1, 2. ¿Baʼax guerra jach naatsʼ yanil u kʼiinil u káajal? ¿Baʼax kʼáatchiʼiloʼob ken k-il u núukil? (Ilawil le dibujo yaan tu káajbal le xookaʼ).

DESDE úuchjeakileʼ yaʼab máakoʼob tsʼoʼok u kíimsaʼaloʼob teʼ guerraʼob tsʼoʼok u yantaloʼob way yóokʼol kaabaʼ. Chéen baʼaleʼ jach náatsʼ yanil u kʼiinil u káajal junpʼéel guerra maas nojoch tiʼ tuláakal le guerraʼob tsʼoʼok u yantaloʼ. Teʼ guerra jeʼelaʼ maʼ chéen wíinikoʼob kun baʼateloʼob tumen táan u kaxtik u yutsiloʼobiʼ, baʼaxeʼ letiʼe «baʼateʼel kun antal tu noj kʼiinil le Dios jach táaj yaan u poderoʼ» (Apo. 16:14). ¿Bix túun kun káajal le guerra wa le baʼatelaʼ? Yaan u káajal le kéen líikʼik juntúul u enemigo Dios utiaʼal u atacartik le luʼum jach yaabiltaʼan tumen Diosoʼ. Teʼ kʼiin jeʼeloʼ Kiʼichkelem Yuum Jéeobaeʼ yaan u meyajtiʼ u poder utiaʼal u taasik junpʼéel xuʼulsajil mix juntéen ilaʼak way yóokʼol kaabeʼ.

² ¿Máax le enemigooʼ? ¿Baʼax le luʼum ken u atacartoʼ? ¿Baʼax kʼiin ken u atacarte, baʼaxten yéetel bix ken u beetil? Tuláakal le máaxoʼob adorartik Jéeobaoʼ unaj u yojéeltikoʼob u núukil le kʼáatchiʼobaʼ tumen yaan baʼax u yil tu yéeteloʼob. Le profecía ku chíikpajal teʼ capítulo 38 yéetel 39 tiʼ u libroil Ezequieloʼ ku núukik le kʼáatchiʼobaʼ.

3. Tsol baʼax ku yaʼalik u profecíail Ezequiel yoʼolal Gog.

 ³ Xok Ezequiel 38:1, 2, 8, 18; 39:4, 11. Le profecíaoʼ ku yaʼalikeʼ «teʼ tu tsʼook jaʼaboʼoboʼ» le enemigo ku kʼaabaʼtik «Gog ku taal tiʼ u luʼumil Magog[oʼ]» yaan u atacartik «le luʼum» tuʼux yaan u kaajal Diosoʼ. Lelaʼ yaan u beetik u «sen pʼuʼujul» Jéeoba, le oʼolaleʼ yaan u líikʼil utiaʼal u xuʼulsik tiʼ Gog. * Le kéen tsʼoʼokok u xuʼulsaʼal tiʼ Gog yéetel le máaxoʼob yanoʼob tu yéeteloʼ yaan u tsʼaʼabaloʼob tiʼ «u jejeláasil chʼíichʼoʼob ku jaantikoʼob bakʼ» bey xan tiʼ «u tsʼíitsʼik baʼalcheʼiloʼob kʼáax». Kéen tsʼoʼokkeʼ Jéeobaeʼ yaan u «tsʼáaik junpʼéel lugar utiaʼal u muʼukul Gog». Utiaʼal k-naʼatik bix kun béeytal le profecíaaʼ, táanileʼ unaj k-ojéeltik máax Gog.

4. ¿Baʼax kʼuch u naʼat u kaajal Jéeoba yoʼolal Gog?

⁴ ¿Máax Gog? U libroil Ezequieleʼ ku yeʼesikeʼ Gogueʼ juntúul u enemigo le máaxoʼob adorartik Jéeobaoʼ. ¿Gogueʼ uláakʼ wa u kʼaabaʼ Satanás, le maas kʼasaʼan enemigo yaan tiʼ le máaxoʼob adorartik Jéeobaoʼ? U kaajal Jéeobaeʼ xáanchaj bey u tuklikoʼ. Chéen baʼaleʼ le ka tu maas xakʼalxoktoʼobeʼ tu maas naʼatoʼob le profecía tu yaʼalaj Ezequieloʼ. Le oʼolaleʼ tu revistail U Pʼíich Tulumil Kananeʼ tsoʼoleʼ Gogueʼ maʼ juntúul ángeliʼ baʼaxeʼ junmúuchʼ kaajoʼob kun baʼateloʼob tu contra le máaxoʼob adorartik Jéeobaoʼ. * Táanil tiʼ k-ilik baʼaxten bey k-aʼalikoʼ, koʼox ilik kaʼapʼéel baʼax ku yaʼalik Ezequiel ku yeʼesik Gogueʼ maʼ juntúul ángeliʼ.

5, 6. ¿Bix u yeʼesik u profecíail Ezequiel de ke Gogueʼ maʼ juntúul ángeliʼ?

⁵ «Yaan in kʼubkech utiaʼal a jaantaʼal tumen u jejeláasil chʼíichʼoʼob ku jaantikoʼob bakʼ» (Eze. 39:4). Teʼ Bibliaoʼ le kéen aʼalaʼak yaan u xuʼulsaʼal wa máaxeʼ suuk u yaʼalaʼal yaan u jaantaʼal u kimen wíinklil tumen chʼíichʼoʼob ku jaantikoʼob bakʼ. Letiʼe baʼax tu yaʼalaj Dios jeʼel u yúuchul tiʼ le israelitaʼoboʼ bey xan tiʼ uláakʼ kaajoʼob (Deu. 28:26; Jer. 7:33; Eze. 29:3, 5). Jeʼex k-ilkoʼ Dioseʼ tu yaʼalaj baʼax jeʼel u yúuchul tiʼ le wíinikoʼob yanoʼob way Luʼumoʼ. Leloʼ jach jaaj, tumen le chʼíichʼoʼob ku jaantikoʼob bakʼ yéetel u tsʼíitsʼik baʼalcheʼiloʼob kʼáaxeʼ maʼ tu páajtal u jaantikoʼob u wíinklil ángeloʼob. Le oʼolaleʼ úuchik u yaʼalik Ezequiel yaan u jaantaʼal u bakʼel Gogueʼ ku yeʼesikeʼ letiʼeʼ maʼ juntúul ángeliʼ.

⁶ «Yaan in tsʼáaik junpʼéel lugar utiaʼal u muʼukul Gog» (Eze. 39:11). Le Bibliaoʼ mix juntéen ku yaʼalik wa yaan u muʼukul le ángeloʼob jeʼex u muʼukul wíinikeʼ. Baʼax si ku yaʼalikeʼ yaan u kʼaʼalal mil años Satanás yéetel u kʼasaʼan ángeloʼob teʼ taamkach jooloʼ. Le kéen tsʼoʼokkeʼ yaan u píikchʼintaʼaloʼob ichil le kʼáaʼnáab de kʼáakʼ yéetel azufreoʼ, leloʼ u kʼáat u yaʼaleʼ yaan u xuʼulsaʼaloʼob utiaʼal mantatsʼ (Luc. 8:31; Apo. 20:1-3, 10). Le oʼolaleʼ úuchik u yaʼalik Ezequiel yaan u «muʼukul Gog» way Luʼumeʼ ku yeʼesikeʼ letiʼeʼ maʼ juntúul ángeliʼ.

7, 8. ¿Tiʼ baʼax chíikaʼan le bix kun xuʼulsbil «u reyil xaman» yéetel le bix kun xuʼulsbil Gogoʼ?

 ⁷ Wa Gog maʼ juntúul ángeleʼ, ¿máax túun le enemigo kun atacartik u kaajal Diosoʼ? Yáaxeʼ koʼox xakʼaltik kaʼapʼéel profecíaʼob jeʼel u yáantkoʼon k-il máax Gog ku taal tiʼ u luʼumil Magog.

⁸ «U reyil xaman» (xok Daniel 11:40-45). Profeta Danieleʼ tu yaʼalaj máakalmáak le nukuch gobiernoʼob kun antaloʼob way Luʼumeʼ. Tiʼ junpʼéel u profecía xaneʼ tʼaanaj tiʼ «u reyil noojol» yéetel tiʼ «u reyil xaman». Tiʼ le bukaʼaj años tsʼoʼok u máanoʼ ku bin u kʼexpajal máax u reyil noojol yéetel u reyil xaman, tsʼoʼoleʼ mantatsʼ tu baʼateloʼob utiaʼal u yilaʼal máax maas yaan u páajtalil. Danieleʼ tu yaʼaleʼ «teʼ tu tsʼook kʼiinoʼoboʼ» u reyil xamaneʼ «jach pʼujaʼan le kéen jóokʼok utiaʼal u kíimsik yéetel u xuʼulsik tiʼ yaʼab máakoʼob». Letiʼeʼ maases yaan u yilik u xuʼulsik tiʼ le máaxoʼob adorartik Jéeobaoʼ. * Chéen baʼaleʼ jeʼex kun úuchul tiʼ Gogueʼ, u reyil xamaneʼ yaan «u xuʼulsaʼaltiʼ» le kéen líikʼik tu contra u kaajal Jéeoba.

9. ¿Baʼaxten k-aʼalik chíikaʼan le bix kun xuʼulsbil Gog yéetel le bix kun xuʼulsbil «u reyiloʼob tuláakal yóokʼol kaab»?

⁹ «U reyiloʼob tuláakal yóokʼol kaab» (xok Apocalipsis 16:14, 16; 17:14; 19:19, 20). U libroil Apocalipsiseʼ ku yaʼalikeʼ «u reyiloʼob tuláakal yóokʼol kaab[eʼ]» yaan u atacarkoʼob Jesús, «u Rey le reyoʼoboʼ». Letiʼobeʼ maʼ tu páajtal u baʼateloʼob tu contra Jesús teʼ kaʼanoʼ, le oʼolal yaan u atacarkoʼob le máaxoʼob apoyartik u Reino way Luʼumeʼ. Bey túunoʼ u reyiloʼob yóokʼol kaabeʼ yaan u xuʼulsaʼaloʼob Armagedón. Lelaʼ chíikaʼan tiʼ baʼax kun úuchul tiʼ Gog tumen yaan xan u xuʼulsaʼaloʼob le kéen u atacartoʼob u kaajal Jéeoba. *

10. ¿Máax Gog ku taal tiʼ u luʼumil Magog?

¹⁰ Yoʼolal le baʼaxoʼob tsʼoʼok k-ilkoʼ, ¿máax túun Gog? Yáaxeʼ tsʼoʼok k-ilkeʼ Gogueʼ maʼ juntúul ángeliʼ. U kaʼapʼéeleʼ Gogueʼ ku chíikbesik junmúuchʼ kaajoʼob ken u atacartoʼob u kaajal Dios. Le kaajoʼobaʼ yaan u muchʼkubaʼob utiaʼal u múul meyajoʼob. ¿Baʼaxten? Tumen le máaxoʼob adorartik Jéeobaoʼ tiaʼanoʼob tiʼ tuláakal yóokʼol kaabeʼ, le oʼolal le kaajoʼobaʼ yaan u yantal u múul chʼaʼtuklikoʼob bix ken u atacartoʼob u kaajal Dios (Mat. 24:9). Chéen baʼaleʼ kʼaʼajaktoʼoneʼ Satanáseʼ letiʼe máax yaan tu paach tuláakal le baʼax kun úuchloʼ. Letiʼeʼ desde úuch ku péeksik le kaajoʼob utiaʼal u beetkoʼob u xuʼulul u adorartaʼal Jéeobaoʼ (1 Juan 5:19; Apo. 12:17). Le profecía tu yaʼalaj Ezequiel tu yoʼolal Gogueʼ maases ku yeʼesik le bix kun atacarbil u kaajal Jéeoba tumen u reyiloʼob yóokʼol kaaboʼ. *

11. ¿Baʼax ku yaʼalik u profecíail Ezequiel yoʼolal le luʼum ken u atacart Gogoʼ?

¹¹ Jeʼex t-ilil teʼ  xóotʼol óoxpʼéeloʼ, Gogueʼ yaan u atacartik «le luʼum» tuʼux yaan u kaajal Jéeobaoʼ, leloʼ yaan u beetik u sen pʼuʼujul. ¿Baʼax le luʼum ku yaʼalaʼaloʼ? Koʼox kaʼa ilik baʼax ku yaʼalik u profecíail Ezequiel (xok Ezequiel 38:8-12). Teʼeloʼ ku yaʼalikeʼ  Gogueʼ yaan u «atacartik u luʼum junpʼéel kaaj tsʼoʼok u salvartaʼal» yéetel tsʼoʼok u jóoʼsaʼal «tiʼ jejeláas luʼumoʼob». Le profecíaoʼ ku tʼaan xan tiʼ u kajnáaliloʼob le luʼumoʼ. Ku yaʼalikeʼ letiʼobeʼ «kajaʼanoʼob ich jeetsʼelil», «tiʼ kaajoʼob minaʼan u pakʼiloʼob tu baʼpach, minaʼan u trancailoʼob mix u joonajiloʼob» yéetel «táan u muchʼkíintikoʼob ayikʼalil». Jach bey le luʼum tuʼux kajaʼan le máaxoʼob adorartik Jéeobaoʼ. ¿Bix jeʼel k-ojéeltik baʼax ku chíikbesik le luʼumoʼ?

12. ¿Bix pʼáatik u luʼumil Israel le ka suunaj le israelitaʼoboʼ?

¹² Tuukulnakoʼon tiʼ le ka suunaj le israelitaʼob tu luʼumoʼoboʼ, le luʼumaʼ letiʼe tuʼux anchaj le kaaj yéeyaʼan tumen Diosoʼ, letiʼe tuʼux meyajnajoʼoboʼ yéetel teʼeloʼ xáanchaj táan u adorarkoʼob Jéeoba. Le ka xuʼul u adorartaʼal Jéeoba tumen le israelitaʼoboʼ letiʼeʼ tu yaʼalaj tiʼ Ezequieleʼ yaan u xuʼulsaʼal u luʼumoʼob yéetel mix baʼal kun pʼáatliʼ (Eze. 33:27-29). Jéeoba xaneʼ tu yaʼaleʼ junmúuchʼ judíoʼob bisaʼanoʼob Babiloniaeʼ yaan u kaʼa suutoʼob teʼ luʼumoʼ yéetel yaan u kaʼa adorarkoʼob. Úuchik u bendecirtaʼal u luʼumil Israel tumen Jéeobaeʼ pʼáat «bey u jardínil Edéneʼ» (Eze. 36:34-36). Lelaʼ káaj u béeytal tu añoil 537 t.t.J., le ka suunaj le judíoʼob Jerusalén utiaʼal u kaʼa adorarkoʼob Jéeobaoʼ.

13, 14. 1) ¿Baʼax le jatsʼuts luʼum wa paraísooʼ? 2) ¿Baʼaxten le luʼumaʼ jach koʼoj u tojol tu táan Jéeoba?

¹³ Teʼ kʼiinoʼobaʼ óoliʼ bey táan u yúuchul ichil u kaajal Jéeobaoʼ. Jeʼex t-ilil tu xookil 9 tiʼ le libroaʼ tu añoil 1919 jáalkʼabtaʼab u kaajal Dios tiʼ le Nojoch Babiloniaoʼ. Teʼ año jeʼeloʼ Jéeobaeʼ bey tu tsʼáaj u kaajal tiʼ junpʼéel jatsʼuts luʼum wa paraísoeʼ. Teʼ jatsʼuts  luʼumaʼ mantatsʼ yaantoʼon maʼalob kaʼansajiʼ, jeetsʼelil yéetel jejeláas baʼaxoʼob k-beetik utiaʼal k-adorartik Jéeobaiʼ. Tsʼoʼoleʼ mix baʼal beetik k-chiʼichnaktal tumen letiʼeʼ táan u kanáantkoʼon yéetel ku yáantkoʼon utiaʼal k-múul bisikba (Pro. 1:33). Jéeobaeʼ mantatsʼ táan xan u kaʼanskoʼon yéetel u kʼubéentmajtoʼon junpʼéel jatsʼuts meyaj: k-tsʼáaik ojéeltbil baʼax ken u beet u Reino. Toʼoneʼ táan k-ilik bix u béeytal le proverbioaʼ: «Le baʼaloʼob ku taal tiʼ Jéeobaoʼ ku ayikʼalkúuntik máak, lelaʼ maʼatech u taal paʼteʼ yéetel muʼyajil» (Pro. 10:22). Tuláakal le máaxoʼob meyajtik Jéeobaoʼ, kex jeʼel tuʼuxak kajaʼanoʼoneʼ, jeʼel u páajtal k-antal ichil le jatsʼuts luʼum ku keʼetel yéetel junpʼéel paraísooʼ. Le baʼaxoʼob k-aʼalik bey xan le baʼaxoʼob k-beetkoʼ unaj u yeʼeskoʼob táan k-adorartik Jéeoba.

¹⁴ «Le luʼum» tuʼux k-meyajtik Jéeobaoʼ jach koʼoj u tojol tu táan letiʼ. ¿Baʼaxten? Tumen le máaxoʼob kajaʼanoʼob teʼ luʼumoʼ Jéeoba natsʼoʼob tu yiknal utiaʼal ka u adorartoʼob chéen letiʼ (Ageo 2:7; Juan 6:44). Tsʼoʼoleʼ letiʼobeʼ ku yilik u yeʼeskoʼob le jatsʼuts modos ku taal tiʼ Diosoʼ (Efe. 4:23, 24; 5:1, 2). Ku adorarkoʼob chéen Jéeoba, ku yeʼeskoʼob u yaabiltmoʼob yéetel ku beetkoʼob le baʼaxoʼob ku yaʼalikoʼ (Rom. 12:1, 2; 1 Juan 5:3). Jéeobaeʼ jach ku kiʼimaktal u yóol kéen u yil bix u tsʼáaik u yóol máak utiaʼal u jatsʼutskíintik le paraíso tuʼux u tsʼaamoʼonoʼ. Kéen k-beet lelaʼ k-kiʼimakkúuntik xan u yóol Jéeoba (Pro. 27:11).

15, 16. ¿Baʼax kʼiin kéen u atacart Gog «le luʼum» tuʼux k-adorartik Diosoʼ?

¹⁵ Maʼ kun xáantaleʼ junmúuchʼ kaajoʼobeʼ yaan u atacarkoʼob le máaxoʼob adorartik Jéeobaoʼ. Lelaʼ jach tsʼoʼok u náatsʼal u kʼiinil, le oʼolal jach unaj k-ojéeltik baʼax kun úuchul. Koʼox ilik óoxpʼéel kʼáatchiʼob jach jeʼel u yáantkoʼoneʼ.

¹⁶ ¿Baʼax kʼiin ken u atacart Gog «le luʼum» tuʼux k-adorartik Diosoʼ? U profecíail Ezequieleʼ ku yaʼalikeʼ «teʼ tu tsʼook jaʼaboʼoboʼ» (Eze. 38:8). Lelaʼ ku yeʼesikeʼ yaan u yúuchul le maʼ yaʼab u bin utiaʼal u xuʼulsaʼal tiʼ le kʼasaʼan yóokʼol kaabaʼ. Kʼaʼajaktoʼoneʼ le nojoch muʼyajiloʼ yaan u káajal kéen xuʼulsaʼak tiʼ le Nojoch Babiloniaoʼ. Kéen tsʼoʼokok u xuʼulsaʼal le religiónoʼoboʼ, Gogueʼ yaan u atacartik u kaajal Dios lelaʼ yaan u yeʼesik jach nukaʼaj káajal le Armagedónoʼ.

17, 18. ¿Baʼax ken u beet Jéeoba utiaʼal u béeytal le baʼax u kʼáat jach teʼ kʼiin u yaʼalmoʼ?

¹⁷ ¿Baʼaxten yaan u atacartik Gog «le luʼum» tuʼux k-adorartik Diosoʼ? U profecíail Ezequieleʼ ku yaʼaliktoʼon baʼaxten. Yáaxeʼ tumen Jéeoba kun beetik u yúuchul, yéetel u kaʼapʼéeleʼ Gogueʼ deporsi taak u xuʼulsik u kaajal Dios.

¹⁸ Jéeoba kun beetik u yúuchul (xok Ezequiel 38:4, 16). Letiʼeʼ ku yaʼalik tiʼ Gog: «Yaan in lechik ganchoʼob ta kamaʼach» yéetel  «yaan in biskech tu contra in luʼum». ¿U kʼáat wa túun u yaʼaleʼ Jéeobaeʼ yaan u obligartik le kaajoʼob utiaʼal u atacarkoʼob le máaxoʼob adorarkoʼ? Maʼatech, Jéeobaeʼ mix bikʼin jeʼel u beetik u kʼasaʼanil tiʼ u kaajaleʼ (Job 34:12). Chéen baʼaleʼ u yojleʼ le kaajoʼobaʼ jach u pʼekmoʼob le máaxoʼob adorarkoʼ yéetel jach taak u xuʼulskoʼob u kaajal (1 Juan 3:13). Le oʼolaleʼ utiaʼal u béeytal le baʼax u kʼáat Jéeoba jach teʼ kʼiin u yaʼalmoʼ, letiʼeʼ bey yaan u lechik ganchoʼob tu kamaʼach Gog utiaʼal u péeksik u beet le baʼax u tukultmoʼ. Kéen tsʼoʼokok u xuʼulsaʼal tiʼ le Nojoch Babiloniaoʼ Jéeobaeʼ yaan u péeksik le kaajoʼob utiaʼal ka u beetoʼob le baʼax jach u tsʼíiboltmaj u beetkoʼoboʼ: u líikʼloʼob tu contra u kaajal utiaʼal u xuʼulskoʼob. Lelaʼ letiʼe baʼax u tukultmaj u beetik Jéeoba utiaʼal u káajal u baʼatelil le Armagedónoʼ. Teʼ kʼiin jeʼeloʼ letiʼeʼ yaan u salvartik u kaajal, yaan u yeʼesik bukaʼaj u poder yéetel yaan u beetik u kʼaj óoltaʼal tumen yaʼabkach kaajoʼob (Eze. 38:23).

19. ¿Baʼax kun taaktal u beetik le kaajoʼoboʼ yéetel baʼaxten?

¹⁹ Gogueʼ deporsi taak u xuʼulsik u kaajal Dios. Le kaajoʼoboʼ ‹yaan u chʼaʼtuklik u beetkoʼob junpʼéel baʼal jach kʼaas› tu contra u kaajal Dios. Letiʼobeʼ desde úuchjeakil jach u pʼekmoʼob u kaajal Jéeoba, le oʼolal le kéen u yiloʼob «minaʼan u pakʼiloʼob tu baʼpach,  minaʼan u trancailoʼob mix u joonajiloʼob[eʼ]» yaan u taaktal u xuʼulskoʼob. Le kaajoʼoboʼ jach u kʼáat u tokoʼob tiʼ u kaajal Dios le ayikʼalil táan u muchʼkíintikoʼ (Eze. 38:10-12). ¿Baʼax le «ayikʼalil» yaan tiʼ u kaajal Diosoʼ? Letiʼobeʼ yaantiʼob yaʼab baʼaloʼob ku keʼetel yéetel ayikʼaliloʼob, chéen baʼaleʼ le baʼax maas koʼoj u tojol yaantiʼoboʼ letiʼe u adorarkoʼob Jéeoba jeʼex uts tu tʼaaneʼ. Le kaajoʼoboʼ yaan u taaktal u tokikoʼob le ayikʼalil yaan tiʼ u kaajal Diosoʼ, chéen baʼaleʼ maʼ tumen taak u adorarkoʼobiʼ, baʼaxeʼ tumen jach u pʼekmoʼob Jéeoba yéetel u pʼekmoʼob le máaxoʼob adorarkoʼ.

20. ¿Bix ken u atacart Gog «le luʼum» wa le lugar ku keʼetel yéetel junpʼéel paraísooʼ?

²⁰ ¿Bix ken u atacart Gog «le luʼum» wa le lugar ku keʼetel yéetel junpʼéel paraísooʼ? Maʼ xaaneʼ le kaajoʼoboʼ yaan u kaxtik baʼax u beetoʼob utiaʼal ka xuʼuluk k-adorartik Jéeoba. Maʼ xan xaneʼ yaan u taaktal u beetkoʼob ka xuʼuluk k-kʼamik le kaʼansaj ku keʼetel yéetel janaloʼ, ka xuʼuluk k-muchʼikba, ka xuʼuluk k-bisikba yéetel ka xuʼuluk k-tsikbaltik u tʼaan Dios. Tuláakal le baʼaloʼobaʼ táakaʼanoʼob ichil le jatsʼuts luʼum tuʼux k-adorartik Jéeoba wa le jatsʼuts paraíso tuʼux yanoʼonoʼ. Satanáseʼ yaan u beetik u líikʼil le kaajoʼob utiaʼal ka u yil u xuʼulsik tiʼ le máaxoʼob adorartik Jéeobaoʼ.

21. ¿Bix jeʼel k-tsʼáaik u graciasil tiʼ Jéeoba ikil u yaʼaliktoʼon baʼax ku taal u kʼiin u yúuchleʼ?

²¹ Jeʼex k-ilkoʼ Gogueʼ yaan u atacartik tuláakal le máaxoʼob adorartik Jéeoba teʼ jatsʼuts luʼumoʼ. ¿Máasaʼ jach k-tsʼáaik gracias tiʼ Jéeoba ikil u yaʼaliktoʼon baʼax ku taal u kʼiin u yúuchul? Cada juntúul tiʼ toʼoneʼ unaj u yeʼesik ku tsʼáaik táanil ichil u kuxtal u adorartik Jéeoba, lelaʼ maases unaj k-beetik le maʼ káajak le nojoch muʼyajiloʼ. Wa k-beetkeʼ yaan k-áantaj utiaʼal ka maas jatsʼutschajak «le luʼum» wa le paraíso tuʼux k-adorartik Jéeobaoʼ. Jach k-tsʼíiboltik k-ilik ka kʼuchuk u kʼiinil u salvartik u kaajal yéetel u santificartik u kʼaabaʼ Jéeoba teʼ Armagedónoʼ. Teʼ tuláakʼ xookoʼ yaan k-ilik bix ken u beetil lelaʼ.