1, 2. 1) ¿Baʼax unaj u chʼaʼtuklik cada máak? 2) ¿Baʼax tu yaʼalaj juntúul ángel ka óotaʼab adorarbil tumen Juan?

TULÁAKAL máak unaj u tuukul tiʼ lelaʼ: «¿Máax ken in adorarte?». Yaʼab máakoʼob tuklikeʼ maʼ chéen chʼaʼabil u núukaʼal le kʼáatchiʼaʼ tumen jach yaʼab religiónoʼob yaan. Chéen baʼaleʼ u jaajileʼ maʼ talam u núukiliʼ tumen chéen unaj u yéeyik máak máax ken u adorarte: Jéeoba wa Satanás.

² Satanáseʼ jach ku tsʼíiboltik ka adorartaʼak. Bey tu yeʼesil le ka tu probartaj Jesúsoʼ. Tu xookil 1 tiʼ le libroaʼ t-kaneʼ Satanáseʼ tu yaʼalaj u tsʼáaik tiʼ Jesús «tuláakal u gobiernoiloʼob yóokʼol kaab bey xan le ayikʼalil yaantiʼoboʼ». ¿Baʼax tu kʼáataj tiʼ Jesús utiaʼal ka u tsʼáatiʼ tuláakal le baʼaloʼobaʼ? Satanáseʼ tu yaʼalajtiʼ: «Adorarten kex chéen juntéen» (Mat. 4:9). Chéen baʼaleʼ le ángel túuxtaʼab tumen Jéeoba utiaʼal u tʼaan yéetel apóstol Juaneʼ maʼ tu yóotaj ka adorartaʼakiʼ (xok Apocalipsis 22:8, 9). Letiʼeʼ tu yeʼesaj kabal óolal ka tu yaʼalaj tiʼ Juan: «¡Maʼ! ¡Maʼ a beetik leloʼ! [...] Adorart Dios».

3. 1) ¿Baʼax jeʼel u yáantkoʼon k-beet le libroaʼ? 2) ¿Baʼax ken k-kʼaʼajs beoraaʼ?

³ Le libroaʼ beetaʼab utiaʼal u yáantkoʼon k-beet le baʼax tu yaʼalaj le ángeloʼ: k-adorartik chéen Jéeoba (Deu. 10:20; Mat. 4:10).  Beoraaʼ koʼox kʼaʼajsik le baʼaxoʼob ku kaʼansiktoʼon le profecíaʼob yéetel le baʼaxoʼob tsʼaʼab u yil Ezequiel yoʼolal bix unaj u adorartaʼal Jéeobaoʼ. Tsʼoʼoleʼ yaan k-xakʼaltik yéetel le Biblia baʼax kun úuchul teʼ tsʼook prueba kun antaloʼ. Le máaxoʼob túun kun chúukpajal u yóoloʼoboʼ yaan u yilkoʼob bix kun kaʼa adorarbil chéen Jéeoba jeʼex uts tu tʼaaneʼ.

4. ¿Máakalmáak le óoxpʼéel baʼaloʼob ku kaʼansiktoʼon u libroil Ezequieloʼ?

⁴ U libroil Ezequieleʼ ku kaʼansiktoʼoneʼ utiaʼal ka u kʼam Jéeoba le adoración k-tsʼáaiktiʼoʼ kʼaʼabéet 1) k-adorartik chéen letiʼ, 2) k-múuchʼ adorartik jeʼex uts tu tʼaaneʼ yéetel 3) k-yaabiltik u maasil. Koʼox ilik baʼax ku yaʼalik le profecíaʼob yoʼolal le óoxpʼéel baʼaloʼob tsʼoʼok k-aʼalikaʼ.

5-9. Tsol baʼax u kʼáat u yaʼal u adorartaʼal chéen Jéeoba.

⁵ Xook 3: * Ezequieleʼ tu yileʼ Jéeobaeʼ baʼpachtaʼan tumen junpʼéel arco iris yéetel táan u nuʼuktik le querubínoʼoboʼ. Le baʼax tu yiloʼ ku kaʼansiktoʼoneʼ chéen Jéeoba, le Dios jach táaj yaan u poder, ku náajmatik ka adorartaʼakoʼ (Eze. 1:4, 15-28).

⁶ Xook 5: Jéeobaeʼ tu tsʼáaj u yil Ezequiel le baʼaloʼob jach kʼaastak ku beetik kaʼach le israelitaʼob teʼ templooʼ. Leloʼ ku yeʼesikeʼ Jéeobaeʼ chíikaʼan u yilik tuláakal baʼal, tak le baʼaloʼob ku taʼakikuba máak u beetoʼ. Jeʼex le ka joʼopʼ u adorartaʼal imagenoʼob tumen le israelitaʼoboʼ letiʼeʼ tu yilaj le baʼax kʼaas ku beetkoʼoboʼ. Letiʼeʼ jach ku yaatal u yóol kéen u beet máak baʼaloʼob kʼaastak, yéetel ku castigartik le máaxoʼob beetik beyoʼ (Eze. 8:1-18).

⁷ Xook 7: Úuchjeakileʼ Jéeobaeʼ tu castigartaj le kaajoʼob tu pʼektoʼob yéetel tu beetoʼob u muʼyaj u kaajaloʼ. Leloʼ ku yeʼesikeʼ yaan xan u castigartik le máaxoʼob beetik u muʼyaj u kaajal teʼ kʼiinoʼobaʼ (Eze. 25:6). U kaajil Israeleʼ kʼaschaj bix u adorartik Jéeoba úuchik u jach biskuba yéetel u maasil kaajoʼoboʼ. Leloʼ ku kaʼansiktoʼoneʼ maʼ unaj u xuʼulul k-tsʼáaik táanil ichil k-kuxtal k-meyajtik Jéeobaiʼ. Ku kaʼansik xan toʼoneʼ maʼ unaj k-beetik baʼaloʼob u pʼekmaj Jéeoba chéen utiaʼal k-lúubul utsil tiʼ k-láakʼtsiloʼobiʼ. Tsʼoʼoleʼ maʼ unaj k-confiar tiʼ le taakʼinoʼ yéetel maʼ unaj k-tsʼáaikba tu tséel mix junpʼéel gobiernoiʼ. Mantatsʼ unaj k-tsʼáaik táanil k-meyajtik Jéeoba.

⁸ Xook 13 yéetel 14: Ezequieleʼ tu yileʼ u templo Dioseʼ tiaʼan yóokʼol junpʼéel kaʼanal montañaeʼ. Leloʼ ku kaʼansiktoʼoneʼ tu táan Jéeobaeʼ mix baʼal le u maasil diosoʼoboʼ, le oʼolal jach unaj k-ilik k-kuxtal jeʼex uts tu tʼaan letiʼeʼ (Eze. 40:1–48:35).

⁹ Xook 15: Le úuchik u keʼetel u kaajil Israel yéetel Judá yéetel kaʼatúul x-prostitutaʼoboʼ ku yeʼesiktoʼoneʼ Jéeobaeʼ jach táaj kʼaas  u yilik u adorartaʼal uláakʼ diosoʼob (Ezequiel capítulo 16 yéetel 23).

10-14. Le libroaʼ, ¿bix u yeʼesik unaj u seguer k-múuchʼ adorartik Jéeoba?

¹⁰ Xook 8: T-ileʼ Jéeobaeʼ u yaʼalmaj yaan u tsʼáaik «juntúul j-kanan taman» utiaʼal u kanáantik u kaajal. Lelaʼ ku yeʼesikeʼ unaj k-múuchʼ meyaj yéetel unaj k-ilik ka yanak jeetsʼelil ichiloʼon tumen tiaʼanoʼon yáanal u nuʼuktaj Jesúseʼ (Eze. 34:23, 24; 37:24-28).

¹¹ Xook 9: T-ilaj le profecíaʼob ku tʼaanoʼob tiʼ u jóokʼol u kaajal Dios tiʼ u luʼumil Babilonia utiaʼal u suutoʼob tu luʼumoʼoboʼ. Leloʼ ku kaʼansik tiʼ le máaxoʼob taak u adorarkoʼob Jéeobaoʼ unaj u jóokʼloʼob tiʼ le religiónoʼob ku kaʼanskoʼob baʼaloʼob maʼ jaajtakoʼ yéetel junpuliʼ maʼ unaj u yantal mix baʼal u yiloʼob tu yéeteloʼobiʼ. Kex jejeláas tuʼux u taaloʼob, jejeláas u razaʼob, kex óotsiloʼob wa ayikʼaloʼobeʼ unaj u múuchʼ adorarkoʼob Jéeoba tumen letiʼe baʼax eʼesik tiaʼanoʼob ichil u kaajal Diosoʼ (Eze. 11:17, 18; 12:24; Juan 17:20-23).

¹² Xook 10: Le tikin baakoʼob tu yilaj Ezequiel ku kaʼa kuxtaloʼoboʼ tu yeʼesaj bix kun múuchʼ meyaj u kaajal Dios. Teʼ kʼiinoʼobaʼ le máaxoʼob meyajtik Diosoʼ bey tsʼoʼok u kaʼa kuxtaloʼobeʼ yéetel beyoʼob junpʼéel ejército ku múuchʼ adorarkoʼob Jéeoba jeʼex uts tu tʼaaneʼ (Eze. 37:1-14).

¹³ Xook 12: U profecíail le kaʼapʼéel cheʼob ku nuʼupuloʼoboʼ ku yeʼesik bix ken u kaʼa muchʼkíintil Jéeoba u kaajal. Bejlaʼeʼ le yéeyaʼanoʼob yéetel le uláakʼ tamanoʼoboʼ junmúuchʼ táan u adorarkoʼob Jéeoba jeʼex aʼalaʼaniloʼ, leloʼ jach ku muʼukʼaʼankúuntik k-fe. Le máakoʼob tiʼ le yóokʼol kaabaʼ u jatsmubaʼob yoʼolal política wa yoʼolal religión, baʼaleʼ toʼoneʼ maʼ tu yúuchultoʼon beyoʼ tumen yaan yaabilaj ichiloʼon yéetel k-múuchʼ adorartik Jéeoba (Eze. 37:15-23).

¹⁴ Xook 16: Tʼaanaj tiʼ le máak u chʼiknakʼmaj u nuʼukulil u tsʼíib juntúul secretario yéetel le máaxoʼob u chʼaʼamoʼob junpʼéel nuʼukul utiaʼal u xíikjatsʼtaʼal máakoʼ. Leloʼ tu kaʼansajtoʼoneʼ le kéen káajak le nojoch muʼyajiloʼ chéen le máaxoʼob táan u adorarkoʼob Jéeoba jeʼex uts tu tʼaan kun marcarbiloʼob utiaʼal u salvarkubaʼoboʼ (Mat. 24:21; Eze. 9:1-11).

15-18. ¿Baʼaxten unaj u seguer k-eʼesik yaabilaj? ¿Bix jeʼel k-beetkeʼ?

¹⁵ Xook 4: Le kantúul baʼaloʼob kuxaʼanoʼoboʼ ku yeʼesiktoʼon u jatsʼuts modos Jéeoba. Le máas jach kʼaʼanaʼanoʼ letiʼe yaabilajoʼ. Le kéen k-tratart u maasil yéetel yaabilajeʼ k-eʼesik jach tu jaajil táan k-meyajtik Dios (Eze. 1:5-14; 1 Juan 4:8).

 ¹⁶ Xook 6 yéetel 11: Jéeobaeʼ tu tsʼáaj máakoʼob jeʼex Ezequiel utiaʼal u yaʼalikoʼob baʼax ku taal u kʼiinoʼ. Dioseʼ yaabilaj, le oʼolal maʼ u kʼáat ka xuʼulsaʼak tiʼ mix máak le kéen u xuʼuls u gobierno Satanásiʼ (2 Ped. 3:9). Bejlaʼeʼ le kéen k-áant le máax tsʼaʼan utiaʼal u yaʼalik baʼax ku taal u kʼiiniloʼ k-eʼesik yaabilaj jeʼex u beetik Jéeobaeʼ (Eze. 33:1-9).

¹⁷ Xook 17 yéetel 18: Jéeobaeʼ u yojel yaʼab máaxoʼob maʼ ken u yóot u beetoʼob le baʼax ku yaʼalikoʼ yéetel yaan u líikʼloʼob tu contra u kaajal. Chéen baʼaleʼ letiʼeʼ u yaabiltmaj u kaajal, le oʼolal maʼ ken u chaʼa u xuʼulsaʼal tumen «Gog ku taal tiʼ u luʼumil Magog». Toʼon xaneʼ tumen k-yaabiltmaj k-éet máakileʼ yaan k-aʼaliktiʼob de ke Jéeobaeʼ yaan u xuʼulsik le máaxoʼob ku líikʼloʼob tu contra u kaajaloʼ (Eze. 38:1–39:20; 2 Tes. 1:6, 7).

¹⁸ Xook 19, 20 yéetel 21: Le río ku tsʼáaik kuxtal yéetel le bix u tʼoʼoxol le luʼumoʼ ku yeʼesik bukaʼaj u yaabiltmoʼon Jéeoba. Tumen jach u yaabiltmoʼoneʼ tu kʼubaj u kuxtal u hijo t-oʼolal. Le oʼolal ku béeytal u perdonartaʼal k-kʼebanoʼob yéetel ku páajtal k-antal ichil u familia Dios. Toʼoneʼ tumen k-yaabiltmaj k-éet máakileʼ k-tsikbaltiktiʼob le baʼaxoʼob ken u beet Jéeoba tu yoʼolal le máaxoʼob ku tsʼáaik u fejoʼob tiʼ Jesúsoʼ (Eze. 45:1-7; 47:1–48:35; Apo. 21:1-4; 22:17).

19. ¿Baʼax ken u beet Jesús tu yáamil le Mil Años kun gobernaroʼ? (Ilawil le cuadro «Jujunpʼéel baʼaxoʼob kun úuchul»).

¹⁹ Tu yáamil le Mil Años kun gobernaroʼ Jesúseʼ yaan u kaʼa kuxkíintik u millonesil máakoʼob yéetel yaan u beetik u xuʼulul u muʼyaj máak tu yoʼolal «le kíimiloʼ» (1 Cor. 15:26; Mar. 5:38-42; Hech. 24:15). Desde úuchjeakileʼ tuláakal máakeʼ jach ku muʼyaj tak ken kʼuchuk u kʼiinil u kíimil. Chéen baʼaleʼ le kéen kaʼa kuxkíintaʼakoʼobeʼ jujunpʼíitil kun bin u tuʼubsikoʼob tuláakal le baʼaxoʼob tu muʼyajtoʼoboʼ yéetel yaan u yantaltiʼob u páajtalil u yéeyikoʼob baʼax ken u beetoʼob beora tsʼoʼok u kaʼa kuxtaloʼobaʼ. Úuchik u tsʼáaik u kuxtal Jesús bey boʼolileʼ yaan u yutskíintik le loob tu beetaj tiʼ máak le kʼojaʼaniloʼoboʼ, le guerraʼoboʼ yéetel le wiʼijiloʼ. Tsʼoʼoleʼ yaan u luʼsik le baʼax maas tsʼoʼok u beetik u muʼyaj máakoʼ: le kʼeban tu máansajtoʼon Adánoʼ (Rom. 5:18, 19). Jesúseʼ yaan «u xuʼulsik tiʼ le baʼaloʼob u beetmaj le Kʼaasilbaʼaloʼ» (1 Juan 3:8).

20. ¿Bix ken u yeʼesil Jesús yéetel le 144,000 jach kabal u yóoloʼoboʼ? (Ilawil le dibujo yaan tu káajbal le xookaʼ).

²⁰ Xok 1 Corintios 15:24-28. ¿Baʼax kun úuchul le kéen tsʼoʼokok u luʼsaʼal le kʼeban tu wíinklil máak yéetel le kéen pʼáatak junpʼéel paraíso le Luʼumaʼ? Jesús yéetel le 144,000 yaan u yeʼeskoʼob jach kabal u yóoloʼob tumen yéetel kiʼimak óolal ken u kʼuboʼob le Reino tiʼ Jéeobaoʼ. Le baʼaxoʼob ken u beetoʼob tu yáamil le Mil Añosoʼ mantatsʼ kun ilbil u yutsil.

21, 22. 1) ¿Bix kun pʼáatal le Luʼum kéen tsʼoʼokok le Mil Añoso? 2) ¿Baʼaxten yaan u chaʼabal u jóokʼol Satanás yéetel u demonioʼob?

²¹ Jéeobaeʼ yaan u beetik junpʼéel baʼal ku yeʼesik jach ku confiar tiʼ le máaxoʼob adorarkoʼ. Letiʼeʼ yaan u yaʼalik ka chaʼabak u jóokʼol Satanás yéetel u demonioʼob teʼ taamkach jool tuʼux kun kʼalbiloʼob ichil mil añosoʼ (xok Apocalipsis 20:1-3). Letiʼobeʼ yaan u yilkoʼobeʼ le yóokʼol kaaboʼ maʼ jeʼex yanil kaʼach táanil tiʼ le Armagedónoʼ, tumen u kajnáaliloʼob yóokʼol kaabeʼ u pʼekmubaʼob yéetel maʼ tu páajtal kaʼach u múul meyajoʼob. Letiʼobeʼ u tusmoʼob kaʼach u kajnáaliloʼob yóokʼol kaab (Apo. 12:9). Chéen baʼaleʼ le kéen tsʼoʼokok le Mil Añosoʼ tuláakal le máakoʼoboʼ beyoʼob junpʼéel familia u yaabiltmubaʼob yéetel ku múul adorarkoʼob Jéeobaeʼ. Le Luʼumoʼ tsʼoʼok u pʼáatal junpʼéel paraíso.

²² ¿Baʼaxten túun ken u chaʼa Jéeoba u jóokʼol Satanás yéetel u demonioʼob wa tuláakal tsʼoʼok u maʼalobtal? Tumen u maas yaʼabil  le máaxoʼob kun kuxtaloʼob tu tsʼoʼokbal le Mil Añosoʼ mix juntéen probartaʼakoʼob utiaʼal u yeʼeskoʼob wa chúukaʼan u yóol u meyajtoʼob Jéeoba. Yaʼab tiʼ letiʼobeʼ maʼ tu kʼaj óoltoʼob Jéeoba ka kíimoʼobiʼ, tsʼoʼoleʼ kéen kaʼa kuxkíintaʼakoʼobeʼ yaan u tsʼaʼabaloʼob tiʼ junpʼéel paraíso. Desde teʼ kʼiin jeʼeloʼ yaan u kaʼansaʼaloʼob tumen Jéeoba yéetel yaan u tsʼáaiktiʼob tuláakal baʼax kʼaʼabéettiʼob. Letiʼobeʼ mix juntéen u yuʼuboʼob bix u léenchʼintaʼal máak u beet baʼax kʼaas, tumen kuxaʼanoʼob ichil máaxoʼob u yaabiltmoʼob Jéeoba. Le oʼolal Satanáseʼ jeʼel u yaʼalikeʼ letiʼobeʼ chéen ku meyajtikoʼob Dios tumen ku kanáantaʼaloʼob yéetel ku bendecirtaʼaloʼob, jeʼex úuchik u yaʼalik tu yoʼolal Jobeʼ (Job 1:9, 10). Le oʼolaleʼ táanil tiʼ u tsʼíibtik Jéeoba k-kʼaabaʼ tu libroil le kuxtaloʼ yaan u tsʼáaik u páajtalil k-eʼesik chúukaʼan k-óol k-meyajte yéetel k-ilik bey k-Taata yéetel k-Reyeʼ (Apo. 20:12, 15).

23. ¿Baʼax kun antal u chʼaʼtuklik cada juntúul máak?

 ²³ Ichil le junpʼíit tiempo kun tsʼaabil tiʼ Satanásoʼ yaan u yilik u náachkuntik tuláakal máak tiʼ Dios. Leloʼ letiʼe u tsʼook prueba kun antaloʼ. Maʼ xaaneʼ jeʼex Adán yéetel Evaeʼ cada juntúul tiʼ toʼoneʼ yaan u yantal u chʼaʼtuklik wa yaan u seguer u adorartik Jéeoba yéetel u tsʼáaikuba yáanal u páajtalil wa u tsʼáaikuba tu tséel Satanás.

24. ¿Baʼaxten ku yaʼalaʼal «Gog yéetel Magog» tiʼ le máaxoʼob ken u tsʼáaubaʼob tu contra Diosoʼ?

²⁴ Xok Apocalipsis 20:7-10. Le máaxoʼob ken u tsʼáaubaʼob tu contra Dios le kéen tsʼoʼokok le Mil Añosoʼ ku yaʼalaʼaltiʼob «Gog yéetel Magog». Letiʼobeʼ beyoʼob jeʼex le kaajoʼob ku yaʼalaʼaltiʼob «Gog ku taal tiʼ u luʼumil Magog» tu yaʼalaj Ezequiel kun atacarkoʼob u kaajal Jéeoba tu kʼiiniloʼob le nojoch muʼyajiloʼ (Eze. 38:2). Le máaxoʼob ken u tsʼáaubaʼob tu contra Jéeoba le kéen tsʼoʼokok le Mil Añosoʼ ku yaʼalaʼal xan tiʼob «kaajoʼob». ¿Baʼaxten? Tumen tu yáamil le Mil Años kun reinar Jesúsoʼ yaan u pʼáatal junmúuchʼ yanil tuláakal le kaajoʼoboʼ, tuláakal le máakoʼoboʼ yaan u gobernartaʼaloʼob tumen u Reino Dios. Jeʼel u páajtal k-aʼalikeʼ yaan u pʼáatal chéen junpʼéeliliʼ kaaj kun antal. Le oʼolaleʼ le kéen meyajnak le tʼaan «Gog yéetel Magog» bey xan «kaajoʼob» teʼ profecíaoʼ  ku yeʼesikeʼ Satanáseʼ yaan u beetik u jatskuba yéetel u náachtal máakoʼob tiʼ Dios. Cada juntúul máak ken u chʼaʼtukult wa yaan u meyajtik Jéeoba wa yaan u tsʼáaikuba tu tséel Satanás.

25, 26. ¿Bukaʼaj máakoʼob ken u tsʼáaubaʼob tu tséel Satanás? ¿Baʼax kun beetbiltiʼob tumen Jéeoba?

²⁵ ¿Yaʼab wa máaxoʼob ken u tsʼáaubaʼob tu tséel Satanás? Le Bibliaoʼ ku yaʼalikeʼ beyoʼob «jeʼex u arenail le kʼáaʼnáaboʼ». Chéen baʼaleʼ lelaʼ maʼ u kʼáat u yaʼal wa jach táaj yaʼab máaxoʼob ken u tsʼáaubaʼob tu contra Jéeobaiʼ. ¿Bix k-ojéeltik leloʼ? Tuukulnakoʼon tiʼ le promesa beetaʼab tiʼ Abrahánoʼ. Jéeobaeʼ tu yaʼalajtiʼeʼ u chʼiʼibaleʼ yaan u jach yaʼabtal «jeʼex le arena yaan tu jáal le kʼáaʼnáaboʼ» (Gén. 22:17, 18). Chéen baʼaleʼ u chʼiʼibal wa le máaxoʼob kun gobernaroʼob teʼ kaʼanoʼ chéen 144,001 u túulaloʼob (Gál. 3:16, 29). Kex yaʼab u yuʼubaʼaleʼ u jaajileʼ junpʼíitoʼob wa k-ketik yéetel le bukaʼaj máakoʼob yanoʼob way Luʼumeʼ. Bey túunoʼ kex yaʼab máaxoʼob ken u tsʼáaubaʼob tu tséel Satanáseʼ, u jaajileʼ junpʼíitoʼob tu tséel le bukaʼaj máakoʼob ken u meyajtoʼob Jéeobaoʼ. Le máakoʼobaʼ maʼ kun béeytal u xuʼulskoʼob u kaajal Jéeoba.

²⁶ Letiʼobeʼ yaan u xuʼulsaʼaloʼob tumen Jéeoba junmúuchʼ yéetel Satanás bey xan u kʼasaʼan ángeloʼob. Chéen yaan u kʼaʼajsaʼaloʼob  yoʼolal le baʼaxoʼob kʼaastak tu beetoʼoboʼ bey xan le bix tsʼoʼokikoʼob úuchik u tsʼáaikubaʼob tu contra Jéeobaoʼ (Apo. 20:10).

27-29. ¿Baʼax bendiciónoʼob ken u kʼam máak le kéen tsʼoʼokok le u tsʼook pruebaoʼ?

²⁷ Le máaxoʼob ken u yeʼesoʼob tiaʼanoʼob tu tséel Jéeoba le kéen tsʼoʼokok le u tsʼook pruebaoʼ yaan u tsʼíibtaʼal u kʼaabaʼob «tu libroil le kuxtaloʼ» (Apo. 20:15). Bey túunoʼ tuláakal máak ken u adorart Jéeoba junmúuchʼ bey junpʼéel familiaeʼ.

²⁸ Chéen máans ta tuukul bix jatsʼutsil le kuxtal kun antaloʼ. Teech yéetel a familiaeʼ mix bikʼin kan muʼyajeʼex tu kaʼatéen. Yaan u kiʼimaktal a wóol yoʼolal le meyaj ken a beetoʼ yéetel yaan a kuxtal yéetel máakoʼob jach tu jaajil u yaabiltmechoʼob. Kéen tsʼoʼokok le u tsʼook pruebaoʼ tuláakal máak kun páajtal u jach biskuba yéetel Jéeoba tumen teʼ kʼiinoʼoboʼ tsʼokaʼaniliʼ u pʼáatal jach minaʼan u kʼeban máakeʼ yéetel toj u kuxtal tu táan Dios. Tsʼoʼoleʼ yaan xan u páajtal k-bisikba yéetel Jéeoba jeʼex u beetik kaʼach Adán yéetel Eva táanil tiʼ u kʼebantaloʼoboʼ. Bey túunoʼ yaan u kaʼa adorartaʼal Jéeoba tumen u paalal, le yanoʼob teʼ kaʼanoʼ bey xan way Luʼumeʼ. ¡Bey kun kaʼa adorarbil chéen Jéeobaoʼ!

²⁹ ¿Yaan wa a wilik u béeytal lelaʼ? Jeʼel u béeytal a wilik wa ka beetik le óoxpʼéel baʼaloʼob ku yaʼalik u libroil Ezequielaʼ: a adorartik  chéen Jéeoba, u seguer a múuchʼ adorartik yéetel a yaabiltik u maasil máakoʼoboʼ. ¿Yaan wa uláakʼ baʼax ku kaʼansiktoʼon u libroil Ezequiel?

30, 31. 1) ¿Baʼax kun úuchul yéetel u enemigoʼob Dios? 2) ¿Baʼax kun úuchul yéetel le máaxoʼob meyajtik Diosoʼ?

³⁰ U libroil Ezequieleʼ yaʼab u téenel ku yaʼalik: «Yaan u yojéeltikoʼobeʼ teneʼ Jéeobaen» (Eze. 6:10; 39:28). Lelaʼ u kʼáat u yaʼaleʼ Dioseʼ yaan u baʼateʼel tu contra u enemigoʼob yéetel yaan u xuʼulsiktiʼob. Teʼ kʼiin jeʼeloʼ yaan u yojéeltikoʼob máax Jéeoba. Tsʼoʼoleʼ yaan u yojéeltikoʼob jach jaaj le baʼax u kʼáat u yaʼal u kʼaabaʼaʼ: «Teneʼ Yaan in Kʼuchul in Beetinba le Baʼax Ken in Yéey in Beetkinbaoʼ». Yaan xan u yilkoʼobeʼ «Jéeoba, le máax gobernartik le ángeloʼoboʼ», jach junpuliʼ «maʼ sajak baʼateʼel tu contra u enemigoʼobiʼ» (1 Sam. 17:45; Éxo. 15:3). Teʼ kʼiinoʼob jeʼeloʼ yaan u tsʼáaikoʼob cuenta mix baʼal jeʼel u kʼatkuba tubeel Jéeoba utiaʼal u béeykuntik baʼax u kʼáateʼ, chéen baʼaleʼ tsʼoʼoktiʼob beyoʼ.

³¹ Le máaxoʼob meyajtik Diosoʼ yaan u kuxtaloʼob ich jeetsʼelil. Teʼ kʼiinoʼob jeʼeloʼ yaan u páajtal k-eʼesik u jatsʼuts modos Dios jach jeʼex unajeʼ (Gén. 1:26). Desde bejlaʼeʼ Jéeobaeʼ juntúul Taatatsil u yaabiltmoʼon yéetel ku kanáantkoʼon jeʼex u beetik juntúul j-kanan tamaneʼ. Chéen baʼaleʼ maʼ kun xáantaleʼ yaan u kʼuchul u beetuba k-Rey. Mientras maʼ kʼuchuk le kʼiin jeʼeloʼ mantatsʼ unaj k-kʼaʼajsik le baʼax tsʼoʼok k-kanik tiʼ u libroil Ezequieloʼ. Le baʼax k-aʼalik yéetel le baʼax k-beetik sáamsamaloʼ unaj u yeʼesik k-ojel máax Jéeoba. Wa k-beetik beyoʼ maʼ ken k-sajaktal kéen káajak le nojoch muʼyajiloʼ. Baʼaxeʼ yaan k-líiʼsik k-pool tumen k-ojel tsʼoʼok u náatsʼal u kʼiinil k-salvartaʼal (Luc. 21:28). Antes tiʼ u kʼuchul le kʼiin jeʼeloʼ unaj k-áantik le bukaʼaj máakoʼob ku páajtal utiaʼal u kʼaj óoltikoʼob yéetel u yaabiltikoʼob Jéeoba, le Dios minaʼan uláakʼ jeʼex letiʼoʼ (Eze. 28:26).