1. ¿Baʼax tsʼaʼab u yil profeta Ezequiel tu beetaj u jach u jaʼakʼal u yóol?

 ¿BIX jeʼel a wuʼuyikaba wa ka eʼesaʼaktech le baʼax tu yilaj profeta Ezequiel óoliʼ dos mil quinientos jaʼaboʼobaʼ? Tukle: Techeʼ táan a náatsʼal yiknal junpʼéel nojoch yéetel jatsʼuts templo. Teʼeloʼ ka kʼaʼamal tumen juntúul ángel jach yaan u páajtalil yéetel ku máanskech a kʼaj óolt le templooʼ. Techeʼ ka naʼakal tiʼ siete escalones utiaʼal a kʼuchul tiʼ junpʼéel tiʼ le óoxpʼéel joonajoʼob yaan teʼ templooʼ. Le joonajoʼobaʼ ku beetik u jaʼakʼal a wóol tumen yaan kex 30 metros u kaʼanlil cada junpʼéel. Tu yookbal cada junpʼéel joonajeʼ yaan máakoʼob ku kananoʼobiʼ. Teʼ columnaʼoboʼ beetaʼan u dibujoil u matailoʼob xaʼaniʼ (Eze. 40:1-4, 10, 14, 16, 22; 41:20).

2. 1) ¿Baʼax ku chíikbesik le templooʼ? (Ilaʼak xan le tsolajiloʼ.) 2) ¿Baʼax ku chíikbesik le u nukuch joonajiloʼob le Templooʼ?

² Le baʼax tsʼaʼab u yil Ezequieloʼ junpʼéel templo espiritual. Teʼ capítulo 40 tak 48 tiʼ u libroil Ezequieloʼ ku maas tsoʼolol bix le temploaʼ. Lelaʼ ku chíikbesik bix u kʼáat Jéeoba ka adorartaʼak. Cada junpʼéel tiʼ le baʼaxoʼob yaan ichiloʼ ku yeʼesik bix unaj k-adorartik Jéeoba teʼ tu tsʼook kʼiinoʼobaʼ. a ¿Baʼax ku yeʼesik le nukuch joonajoʼoboʼ? Ku yeʼesikeʼ le máaxoʼob u kʼáatoʼob u adorartoʼob Jéeobaeʼ unaj u kuxtaloʼob jeʼex u yaʼalik u leyoʼobeʼ. Lelaʼ bey u yeʼesik xan le u matailoʼob xaʼan beetaʼan u dibujoiloʼoboʼ. Leloʼobaʼ yaan kʼiineʼ ku meyajoʼob utiaʼal u yúuchul tʼaan tiʼ u bisik máak junpʼéel toj kuxtal (Sal. 92:12). ¿Baʼax ku chíikbesik le kúuchiloʼob tuʼux yaan le máak ku kananoʼ? Ku yeʼesikeʼ le máaxoʼob ku xuʼulul u kuxtaloʼob jeʼex u kʼáat Dioseʼ maʼ tu chaʼabal u seguer u pʼáatloʼob ichil le máaxoʼob adorartik Dios jeʼex unajoʼ (Eze. 44:9).

3. ¿Baʼaxten cada ku kʼaʼabéettal u limpiokíintaʼal le máaxoʼob meyajtik Diosoʼ?

³ ¿Bix tsʼoʼok u béeytal le baʼax tsʼaʼab u yil Ezequieloʼ? Jeʼex t-ilaj teʼ xook 2 tiʼ le libroaʼ, tiʼ Jéeobaeʼ meyajnaj Cristo utiaʼal u limpiokíintik u kaajal. Lelaʼ tu beetaj desde tu jaʼabil 1914 tak tu yookbal 1919. Baʼaleʼ ¿chéen wa teʼ kʼiinoʼob tu limpiokíintoʼ? Maʼatech. Teʼ cien jaʼaboʼob tsʼoʼok u máanoʼ Cristoeʼ tu yáantaj le máaxoʼob tsaypacht utiaʼal ka kuxlakoʼob jeʼex u kʼáat Diosoʼ. ¿Baʼaxten tu beetaj? Tumen le máaxoʼob tsaypachtikoʼ tiaʼanoʼob ichil le kʼasaʼan yóokʼol kaabaʼ yéetel le Kʼaasilbaʼaloʼ mantatsʼ táan u kaxtik bix jeʼel u beetik u lúubloʼob tiʼ le baʼaloʼob kʼaastak ku beetaʼal teʼ yóokʼol kaabaʼ (xok 2 Pedro 2:20-22). Koʼox ilik óoxpʼéel bix tsʼoʼok u limpiokíintaʼal le máaxoʼob meyajtik Diosoʼ.  Yáaxeʼ u kuxtaloʼob, u kaʼapʼéeleʼ le múuchʼuliloʼ yéetel u yóoxpʼéeleʼ le familiaoʼ.

4, 5. ¿Baʼax tsʼoʼok u jach meyaj tiʼ Satanás utiaʼal u beetik u lúubul tiʼ baʼax kʼaas le máaxoʼob meyajtik Diosoʼ?

⁴ U kaajal Jéeobaeʼ mantatsʼ ku yilik ka yanak junpʼéel toj kuxtal tiʼ le máaxoʼob ku yookloʼob ichiloʼ. Le oʼolal cada táan u tsʼáaik tsolnuʼukoʼob utiaʼal u nuʼuktik u kuxtaloʼob. Koʼox ilik jujunpʼéeliʼ.

⁵ Núupkʼeban. Jéeobaeʼ tu tsʼáaj u páajtalil tiʼ le xiib yéetel tiʼ le koʼolel tsʼokaʼan u beeloʼob utiaʼal ka núupchilakoʼoboʼ. Baʼaleʼ Satanaseʼ uts tu tʼaan u kʼaskúuntik le jatsʼuts siibalaʼ yéetel ku meyajtiʼ utiaʼal u náachkuntik máak tiʼ Dios. Le núupchitaloʼ letiʼe baʼax meyajnajtiʼ utiaʼal u beetik u lúubul tiʼ baʼax kʼaas yaʼab tiʼ le israelitaʼob tu kʼiiniloʼob Balaamoʼ yéetel letiʼe baʼax ku meyaj xan tiʼ teʼ kʼiinoʼobaʼ (Núm. 25:1-3, 9; Apo. 2:14).

6. ¿Baʼax ku yaʼalik le voto jóoʼsaʼab teʼ revista The Watchtoweroʼ, bix meyajnajik yéetel baʼaxten xuʼul u meyaj? (Ilaʼak xan le tsolajiloʼ.)

⁶ Utiaʼal u kanáantaʼal u kaajal Dios tiʼ le baʼaxoʼob ku beetik Satanasoʼ, jóoʼsaʼab junpʼéel voto teʼ revista Watch Tower 15 tiʼ junio tiʼ 1908, ku yaʼalik: «Jeʼel tuʼuxak yanen yéetel jeʼel baʼalak súutukileʼ yaan in kanáantik maʼ in lúubul tiʼ baʼax kʼaas kex tak chéen tin juunal pʼaatlen yéetel juntúul xiib wa yéetel juntúul koʼolel». b Kex mix máak kaʼach ku obligartaʼal u tsʼoʼokbes le votoaʼ, yaʼabeʼ tu beetaj yéetel kiʼimak óolal yéetel tu túuxtaj u kʼaabaʼob utiaʼal ka jóoʼsaʼak teʼ revista Watch Toweroʼ. Ka máan kʼiineʼ ilaʼabeʼ kex yaʼab máax tu yáantaj le votooʼ, pʼáat minaʼan u muukʼ tumen xuʼul u tsʼoʼokbesaʼal. Baʼaleʼ le bix u kʼáat Dios ka kuxlak máak jeʼex u chíikbesik le votooʼ láayliʼ maʼalobeʼ.

7. ¿Baʼax tiʼ tʼaanaj le revista The Watchtower tu jaʼabil 1935, yéetel baʼax tsolnuʼukil tu tsʼáaj tiʼ le tsʼokaʼan u beeloʼoboʼ?

⁷ Satanaseʼ maas pʼuʼuj tu contra u kaajal Dios. Le revista The Watchtower 1 tiʼ marzo tiʼ 1935, tʼaanaj tiʼ junpʼéel baʼax joʼopʼ u yúuchul ichil u kaajal Jéeoba. Yaan sukuʼunoʼobeʼ tu tukloʼobeʼ tumen ku jóokʼloʼob kʼaʼaytajeʼ maʼ jelaʼan ka núupkʼebanchajkoʼobiʼ. Le revistaoʼ tu yaʼalaj: «Cada juntúuleʼ unaj u kʼaʼajsikeʼ maʼ chéen unaj u jóokʼol máak kʼaʼaytajiʼ. Le j-Jaajkunajoʼoboʼ ku biskoʼob u kʼaabaʼ Jéeoba, le oʼolal unaj u kanáantik baʼax ku beetkoʼob utiaʼal maʼ u yúuchul tʼaan kʼaas tiʼ Jéeoba mix tiʼ u Reino». Ka tsʼoʼokeʼ le xookoʼ tu tsʼáaj maʼalob tsolnuʼukoʼob tiʼ le tsʼokaʼan u beeloʼoboʼ yéetel tu líiʼsaj u yóoloʼob utiaʼal ka ‹púutsʼkoʼob tiʼ le núupkʼebanoʼ› (1 Cor. 6:18).

8. ¿Baʼaxten le revista The Watchtoweroʼ yaʼab u téenel tsʼoʼok u tsolik baʼax táakaʼan ichil le núupkʼebanoʼ?

⁸ Teʼ tu tsʼook jaʼaboʼobaʼ le revista The Watchtower tsʼoʼok u tsolik yaʼab u téenel baʼax táakaʼan ichil le tʼaan pornéya ku meyaj ichil le Kiliʼich Tsʼíiboʼob ich Griego utiaʼal u yúuchul tʼaan tiʼ le núupkʼebanoʼ. Tu yaʼaleʼ le tʼaanaʼ maʼ chéen táan u tʼaan tiʼ le núupchitaloʼ, baʼaxeʼ tiʼ tuláakal le baʼaloʼob kʼaastak yéetel suʼtsiltak jeʼex le ku beetaʼal tu najiloʼob prostitucionoʼ. Jeʼex k-ilkoʼ le máaxoʼob tsaypachtik Cristooʼ mantatsʼ táan u kanáantaʼaloʼob utiaʼal maʼ u lúubloʼob tiʼ le núupkʼeban chupmil le yóokʼol kaabaʼ (xok Efesoiloʼob 4:17-19).

9, 10. 1) ¿Baʼax tiʼ tʼaanaj le revista The Watchtower 1 tiʼ marzo tiʼ 1935? 2) ¿Baʼax ku yaʼalik le Biblia tiʼ u yuʼukʼul vino wa cervezaoʼ?

 ⁹ Káaltalil. Le revista The Watchtower 1 tiʼ marzo tiʼ 1935, tʼaanaj tiʼ uláakʼ baʼax maʼ unaj u beetaʼaliʼ, tu yaʼalaj: «Tsʼoʼok xan u yilaʼaleʼ yaneʼ u chan ukʼmaj ken jóokʼok kʼaʼaytaj yéetel ken u beet uláakʼ meyajoʼob teʼ múuchʼuliloʼ. ¿Baʼax súutukil ku yaʼalik le Biblia maʼ jelaʼan ka uʼukʼuk vinooʼ? ¿Maʼalob wa ka u yukʼ máak táanil tiʼ u táakpajal tiʼ le meyajoʼob ku beetaʼal teʼ múuchʼuliloʼ?».

¹⁰ Le bix úuchik u núukaʼal le kʼáatchiʼ ichil le xookoʼ tu yeʼesaj baʼax ku yaʼalik le Biblia tiʼ u yuʼukʼul vino wa cervezaoʼ. Le Bibliaoʼ maʼatech u yaʼalik wa kʼaas u yuʼukʼul, baʼaleʼ ku yaʼalik junpuliʼ maʼ unaj u káaltal máakiʼ (Sal. 104:14, 15; 1 Cor. 6:9, 10). Tiʼ le máaxoʼob meyajtik Diosoʼ cada ku kʼaʼajsaʼal bix úuchik u kíimil u paalal Aarón utiaʼal u yeʼesaʼaltiʼob maʼ maʼalob u yukʼik máak aguardiente táanil tiʼ u beetik wa baʼax meyajil teʼ múuchʼuliloʼ. Yoʼolal le baʼax ku seguer u yaʼalik le Bibliaoʼ ku tuklaʼal bey baʼax maʼ maʼalob tu beetoʼobeʼ, tumen aʼalaʼab tiʼ le sacerdoteʼob maʼ u yukʼikoʼob aguardiente tu yorail táan u beetkoʼob le meyajoʼob tsʼaʼantiʼoboʼ (Lev. 10:1, 2, 8-11). Le oʼolal le máaxoʼob tsaypachtik Cristo bejlaʼaʼ maʼatech u yukʼikoʼob mix junpʼíit aguardiente wa táan u beetkoʼob le meyaj tsʼaʼantiʼob teʼ múuchʼuliloʼ.

11. ¿Baʼaxten jach nojoch áantaj tsʼoʼok u tsʼáaik le jóoʼsaʼaniloʼob tiʼ le máaxoʼob tsaypachtik Cristooʼ?

¹¹ Teʼ tu tsʼook jaʼaboʼobaʼ tsʼoʼok u yáantaʼal le máaxoʼob tsaypachtik Cristo u maas naʼatoʼob maʼ maʼalob u suuktal tiʼ máak u sen ukʼik aguardienteiʼ. Le jóoʼsaʼaniloʼob ku tsʼáaik le palitsiloʼ tsʼoʼok u yáantik yaʼab máakoʼob u pʼat u káaltaloʼob yéetel u yutskíint u kuxtaloʼob. Yaan xan tiʼ le máakoʼob úuch lúubkoʼob tiʼ le vicioaʼ tsʼoʼok u yáantaʼaloʼob utiaʼal ka u pʼatoʼob. Bey túunoʼ le maʼalob kaʼansajoʼ tsʼoʼok u yáantik yaʼab máakoʼob u bisoʼob junpʼéel kuxtal limpio, u yantal kiʼimak óolal ichil u familiaʼob yéetel u adorarkoʼob Jéeoba jeʼex uts tu tʼaaneʼ.

12. Desde úucheʼ, ¿baʼax u naʼatmaj le máaxoʼob tsaypachtik Cristo tiʼ u tsʼuʼutsʼaʼal chamaloʼ?

¹² Tsʼuʼutsʼ chamal. Le máaxoʼob tsaypachtik Cristooʼ desde úuchjeakileʼ u wéej naʼatmoʼob maʼ uts tu tʼaan Dios ka u tsʼuʼutsʼoʼob chamaliʼ. Charles Capen, juntúul sukuʼun tsʼoʼok u yantal u jaʼabileʼ, tu tsikbaltaj le baʼax úuch le ka tu kʼaj óoltaj sukuʼun Charles Taze Russell tu jóokʼbal le siglo 19. Teʼ kʼiinoʼob jeʼeloʼ 13 jaʼaboʼob yaan tiʼ sukuʼun Capen, letiʼ, u sukuʼun yéetel kaʼatúul u yíitsʼnoʼobeʼ tiʼ kulukbaloʼob kaʼach tu escalerail le naj ku kʼaabaʼtik Casa Bíblica yaan kaʼach Allegheny (Pensilvania, Estados Unidos). Le ka máan sukuʼun Russell yiknaloʼobeʼ tu kʼáatajtiʼob: «¿Táan wa tsʼuʼutsʼkeʼex chamal? Tumen jach bóok chamal». Letiʼobeʼ tu yaʼaloʼobtiʼ maʼ táan u tsʼuʼutsʼkoʼob chamaliʼ. Yéetel lelaʼ tu naʼatoʼob maʼ maʼalob u yilik sukuʼun Rusell u tsʼuʼutsʼaʼal chamaliʼ. Teʼ revista Watch Tower 1 tiʼ agosto tiʼ 1895, le sukuʼun Russelloʼ tu yaʼalaj yoʼolal 2 Corintoiloʼob 7:1: «Maʼ tin kʼuchul in naʼat bix jeʼel u tsʼáaik nojbeʼenil tiʼ Dios le u tsʼuʼutsʼaʼal chamaloʼ yéetel baʼax utsil ku kʼamik le máax ku tsʼuʼutsʼoʼ [...]. Maʼ tu páajtal k-máansik t-tuukul Jesuseʼ táan u tsʼuʼutsʼ chamal yéetel tuʼuchajaʼan yéetel u book».

13. ¿Baʼax aʼalaʼab tu jaʼabil 1973 yoʼolal le máaxoʼob ku tsʼuʼutsʼkoʼob chamaloʼ?

 ¹³ Tu jaʼabil 1935, le revista The Watchtoweroʼ tu yaʼaleʼ le kʼúutsoʼ junpʼéel «xíiw tuʼ» yéetel le máaxoʼob chaʼachik wa tsʼuʼutsʼik u chamaliloʼ maʼ tu páajtal u seguer u meyajoʼob Betel mix u beetkoʼob uláakʼ meyaj ichil u kaajal Dios, jeʼex u beetik u precursoriloʼob wa u viajanteiloʼob. Tu jaʼabil 1973, maas aʼalaʼab ka pʼaʼatak le vicioaʼ. Le revista The Watchtower 1 tiʼ juniooʼ tu yaʼaleʼ mix juntúul u j-jaajkunaj Jéeoba jeʼel u páajtal u pʼáatal ichil le múuchʼulil wa maʼ tu xulik u tsʼuʼutsʼ chamaloʼ, tumen lelaʼ ku suciokintik u wíinklil yéetel maʼatech u yeʼesik yaabilaj tiʼ u maasil. Le máaxoʼob maʼ tu pʼataj u tsʼuʼutsʼ chamaloʼoboʼ jóoʼsaʼaboʼob teʼ múuchʼuliloʼ. c Lelaʼ letiʼe uláakʼ baʼax meyajnaj tiʼ Cristo utiaʼal u limpiokíintik le máaxoʼob tsaypachtikoʼ.

14. ¿Baʼax u yaʼalmaj Dios yoʼolal le kʼiʼikʼoʼ, yéetel baʼax kʼiin ka káaj u maas meyaj tiʼ le doctoroʼoboʼ?

¹⁴ Le bix maʼ maʼalob ka meyajnak le kʼiʼikʼoʼ. Tu kʼiiniloʼob Noeeʼ, Dioseʼ tu yaʼalaj maʼ maʼalob ka jaantaʼak le kʼiʼikʼoʼ, bey xan úuchik u yaʼalik tiʼ u kaajil Israeloʼ. Tiʼ le yáax cristianoʼoboʼ tu yaʼalaj xan tiʼob «ka u náachkuntubaʼob [...] tiʼ kʼiʼikʼ» (Bax. 15:20, 29; Gén.9:4; Lev. 7:26). Baʼaleʼ teʼ kʼiinoʼobaʼ Satanaseʼ tsʼoʼok u kaxtik bix u yoksik tu tuukul máak utiaʼal u bin tu contra le baʼax ku yaʼalik Diosaʼ. Le doctoroʼoboʼ káaj u tsʼáaikoʼob kʼiʼikʼ tiʼ máak teʼ siglo 19, baʼaleʼ ka joʼopʼ u kʼaj óoltaʼal baʼax clase kʼiʼikʼil yaan tiʼ máakeʼ joʼopʼ u maas meyajtiʼob. Tu jaʼabil 1937, joʼopʼ u líiʼsaʼal le kʼiʼikʼ utiaʼal u kaʼa meyajoʼ yéetel káaj u maas tsʼaʼabal kʼiʼikʼ tiʼ máak tu kʼiiniloʼob le Kaʼapʼéel Nojoch Baʼateltáambaloʼ. Maʼ xáanchaj ka joʼopʼ u meyaj kʼiʼikʼ tuláakal yóokʼol kaabiʼ.

15, 16. 1) ¿Tsʼoʼok wa u beetik le j-Jaajkunajoʼob le baʼax ku yaʼalik Jéeoba yoʼolal le kʼiʼikʼoʼ? 2) ¿Bix tsʼoʼok u yáantaʼal u j-jaajkunajoʼob Jéeoba utiaʼal maʼ u kʼamkoʼob le tratamientoʼob tuʼux ku meyaj le kʼiʼikʼoʼ, yéetel baʼax utsil tsʼoʼok u taasik?

¹⁵ Tu jaʼabil 1944, le revista The Watchtoweroʼ tu yaʼaleʼ le u tsʼaʼabal kʼiʼikʼ tiʼ máakoʼ bey jeʼex ka jaantaʼakeʼ. Teʼ jaʼab xan jeʼeloʼ maas eʼesaʼab baʼaxten ku yaʼalaʼal beyaʼ. Tu jaʼabil 1951, jóoʼsaʼab u jaats kʼáatchiʼob yéetel u núukiloʼob utiaʼal u yáantaʼal le máaxoʼob meyajtik Dios utiaʼal u tʼaanoʼob yéetel le doctoroʼoboʼ. Tiʼ tuláakal yóokʼol kaabeʼ le sukuʼunoʼoboʼ maʼ tu chʼaʼajoʼob saajkil u beetoʼob le baʼax ku yaʼalik Dios yoʼolal le kʼiʼikʼoʼ, kex yaan hora ku chʼaʼpachtaʼaloʼob yéetel ku pʼaʼastaʼaloʼob. Baʼaleʼ Cristoeʼ tu péeksaj le palitsil utiaʼal u tsʼáaik le áantaj kʼaʼabéetoʼ. Jóoʼsaʼab folletoʼob yéetel xookoʼob ku tsolkoʼob baʼaxten maʼ unaj u tsʼaʼabal kʼiʼikʼ tiʼ máakiʼ.

¹⁶ Tu jaʼabil 1979, jujuntúul ancianoʼobeʼ joʼopʼ u binoʼob teʼ hospitaloʼob utiaʼal u yáantkoʼob le doctoroʼob u naʼatoʼob baʼaxten maʼatech k-kʼamik kʼiʼikʼ, baʼax ku yaʼalik le Biblia tu yoʼolaloʼ yéetel baʼaxoʼob jeʼel k-kʼamik tu lugar le kʼiʼikʼoʼ. Tu jaʼabil 1980, u ancianoiloʼob 39 nukuch kaajoʼob tiʼ Estados Unidoseʼ kaʼansaʼabtiʼob u beetoʼob le meyajaʼ. Ka máan kʼiineʼ le Cuerpo Gobernanteoʼ tu yaʼalaj ka yanak le Comiteʼob tiʼ Enlace yéetel Hospitaloʼob tiʼ tuláakal yóokʼol kaaboʼ. ¿Baʼax utsiloʼob tsʼoʼok u taasik leloʼ? Bejlaʼeʼ yaʼab cirujanoʼob yéetel anestesiologoʼob ku beetkoʼob le baʼax ku yaʼalik le j-Jaajkunajoʼob utiaʼal maʼ u meyaj kʼiʼikʼ utiaʼal u tsʼaʼakaloʼoboʼ. Sáamsamaleʼ táan u maas yaʼabtal hospitaloʼob  ku tsʼáaikoʼob tratamientoʼob tuʼux maʼatech u tsʼaʼabal kʼiʼikʼ tiʼ máak, yaan tak doctoroʼobeʼ ku yaʼalikoʼobeʼ le tratamientoʼobaʼ letiʼe maas maʼaloboʼ. ¿Máasaʼ jach maʼalob bix u kanáantik Jesucristo le máaxoʼob tsaypachtik utiaʼal maʼ u kʼaskúuntaʼal u kuxtaloʼob tumen Satanasoʼ? (Xok Efesoiloʼob 5:25-27.)

17. ¿Bix jeʼel k-eʼesik jach maʼalob k-ilik le baʼax ku beetik Cristo utiaʼal u limpiokíintik le máaxoʼob meyajtik Diosoʼ?

¹⁷ Jach maʼalob ka tuukulnakoʼon tiʼ lelaʼ: «¿Nojoch baʼal wa in wilik le baʼax ku beetik Cristo utiaʼal u limpiokíintikoʼon, ikil u kaʼansiktoʼon bix u kʼáat Jéeoba ka kuxlakoʼonoʼ?». Wa beyoʼ, maʼ u tuʼubultoʼoneʼ Satanaseʼ mantatsʼ táan u kaxtik bix u náachkuntkoʼon tiʼ Jéeoba yéetel tiʼ Cristo utiaʼal k-ilik maʼ kʼaas le bix kuxlik le máakoʼob teʼ yóokʼol kaabaʼ. Baʼaleʼ utiaʼal maʼ k-lúubul tu kʼab Satanaseʼ, u kaajal Jéeobaeʼ mantatsʼ táan u kʼaʼajsiktoʼon yéetel yaabilaj ka k-kanáantba tiʼ le baʼaloʼob kʼaastak ku beetaʼal teʼ yóokʼol kaabaʼ. Le oʼolal jach maʼalob ka k-chʼaʼtukult maʼ u náayal k-óol yéetel ka k-tsʼáa ichil k-kuxtal le tsolnuʼukoʼob ku tsʼáaiktoʼon Jéeobaoʼ (Pro. 19:20).

18. ¿Baʼax ku kʼaʼajsiktoʼon le templo tu yilaj Ezequiel yoʼolal le máaxoʼob maʼ u kʼáatoʼob kuxtal jeʼex kʼáat Diosoʼ?

¹⁸ Le u kaʼapʼéel bix u limpiokíintaʼal le máaxoʼob meyajtik Diosoʼ yaan yil yéetel le múuchʼuliloʼ. Tsʼoʼok u yilaʼaleʼ maʼ tuláakal  uts tu tʼaan u nuʼuktik u kuxtal jeʼex u yaʼalik Jéeobaoʼ yéetel maʼ tuláakal ku chúukpajal u yóol u meyajtiʼ. Yaneʼ ken máanak kʼiineʼ ku kʼexpajal u puksiʼikʼal yéetel ku bin tu contra le bix u kʼáat Jéeoba ka kuxlakoʼonoʼ. ¿Baʼax unaj u beetaʼal tiʼ le máaxoʼob ku yúuchultiʼob beyoʼ? Utiaʼal k-ojéeltikeʼ koʼox tʼaan tu kaʼatéen tiʼ le templo espiritual tu yilaj Ezequieleʼ. ¿Kʼajaʼantech wa le nukuch joonajoʼobeʼ? Tiʼ cada junpʼéeleʼ yaan junpʼéel kúuchil tuʼux yaan juntúul máak ku kananiʼ. Le máakoʼob kanáantik le templooʼ maʼatech u chaʼikoʼob kaʼach u yokol mix juntúul máak ‹minaʼan u chíikulal núuptʼaan tu tuukul› (Eze. 44:9). Lelaʼ ku yeʼesikeʼ maʼ tuláakal máak jeʼel u páajtal u adorartik Jéeobaeʼ, baʼaxeʼ chéen le máaxoʼob ku nuʼuktik u kuxtaloʼob jeʼex u yaʼalikoʼ. Bejlaʼa xaneʼ maʼ tuláakal máak jeʼel u páajtal u táakpajal u adorart Dios jeʼex u beetik le u maasiloʼob yaan teʼ múuchʼuliloʼoboʼ.

19, 20. 1) ¿Bix tsʼoʼok u yáantik Cristo le máaxoʼob tsaypachtik utiaʼal ka u juzgartoʼob le máaxoʼob maʼ tu xuʼulul u beetkoʼob baʼaloʼob kʼaastakoʼ? 2) ¿Máakalmáak le óoxpʼéel baʼax oʼolal unaj u jóoʼsaʼal teʼ múuchʼulil juntúul máax maʼ tu arrepentiroʼ?

¹⁹ Tu jaʼabil 1892, le revista Watch Toweroʼ tu yaʼaleʼ «unaj k-jóo’sik ichil le múuchʼulil le máaxoʼob maʼatech u kʼamkoʼob wa tu jaajil tu tsʼáaj u kuxtal Cristo utiaʼal u boʼotik u kʼeban tuláakal máakoʼ» (xok 2 Juan 10). Tu jaʼabil 1904, le libro The New Creation (Túumben baʼaloʼob) tu yaʼaleʼ le máaxoʼob maʼ tu xuʼulul u beetkoʼob baʼaloʼob kʼaastakoʼ jeʼel u beetkoʼob u tʼóochpajal u maasil sukuʼunoʼob teʼ múuchʼuliloʼ. Teʼ kʼiinoʼob jeʼeloʼ tuláakal le múuchʼulil ku táakpajal tiʼ «le juicio ku beetik le iglesia» tiʼ le máaxoʼob ku lúubloʼob tiʼ kʼebanoʼ. Baʼaleʼ le juicioʼob beyaʼ óoliʼ jelaʼan u yilaʼal. Tu jaʼabil 1944, le revista The Watchtoweroʼ tu yaʼaleʼ chéen le sukuʼunoʼob nuʼuktik le múuchʼulil unaj u beetkoʼob le juicioʼoboʼ. Tu jaʼabil 1952, jóoʼsaʼab teʼ revista The Watchtower junpʼéel bix u yaʼalik le Biblia unaj u juzgartaʼal le máaxoʼob ku kʼebantaloʼoboʼ yéetel tu yeʼeseʼ unaj u jóoʼsaʼaloʼob teʼ múuchʼulil utiaʼal u pʼáatal limpioiloʼ.

²⁰ Desde teʼ kʼiinoʼob jeʼeloʼ Cristoeʼ tsʼoʼok u yáantik le máaxoʼob tsaypachtik utiaʼal ka u naʼatoʼob bix unaj u yáantaʼal yéetel u juzgartaʼal le máaxoʼob ku lúubloʼob tiʼ junpʼéel nojoch kʼebanoʼ. Le ancianoʼoboʼ ku kaʼansaʼaloʼob juzgar jeʼex u beetik Jéeobaeʼ, ka u yeʼesoʼob justicia yéetel chʼaʼ óotsilal. Bejlaʼeʼ tsʼoʼok u naʼataʼal óoxpʼéel baʼax oʼolal unaj u jóoʼsaʼal teʼ múuchʼulil le máax maʼ tu arrepentiroʼ: utiaʼal maʼ u taasaʼal suʼtsilil tiʼ u kʼaabaʼ Dios, utiaʼal u pʼaʼatal limpioil le múuchʼuliloʼ yéetel utiaʼal u yáantaʼal le máax kʼebanchaj utiaʼal ka arrepentirnakoʼ.

21. ¿Baʼaxten jach nojoch bix u yáantaj le u jóoʼsaʼal teʼ múuchʼulil le máax ku kʼebantaloʼ?

²¹ ¿Ka wilik wa bey junpʼéel bendición u jóoʼsaʼal teʼ múuchʼulil le máax ku kʼebantaloʼ? Tu úuchben kaajil Israeleʼ le kʼasaʼan máakoʼoboʼ ku beetkoʼob kaʼach u kʼastal u maasil, le oʼolal yaan kʼiineʼ maas yaʼabchaj máaxoʼob beetik baʼaloʼob kʼaastak ke le máaxoʼob yaabiltmil Jéeoba yéetel ku beetkoʼob baʼaloʼob maʼalobtakoʼ. Yoʼolal leloʼ le israelitaʼoboʼ cada kaʼach táan u taaskoʼob suʼtsilil tiʼ u kʼaabaʼ Dios yéetel ku xuʼulul u lúubloʼob utsil tiʼ (Jer. 7:23-28). Baʼaleʼ bejlaʼeʼ yaʼab xiiboʼob yéetel koʼoleloʼob ku  páajtal u biskubaʼob yéetel Jéeoba. Lelaʼ ku béeytal tumen ku jóoʼsaʼal ichil le múuchʼulil le máaxoʼob maʼ tu arrepentiroʼoboʼ, beyoʼ maʼ tu tsʼaʼabal tuʼux u meyajoʼob tiʼ Satanás utiaʼal u kʼaskúuntikoʼob le múuchʼuliloʼ. Bey túunoʼ ku páajtal k-kanáantikba utiaʼal maʼ k-náachtal tiʼ Jéeoba. Kʼaʼajaktoʼoneʼ Jéeobaeʼ tu yaʼalaj: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ» (Isa. 54:17). ¿K-apoyartik wa yéetel chúukaʼan óolal le sukuʼunoʼob kʼubéentaʼantiʼob u nojoch meyajil u juzgartaʼal le máaxoʼob ku kʼebantaloʼoboʼ?

22, 23. ¿Baʼaxten ku taasiktoʼon kiʼimak óolal le baʼax tu beetaj le sukuʼunoʼob teʼ yáax siglooʼ, baʼaleʼ baʼaxten kʼaʼabéet kaʼach u tsʼáaikoʼob u pʼiis baʼax ku beetkoʼob?

²² Le u yóoxpʼéel bix u limpiokíintaʼal le máaxoʼob meyajtik Diosoʼ yaan yil yéetel le tsʼoʼokol beeloʼ bey xan yéetel le familiaoʼ. Jeʼex le ken k-xok u tsikbalil u kuxtal le sukuʼunoʼob tu káajbal le siglo veinteoʼ, ku jaʼakʼal k-óol ken k-il bix jach chúukpajik u yóol u yuʼuboʼob tʼaan. U jaajileʼ jach ku kiʼimaktal k-óol k-ojéeltik tu pʼatoʼob yaʼab baʼaloʼob utiaʼal u tsʼáaikoʼob táanil u meyajtikoʼob Jéeoba. Baʼaleʼ k-tsʼáaik cuenta kʼaʼabéetchaj u tsʼáaikoʼob u pʼiis baʼaxoʼob tu beetoʼob. ¿Baʼaxten k-aʼalik beyoʼ?

²³ Teʼ kʼiinoʼob jeʼeloʼ le sukuʼunoʼoboʼ ku túuxtaʼaloʼob kʼaʼaytaj táanxel tuʼux yéetel ku túuxtaʼaloʼob u xíimbaltoʼob le múuchʼuliloʼoboʼ. Le ken xiʼikoʼob kaʼacheʼ ku máan yaʼab mesoʼob táan u suutoʼob tu yotochoʼob. Tsʼoʼoleʼ teʼ jóoʼsaʼaniloʼob kaʼachoʼ ku sen aʼalaʼal tiʼ le sukuʼunoʼob yéetel tiʼ le kiikoʼob maʼ u tsʼoʼokol u beeloʼob kex maʼ letiʼe baʼax ku yaʼalik le Bibliaoʼ. Yéetel chéen wa baʼax kʼiin ku yúuchul tʼaan tiʼ baʼax jeʼel u yáantaj utiaʼal ka xiʼik utsil tiʼ le máaxoʼob ku tsʼoʼokol u beeloʼoboʼ. Baʼaleʼ ¿láayliʼ wa bey u yúuchul xan teʼ kʼiinoʼobaʼ? Maʼatech.

24. ¿Bix úuchik u yáantik Cristo le máaxoʼob tsaypachtik utiaʼal ka u yiloʼob le tsʼoʼokol beel yéetel le familia jeʼex unajoʼ?

²⁴ Bejlaʼeʼ maʼatech u túuxtaʼal le sukuʼunoʼob u beetoʼob wa baʼax meyajil táanxel tuʼux ka tak kʼaʼabéetchajak u pʼatik u yatanoʼob yéetel u paalaloʼob ichil yaʼab kʼiinoʼoboʼ (xok 1 Timoteo 5:8). Cristo xaneʼ tsʼoʼok u yilik ka tsʼaʼabak maʼalob tsolnuʼukoʼob tiʼ le máaxoʼob tsaypachtik utiaʼal ka u yiloʼob le tsʼoʼokol beel yéetel le familia jeʼex unajoʼ (Efe. 3:14, 15). Tu jaʼabil 1978, jóoʼsaʼab le libro Cómo lograr felicidad en su vida familiar. Máan kex dieciocho jaʼaboʼobeʼ ka jóoʼsaʼab xan le libro Le baʼax jeʼel u beetik u yantal ki’imak óolal ichil le familiaoʼ. Tsʼoʼoleʼ tiʼ U Pʼíich Tulumil Kananeʼ tsʼoʼok u jóoʼsaʼal jejeláas xookoʼob utiaʼal u yáantaʼal le tsʼokaʼan u beeloʼob u nuʼukt u kuxtaloʼob yéetel le baʼaxoʼob ku kaʼansik le Bibliaoʼ.

25-27. ¿Baʼaxoʼob tsʼoʼok u beetaʼal utiaʼal u yáantaʼal le mejen paalal yéetel le táankelmoʼoboʼ?

²⁵ ¿Kux túun tiʼ le táankelmoʼoboʼ? ¿Yaan wa jóoʼsaʼanil tsʼoʼok u beetaʼal utiaʼal u yáantaʼaloʼob? Yaan. Desde úucheʼ tsʼoʼok u yilaʼal u kaʼansaʼaltiʼob le baʼaxoʼob maas jeʼel u yáantkoʼoboʼ. Le palitsil chúukaʼan u yóol yéetel yaan u naʼatoʼ tsʼoʼok u beetik jóoʼsaʼaniloʼob utiaʼal le táankelem paalaloʼoboʼ. Bejlaʼeʼ yaʼab jóoʼsaʼaniloʼob yaan utiaʼal u yáantaʼaloʼob, kaʼacheʼ chéen junpʼíit. Jeʼex  tu jaʼabil 1919 tak 1921, le revista The Golden Age (¡Despertad!) tu taasaj junpʼéel xook ku kʼaabaʼtik «Juvenile Bible Study» (Utiaʼal u xakʼalxook le táankelmoʼoboʼ). Tu jaʼabil 1920, jóoʼsaʼab le folleto The Golden Age ABC. Tu jaʼabil 1942, jóoʼsaʼab le libro Hijos. Tu yáamil 1970 tak 1979, jóoʼsaʼab le libroʼob Escuchando al Gran Maestro, Tu juventud... aprovechándola de la mejor manera yéetel U libroi tsikbalilo’ob tiʼ le Bibliaoʼ. Tu jaʼabil 1982, teʼ revista ¡Despertad! xanoʼ káaj u jóoʼsaʼal xookoʼob ku kʼaabaʼtik «Lo que los jóvenes preguntan». Tu jaʼabil 1989, jóoʼsaʼab teʼ libro Lo que los jóvenes preguntan. Respuestas prácticas u jaats tiʼ le xookoʼob tsʼoʼok u jóoʼsaʼaloʼobaʼ.

²⁶ Bejlaʼeʼ yaan kaʼapʼéel u libroil túumbenkuntaʼanoʼob. Le xookoʼob xanaʼ ku chíikpajloʼob teʼ sitio jw.org. Yaan xan toʼon le libro Kaanbalnako’on tiʼ le Maʼalob j-Kaʼansajoʼ. Teʼ sitio xanoʼ yaan yaʼab xookoʼob utiaʼal le táankelmoʼoboʼ yéetel mejen cuadroʼob ku tʼaanoʼob tiʼ le máaxoʼob ku chʼaʼchiʼitaʼaloʼob ichil le Bibliaoʼ, áantajoʼob utiaʼal u kaʼansaʼal le mejen paalaloʼoboʼ, rompecabezas, videoʼob yéetel u dibujoil le máaxoʼob ku chʼaʼchiʼitaʼaloʼob ichil le  Bibliaoʼ. Tsʼoʼoleʼ yaan xan xookoʼob utiaʼal mejen paalal de óoxpʼéel wa menos u jaʼabiloʼob. Jeʼex k-ilkoʼ Jesuseʼ jach u yaabiltmaj le mejen paalal yéetel le táankelmoʼoboʼ, jeʼex tu yeʼesil le ka tu méekʼaj le mejen paalal teʼ yáax siglooʼ (Mar. 10:13-16). Letiʼeʼ u kʼáat tuláakal ka u yuʼub yaabiltaʼan yéetel táan u tsʼaʼabal le kaʼansaj kʼaʼabéettiʼoboʼ.

²⁷ Jesuseʼ jach u kʼáat ka kanáantaʼak le mejen paalaloʼob tiʼ baʼaxoʼob jeʼel u loobiltikoʼoboʼ. Le yóokʼol kaabaʼ cada kʼiin ku máaneʼ táan u maas kʼastal, yaʼab tuʼuxeʼ ku beetaʼal loob tiʼ le mejen paalaloʼ. Le oʼolal ku beetaʼal jóoʼsaʼaniloʼob utiaʼal u yáantaʼal le taatatsiloʼob u kanáant u mejen paalaloʼob tiʼ le máakoʼob yaan kʼaakʼas tuukul tiʼoboʼ. d

28. 1) Jeʼex u yeʼesik le templo tu yilaj Ezequieloʼ, ¿baʼax kʼaʼabéet k-beetik utiaʼal k-adorartik Jéeoba jeʼex u kʼáateʼ? 2) ¿Baʼax jach maʼalob unaj u seguer k-beetik?

²⁸ ¿Máasaʼ jach ku taasiktoʼon kiʼimak óolal k-ilik tuláakal le baʼaxoʼob ku beetik Cristo t-oʼolaloʼ? Letiʼeʼ ku yáantkoʼon k-nuʼukt k-kuxtal yéetel le maʼalob tsolnuʼukoʼob ku tsʼáaik Jéeoba utiaʼal ka xiʼiktoʼon utsiloʼ. Koʼox kaʼa tʼaan tiʼ le templo tu yilaj Ezequieloʼ. Kʼaʼajaktech le nukuch joonajoʼob yaantiʼeʼ. Kex maʼ tu páajtal k-ilkeʼ jeʼel u páajtal k-okol ichileʼ. Lelaʼ k-beetik le ken xiʼikoʼon tu Najil Reino, le ken k-xok le Bibliaoʼ wa le ken tʼaanakoʼon tu jool junpʼéel naj teʼ kʼaʼaytajoʼ. Baʼaleʼ maʼ xaaneʼ jeʼel a tuklikeʼ: «Le baʼaloʼobaʼ jeʼel máaxak jeʼel u páajtal u beetkeʼ, tak le máaxoʼob kaʼanal u yichoʼoboʼ jeʼel u beetkoʼob sin ke u yookloʼob ichil u templo Jéeobaeʼ». U jaajileʼ beyoʼ, baʼaleʼ toʼoneʼ maʼ chéen k-beetik le óoxpʼéel baʼaloʼobaʼ, baʼaxeʼ k-ilik k-kuxtal jeʼex u yaʼalik Jéeobaoʼ yéetel k-adorartik jeʼex uts tu tʼaaneʼ. Le oʼolal jeʼel u páajtal k-aʼalikeʼ maʼ chéen tsʼoʼok k-okol ichil u temploiʼ, baʼaxeʼ táan k-adorartik ichil le maas kiliʼich kúuchiloʼ, tumen táan k-adorartik Jéeoba jach jeʼex u yaʼalik le Bibliaoʼ yéetel jeʼex uts tu tʼaanoʼ. Unaj k-beetik tuláakal le ku páajtal utiaʼal k-eʼesik u nojbeʼenil Jéeoba ikil k-beetik le baʼax ku yaʼalikoʼ.