Dioseʼ ku yaʼalik tiʼ tuláakal máak ka orarnak (Salmo 65:2). Pero maʼ tuláakal le oraciónoʼob ku yuʼubikoʼ. Teʼ Bibliaoʼ ku yaʼalikeʼ le íichamtsil ku maltratartik u yataneʼ maʼ tu yuʼubaʼal u oración tumen Dios (1 Pedro 3:7). Dioseʼ maʼ tu yuʼubik kaʼach u oración le israelitaʼob wa mantatsʼ ku beetkoʼob baʼaloʼob kʼaastakoʼ. Chéen baʼaleʼ Dioseʼ jeʼel u yuʼubik u oración le máax lúub tiʼ junpʼéel nojoch kʼeban pero tsʼoʼok u arrepentiroʼ. Xok Isaías 1:15; 55:7.

Chaʼant le video ¿Ku yuʼubik wa Dios tuláakal le oraciónoʼoboʼ?

Le oraciónoʼ táakaʼan ichil le adoración k-tsʼáaik tiʼ Diosoʼ le beetik chéen tiʼ Jéeoba unaj k-orar (Mateo 4:10; 6:9). Kʼaʼabéet k-orar tu kʼaabaʼ Jesús tumen tu tsʼáaj u kuxtal utiaʼal u boʼotik k-kʼebanoʼob (Juan 14:6). Jéeobaeʼ maʼ u kʼáat ka k-aʼal de memoriail le oraciónoʼoboʼ, baʼaxeʼ u kʼáat ka jóokʼok t-puksiʼikʼal le baʼax ken k-aʼaloʼ. Xok Mateo 6:7; Filipenses 4:6, 7.

Jéeobaeʼ ku yuʼubik xan le oraciónoʼob k-beetik chéen ichil k-tuukuloʼ (1 Samuel 1:12, 13). Letiʼeʼ u kʼáat ka orarnakoʼon tuláakal súutukil: kéen ajakoʼon, antes k-wenel, antes k-janal wa le kéen yanaktoʼon problemas. Xok Salmo 55:22; Mateo 15:36.

Maʼ fácil u beetik máak baʼax ku yaʼalik Diosiʼ tumen u maas yaʼabil le máakoʼoboʼ maʼ tu creerkoʼob wa yaan Dios mix u promesaʼob (2 Timoteo 3:1, 4; 2 Pedro 3:3, 13).  Le oʼolal jach kʼaʼabéet k-muchʼikba yéetel máaxoʼob adorartik Jéeoba utiaʼal k-paklan líiʼsik k-óol. Xok Hebreos 10:24, 25.

Wa k-muchʼikba yéetel máaxoʼob u yaabiltmoʼob Dioseʼ yaan xan k-maas natsʼikba tiʼ letiʼ. Le muchʼtáambaloʼob ku beetik u testigoʼob Jéeobaoʼ ku yáantkoʼon utiaʼal u maas nojochtal k-fe yéetel utiaʼal k-paklan líiʼsik k-óol. Xok Romanos 1:11, 12.

K-natsʼikba yiknal Dios le kéen tuukulnakoʼon tiʼ le baʼaxoʼob ku beetkoʼ, tiʼ u consejoʼob yéetel tiʼ u promesaʼob yaan teʼ Bibliaoʼ. Wa k-orar yéetel k-maas kʼaj óoltik Dioseʼ yaan k-ilik jach u yaabiltmoʼon yéetel jach yaan u naʼat. Xok Josué 1:8; Salmo 1:1-3.

Chéen ku páajtal u natsʼkuba máak yiknal Dios wa yaan u fe tiʼ letiʼ. Le fejoʼ bey jeʼex junpʼéel chan paakʼaleʼ: mantatsʼ kʼaʼabéet u jóoyabtaʼal utiaʼal u nojochtal, le fe xanoʼ ku nojochtal le kéen tuukulnakoʼon tiʼ le baʼax k-kanik yoʼolal Jéeobaoʼ. Xok Mateo 4:4; Hebreos 11:1, 6.

Jéeobaeʼ ku kanáantik máaxoʼob yaabiltik. Ku kanáantkoʼob tiʼ baʼaxoʼob jeʼel u náachkuntkoʼob tiʼ letiʼeʼ (Salmo 91:1, 2, 7-10). Teʼ Bibliaoʼ ku yaʼaliktoʼon bix unaj k-kuxtal utiaʼal u kiʼimaktal k-óol yéetel utiaʼal maʼ k-kʼojaʼantal. Xok Salmo 73:27, 28; Santiago 4:4, 8.