XOOK 7
¿Baʼax u Reino Dios?
1. ¿Baʼax u Reino Dios?
¿Baʼaxten Jesúseʼ letiʼe maas maʼalob Reyoʼ? (MARCOS 1:40-42)
U Reino Dioseʼ junpʼéel gobierno yaan teʼ kaʼanoʼ. Le gobiernoaʼ yaan u yáantaj utiaʼal u beetaʼal baʼax u kʼáat Dios teʼ kaʼanoʼ bey xan way Luʼumeʼ. ¡Jach letiʼe gobierno kʼaʼabéettoʼonoʼ! Maʼ tun xáantaleʼ u Reino Dioseʼ yaan u xuʼulsik tuláakal le gobiernoʼob yanoʼob way Luʼumeʼ yéetel yaan u pʼáatal chéen letiʼ ku gobernar. ¿Máasaʼ jach jatsʼuts le promesaaʼ? Xok Daniel 2:44; Mateo 6:9, 10; 24:14.
Baʼaleʼ kʼaʼabéet juntúul máak utiaʼal nuʼuktik le Reinooʼ. Jéeobaeʼ tsʼoʼok u yéeyik Jesús utiaʼal u beetik u Reyil le Reinooʼ. Xok Apocalipsis 11:15.
Chaʼant le video ¿Baʼax u Reino Dios?
2. ¿Baʼaxten Jesúseʼ letiʼe maas maʼalob Reyoʼ?
Jesúseʼ letiʼe maas maʼalob Reyoʼ tumen jach uts yéetel mantatsʼ ku beetik baʼax maʼalob (Mateo 11:28-30). Tsʼoʼoleʼ kéen gobernarnak way Luʼumeʼ yaan u yáantik tuláakal máak tumen yaan u poderil tiʼ u beetik. Ka tsʼoʼok u kaʼa kuxkíintaʼal Jesúseʼ suunaj teʼ kaʼanoʼ ka kulaj tu x-noʼoj kʼab Dios utiaʼal u páaʼtik u tsʼaʼabaltiʼ le autoridad utiaʼal u gobernaroʼ (Hebreos 10:12, 13). Beoraaʼ táan u gobernar teʼ kaʼanoʼ. Xok Daniel 7:13, 14.
3. ¿Tu juunal wa kun gobernar Jesús?
Le Bibliaoʼ ku yaʼalikeʼ maʼ tu juunal kun gobernar Jesúsiʼ, yaan u yáantaʼal tumen junmúuchʼ máakoʼob. Tiʼ Daniel 7:27, ku yaʼalaʼaltiʼob santoʼob. U apóstoloʼob Jesús yáax yéeyaʼaboʼob utiaʼal u gobernaroʼob tu yéetel. Teʼ kʼiinoʼobaʼ Jéeobaeʼ láayliʼ táan u yéeyik xiiboʼob yéetel koʼoleloʼob utiaʼal u gobernaroʼob yéetel Jesús. Letiʼobeʼ kéen kíimkoʼobeʼ ku kaʼa kuxkíintaʼaloʼob yéetel ku tsʼaʼabaltiʼob junpʼéel wíinklil jeʼex utiaʼal le ángeloʼob utiaʼal u binoʼob kaʼan. Xok Juan 14:1-3; 1 Corintios 15:42-44.
¿Jaytúul máaxoʼob kun binoʼob kaʼan? Teʼ Bibliaoʼ ku yaʼalaʼaltiʼob «u chan múuchʼ tamanoʼob» (Lucas 12:32). Le Bibliaoʼ ku yaʼalikeʼ 144,000 u túulaloʼob. Xok Apocalipsis 14:1.
4. ¿Baʼaxoʼob úuch ka káaj u gobernar Jesús?
Jesúseʼ káaj u gobernar tu añoil 1914 *. Le yáax baʼax tu beetoʼ letiʼe u jóoʼsik Satanás yéetel u demonioʼob teʼ kaʼanoʼ. Le Kʼaasilbaʼaloʼ pʼuʼuji tumen puʼul way Luʼumeʼ (Apocalipsis 12:7-10, 12). Le oʼolal way Luʼumeʼ táan u sen sufrir máak: yaan wiʼijil, kʼaakʼas kʼojaʼaniloʼob, ku tíitkuba luʼum yéetel guerraʼob. Le baʼaxoʼob ku yúuchloʼ ku yeʼesik jach taʼaytak u káajal u gobernar u Reino Dios way Luʼumeʼ. Xok Lucas 21:7, 10, 11, 31.
5. ¿Baʼax ku beetik u Reino Dios teʼ kʼiinoʼobaʼ? ¿Baʼax ken u beet tu yáamil mil años?
Teʼ kʼiinoʼobaʼ u Reino Dioseʼ táan u muchʼik «yaʼabkach máakoʼob» tiʼ tuláakal kaajoʼob yéetel le kʼaʼaytajoʼ. U millonesil xiiboʼob yéetel koʼoleloʼobeʼ táan u tsʼáaikubaʼob tu favor Jesucristo. Letiʼobeʼ yaan u salvartaʼaloʼob le kéen xuʼulsaʼak le kʼasaʼan máakoʼoboʼ. Le oʼolaleʼ wa k-kʼáat ka salvartaʼakoʼon tumen u Reino Dioseʼ kʼaʼabéet k-uʼuyik u tʼaan Jesús. Xok Apocalipsis 7:9, 14, 16, 17.
Tu yáamil mil añoseʼ u Reino Dioseʼ yaan u kaʼa sutik paraísoil le Luʼumaʼ. Kéen u tsʼoʼoks u meyaj Jesúseʼ yaan u sutik le Reino tiʼ u Taataoʼ (1 Corintios 15:24-26). ¿Tiʼ máax a kʼáat a tsikbalt le baʼaxoʼob táan a kanik yoʼolal u Reino Diosoʼ? Xok Salmo 37:10, 11, 29.
^ xóot’ol 6 Utiaʼal a wojéeltik baʼax ku yaʼalik le Biblia yoʼolal u añoil 1914, ilawil le nota 21 página 216 tak 219 tiʼ le libro ¿Baʼax k-kanik teʼ Bibliaoʼ?
