1, 2. 1) ¿Bix u yilaʼal wa jach maʼalob junpʼéel siibal? 2) ¿Baʼaxten le boʼoloʼ u maas nojoch siibal Dios?

¿MÁAKALMÁAK le maas maʼalob siibal tsʼoʼok a kʼamkoʼ? Junpʼéel maʼalob siibaleʼ maʼ tsaaj wa jach koʼojiʼ. Wa kʼaʼabéettech bey xan wa ku kiʼimakkúuntik a wóoleʼ leloʼ u kʼáat u yaʼaleʼ junpʼéel jach maʼalob siibal.

² Tiʼ le baʼaxoʼob u siimajtoʼon Diosoʼ yaan junpʼéel maas kʼaʼabéettoʼoniʼ: tu túuxtaj u Paal bey junpʼéel boʼol utiaʼal u salvarkoʼoneʼ. Lelaʼ u maas nojoch siibal Dios tiʼ wíinik tumen ku tsʼáaik kuxtal minaʼan u xuul (xok Mateo 20:28). Teʼ xookaʼ yaan k-kanikeʼ Jéeobaeʼ tu yeʼesaj jach u yaabiltmoʼon úuchik u túuxtik Jesús way Luʼumeʼ.

3. ¿Baʼaxten k-kíimil?

³ Le boʼoloʼ letiʼe baʼax tu tsʼáaj Jéeoba utiaʼal u jáalkʼabtik wíinik tiʼ le kʼeban yéetel le kíimiloʼ (Efesios 1:7). Utiaʼal k-naʼatik baʼaxten kʼaʼabéetchaj le boʼolaʼ unaj k-ojéeltik baʼax úuch walajki u milesil jaʼaboʼob tu jardínil Edénoʼ. Adán yéetel Eva, k-yáax taataʼobeʼ, kʼebanchajoʼobeʼ ka kíimoʼob. Le oʼolal k-kíimil, tumen letiʼob máanstoʼon le kʼebanoʼ (ilawil nota 9).

4. ¿Máax Adán, yéetel bix le kuxtal tsʼaʼabtiʼoʼ?

 ⁴ Ka beetaʼab Adán, le yáax wíinik, tumen Jéeobaoʼ mix junpʼéel kʼaas yaan tu wíinklil mix tu tuukul. U kʼáat u yaʼaleʼ maʼ tun kʼojaʼantal, maʼ tun chʼíijil, mix kun kíimil kaʼachi. Jach jatsʼuts le kuxtal tsʼaʼabtiʼoʼ. Adáneʼ ku yilik Jéeoba bey u taataeʼ, tumen letiʼ beete (Lucas 3:38). Jéeobaeʼ suuk u tsikbal kaʼach tu yéetel utiaʼal u tsoliktiʼ baʼax unaj u beetik. Tsʼoʼoleʼ jatsʼuts le meyaj tu tsʼáajtiʼoʼ (Génesis 1:28-30; 2:16, 17).

5. ¿Baʼaxten ku yaʼalaʼal Adáneʼ beetaʼab «jeʼel bix» Dioseʼ?

⁵ Jéeobaeʼ tu beetaj Adán «jeʼel bix letiʼeʼ» (Génesis 1:27). U kʼáat u yaʼaleʼ tsʼaʼabtiʼ le jatsʼuts modos yaan tiʼ Dios, jeʼex yaabilaj, naʼat, tojil wa justicia yéetel páajtalil. Adáneʼ maʼ bey kaʼach junpʼéel roboteʼ tumen ku páajtal u chʼaʼtuklik u beetik baʼax uts wa baʼax kʼaas. Wa ka u yuʼub u tʼaan Dioseʼ jeʼel kaʼach u kuxtal minaʼan u xuul teʼ Paraísooʼ.

6. 1) ¿Baʼax úuch tiʼ Adán tumen maʼ tu yuʼubaj tʼaaniʼ? 2) ¿Bix biniktoʼon tu yoʼolal leloʼ?

⁶ Bin kʼaasil tiʼ Adán tumen maʼ tu yuʼubaj tʼaaniʼ. Aʼalaʼab yaan u kíimil, xuʼul u biskuba yéetel Jéeoba, kʼaschaj u kuxtaleʼ ka jóoʼsaʼab teʼ Paraísooʼ (Génesis 3:17-19). Yoʼolal Adáneʼ «ook le kʼeban way yóokʼol kaab[oʼ], yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ» (Romanos 5:12). Ka kʼebanchaj Adáneʼ tu konoʼon tiʼ kʼeban yéetel tiʼ kíimil (Romanos 7:14). Adán yéetel Evaeʼ maʼ tun kaʼa kuxkíintbiloʼob, tumen u yóoliliʼob maʼ u yuʼubikoʼob tʼaaneʼ. Baʼaleʼ  ¿kux túun toʼon? Le boʼol tu tsʼáaj Jéeobaoʼ jeʼel u salvarkoʼoneʼ.

7, 8. ¿Baʼax junpʼéel boʼol?

⁷ ¿Baʼax junpʼéel boʼol? Letiʼe bajux ku tsʼáaik máak utiaʼal u manik wa baʼaxoʼ. Teʼ Bibliaoʼ ku meyaj xan utiaʼal u yúuchul tʼaan tiʼ le bajux ku tsʼaʼabal utiaʼal u jáalkʼabtaʼal wa máaxoʼ, wa utiaʼal u yutskíintaʼal junpʼéel baʼax kʼaskúuntaʼabi.

⁸ Mix juntúul wíinik jeʼel u páajtal u boʼotik le nojoch pʼaax anchaj tiʼ Adán úuchik u kʼebantaloʼ, tumen tu konoʼon tiʼ le kʼeban yéetel tiʼ le kíimiloʼ. Baʼaleʼ Jéeobaeʼ tu tsʼáaj junpʼéel boʼol utiaʼal u jáalkʼabtikoʼon. Koʼox ilik bix tu beetil yéetel baʼax utsil ku taasiktoʼon.

9. ¿Bix le boʼol unaj u tsʼaʼabal kaʼachoʼ?

⁹ Tumen láaj kʼebanoʼoneʼ mix juntúul tiʼ toʼon jeʼel u boʼotik le jach maʼalob kuxtal tu kʼaskúuntaj Adánoʼ (Salmo 49:7, 8). Chéen juntúul máak minaʼan u kʼeban jeʼel u boʼotkeʼ. Utiaʼal k-jáalkʼabtaʼaleʼ unaj u boʼotaʼal «jach le bukaʼaj kʼaʼabéet[oʼ]» (1 Timoteo 2:6). Kʼaʼabéet u kʼuʼubul junpʼéel kuxtal jach jeʼex le yaan tiʼ Adán kaʼachoʼ.

10. ¿Bix úuchik u tsʼaʼabal le boʼoloʼ?

¹⁰ ¿Bix úuchik u tsʼaʼabal le boʼoloʼ? Jéeobaeʼ tu túuxtaj u Yáax Paal way Luʼumeʼ (1 Juan 4:9, 10). Jesúseʼ tu yuʼubaj tʼaan, ka tu pʼataj le kaʼanoʼ (Filipenses 2:7). Utiaʼal ka síijik way Luʼum bey juntúul wíinik minaʼan u kʼebaneʼ Jéeobaeʼ tu  máansaj u kuxtal Jesús tu jobnel María (Lucas 1:35).

11. ¿Bix u salvartaʼal tuláakal wíinik tumen juntúuliliʼ máak?

¹¹ Tumen maʼ tu yuʼubaj tʼaan Adáneʼ, kʼaschaj u kuxtal tuláakal máak. Baʼaleʼ ¿jeʼel wa u láaj salvartaʼal u paalal Adán tumen juntúuliliʼ máakeʼ? Jeʼeleʼ (xok Romanos 5:19). Jesúseʼ maʼ anchaj mix junpʼíit u kʼebaniʼ, le oʼolal béeychaj u kʼubik u kuxtal bey junpʼéel boʼol utiaʼal u salvarkoʼon tiʼ le kíimiloʼ (1 Corintios 15:21, 22, 45).

12. ¿Baʼaxten anchaj u sen muʼyaj Jesús?

¹² Le Bibliaoʼ ku yaʼalikeʼ Jesúseʼ jaʼajatsʼaʼabi, chʼuykíintaʼab tiʼ cheʼ yéetel jach muʼyajnaj le táan u kíimsaʼaloʼ (Juan 19:1, 16-18, 30; ilawil nota 15). ¿Baʼaxten anchaj u sen muʼyaj? Tumen Satanáseʼ u yaʼalmeʼ mix máak jeʼel u chúukpajal u yaabilaj tiʼ Dios wa ka beetaʼak u sen muʼyajeʼ. Jesúseʼ tu yeʼeseʼ juntúul máak minaʼan u kʼebaneʼ jeʼel u chúukpajal u yaabilaj tiʼ Dios kex ka muʼyajnakeʼ. ¡Jach tu kiʼimakkúuntaj u yóol Jéeoba! (Proverbios 27:11).

13. ¿Bix úuchik u beetaʼal le boʼoloʼ?

¹³ ¿Bix úuchik u beetaʼal le boʼoloʼ? Tu jaʼabil 33, tu kʼiinil 14 tiʼ nisán tiʼ u calendario le judíoʼoboʼ, Dioseʼ tu chaʼaj u kíimsaʼal u Hijo (Hebreos 10:10). Óoxpʼéel kʼiin kíimik Jesúseʼ kaʼa kuxkíintaʼab tumen Jéeoba yéetel junpʼéel wíinklil maʼ tu páajtal u yilaʼal. Ka suunaj Jesús teʼ kaʼanoʼ tu kʼubaj tiʼ u Taata u tojol u kuxtal (Hebreos 9:24). Yéetel le boʼoloʼ jeʼel u páajtal k-jáalkʼabtaʼal tiʼ le kʼeban yéetel tiʼ le kíimiloʼ (xok Romanos 3:23, 24).

14, 15. ¿Baʼax unaj k-beetik utiaʼal ka u perdonartoʼon Jéeoba?

¹⁴ Yaʼab utsil ku taasik le boʼol tu tsʼáaj Diosoʼ. Koʼox ilik bix u yáantkoʼon bejlaʼeʼ bey xan teʼ kʼiinoʼob kun taaloʼ.

¹⁵ Ku perdonartaʼal k-kʼebanoʼob. Maʼ chéen chʼaʼabil u beetaʼal baʼax utsiʼ. Yaan kʼiineʼ tuláakloʼon k-aʼalik wa k-beetik baʼax maʼ maʼalobiʼ. ¿Bix túun jeʼel k-perdonartaʼaleʼ? Kʼaʼabéet k-kʼexik k-tuukul yéetel k-kʼáat óoltik tiʼ Jéeoba ka u perdonartoʼon. Wa k-beetkeʼ jach tu jaajil jeʼel u perdonarkoʼoneʼ (Colosenses 1:13, 14; 1 Juan 1:8, 9).

16. ¿Baʼax unaj k-beetik utiaʼal k-uʼuyikba maʼalobil tu táan Dios?

¹⁶ K-uʼuyikba maʼalobil. Kéen k-tsʼáa cuenta yaan baʼax kʼaas k-beetmeʼ ku lúubul k-óol. Maʼ xaaneʼ k-uʼuyik mix baʼal k-biilal yéetel k-tuklik tsʼoʼoktoʼon beyoʼ. Baʼaleʼ maʼ unaj k-pʼatikbaiʼ, wa k-kʼáat óoltik tiʼ Jéeoba ka u perdonartoʼoneʼ jeʼel u beetkeʼ (Hebreos 9:13, 14). Letiʼeʼ u kʼáat ka k-tsikbalttiʼ baʼax ku yúuchultoʼon yéetel baʼax beetik k-chiʼichnaktal (Hebreos 4:14-16). Beyoʼ yaan k-uʼuyikba maʼalobil tu táan letiʼ.

17. ¿Baʼax jeʼel k-kʼamik yoʼolal u kuxtal Jesús tu kʼuboʼ?

¹⁷ Jeʼel k-kuxtal minaʼan u xuuleʼ. «Le boʼol ku tsʼáaik le kʼebanoʼ letiʼe kíimiloʼ, chéen baʼaleʼ le siibal ku tsʼáaik Diosoʼ kuxtal minaʼan u xuul tu yoʼolal k-Yuumtsil Cristo Jesús» (Romanos 6:23). Yoʼolal u kuxtal Jesús tu kʼuboʼ jeʼel u yantaltoʼon kuxtal minaʼan u xuuleʼ yéetel yaan u xuʼulul k-kʼojaʼantal (Apocalipsis 21:3, 4). ¿Baʼax unaj k-beetik utiaʼal k-kʼamik le kuxtal jeʼeloʼ?

18. ¿Bix k-ojéeltik u yaabiltmoʼon Jéeoba?

¹⁸ ¿Máasaʼ jach ku kiʼimaktal k-óol kéen siʼibiktoʼon junpʼéel baʼal jach jatsʼuts? Le boʼol tu tsʼáaj Jéeobaoʼ letiʼe baʼax maas jatsʼuts tsʼoʼok u síiktoʼonoʼ, le oʼolal unaj k-tsʼáaik u diosboʼotikil tiʼ. Juan 3:16, ku yaʼalik yoʼolal Jéeoba: «Tumen jach u yaabiltmaj yóokʼol kaabeʼ tu tsʼáaj u juntúuliliʼ Paal». Jesús xaneʼ u yaabiltmoʼon, le oʼolal tu tsʼáaj u kuxtal t-oʼolal (Juan 15:13). Le boʼol beetaʼaboʼ ku yeʼesik jach tu jaajil u yaabiltmoʼon Jéeoba yéetel Jesús (Gálatas 2:20).

19. ¿Bix jeʼel a beetkaba u amigo Jéeobaeʼ?

¹⁹ Beora tsʼoʼok a kanik bukaʼaj u yaabiltmoʼon Jéeobaeʼ, ¿bix jeʼel a beetkaba u amigoeʼ? Maʼ tu páajtal a yaabiltik máax maʼ a kʼaj óoliʼ. Baʼaleʼ Juan 17:3, ku yaʼalikeʼ jeʼel u páajtal a kʼaj óoltik Jéeobaeʼ. Kéen a kʼaj óolteʼ yaan a yaabiltik yéetel yaan u taaktal a beetik baʼax uts tu tʼaan. Seguernak a xokik le Biblia utiaʼal a kaanbal tiʼ Jéeobaoʼ (1 Juan 5:3).

20. ¿Bix jeʼel k-tsʼáaik k-fe tiʼ le boʼol tu kʼubaj Jesúsoʼ?

²⁰ Tsʼáa a fe tiʼ le boʼol tu kʼubaj Jesúsoʼ. Le Bibliaoʼ ku yaʼalikeʼ «máax ku tsʼáaik u fe tiʼ le Paaloʼ yaan u yantal kuxtal minaʼan u xuul tiʼ» (Juan 3:36). ¿Bix jeʼel k-tsʼáaik k-fe tiʼ Jesúseʼ? Letiʼe kéen k-beet le baʼax tu kaʼansoʼ (Juan 13:15). Unaj k-creertik xan letiʼ salvartoʼon yéetel u kuxtal tu kʼubaj bey boʼoloʼ. Maʼ chéen unaj k-aʼalik k-tsʼaamaj k-fe tiʼ letiʼ, unaj k-eʼesik yéetel baʼaxoʼob k-beetik.  Santiago 2:26, ku yaʼalik «kimen yanil» k-fe wa maʼ t-eʼesik yéetel baʼaxoʼob k-beetik.

21, 22. 1) ¿Baʼaxten cada jaʼab unaj k-kʼaʼajsik bix úuchik u kíimil Cristo? 2) ¿Baʼax ken k-il teʼ xook 6 yéetel 7?

²¹ Xeen a kʼaʼajs bix úuchik u kʼubik u kuxtal Cristo t-oʼolal. Le áakʼab táanil tiʼ u kíimil Jesúsoʼ tu yaʼalaj ka k-muchʼba cada jaʼab utiaʼal k-kʼaʼajsik le úuchik u kʼubik u kuxtaloʼ (1 Corintios 11:20; Mateo 26:26-28). Jesúseʼ u kʼáat ka k-kʼaʼajs le boʼol tu kʼubaj t-oʼolaloʼ, le oʼolal tu yaʼalaj: «Seguernak a beetkeʼex lelaʼ utiaʼal a kʼaʼajsikeneʼex» (xok Lucas 22:19). Kéen k-kʼaʼajs bix úuchik u kʼubik u kuxtal Cristo t-oʼolaleʼ k-tsʼáaik u diosboʼotikil yoʼolal le boʼoloʼ bey xan yoʼolal le nojoch yaabilaj ku yuʼubik Jéeoba yéetel Jesús t-oʼolaloʼ (ilawil nota 16).

²² Minaʼan uláakʼ siibal maas nojoch tiʼ le boʼol tu tsʼáaj Jéeoba t-oʼolaloʼ (2 Corintios 9:14, 15). Teʼ xook 6 yéetel 7, yaan k-ilik baʼax utsil ken u taas le boʼol tiʼ le kimenoʼoboʼ.