LE TÁAN a kʼaʼaytaj joonaj joonajiloʼ ka wuʼuyik táan u náatsʼal u juum junpʼéel patrulla. Ku káajal a tsikbal yéetel u yuumil naj, baʼaleʼ le máax jokʼaʼan ta wéeteloʼ ku xuʼulul u beetik u cuentail le tsikbaloʼ, tumen táan u yilik u náatsʼal le patrulla teʼ tuʼux yaneʼexoʼ. Ku yéemel le policíaoʼ ku kʼáatik: «¿Teʼex wa kaʼansik le baʼax ku yaʼalik le Bibliaoʼ? Yaʼab máaxoʼob takik a pooleʼex». Teʼexeʼ ka waʼalikeʼex yéetel tsiikil u j-jaajkunajeʼex Jéeoba. ¿Baʼax ta tʼaan kun úuchulteʼex?

Lelaʼ yaan yil yéetel baʼaxoʼob uchaʼan teʼ tuʼux kajaʼanechoʼ. ¿Bix u yilaʼal u j-jaajkunajoʼob Jéeoba tumen le gobiernooʼ? ¿Ku chaʼik wa u kʼaʼaytajoʼob? Wa ku chaʼikeʼ, maʼ xaaneʼ béeychaj yoʼolal le jach maʼalob meyaj beetaʼab tumen le sukuʼunoʼob úuchjeakil utiaʼal u defendertikoʼob yéetel u tsʼáaikoʼob u yojéelt «le autoridadoʼob le derecho yaan utiaʼal u kʼaʼaytaʼal le maʼalob péektsiloʼ» (Fili. 1:7). Baʼaleʼ jeʼel tuʼuxak kajaʼanecheʼ, ken a wil bix úuchik u chaʼabal u kʼaʼaytaʼal le Reino tiʼ jejeláas luʼumiloʼoboʼ jeʼel u muʼukʼaʼankúuntik a fejeʼ. Teʼ jaatsaʼ yaan k-tʼaan tiʼ bix úuchik u ganar le Reino tiʼ jujunpʼéel luʼumiloʼoboʼ. Le juicioʼob ganartaʼaboʼ ku yeʼeskoʼob jach tu jaajil táan u gobernar le Reinooʼ. Tumen chéen t-juunaleʼ maʼ tu páajtal k-ganartikoʼob kaʼachi.