JAATS 3
Le nuʼuktajoʼob ku tsʼáaik le Reinooʼ: K-kaʼansaʼal k-beet baʼaxoʼob maʼalobtak
TSʼOʼOK a tsʼáaik cuentaeʼ a vecinoeʼ jach ku beetik u cuentail baʼaxoʼob ka beetkeʼex. Le ka ta wilaj bejlaʼeʼ ta tʼanaj jeʼex suukil a beetkeʼ. Letiʼeʼ ku núukik yéetel ku béechʼkʼabtikech utiaʼal ka náatsʼkech tu yiknal. Letiʼeʼ ku yaʼalik: «¿Baʼax oʼolal teʼexeʼ jelaʼan a kuxtaleʼex tiʼ u maasil?». Techeʼ ka núukiktiʼ: «¿Baʼaxten ka waʼalik leloʼ?». Letiʼeʼ ku núukik: «¿Máasaʼ teʼexeʼ u j-jaajkunajeʼex Jéeoba? Teʼexeʼ maʼ beyeʼex jeʼex u maasil máakoʼob tiʼ yaanal religionoʼoboʼ, tumen maʼatech a beetkeʼex le kʼiinbesajoʼob suukaʼan u beetaʼaloʼoboʼ, maʼatech a táakpajleʼex tiʼ política mix tiʼ baʼateltáambaloʼob. Maʼatech a tsʼuʼutsʼkeʼex chamal. Tuláakleʼex jach maʼalob baʼax ka beetkeʼex. ¿Baʼax oʼolal bey a kuxtaleʼexoʼ?».
Lelaʼ k-beetik tumen k-nuʼuktik k-kuxtal jeʼex u yaʼalik u Reino Dioseʼ. Jesús, le máax gobernartikoʼonoʼ, mantatsʼ táan u kaʼanskoʼon k-maʼalobkíint bix k-kuxtal. Letiʼeʼ ku yáantkoʼon kuxtal jeʼex tu beetiloʼ, le oʼolal maʼ beyoʼon jeʼex u maasil máakoʼoboʼ. Teʼ jaatsaʼ yaan k-ilik bix u kaʼansaʼal le máaxoʼob meyajtik Dios tumen le Rey yéeyaʼan utiaʼal ka u beetoʼob baʼaloʼob maʼalobtak utiaʼal u nojbeʼenil Jéeobaoʼ.
BAʼAX YAAN TEʼ JAATSAʼ
XOOKIL 11
Junpʼéel kuxtal limpio: Ku chíikbesaʼal u nojbeʼenil Dios
Le kúuchiloʼob tuʼux yaan le máaxoʼob ku kanáanoʼoboʼ yéetel le baʼax tu chíikbesaj le joonajoʼob tu yilaj Ezequieloʼ joʼopʼ u béeytaloʼob ichil u kaajal Dios desde 1914.
XOOK 12
Kaʼansaʼanoʼon utiaʼal k-meyajtik ‹u Diosil le jeetsʼeliloʼ›
Le Bibliaoʼ maʼatech u tʼaan tiʼ baʼaloʼob xaʼakʼaʼan yaniloʼob yéetel tiʼ baʼaloʼob tu tsoolol yaniliʼ, baʼaxeʼ tiʼ baʼaloʼob xaʼakʼaʼan yaniloʼob yéetel tiʼ jeetsʼelil. ¿Baʼaxten? Tumen le baʼaloʼob tu tsoolol yaniloʼ maʼ mantatsʼ ku taasik jeetsʼeliliʼ.