1, 2. 1) ¿Baʼax tu tsolaj Jéeoba tiʼ Ezequiel yéetel tiʼ le judíoʼob bisaʼanoʼob táanxel luʼumiloʼ? 2) ¿Baʼax kʼáatchiʼiloʼob kun núukbil teʼ xookaʼ?

EZEQUIELEʼ tsʼaʼab u yil junpʼéel baʼal tu kʼaʼajsajtiʼ baʼax aʼalaʼab tiʼ Moisés yéetel tiʼ Josué. Kex 900 años paachileʼ Jéeobaeʼ tu yaʼalaj tiʼ Moisés tak tuʼux kun náakal le luʼum kun tsʼaabiltiʼob kaʼachoʼ. Tsʼoʼoleʼ tu yaʼalaj xan tiʼ Josué bix unaj u tʼoʼoxol le luʼum tiʼ u tribuiloʼob Israeloʼ (Núm. 34:1-15; Jos. 13:7; 22:4, 9). Tu añoil 593 t.t.J., Jéeobaeʼ tu tsolaj tiʼ Ezequiel yéetel tiʼ le judíoʼob bisaʼanoʼob táanxel luʼumiloʼ bix ken u tʼoxiloʼob le luʼum ichil u tribuiloʼob Israeloʼ (Eze. 45:1; 47:14; 48:29).

² Yéetel le baʼax tsʼaʼab u yil Ezequieloʼ, ¿baʼax taak kaʼach u yeʼesaʼal tiʼ letiʼ bey xan tiʼ le judíoʼoboʼ? ¿Baʼaxten ku líiʼsik k-óol teʼ kʼiinoʼobaʼ? ¿Yaan wa u kaʼa béeytal teʼ kʼiinoʼob ku taaloʼoboʼ?

3, 4. 1) ¿Máakalmáak le kanpʼéel baʼaloʼob kun béeytaloʼob tiʼ u kaajil Israeloʼ? 2) ¿Tiʼ máakalmáak ken k-tʼaan teʼ xookaʼ?

³ Ezequieleʼ tu tsʼíibtaj tiʼ nueve capítuloʼob le u tsʼook baʼax tsʼaʼab u yiloʼ (Eze. 40:1–48:35). Le baʼax tu yiloʼ tu yeʼesaj kanpʼéel baʼaloʼob kun béeytaloʼob tiʼ u kaajil Israel, leloʼ jach tu líiʼsaj  u yóol le judíoʼob bisaʼanoʼob táanxel luʼumiloʼ. ¿Máakalmáak le kanpʼéel baʼaloʼoboʼ? Yáaxeʼ yaan u kaʼa adorartaʼal Jéeoba teʼ templooʼ. U kaʼapʼéeleʼ u kaajil Israeleʼ yaan u nuʼuktaʼal tumen sacerdoteʼob yéetel j-kanan tamanoʼob utstakoʼob. U yóoxpʼéeleʼ yaan u tsʼaʼabal junxóotʼ luʼum bey herencia tiʼ le máaxoʼob kun suutoʼoboʼ. U kanpʼéeleʼ yaan u kaʼa antal Jéeoba yéetel u kaajal.

⁴ U xookil 13 yéetel 14 tiʼ le libroaʼ tʼaanajoʼob tiʼ le yáax kaʼapʼéeloʼ: le u kaʼa adorartaʼal Jéeobaoʼ yéetel le u nuʼuktaʼal u kaajil Israel tumen j-kanan tamanoʼob utstakoʼoboʼ. Teʼ xookaʼ yaan k-tʼaan tiʼ le u yóoxpʼéeloʼ: le u tsʼaʼabal junxóotʼ luʼum bey herencia tiʼ le máaxoʼob kun suutoʼoboʼ. Teʼ tuláakʼ xookoʼ yaan k-tʼaan tiʼ le u kanpʼéeloʼ: le u kaʼa antal Jéeoba yéetel u kaajaloʼ (Eze. 47:13-21; 48:1-7, 23-29).

5, 6. 1) ¿Máakalmáak le luʼum tu yaʼalaj Jéeoba kun tʼoxbiloʼ? (Ilawil le dibujo yaan tu káajbal le xookaʼ). 2) ¿Baʼaxten tu yaʼalaj Jéeoba tuʼux kun náakal u fronterailoʼob le luʼumoʼ?

⁵ Xok Ezequiel 47:14. Jéeobaeʼ tu yaʼalaj tiʼ Ezequieleʼ yaan junxóotʼ luʼum kun pʼáatal «bey u jardínil Edéneʼ» (Eze. 36:35). Tsʼoʼoleʼ ka tu yaʼalaj: «Le luʼumaʼ letiʼe unaj a tʼoxkeʼex tiʼ u 12 tribuiloʼob Israel utiaʼal ka pʼáataktiʼob bey herenciaoʼ» (Eze. 47:13). «Le luʼum» tu yaʼalaj Jéeobaoʼ letiʼe u luʼumil Israel tuʼux kun suut le judíoʼoboʼ. Tsʼoʼoleʼ jeʼex u yaʼalik Ezequiel 47:15-21, Jéeobaeʼ hasta tu yaʼalaj tuʼux kun náakal u fronterailoʼob le luʼumoʼ.

⁶ ¿Baʼaxten tu yaʼalaj tuʼux kun náakal u fronterailoʼob le luʼumoʼ? Utiaʼal kaʼach u yeʼesik tiʼ Ezequiel yéetel tiʼ le judíoʼob jach tu jaajil yaan u kaʼa tiaʼalintikoʼob u luʼumil Israeloʼ. ¡Le baʼax tu yaʼalaj Jéeobaoʼ jach tu líiʼsaj wal u yóol le judíoʼob bisaʼanoʼob táanxel luʼumiloʼ! Chéen baʼaleʼ, ¿jach wa tu jaajil tsʼaʼabtiʼob junpʼéel luʼum bey herenciaeʼ? Tsʼaʼabtiʼob jach tu jaajil.

7. 1) ¿Baʼax úuch tu añoil 537 t.t.J., yéetel baʼax ku kʼaʼajsiktoʼon? 2) ¿Baʼax ken k-xakʼalt beoraaʼ?

⁷ Tu añoil 537 t.t.J., u milesil judíoʼobeʼ suunajoʼob tu luʼumil Israel utiaʼal u kajtaloʼobiʼ, jach jeʼex úuchik u profetizartik Ezequiel kex 56 años paachileʼ. Le baʼax úuch tu kʼiinil le judíoʼoboʼ ku kʼaʼajsiktoʼon junpʼéel baʼax uchaʼan tiʼ u kaajal Dios teʼ kʼiinoʼobaʼ. Jeʼel u páajtal u yaʼalaʼaleʼ letiʼob xaneʼ tu kʼamoʼob junxóotʼ luʼum bey herenciaeʼ. ¿Baʼaxten k-aʼalik leloʼ? Tumen Jéeobaeʼ tu chaʼaj u yokol u kaajal tiʼ junpʼéel lugar ku keʼetel yéetel junpʼéel paraíso. Le bix úuchik u kaʼa suut le judíoʼob tu luʼumoʼoboʼ yaʼab baʼax jeʼel u kaʼansiktoʼoneʼ. Chéen baʼaleʼ táanil tiʼ k-ilik baʼax ku kaʼansiktoʼoneʼ koʼox xakʼaltik baʼaxoʼob eʼesik jach tu jaajil yaan junpʼéel lugar ku keʼetel yéetel junpʼéel paraíso.

8. 1) ¿Baʼax kaajil tu yéeyaj Jéeoba tu lugar u kaajil Israel? 2) ¿Baʼaxten k-aʼalik le máaxoʼob meyajtik Diosoʼ bey tiaʼanoʼob tiʼ junpʼéel paraísoeʼ? 3) ¿Baʼax añoil ka káaj u yantal le paraíso jeʼeloʼ, yéetel máaxoʼob yanoʼob ichil?

 ⁸ Tiʼ uláakʼ junpʼéel baʼax tu tsʼáaj u yil Ezequieleʼ, Jéeobaeʼ tu yeʼeseʼ le profecía ku tʼaan tiʼ u kaʼa suut le israelitaʼob tu luʼumoʼoboʼ yaan u kaʼa béeytal kéen káajak u reinar «David» wa Jesucristo, lelaʼ úuch tu añoil 1914 (Eze. 37:24). Teʼ año jeʼeloʼ úuch xúumpʼattaʼak u kaajil Israel tumen Dios. Letiʼeʼ tsʼoʼok kaʼach u yéeyik uláakʼ junpʼéel kaaj tuʼux táakaʼan le máaxoʼob yéeyaʼanoʼob utiaʼal u binoʼob kaʼanoʼ (xok Mateo 21:43; 1 Pedro 2:9). Tsʼoʼoleʼ Jéeobaeʼ tu xúumpʼattaj xan le luʼum tuʼux yaan kaʼach u kaajil Israeloʼ ka tu yéeyaj uláakʼ junpʼéel luʼum ku keʼetel yéetel junpʼéel paraíso (Isa. 66:8). Jeʼex tsʼoʼok k-ilik tu xookil 17 tiʼ le libroaʼ le máaxoʼob meyajtik Diosoʼ bey tiaʼanoʼob tiʼ junpʼéel paraísoeʼ tumen teʼeloʼ mix baʼal beetik u chiʼichnaktaloʼob. Tsʼoʼoleʼ desde tu añoil 1919, le yéeyaʼanoʼoboʼ táan u beetkoʼob jejeláas baʼaloʼob utiaʼal u adorarkoʼob Jéeoba teʼ paraíso jeʼeloʼ (ilawil le cuadro 9B, «¿Baʼax eʼesik 1919 ka úuchi?»). Ka máan  kʼiineʼ ‹le uláakʼ tamanoʼoboʼ› káaj xan u yookloʼob teʼ luʼum ku keʼetel yéetel junpʼéel paraísooʼ (Juan 10:16). Le paraísoaʼ táan u bin u maas nojochtal teʼ kʼiinoʼobaʼ, chéen baʼaleʼ tuláakal le utsiloʼob ken u taasoʼ yaan k-ilik hasta kéen tsʼoʼokok le Armagedónoʼ.

9. Tsol bix unaj u tʼoʼoxol kaʼach le luʼumoʼ.

⁹ Xok Ezequiel 48:1, 28. Jéeobaeʼ tu yaʼalaj tuʼux ku náakal u fronterailoʼob le luʼumoʼ, le ka tsʼoʼokeʼ tu yaʼalaj xan bix unaj u tʼoʼoxol. Tu yaʼaleʼ unaj u tʼoʼoxol maʼalob le luʼum tiʼ le 12 tribuʼoboʼ, igual unaj u tocartiʼob. Unaj u káajal xaman yéetel u tribuil Dan yéetel unaj u tsʼoʼokol noojol yéetel u tribuil Gad. U chowakil le luʼum kun tocar tiʼ cada tribuoʼ yaan u káajal desde tu fronterail lakʼin yéetel yaan u náakal teʼ Mar Grande wa Mar Mediterráneo yaan chikʼinoʼ (Eze. 47:20).

10. ¿Baʼax tu yeʼesaj tiʼ le judíoʼob le baʼax tsʼaʼab u yil Ezequieloʼ?

¹⁰ ¿Baʼax tu yeʼesaj tiʼ le judíoʼob le baʼax tsʼaʼab u yil Ezequieloʼ? Úuchik u yaʼalik Jéeoba jach bix unaj u tʼoʼoxol le luʼumoʼ tu yeʼesaj maʼ chéen kun jáajan tʼoxbiliʼ, baʼaxeʼ chʼaʼtuklaʼan tubeel. Tsʼoʼoleʼ le u tʼoʼoxol le luʼum ichil le 12 tribuʼoboʼ tu yeʼeseʼ tuláakal le máaxoʼob kun suutoʼob tu luʼumil Israeloʼ yaan u tsʼaʼabaltiʼob junxóotʼ luʼum bey herenciaeʼ. ¡Tuláakal máak kun antal u yotoch yéetel u terreno!

11. ¿Baʼax ku yeʼesiktoʼon le baʼax tu yilaj Ezequieloʼ? (Ilawil le cuadro «U tʼoʼoxol le luʼumoʼ»).

¹¹ ¿Baʼax ku yeʼesiktoʼon le baʼax tu yilaj Ezequieloʼ? Úuchjeakileʼ maʼ chéen le sacerdoteʼob, le levitaʼob yéetel u nuuktakil le kaaj kun tsʼaabil kaʼach u herenciaʼoboʼ, baʼaxeʼ yaan u tsʼaʼabal tiʼ tuláakal le máaxoʼob yanoʼob tiʼ le 12 tribuʼoboʼ (Eze. 45:4, 5, 7, 8). Teʼ kʼiinoʼobaʼ le yéeyaʼanoʼob yéetel le máaxoʼob nuʼuktik u kaajal Dios táakaʼanoʼob ichil le ‹yaʼabkach máakoʼoboʼ› yaantiʼob junpʼéel lugar teʼ paraíso tuʼux yaan u kaajal Diosoʼ (Apo. 7:9). * Chéen baʼaleʼ maʼ chéen letiʼob yaantiʼob junpʼéel lugar teʼ paraísooʼ, baʼaxeʼ tuláakloʼon yéetel kex jeʼel baʼaxak meyajil k-beetkeʼ koʼoj u tojol tu táan Dios. ¿Máasaʼ jach ku líiʼsik k-óol?

12, 13. ¿Bix unaj u tʼoʼoxol kaʼach le luʼum tiʼ le tribuʼoboʼ?

¹² Jeʼex tsʼoʼok k-ilkoʼ Jéeobaeʼ tu yaʼalaj tiʼ Ezequiel bix unaj u tʼoʼoxol le luʼumoʼ. Baʼaleʼ jujunpʼéel tiʼ le baʼaxoʼob tu yaʼaloʼ maʼ xaaneʼ jelaʼan tu yuʼubil Ezequiel tumen maʼ igual yéetel le baʼax tu yaʼalaj Dios tiʼ Moisésoʼ. Koʼoneʼex ilik kaʼapʼéel baʼal maʼ igualiʼ: junpʼéel baʼax tu yaʼalaj yoʼolal le luʼumoʼ yéetel junpʼéel baʼax tu yaʼalaj yoʼolal u kajnáaliloʼob.

¹³ Le luʼumoʼ. Jéeobaeʼ tu yaʼalaj tiʼ Moiséseʼ unaj u tsʼáaik junxóotʼ luʼum maas nojoch tiʼ le tribuʼob maas nuuktakoʼ (Núm. 26:52-54). Chéen baʼaleʼ tiʼ Ezequieleʼ tu yaʼaleʼ unaj igual le luʼum  kun tʼoxbil tiʼ cada tribuoʼ (Eze. 47:14). U kóochil le luʼum kun tocar tiʼ cada tribuoʼ unaj igual le kéen pʼiʼisik desde xaman tak noojol. Beyoʼ tuláakal le israelitaʼoboʼ yaan u páajtal kaʼach u disfrutarkoʼob u yich le maʼalob luʼum kun tsʼaabiltiʼoboʼ.

14. Le baʼax tu yaʼalaj Jéeoba tiʼ Ezequiel yoʼolal le j-táanxel luʼumiloʼoboʼ, ¿baʼaxten jelaʼan tiʼ le baʼax ku yaʼalik kaʼach le Leyoʼ?

¹⁴ U kajnáaliloʼob. Teʼ Ley tsʼaʼab tiʼ Moisésoʼ ku kanáantaʼal kaʼach le j-táanxel luʼumiloʼoboʼ yéetel ku chaʼabal u adorarkoʼob Jéeoba, chéen baʼaleʼ maʼ tu páajtal kaʼach u tiaʼalintikoʼob mix junxóotʼ luʼum tu kaajil Israel (Lev. 19:33, 34). Le baʼax tu yaʼalaj Jéeoba tiʼ Ezequieloʼ jelaʼan tiʼ le baʼax u yaʼalmaj teʼ Ley tu tsʼáaj tiʼ Moisésoʼ. Letiʼeʼ tu yaʼalaj tiʼ Ezequiel: «Le herencia kun tsʼaabil tiʼ le j-táanxel luʼumiloʼ tiʼ kun chʼaʼabil ichil u luʼum le tribu tuʼux kajakbaloʼ». Yéetel le baʼax tu yaʼaloʼ tu yeʼeseʼ igual u yilik le israelitaʼob yéetel le j-táanxel luʼumiloʼoboʼ (Eze. 47:22, 23). Ezequieleʼ tu yileʼ u kajnáaliloʼob le luʼumoʼ igual le derecho yaantiʼoboʼ yéetel ku múuchʼ adorarkoʼob Jéeoba (Lev. 25:23).

15. ¿Bix u yilik Jéeoba tuláakal le máaxoʼob adorarkoʼ?

¹⁵ Le baʼax tu yaʼalaj Jéeoba yoʼolal le luʼum yéetel u kajnáaliloʼoboʼ tu líiʼsaj u yóol le máaxoʼob bisaʼanoʼob táanxel luʼumiloʼ.  Letiʼobeʼ tu naʼatoʼobeʼ junpʼéeliliʼ herencia ken u kʼam le israelitaʼob yéetel le j-táanxel luʼumiloʼob adorartik Jéeobaoʼ (Esd. 8:20; Neh. 3:26; 7:6, 25; Isa. 56:3, 8). Yéetel le baʼax tu yaʼaloʼ Jéeobaeʼ tu yeʼesaj junpʼéel baʼal mix bikʼin kun kʼexpajal: tuláakal le máaxoʼob adorarkoʼ igual u tojoloʼob tu táan (xok Ageo 2:7). Leloʼ jach ku líiʼsik k-óol kex yéeyaʼanoʼon utiaʼal k-bin kaʼan bey xan wa táan k-páaʼtik k-pʼáatal kuxtal way Luʼumeʼ.

16, 17. 1) Beora tsʼoʼok k-xakʼaltik le baʼax tu yaʼalaj Jéeoba yoʼolal le luʼum yéetel u kajnáaliloʼoboʼ, ¿baʼaxoʼob tsʼoʼok k-kanik? 2) ¿Baʼax ken k-il teʼ tuláakʼ xookoʼ?

¹⁶ Beora tsʼoʼok k-xakʼaltik le baʼax tu yaʼalaj Jéeoba yoʼolal le luʼum yéetel u kajnáaliloʼoboʼ, ¿baʼaxoʼob tsʼoʼok k-kanik? Jach unaj u chíikpajleʼ tuláakal le máaxoʼob meyajtik Jéeoba way Luʼumeʼ igualoʼob yéetel ku múuchʼ meyajoʼob. Jéeobaeʼ mix máak jelaʼan u paktik, le oʼolal maʼalob ka k-tukle: ¿Kin tuukul wa jeʼex u tuukul Jéeobaeʼ? ¿Kin respetartik wa tuláakal le sukuʼunoʼob kex jeʼel baʼalak idioma ku tʼankoʼob, kex jeʼel tuʼuxak u taaloʼob wa kex jeʼel baʼalak situación yaniloʼobeʼ? (Rom. 12:10). Jach ku kiʼimaktal k-óol tumen Jéeobaeʼ ku tsʼáaik u páajtalil tiʼ tuláakal máak u yokol ichil u kaajal ku keʼetel yéetel junpʼéel paraísooʼ. Teʼeloʼ k-meyajtik Jéeoba yéetel k-disfrutartik le bendiciónoʼob ku tsʼáaiktoʼonoʼ (Gál. 3:26-29; Apo. 7:9).

¹⁷ Teʼ tuláakʼ xookoʼ yaan k-ilik le u kanpʼéel baʼal kun béeytaloʼ: Jéeobaeʼ yaan u kaʼa antal yéetel le máaxoʼob bisaʼanoʼob táanxel luʼumiloʼ. Yaan xan k-ilik baʼax jeʼel k-kanik tiʼ le baʼax u yaʼalmoʼ.