Sukuʼuneʼex yéetel kiikeʼex:

Tu añoil 1971, beetaʼab junpʼéel Asamblea tiʼ Distrito tu kʼaabaʼtaj «Nombre Divino». Teʼ asamblea beetaʼab ich inglésoʼ tsʼaʼab jujunpʼéel túumben publicaciónoʼob tiʼ le máaxoʼob binoʼoboʼ. Le Anuario jóoʼsaʼab 1972, tu yaʼaleʼ «mix máak páaʼtik le bukaʼaj baʼaxoʼob jóoʼsaʼaboʼ». Juntúul sukuʼuneʼ tu yaʼalaj yoʼolal le libro tsʼaʼaboʼ: «Jach jatsʼuts bix u tsolik le baʼaxoʼob ku taal u kʼiin u yúuchloʼ. Mix juntéen jóoʼsaʼak junpʼéel publicación ka u yaʼal baʼaloʼob beyoʼ». ¿Tiʼ baʼax libroil ku tʼaan? Tiʼ le libro «Las naciones sabrán que yo soy Jehová»... ¿cómo? ¿Baʼaxten jach jatsʼuts ilaʼabik le baʼax tu taasaj le libroaʼ? Tumen ku jel tsolik kaʼach u profecíailoʼob Ezequiel. Le profecíaʼobaʼ ku yeʼeskoʼob baʼax ku taal u kʼiin u yúuchul way yóokʼol kaabeʼ.

U kaajal Dioseʼ jach séebaʼan úuchik u yaʼabtal desde ka jóoʼsaʼab le libro «Las naciones sabrán». Kaʼacheʼ kex millón y medio sukuʼunoʼob yaan tuláakal yóokʼol kaab, chéen baʼaleʼ teʼ kʼiinoʼobaʼ maas tiʼ ocho millones (Isa. 60:22). Le máaxoʼob meyajtik Dios tiʼ tuláakal yóokʼol kaaboʼ ku tʼankoʼob maas tiʼ 900 idiomaʼob. Yaʼab tiʼ letiʼobeʼ mix juntéen béeychajak u xakʼalxoktikoʼob junpʼéel libro tuʼux ku tsoʼolol le profecíaʼob tsʼaʼab u yil Ezequiel tumen Jéeobaoʼ (Zac. 8:23).

Tsʼoʼoleʼ desde tu añoil 1971, maas naʼataʼab yaʼab tiʼ le kaʼansajoʼob yaan teʼ Bibliaoʼ (Pro. 4:18). Tu añoil 1985, kʼuch naʼatbileʼ le «uláakʼ tamanoʼob» tu yaʼalaj Jesúsoʼ ku yilaʼal bey toj u kuxtaloʼobeʼ yéetel ku yaʼalaʼaltiʼob u amigoʼob Dios (Juan 10:16; Rom. 5:18; Sant. 2:23). Tu añoil 1995, kʼuch naʼatbileʼ «le tamanoʼob» yéetel «le chivoʼoboʼ» yaan u jaʼatsloʼob teʼ kʼiinoʼob táan «u sen muʼyaj máak» wa teʼ nojoch muʼyajiloʼ (Mat. 24:21; 25:31, 32). Tuláakal le baʼaloʼobaʼ tsʼoʼok u yáantik u kaajal Dios u maas naʼat baʼax ku yaʼalik u libroil Ezequiel.

Bejlaʼeʼ maas yaʼab baʼaloʼob táan u bin u naʼataʼal. Tuukulnen tiʼ le baʼaloʼob tsʼoʼok k-kanik tiʼ le kettʼaanoʼob tu yaʼalaj Jesúsoʼ. Yaʼab tiʼ le baʼaxoʼob tu kaʼansajoʼ bejlaʼeʼ maas k-naʼatkoʼob tubeel yéetel ku kʼuchloʼob t-puksiʼikʼal. Tsʼoʼoleʼ jujunpʼéel tiʼ le baʼaloʼobaʼ yaan u béeytaloʼob le táan le nojoch muʼyajiloʼ, lelaʼ jach natsʼaʼan u kʼiinil u yúuchul. Bejlaʼa xaneʼ maas maʼalob bix k-naʼatik jujunpʼéel tiʼ u profecíailoʼob Ezequiel, jeʼex le ku tʼaan tiʼ Gog ku taal tiʼ u luʼumil Magogoʼ (capítulo 38 yéetel 39), le máak u takmaj junpʼéel nookʼ de lino yéetel u chʼiknakʼmaj u nuʼukulil u tsʼíib juntúul secretariooʼ (capítulo 9), le táax luʼum chuup yéetel tikin baakoʼoboʼ bey xan le kaʼapʼéel cheʼob ku nuʼupul utiaʼal ka pʼáatkoʼob junpʼéeliliʼoboʼ (capítulo 37). Yoʼolal tuláakal le túumben baʼaloʼob tsʼoʼok u naʼataʼalaʼ kʼaʼabéetchaj u jel tsoʼolol baʼax ku yaʼalik le libro «Las naciones sabrán».

Le máaxoʼob meyajtik Diosoʼ úuch joʼopʼok u páaʼtkoʼob ka jóoʼsaʼak junpʼéel libro ka u jel tsol u profecíailoʼob Ezequiel. Le oʼolal jóoʼsaʼab le libro Yaan u kaʼa adorartaʼal chéen Jéeoba. Le libroaʼ yaan 22 capítuloʼob tiʼ yéetel yaʼab jatsʼuts fotoʼob ku taasik. Jeʼex u bin a xokikeʼ yaan a tsʼáaik cuentaeʼ jach yaʼab meyaj yanchaj u beetaʼal. Utiaʼal u naʼatik le Cuerpo Gobernante baʼax u kʼáat u kaʼanstoʼon Jéeoba tu libroil Ezequieloʼ kʼaʼabéetchaj u sen orar yéetel u tuukul tiʼ le profecíaʼoboʼ. Yanchaj u tuklikoʼob baʼax tu kaʼansaj tiʼ le judíoʼob úuchjeakiloʼ, baʼax ku kaʼansiktoʼon teʼ kʼiinoʼobaʼ, máakalmáak le  profecíaʼob ku tʼaanoʼob tiʼ le baʼax ku taal u kʼiin u yúuchloʼ yéetel tu tsʼookeʼ tu xakʼaltoʼob maʼalob utiaʼal u yilkoʼob wa unaj u kaxtikoʼob baʼax u kʼáat u yaʼal cada junpʼéel tiʼ le baʼaxoʼob ku yaʼalik le profecíaʼoboʼ. Tuláakal lelaʼ yaan u yáantkoʼon k-maas naʼat baʼax ku yaʼalik u libroil Ezequiel, junpʼéel libro jach jatsʼuts.

Jeʼex u bin a xokik u libroil Ezequieleʼ bey xan kun bin a maas naʼatik bix u meyaj u kaajal Dios teʼ kaʼanoʼ. Tsʼoʼoleʼ yaan xan a wilik bix u páaʼtik Jéeoba ka adorartaʼak tumen le máaxoʼob yanoʼob teʼ kaʼanoʼ bey xan le máaxoʼob yanoʼob way Luʼumeʼ. Le libro U kaʼa adorartaʼal Jéeobaoʼ yaan u yeʼesiktech baʼax tu beetaj Jéeoba yoʼolal u kaajal úuchjeakil yéetel baʼax ken u beet tu yoʼolaloʼob maʼ kun xáantal. Yaan a wilik xaneʼ le libroaʼ ku tʼaan tiʼ kaʼapʼéel baʼaloʼob ku páaʼtik Jéeoba ka k-beete. Yáaxeʼ, utiaʼal u kʼamik Jéeoba le bix k-adorarkoʼ kʼaʼabéet k-kʼaj óoltik tubeel yéetel k-kʼamik letiʼ u Maas Nojchil tiʼ tuláakal baʼax yaan. U kaʼapʼéeleʼ, kʼaʼabéet k-adorartik Jéeoba jeʼex uts tu tʼaaneʼ yéetel unaj k-beetik le baʼaxoʼob ku yaʼalik teʼ Bibliaoʼ.

Le libroaʼ beetaʼab utiaʼal u yáantkeʼex a chʼaʼtukleʼex a maas meyajtikeʼex Jéeoba yéetel ka a alabarteʼex u kʼaabaʼ. Beetaʼab xan utiaʼal ka chúukpajak a wóol a páaʼteʼex le kʼiin ken u yeʼes Jéeoba tiʼ le kaajoʼob máax jach tu jaajil letiʼoʼ (Eze. 36:23; 38:23).

K-páaʼtikeʼ, Jéeoba, le k-Taata jach u yaabiltmoʼonoʼ, ka u bendecirteʼex yéetel ka u yáanteʼex a naʼateʼex le baʼax u kʼáat u yaʼaltoʼon tu libroil Ezequieloʼ.