken a chʼaʼa saajkilil tiʼ baʼaloʼob maʼ jaajtakiʼ. Tsʼoʼoleʼ ken máanak kʼiineʼ yaan a jáalkʼabtaʼal tiʼ le kʼeban yéetel tiʼ le kíimiloʼ. Jeʼex tu yaʼalaj Jesuseʼ: «Teʼexeʼ yaan a kʼaj óoltikeʼex le jaajoʼ, le jaaj túunoʼ yaan u jáalkʼabtikeʼex» (Juan 8:32).