¡Le pixanoʼoboʼ jach tu jaajil yanoʼob! Yaan pixanoʼob utstakoʼob yéetel yaan kʼasaʼantakoʼobiʼ. Baʼaleʼ le pixanoʼoboʼ, ¿letiʼe wa baʼax ku yaʼalaʼal ku jóokʼol tiʼ le máaxoʼob ku kíimloʼoboʼ?

Maʼ, maʼ letiʼobiʼ. Ken kíimik wa máaxeʼ, maʼ tu bin kuxtal yaanal tuʼux, jeʼex u tuklik yaʼab máakoʼobeʼ. ¿Baʼaxten k-aʼalik beyaʼ? Tumen bey u yaʼalik le Bibliaoʼ. Le Bibliaoʼ upʼéel libro maʼatech u tuus yéetel ku taal tiʼ le utúuliliʼ jaajil Dios ku kʼaabaʼtik Jéeoba wa Yahveh. Letiʼ beet wíinikoʼob yéetel u yojel baʼax ku yúuchultiʼob ken kíimikoʼob (Isaías 42:8; 2 Timoteo 3:16).

Le Bibliaoʼ ku yaʼalikeʼ Dioseʼ «yéetel luʼum» tu beetaj Adán, le yáax wíinikoʼ (Génesis 2:7). Dioseʼ tu tsʼáaj Adán tiʼ upʼéel jatsʼuts kúuchil tu kʼaabaʼtaj u jardinil Edén. Wa ka u beet le baʼax aʼalaʼabtiʼ tumen Jéeobaoʼ, Adaneʼ maʼ kun kíimil kaʼachi; yéetel tak bejlaʼa kuxaʼaneʼ. Baʼaleʼ tumen Adán maʼ tu yóotaj u yuʼub tʼaaneʼ, Dioseʼ tu yaʼalajtiʼ: «[Bíin] suunakech teʼ luʼumoʼ, tumen tiʼ chʼaʼabechiʼ. Tumen luʼumech yéetel teʼ luʼum bíin suunakechoʼ» (Génesis 3:19).

¿Baʼax túun u kʼáat u yaʼal leloʼ? ¿Tuʼux yaan kaʼach Adán maʼiliʼ beetaʼak tumen Diosiʼ? Mix tuʼux yaan kaʼachi. Maʼ kajaʼan kaʼach teʼ kaʼan bey utúul pixaneʼ. Le oʼolaleʼ, le ka aʼalaʼab tiʼ Adán yaan u kaʼa suut luʼumeʼ, táan u yaʼalaʼaltiʼ yaan u kíimil. Ka kíim Adaneʼ maʼ bin kuxtal yaanal tuʼuxiʼ. Le ka kíimeʼ, jach tu jaajil xuʼul u yantal.

Baʼaleʼ ¿kux túun le uláakʼ máaxoʼob tsʼoʼok u kíimloʼoboʼ, úuch wa xan tiʼob jeʼex úuchik tiʼ  Adaneʼ? Le Bibliaoʼ ku núukik le kʼáatchiʼaʼ.

• «Junpʼéeliliʼ lugar ku binoʼob tuláakloʼob. Tuláakloʼob tiʼ luʼum u taaloʼob, yéetel tuláakloʼob ku kaʼa suutoʼob luʼumil» (Eclesiastés 3:20).

• «Le kimenoʼoboʼ maʼ u yojloʼob mix baʼaliʼ» (Eclesiastés 9:5).

• «Tsʼoʼok xan u xuʼulul le yaabilaj yéetel le celos ku yuʼubikoʼob kaʼachoʼ, yéetel wa yaan máax u pʼekmoʼob kaʼacheʼ tsʼoʼok xan u xuʼulul» (Eclesiastés 9:6).

• «Teʼ Muknal tuʼux ka binoʼ minaʼan meyajiʼ, minaʼan tuukuliʼ, minaʼan kaanbaliʼ yéetel minaʼan naʼatiʼ» (Eclesiastés 9:10).

• «Kéen xuʼuluk u chʼaʼik u yiikʼoʼobeʼ ku suutoʼob teʼ luʼumoʼ. Ku pʼáatal maʼ tu páajtal u béeykuntkoʼob le baʼax u tukultmoʼoboʼ» (Salmo 146:4).

¿Ku talamtal wa tech a creertik le baʼax ku yaʼalik le tekstoʼob tsʼoʼok a xokikoʼ? Wa beyoʼ, tukult lelaʼ: Tiʼ yaʼab familiaʼobeʼ letiʼe íichamtsil ku meyaj utiaʼal u  tsʼáaik baʼax kʼaʼabéet tiʼ u familiaoʼ. Baʼaleʼ ken kíimkeʼ, u familiaeʼ jach ku máansik talamiloʼob. Yaan kʼiineʼ, le atantsil yéetel le paalaloʼoboʼ minaʼantiʼob taakʼin mix utiaʼal u manik baʼal u jaantoʼob. Maʼ xaan xaneʼ ku joʼopʼol u beetaʼaltiʼob loob tumen le máaxoʼob pʼekmil kaʼach le íichamtsiloʼ. Beoraaʼ, tukult lelaʼ: «Wa le íichamtsil láayliʼ kuxaʼan bey pixaneʼ, ¿baʼaxten maʼ tu seguer u tsʼáaik baʼax kʼaʼabéet tiʼ u familia? ¿Baʼaxten maʼ tu kanáantik u familia tiʼ le máaxoʼob beetik loob tiʼoboʼ?». Maʼ tu beetik tumen jach jaaj le baʼax ku yaʼalik le tekstoʼob tsʼoʼok k-ilkoʼ. Letiʼeʼ maʼ kuxaʼan mix tuʼuxiʼ, yéetel maʼ tu páajtal u beetik mix baʼal (Salmo 115:17).

¿Lelaʼ u kʼáat wa túun u yaʼaleʼ mix bikʼin u kaʼa kuxtal le máaxoʼob kimenoʼoboʼ? Maʼ, maʼ letiʼ u kʼáat u yaʼaliʼ. Maas táanileʼ yaan k-tʼaan tiʼ bix kun kaʼa kuxkíintbil le kimenoʼoboʼ. U jaajileʼ le baʼax tsʼoʼok k-ilkaʼ, ku yeʼesikeʼ le máaxoʼob tsʼoʼok u kíimloʼoboʼ maʼ u yojeloʼob baʼax táan a beetkiʼ. Maʼ tu páajtal u yilkechoʼob, u yuʼubkechoʼob mix u tʼankechoʼob. Minaʼan baʼax oʼolal a chʼaʼik saajkil tiʼob. Letiʼobeʼ maʼ tu páajtal u yáantkechoʼob mix u beetkoʼobtech loob (Eclesiastés 9:4; Isaías 26:14).