«U adorartaʼal Dioseʼ u kʼáat u yaʼal u yeʼesaʼal respeto yéetel yaabilaj tiʼ letiʼ». Ichil le idiomaʼob tsʼíibtaʼab le Bibliaoʼ le tʼaanoʼob meyajnaj utiaʼal «adoraciónoʼ» ku tsʼáaik naʼatbil u yeʼesaʼal respeto wa u yuʼubaʼal u tʼaan wa máax (Mat. 28:9). Le tʼaanoʼobaʼ jeʼel xan u tsʼáaik naʼatbil u beetaʼal baʼaloʼob utiaʼal u adorartaʼal Dios wa utiaʼal u adorartaʼal yaanal dioseʼ (Juan 4:23, 24). Le tʼaanoʼobaʼ ku naʼataʼal según tiʼ baʼax táan u yúuchul tʼaan.

Chéen Jéeoba ku náajmatik ka k-adorarte tumen letiʼ beet tuláakal baʼal (Apo. 4:10, 11). K-adorartik Jéeoba wa k-reconocertik chéen tiʼ letiʼ yaan u derechoil u gobernar yéetel wa k-respetartik u kʼaabaʼ (Sal. 86:9; Mat. 6:9, 10). Ichil u libroil Ezequieleʼ yaʼab u téenel ku yaʼalaʼal chéen tiʼ Jéeoba yaan u derechoil u gobernar, yéetel yaʼab u téenel ku chʼaʼchiʼitaʼal u kʼaabaʼ. Tsʼoʼoleʼ le tʼaan «Jéeoba, le máax yaan tuláakal autoridad tiʼoʼ» ku chíikpajal kex 200 u téenel. Le tʼaan ku yaʼalik «ojéelteʼex máax Jéeoba» yéetel uláakʼ chíikaʼanoʼob tiʼ leloʼ 45 u téenel (Eze. 2:4; 6:7).

Utiaʼal u adorartik máak Jéeobaeʼ maʼ chéen unaj u yaʼalikiʼ, baʼaxeʼ yaan baʼax unaj u beetik (Sant. 2:26). Kéen u kʼub u kuxtal máak tiʼ Jéeobaeʼ ku yeʼesiktiʼ u kʼáat ka nuʼuktaʼak yéetel u kʼáat u respetart u kʼaabaʼ. Maʼ k-tuʼubsikeʼ yéetel le baʼax tu yaʼalaj Jesús u yóoxtéen ka probartaʼaboʼ tu tsʼáaj naʼatbileʼ ichil le adoración k-tsʼáaik tiʼ Jéeobaoʼ táakaʼan xan k-meyajtik (Mat. 4:10). Toʼoneʼ k-adorartik Jéeoba, le oʼolal k-tsʼíiboltik k-meyajtik (Deu. 10:12). Ichil le adoración k-tsʼáaik tiʼ Diosoʼ táakaʼan le jejeláas meyajoʼob k-beetik ichil u kaajaloʼ, le oʼolal kʼaʼabéet k-beetik sacrificioʼob. ¿Bey máakalmáak le meyajoʼobaʼ?

Jejeláas meyajoʼob jeʼel k-beetik utiaʼal k-adorartik Jéeobaeʼ, le meyajoʼobaʼ ku beetik u kiʼimaktal u yóol. K-adorartik Jéeoba kéen k-kaʼans tiʼ u maasil le baʼax tsʼoʼok k-kanikoʼ, kéen xiʼikoʼon muchʼtáambal yéetel kéen comentarnakoʼoniʼ. K-adorartik xan kéen k-kanáant le lugaroʼob tuʼux k-muchʼtaloʼ yéetel kéen áantajnakoʼon utiaʼal u beetaʼal u maasil. Tsʼoʼoleʼ k-adorartik Jéeoba kéen k-beet le adoración ich familiaoʼ, kéen k-áant le sukuʼunoʼob tuʼux úuch junpʼéel nojoch looboʼ, kéen áantajnakoʼon teʼ asambleaʼoboʼ wa kéen meyajnakoʼon Betel (Heb. 13:16; Sant. 1:27). Wa k-tsʼáaik táanil ichil k-kuxtal k-meyajtik Jéeobaeʼ yaan k-beetik «junpʼéel meyaj santo bul kʼiin yéetel bul áakʼab». ¡Jach kiʼimak k-óol meyajtik k-Dios Jéeoba! (Apo. 7:15).