Le capítulo 16 yéetel 23 tiʼ u libroil Ezequieloʼ ku yeʼesiktoʼon baʼaxoʼob tu yaʼalaj Dios tu contra le baʼax tu beetaj u kaajaloʼ. Le baʼax ku yaʼalik le kaʼapʼéel capítuloʼobaʼ jach chíikaʼanoʼob tumen ku tʼaanoʼob tiʼ le baʼaxoʼob ku beetik juntúul x-prostitutaoʼ. Ku yaʼalikoʼobeʼ Samariaeʼ letiʼe kiktsiloʼ yéetel Jerusaléneʼ letiʼe íitsʼintsiloʼ. Ku yaʼalikoʼobeʼ le íitsʼintsiloʼ tu prostituirtuba xan jeʼex tu beetaj u kiikoʼ, chéen baʼaleʼ ka máan kʼiineʼ maas kʼaschaj le íitsʼintsiloʼ. Teʼ capítulo 23, Jéeobaeʼ ku yaʼalik bix u kʼaabaʼ le kaʼatúul kiktsiloʼobaʼ: Oholá yéetel Oholibá. Samariaeʼ ku keʼetel yéetel Oholá (u reinoil le diez tribuʼoboʼ), Jerusaléneʼ ku keʼetel yéetel Oholibá (u reinoil le kaʼapʼéel tribuʼoboʼ) (Eze. 23:1-4). *

Yaan uláakʼ tiʼ baʼax chíikaʼan le kaʼapʼéel capítuloʼobaʼ. Ku yaʼalikoʼobeʼ tu kaʼatúulal le koʼoleloʼobaʼ u yatanoʼob kaʼach Jéeoba, chéen baʼaleʼ tu traicionartoʼob yéetel káaj u beetik u x-prostitutailoʼob. Ku yaʼalikoʼob xaneʼ Jéeobaeʼ yaan u perdonartik le kaajoʼobaʼ. Le capítulo 16 maas chíikaʼan u yeʼesik bix kun perdonarbiloʼob tumen Jéeoba, chéen baʼaleʼ le capítulo 23, maʼatech u jach tʼaan tiʼ lelaʼ (Eze. 16:16, 20, 21, 37, 38, 41, 42; 23:4, 11, 22, 23, 27, 37).

Úuchjeakileʼ u kaajal Dioseʼ ku yaʼalikeʼ Oholá yéetel Oholibáeʼ ku chíikbeskoʼob le cristiandadoʼ, ichil lelaʼ táakaʼan le religión católicaoʼ bey xan le uláakʼ religiónoʼob maʼ tu kaʼanskoʼob u jaajiloʼ. Chéen baʼaleʼ ka máan kʼiineʼ u kaajal Dioseʼ sen orarnaji yéetel tu maas xakʼaltaj lelaʼ. Junpʼéel baʼax áantoʼobeʼ letiʼe u tuukuloʼob tiʼ le kʼáatchiʼobaʼ: Le religiónoʼob maʼatech u kaʼanskoʼob u jaajiloʼ, ¿jeʼel wa u páajtal u yaʼalaʼal tsʼokaʼan u beeloʼob kaʼach yéetel Jéeobaeʼ? ¿Tu beetaj wa Jéeoba junpʼéel pacto tu yéeteloʼob? U jaajileʼ maʼ. ¿Baʼaxten k-aʼalik beyoʼ? Tumen Jesúseʼ tu beetaj «junpʼéel túumben pacto» yéetel u Israel Dios wa le máaxoʼob kun binoʼob kaʼanoʼ (Jer. 31:31; Luc. 22:20). Le ka kíim tuláakal le apóstoloʼoboʼ letiʼe ka káaj u yantal le cristiandadoʼ. Teʼ siglo cuatrooʼ tsʼokaʼaniliʼ u yaʼabtal le religiónoʼob beyaʼ. Letiʼobeʼ ku keʼeteloʼob yéetel «le kʼaakʼas xíiw» wa le maʼ jaajil cristianoʼob tu yaʼalaj Jesús tu kettʼaanil le maʼalob trigo yéetel le kʼaakʼas xíiwoʼ (Mat. 13:24-30).

Yaan uláakʼ baʼax eʼesik de ke Jerusalén yéetel Samariaeʼ yaanal baʼax ku chíikbeskoʼob. Jéeobaeʼ tu yaʼaleʼ yaan u perdonartik le kaʼapʼéel kaajoʼobaʼ (Eze. 16:41, 42, 53-55). Chéen baʼaleʼ, ¿ku yaʼalik wa le Biblia yaan xan u perdonartaʼal le cristiandadoʼ? Maʼatech, letiʼobeʼ yaan xan u xuʼulsaʼaloʼob paʼteʼ yéetel le Nojoch Babiloniaoʼ.

Jeʼex túun k-ilkoʼ Oholá yéetel Oholibáeʼ maʼ letiʼe cristiandadoʼ. Chéen baʼaleʼ le baʼax ku yaʼalik le Biblia tu yoʼolaloʼoboʼ ku kaʼansiktoʼon baʼax ku tuklik Jéeoba yoʼolal le máaxoʼob pʼatik kʼaasil u kʼaabaʼoʼ yéetel maʼatech u adorarkoʼob jeʼex uts tu tʼaanoʼ. Le religiónoʼob táakaʼanoʼob ichil le cristiandadoʼ jach bey u beetkoʼoboʼ, tumen chéen ku yaʼalikoʼob táan u beetkoʼob baʼax ku yaʼalik Dios. Tsʼoʼoleʼ ku yaʼalikoʼobeʼ Jesús, u Hijo Dios, nuʼuktikoʼob. Chéen baʼaleʼ maʼ jaaj baʼax ku yaʼalikoʼobiʼ tumen ku kaʼanskoʼobeʼ Jesúseʼ junpʼéel trinidad yéetel letiʼobeʼ uts tu tʼaan u táakpajloʼob tiʼ le baʼaxoʼob ku beetaʼal teʼ yóokʼol kaabaʼ (Juan 15:19). Ikil u adorarkoʼob yaanal diosoʼob yéetel u yoksikubaʼob ich políticaeʼ ku yeʼeskoʼobeʼ táakaʼanoʼob ichil le Nojoch Babilonia wa «le koʼolel chéen bey u máanoʼ» (Apo. 17:1). Letiʼobeʼ yaan u xuʼulsaʼaloʼob paʼteʼ yéetel u maasil religiónoʼob maʼatech u kaʼanskoʼob u jaajiloʼ.