LE TÁAN a tsʼáaik xook tiʼ juntúul máakoʼ ka wilik bix u kiʼimaktal u yóol ken u naʼat le baʼax ku xokik teʼ Bibliaoʼ. Letiʼeʼ ku yaʼalik: «¿U kʼáat wa túun u yaʼaleʼ jeʼel u páajtal k-kuxtal tiʼ junpʼéel Paraíso way Luʼumeʼ?». Le máax bijaʼan ta wéeteloʼ ku yaʼaliktiʼ yéetel kiʼimak óolal: «Leloʼ bey u yeʼesik le teksto ta xokoʼ». Le j-xoknáal túunoʼ ku yaʼalik: «Lelaʼ mix juntéen in wuʼuy u kaʼansaʼal». Teʼ súutuk jeʼeloʼ ku kʼaʼajaltech bey xan tu yuʼubiluba le ka tu kanaj bix u kʼaabaʼ Diosoʼ.

¿Tsʼoʼok wa u yáax aʼalaʼaltech beyoʼ? Tiʼ yaʼab sukuʼunoʼobeʼ tsʼoʼoki. Lelaʼ ku yeʼesikeʼ le u jaajil yaan teʼ Bibliaoʼ junpʼéel jatsʼuts baʼax u siimajtoʼon Dios. Baʼaleʼ ¿a wojel wa bix kʼuchiktoʼon le jatsʼuts siibalaʼ? Teʼ jaatsaʼ yaan u núukaʼal le kʼáatchiʼaʼ. Tuláakal baʼax tsʼoʼok u kanik u kaajal Dios jujunpʼíitiloʼ ku yeʼesik jach tu jaajil tsʼoʼok u káajal u meyaj u Reino Dios. Rey Jesucristoeʼ tsʼoʼok cien jaʼaboʼob joʼopʼok u yilik ka tsʼaʼabak kʼaj óoltbil u jaajil.