1, 2. Tsol baʼax ku beetik le x-prostituta ku yaʼalaʼal teʼ xóotʼol dosoʼ.

¿BIX a wuʼuyikaba ken a wil juntúul x-prostituta? ¿Baʼax beet u káajal u kuxtal beyoʼ? ¿Ku maltratartaʼal wa kaʼach tu yotoch wa yanchaj máax violart tu paalil? ¿Káaj wa u konkuba tumen jach óotsiloʼob? ¿Tu pʼataj wa u yíicham tumen jach ku jaʼajatsʼaʼal? U jaajileʼ tuláakal tuʼux ku yúuchul baʼaloʼob beyaʼ. Le oʼolal Jesúseʼ tu chʼaʼaj óotsilil tiʼ jujuntúul x-prostitutaʼob. Úuchik u beetik beyoʼ tu yeʼeseʼ le máaxoʼob ku arrepentiroʼob yéetel ku xuʼulul u beetkoʼob baʼaloʼob kʼaastakeʼ jeʼel u bintiʼob maʼalobil ichil u kuxtaloʼobeʼ (Mat. 21:28-32; Luc. 7:36-50).

² Chéen baʼaleʼ beoraeʼ tuukulnakoʼon tiʼ juntúul koʼolel ku beetik u x-prostitutail chéen tumen uts tu tʼaan u kuxtal beyoʼ. Letiʼeʼ maʼ kʼaas u yilik baʼax ku beetkiʼ, baʼaxeʼ ku beetik utiaʼal u yantal tiʼ taakʼin bey xan utiaʼal u controlartik le máakoʼoboʼ. Tsʼoʼoleʼ u maas kʼaasileʼ tsʼokaʼan u beel yéetel juntúul máak jach uts yéetel maʼ tu tusik u núup. ¿Bix a wuʼuyikaba kéen a wil juntúul koʼolel beyoʼ? ¿Máasaʼ jach kʼaas baʼax ku beetik? ¡Hasta mix máak ku  taaktal u chʼaʼik óotsilil tiʼ! Le bix a wuʼuyikaba yoʼolal le baʼax ku beetik le koʼolelaʼ, letiʼe baʼax xan ku yuʼubik Jéeoba yoʼolal le religiónoʼob maʼatech u kaʼanskoʼob u jaajiloʼ.

3. ¿Máax tiʼ kun úuchul tʼaan teʼ xookaʼ?

³ Tu libroil Ezequieleʼ (capítulo 16 yéetel 23) kaʼapʼéel tuʼux ku yúuchul tʼaan tiʼ le baʼax ku beetik juntúul x-prostitutaoʼ. Lelaʼ ku yeʼesik bix úuchik u pʼaʼatal Dios tumen u kaajil Israel yéetel Judá. Chéen baʼaleʼ táanil tiʼ k-tʼaan tiʼ letiʼobeʼ, yaan k-tʼaan tiʼ uláakʼ x-prostituta. Le koʼolelaʼ káaj u beetik u x-prostitutail antes tak tiʼ u síijil Ezequiel, tsʼoʼoleʼ tak teʼ kʼiinoʼobaʼ láayliʼ bey u kuxtaloʼ. U libroil Apocalipsiseʼ ku yeʼesiktoʼon máax le koʼolelaʼ.

4, 5. ¿Baʼax ku chíikbesik «le Nojoch Babiloniaoʼ», yéetel baʼaxten bey k-aʼalikoʼ? (Ilawil le dibujo yaan tu káajbal le xookaʼ).

⁴ Tu tsʼoʼokbal le yáax siglooʼ Jesúseʼ tu tsʼáaj u yil apóstol Juan juntúul «koʼolel chéen bey u máanoʼ», letiʼeʼ «u maama le koʼoleloʼob chéen bey u máanoʼoboʼ» (Apo. 17:1, 5). Desde úuchjeakileʼ u nuuktakil le religiónoʼob yéetel le máaxoʼob xokik u tʼaaniloʼob le Bibliaoʼ maʼ u yojloʼob jach máax ku chíikbesik le koʼolelaʼ. Ku yaʼalikoʼobeʼ maʼ xaaneʼ ku chíikbesik Babilonia, Roma, le Iglesia Católicaoʼ wa uláakʼ baʼal. Chéen baʼaleʼ u testigoʼob Jéeobaeʼ desde úuch u yaʼaloʼob máax «le koʼolel chéen bey u máanoʼ». Le koʼolelaʼ ku chíikbesik tuláakal le religiónoʼob maʼatech u kaʼanskoʼob u jaajiloʼ. ¿Baʼaxten bey k-aʼalikoʼ?

⁵ Le koʼolelaʼ yaan u castigartaʼal tumen yanchaj baʼal u yil «yéetel u reyiloʼob yóokʼol kaab» wa le gobiernoʼoboʼ. Lelaʼ ku yeʼesikeʼ le koʼolelaʼ maʼ u gobiernoiloʼob yóokʼol kaabiʼ. Tsʼoʼoleʼ u libroil Apocalipsiseʼ ku yaʼalikeʼ «u comercianteiloʼob yóokʼol kaabeʼ» yaan u yokʼoloʼob yéetel yaan u yaatal u yóoloʼob kéen xuʼulsaʼak tiʼ le Nojoch Babiloniaoʼ. Lelaʼ ku yeʼesikeʼ le koʼolelaʼ maʼ tu chíikbesik le máaxoʼob controlartik u taakʼinil le yóokʼol kaabaʼ. ¿Baʼax túun ku chíikbesik? Le koʼolelaʼ ku adorartik yaanal diosoʼob, ku tuus yéetel ku «beetik u j-meenil». ¿Máasaʼ jach letiʼe baʼaxoʼob ku beetik le religiónoʼob maʼatech u kaʼanskoʼob u jaajiloʼ? Le Bibliaoʼ ku yaʼalikeʼ le koʼolelaʼ kulukbal yóokʼol juntúul chak tsʼíitsʼik baʼalcheʼ, lelaʼ ku yeʼesikeʼ yaan u páajtalil yóokʼol le gobiernoʼoboʼ. Tsʼoʼoleʼ letiʼ beetik xan u kíimsaʼal le máaxoʼob adorartik Jéeobaoʼ (Apo. 17:2, 3; 18:11, 23, 24). Tuláakal le baʼaloʼobaʼ letiʼe baʼaxoʼob ku beetik le religiónoʼob maʼatech u kaʼanskoʼob u jaajiloʼ.

6. ¿Baʼaxten k-aʼalik le Nojoch Babiloniaoʼ «u maama le koʼoleloʼob chéen bey u máanoʼoboʼ»?

⁶ Chéen baʼaleʼ tiʼ le Nojoch Babiloniaoʼ maʼ chéen ku yaʼalaʼaltiʼ «le koʼolel chéen bey u máanoʼ», baʼaxeʼ ku yaʼalaʼaltiʼ «u maama le koʼoleloʼob chéen bey u máanoʼoboʼ». ¿Baʼaxten? Tumen jach yaʼab religiónoʼob yaan ichil. Le ka tu xaʼakʼbesaj Jéeoba u tʼaan le máakoʼob Babel wa Babiloniaoʼ, tuláakal le máakoʼoboʼ kʼiʼitpajoʼob yéetel seguernaj u adorarkoʼob yaanal diosoʼob teʼ tuʼuxoʼob binoʼob  kajtaloʼ. Bey úuchik u yantal yaʼab religiónoʼoboʼ. Tuláakal le religiónoʼobaʼ táakaʼanoʼob ichil «le Nojoch Babiloniaoʼ» (Gén. 11:1-9). Letiʼobeʼ u hijaʼob le Nojoch Babiloniaoʼ, le koʼolel chéen bey u máanoʼ. Tiʼ Satanáseʼ ku meyaj le religiónoʼob utiaʼal u beetik u táakpajal máak tiʼ espiritismo, u adorartaʼal yaanal diosoʼob bey xan utiaʼal u kaʼansaʼal baʼaloʼob maʼ jaajtak yoʼolal Jéeobaiʼ. Le oʼolal le Bibliaoʼ ku yaʼalik tiʼ le máaxoʼob meyajtik Diosoʼ: «Jóokʼeneʼex tiʼ le kaajaʼ utiaʼal maʼ a táakpajleʼex tiʼ u kʼebanoʼob» (xok Apocalipsis 18:4, 5).

7. ¿Baʼaxten unaj k-jóokʼol tiʼ le Nojoch Babiloniaoʼ?

⁷ Kux teech, ¿tsʼoʼok wa a jóokʼol tiʼ le Nojoch Babiloniaoʼ? Kʼaʼajaktecheʼ le máakoʼoboʼ ku yilik u yantal u religiónoʼob tumen desde ka beetaʼab wíinikeʼ beetaʼab utiaʼal «u nuʼuktaʼaloʼob tumen Dios» (Mat. 5:3). Chéen baʼaleʼ utiaʼal ka u nuʼuktoʼon Jéeobaeʼ kʼaʼabéet k-adorartik jeʼex uts tu tʼaaneʼ. Le oʼolaleʼ kʼaʼabéet k-náachtal tiʼ tuláakal le kaʼansajoʼob ku taal tiʼ le Nojoch Babiloniaoʼ. Satanáseʼ táan u kaxtik baʼax u beet utiaʼal ka táakpajkoʼon tiʼ le baʼaloʼob kʼaastak ku beetkoʼ. Lelaʼ bey xan tu beetil yéetel le máaxoʼob adorart Dios úuchjeakiloʼ. Le oʼolal tu kʼiiniloʼob Ezequieleʼ tsʼokaʼaniliʼ u jach kʼastal le bix u adoraroʼoboʼ. Wa k-tuukul tiʼ le baʼax úuchoʼ yaan k-kanik bix u kʼáat Jéeoba ka adorartaʼak, bix u yeʼesik u justicia yéetel bix u chʼaʼik óotsilil.

8-10. 1) ¿Baʼax eʼesik Jéeobaeʼ u kʼáat ka adorartaʼak chéen letiʼ? 2) Tʼaanen tiʼ junpʼéel baʼal jeʼel u maas yáantkoʼon k-naʼat lelaʼ.

⁸ Tu libroil Ezequieleʼ Jéeobaeʼ tu ketaj u kaajal yéetel juntúul x-prostituta. Ezequieleʼ tu yaʼalaj bix tu yuʼubiluba Jéeoba úuchik u traicionartaʼal tumen le máaxoʼob adorarkoʼ. ¿Baʼaxten Jéeobaeʼ tu ketaj u kaajal yéetel juntúul x-prostituta?

⁹ Táanil tiʼ k-núukik lelaʼ, koʼox kʼaʼajsik junpʼéel baʼax t-kanaj teʼ xook 5. Teʼeloʼ t-kaneʼ Jéeobaeʼ u kʼáat ka adorartaʼak chéen letiʼ. Le oʼolal teʼ Ley tu tsʼáaj tiʼ le israelitaʼoboʼ tu yaʼalaj: «Maʼ unaj u yantaltech uláakʼ diosoʼobiʼ», wa jeʼex u yaʼalik le notaoʼ «maʼ a tsʼáaikaba tin contra». Tsʼoʼoleʼ tu yaʼalaj xan: «Teneʼ Jéeoba a Diosen, in kʼáat ka adorartaʼaken chéen teen» (Éxo. 20:3, 5). Ka máan kʼiineʼ tu kaʼa aʼalajtiʼob: «Maʼ unaj a chintaleʼex tu táan uláakʼ diosiʼ tumen Jéeobaeʼ juntúul Dios ku kʼáatik ka adorartaʼak chéen letiʼ. Jach beyoʼ, letiʼeʼ ku kʼáatik ka adorartaʼak chéen letiʼ» (Éxo. 34:14). Jeʼex túun k-ilkoʼ utiaʼal u kʼaʼamal k-adoracióneʼ jach chéen Jéeoba unaj k-adorartik.

¹⁰ Utiaʼal k-maas naʼatik lelaʼ maʼalob ka tuukulnakoʼon tiʼ juntúul xiib yéetel u yatan. Tu kaʼatúulaloʼobeʼ ku páaʼtkoʼob ka u yaabiltubaʼob yéetel maʼ u tuʼusloʼob yéetel yaanal. Chéen baʼaleʼ wa juntúul tiʼ letiʼob ku káajal u yutstal tu yich yaanal máak yéetel  ku tsʼíiboltik u yantal baʼax u yil tu yéeteleʼ, u núupeʼ yaan u celosotal yéetel yaan u jach yaatal u yóol (xok Hebreos 13:4). Jéeobaeʼ bey xan u yuʼubikuba kéen traicionartaʼak tumen le máaxoʼob adorarkoʼ, maases wa ku joʼopʼol u adorarkoʼob yaanal diosoʼob. Le baʼaxoʼob ku yaʼalik u capítuloil 16 tiʼ u libroil Ezequieleʼ ku yeʼesik bix u yuʼubikuba Jéeoba kéen úuchuk leloʼ.

11. ¿Bix úuchik u yantal u kaajil Jerusalén?

¹¹ U capítuloil 16 tiʼ u libroil Ezequieleʼ ku tʼaan tiʼ junpʼéel tiʼ le profecíaʼob maas chowaktak u yaʼalmaj Jéeoba teʼ libroaʼ. Lelaʼ junpʼéel xan tiʼ le profecíaʼob maas chowaktak yaan ichil le Tsʼíiboʼob ich Hebreooʼ. Kex Jéeoba ku chʼaʼchiʼitik Jerusaléneʼ u jaajileʼ táan u tʼaan tiʼ tuláakal u kaajil Judá. Teʼeloʼ ku yaʼalik bix úuchik u yantal le kaajaʼ yéetel bix úuchik u traicionartik Jéeoba. Ku yaʼalikeʼ Judáeʼ bey juntúul chaambal táant u síijil ka xúumpʼattaʼabeʼ. U taataʼobeʼ letiʼe cananeoʼob ku adorarkoʼob yaanal diosoʼoboʼ. Jerusaléneʼ xáanchaj tiaʼan yáanal u páajtalil le jebuseoʼoboʼ, junpʼéel u tribuiloʼob Canaán, lelaʼ bey úuchik tak ka chʼaʼab tumen Davidoʼ. Jéeobaeʼ tu chʼaʼaj óotsilil tiʼ le chaambaloʼ, tu limpiokíintaj yéetel tu kanáantaj. Le ka nojochchajeʼ tsʼoʼok u beel tu yéetel. U jaajileʼ le israelitaʼob kajlajoʼob Jerusalénoʼ tsʼokaʼaniliʼ u beetkoʼob junpʼéel pacto tu kʼiiniloʼob Moiséseʼ (Éxo. 24:7, 8). Le ka tsʼoʼok u yéeyik Jéeoba u kaajil Jerusaléneʼ tu bendecirtaj, tu ayikʼalkúuntaj yéetel tu jatsʼutskíintaj. Tu beetaj jeʼex u beetik juntúul íichamtsil ayikʼal jach u yaabiltmaj u yataneʼ (Eze. 16:1-14).

12. ¿Bix káajik u adorartaʼal uláakʼ diosoʼob Jerusalén?

¹² Chéen baʼaleʼ koʼox ilik baʼax úuchi. Jéeobaeʼ tu yaʼalaj: «Joʼopʼ a creerkaba tu yoʼolal a kiʼichpanil, yéetel tumen yaʼab máakoʼob kʼaj óoltmilecheʼ joʼopʼ a kuxtal jeʼex juntúul koʼolel chéen bey u máanoʼ. Techeʼ ku yantal baʼal a wil yéetel le máaxoʼob ku máanoʼob teʼ tuʼux yanechoʼ, techeʼ ka kʼubikaba tiʼ letiʼob» (Eze. 16:15). Tu kʼiiniloʼob Salomóneʼ Jéeobaeʼ jach tu bendecirtaj u kaajal, le oʼolal Jerusaléneʼ sen ayikʼalchaji yéetel kʼaj óoltaʼab tuláakal tuʼux (1 Rey. 10:23, 27). Chéen baʼaleʼ jujunpʼíitileʼ káaj u adorartaʼal yaanal diosoʼob ichil le kaajoʼ yéetel tu tsʼookeʼ tu xúumpʼattoʼob Jéeoba. Lelaʼ káaj le ka tsʼoʼok u beel Salomón yéetel yaʼab koʼoleloʼob táanxel luʼumiloʼob, utiaʼal túun u kiʼimakkúuntik u yóoloʼobeʼ káaj u adorartik yaanal diosoʼob (1 Rey. 11:1-8). Tu tsʼookeʼ yanchaj uláakʼ reyoʼob tu beetoʼob uláakʼ baʼaloʼob maas kʼaastak, ka tu beetoʼob u maas kʼastal le kaajoʼ. ¿Baʼax wal tu tuklaj Jéeoba úuchik u traicionartaʼal yéetel uláakʼ diosoʼobeʼ? Letiʼeʼ tu yaʼalaj: «Le baʼaloʼob beyaʼ maʼ unaj u yúuchul kaʼachiʼ, junpuliʼ maʼ unaj u yúuchliʼ» (Eze. 16:16). Chéen baʼaleʼ le kaajaʼ maʼ tu yuʼubaj tʼaaniʼ, ka maas kʼaschaj baʼax ku beetik.

13. ¿Baʼaxoʼob sen kʼaastak beetaʼab Jerusalén?

 ¹³ Chéen tukult bix yaachajik u yóol Jéeoba yéetel bix tu pʼektil le baʼax beetaʼab Jerusalénoʼ. Letiʼeʼ tu yaʼalaj: «Techeʼ maʼ chéen kuxlajech jeʼex juntúul koʼolel chéen bey u máanoʼ, baʼaxeʼ ta chʼaʼaj le in hijoʼob yéetel le in hijaʼob ta síijsoʼ ka ta kʼuboʼob tiʼ le imagenoʼoboʼ. Ta kíimsaj in paalaloʼobeʼ ka ta tóokoʼob utiaʼal a kʼuboʼob bey junpʼéel ofrendaeʼ» (Eze. 16:20, 21). Le baʼaloʼob sen kʼaastak tu beetaj u kaajal Jéeobaoʼ ku yeʼesik bukaʼaj kʼasaʼanil Satanás. Letiʼeʼ jach ku kiʼimaktal u yóol kéen u yil u beetaʼal baʼaloʼob kʼaastak tumen le máaxoʼob adorartik Diosoʼ. Chéen baʼaleʼ Jéeobaeʼ ku yilik tuláakal baʼax ku yúuchul, tsʼoʼoleʼ yaan u páajtalil tiʼ utiaʼal u yutskíintik tuláakal le baʼaxoʼob tsʼoʼok u kʼaskúuntik Satanásoʼ (xok Job 34:24).

14. ¿Bix u kʼaabaʼ u kiikoʼob Jerusalén? ¿Máax tiʼ le óoxtúul kiikoʼob tu beetaj baʼaloʼob maas kʼaastakoʼ?

¹⁴ Jerusaléneʼ maʼ yaachaj u yóol yoʼolal le baʼaloʼob kʼaastak ku beetkoʼ, baʼaxeʼ seguernaj u prostituirkuba. Jéeobaeʼ tu yaʼaleʼ maas jach kʼaas baʼax ku beetik tumen ‹tu lugar u boʼotaʼaleʼ›, letiʼ ku boʼol (Eze. 16:34). Jéeobaeʼ tu yaʼaleʼ Jerusaléneʼ ku beetik le baʼax tu beetaj u «maama[oʼ]» wa le cananeoʼob yanoʼob kaʼach teʼ luʼumoʼ (Eze. 16:44, 45). Jéeoba xaneʼ tu yaʼaleʼ Jerusaléneʼ yaan juntúul u kiik ku kʼaabaʼtik Samaria, letiʼeʼ maas úuch káajak u prostituirkuba. Tsʼoʼoleʼ tʼaanaj xan tiʼ uláakʼ juntúul u kiik ku kʼaabaʼtik Sodoma, le kaajaʼ xuʼulsaʼab tumen Dios yoʼolal le baʼaloʼob kʼaastak ku beetkoʼ yéetel tumen jach nojbaʼal u taaskuba kaʼachi. Yéetel le baʼax tu yaʼaloʼ, Jéeobaeʼ tu yeʼeseʼ le baʼax tu beetaj Jerusalénoʼ maas kʼaas tiʼ le baʼax tu beetaj Samaria yéetel Sodomaoʼ (Eze. 16:46-50). Chéen baʼaleʼ le kaajoʼ seguernaj u beetik le baʼaloʼob suʼtsiltak ku beetkoʼ.

15. ¿Baʼaxten castigartaʼab u kaajil Jerusalén tumen Jéeoba? ¿Yéetel baʼax kun úuchul ken máanak kʼiin?

¹⁵ ¿Baʼax túun tu beetaj Jéeoba? Letiʼeʼ tu yaʼalaj tiʼ u kaajal: «Yaan in muchʼik tuláakal le máaxoʼob ta kiʼimakkúuntaj u yóoloʼob le ka yanchaj baʼal a wil tu yéeteloʼoboʼ» yéetel «yaan in kʼubkech» tu kʼaboʼob. Tu yaʼalaj xan tiʼ: «Yaan u kíimskechoʼob yéetel espada yéetel yaan u muruxtuntikechoʼob». Jeʼex túun k-ilkoʼ le máaxoʼob tu kiʼimakkúuntaj u yóoloʼoboʼ letiʼob kun xuʼulsik yéetel letiʼob kun luʼsik tuláakal le baʼaxoʼob yaantiʼoboʼ. ¿Baʼaxten castigartaʼab u kaajil Jerusalén tumen Jéeoba? Letiʼeʼ maʼ tu beetaj utiaʼal u xuʼulsiktiʼiʼ, baʼaxeʼ tu castigartaj utiaʼal ‹u xuʼulul u beetik u x-prostitutail›. Le oʼolal tu yaʼalaj xan: «Le kéen tsʼoʼokkeʼ yaan u xuʼulul in pʼujaʼanil ta contra yéetel yaan u xuʼulul in kʼuuxil ta wéetel, yaan u jéetsʼel in wóol yéetel yaan u xuʼulul in tsʼíikil». Jeʼex tu yaʼalil le xook 9 yaan teʼ libroaʼ, Jéeobaeʼ yaan u chaʼik u bisaʼal u kaajal tu luʼumil Babilonia. Tsʼoʼoleʼ kéen máanak kʼiineʼ yaan u beetik u suutoʼob Jerusalén utiaʼal u adorartaʼal chéen letiʼ. ¿Baʼaxten bey ken u beetiloʼ? Letiʼeʼ tu yaʼalaj: «Teneʼ  maʼ ken in tuʼubs le pacto tin beetaj ta wéetel ta x-lóoʼbayaniloʼ» (Eze. 16:37-42, 60). Jéeobaeʼ yaan u yeʼesik maʼ bey jeʼex u kaajaleʼ, letiʼeʼ chúukaʼan u yóol tiʼ baʼax u yaʼalmaj (xok Apocalipsis 15:4).

16, 17. 1) ¿Baʼaxten k-aʼalik Oholá yéetel Oholibáeʼ maʼ tu chíikbeskoʼob le religiónoʼob ku tsaypachtikoʼob Cristooʼ? (Ilawil le cuadro «Kaʼatúul x-prostitutaʼob»). 2) ¿Baʼax ku kaʼansiktoʼon le capítulo 16 yéetel 23 tiʼ u libroil Ezequieloʼ?

¹⁶ Le baʼax tu yaʼalaj Jéeoba tu capítuloil 16 yéetel 23 tiʼ u libroil Ezequieloʼ ku kaʼansiktoʼon bix u kʼáat ka k-adorarte, bix u yeʼesik u justicia yéetel bix u chʼaʼik óotsilil. Le oʼolal jach k-ilik maʼ k-beetik le baʼaxoʼob kʼaastak tu beetaj u kaajal úuchjeakiloʼ. ¡Junpuliʼ maʼ k-kʼáat k-beet u yaatal u yóol Jéeoba jeʼex tu beetil Judá yéetel Jerusalénoʼ! Utiaʼal leloʼ unaj k-náachtal tiʼ tuláakal baʼax yaan yil yéetel u adorartaʼal yaanal diosoʼob, ichil lelaʼ táakaʼan u tsʼíiboltaʼal baʼaloʼob utiaʼal yaanal máak bey xan u bin máak tu paach ayikʼalil (Mat. 6:24; Col. 3:5). Toʼoneʼ kiʼimak k-óol tumen teʼ tu tsʼook kʼiinoʼobaʼ Jéeobaeʼ tsʼoʼok u beetik u kaʼa adorartaʼal chéen letiʼ yéetel maʼ ken u chaʼa u kʼaskúuntaʼal le adoración ku tsʼaʼabaltiʼoʼ. Letiʼeʼ tsʼoʼok u beetik «junpʼéel pacto [...] utiaʼal mantatsʼ» yéetel le máaxoʼob yéeyaʼanoʼob utiaʼal u binoʼob kaʼanoʼ, letiʼobeʼ mix bikʼin ken u xúumpʼattoʼob Jéeoba (Eze. 16:60). Le oʼolaleʼ maʼ u tuʼubultech baʼax u beetmaj Jéeoba utiaʼal ka yanakech ichil u kaajal: junpʼéel kaaj limpio.

¹⁷ Beora tsʼoʼok k-xakʼaltik baʼax tu yaʼalaj Jéeoba tu contra le x-prostitutaʼob ku yaʼalaʼal tu libroil Ezequieloʼ, koʼox ilik baʼax ku kaʼansiktoʼon yoʼolal «le koʼolel chéen bey u máanoʼ» wa le Nojoch Babiloniaoʼ.

18, 19. ¿Tiʼ baʼax chíikaʼan le x-prostitutaʼob ku yaʼalaʼal tu libroil Ezequiel yéetel tu libroil Apocalipsisoʼ?

¹⁸ Jéeobaeʼ maʼatech u kʼexpajal (Sant. 1:17). Letiʼeʼ desde tu káajbaleʼ u pʼekmaj le religiónoʼob maʼatech u kaʼanskoʼob u jaajiloʼ. Le oʼolal le baʼaxoʼob tu yaʼalaj tu contra le x-prostitutaʼob tu libroil Ezequieloʼ chíikaʼan tiʼ le baʼax ku yaʼalik tu contra «le koʼolel chéen bey u máan» ku yaʼalaʼal tu libroil Apocalipsisoʼ.

¹⁹ ¿Tiʼ baʼax chíikaʼanoʼob? Jéeobaeʼ tu castigartaj u kaajal le ka tu chaʼaj u xuʼulsaʼaltiʼ tumen le kaajoʼob yaabiltmil kaʼachoʼ. Le religiónoʼob yanoʼob teʼ kʼiinoʼobaʼ yaan xan u castigartaʼaloʼob tumen tsʼoʼok u yantal baʼal u yiloʼob yéetel «u reyiloʼob yóokʼol kaab». ¿Máax túun kun castigarkoʼob? Le Bibliaoʼ ku yaʼalikeʼ le gobiernoʼoboʼ «yaan u pʼektikoʼob le koʼolel chéen bey u máanoʼ. Tsʼoʼoleʼ yaan u tokikoʼob tuláakal baʼax yaantiʼ, yaan u pʼatkoʼob x-maʼ nookʼil, yaan u jaantikoʼob u bakʼel yéetel yaan u xuʼulskoʼob yéetel kʼáakʼ». ¿Baʼaxten yaan u jáan kʼexpajal bix u tuukuloʼob? Tumen Jéeobaeʼ yaan u tsʼáaik «ichil u puksiʼikʼaloʼob ka u tsʼoʼokbesoʼob le baʼax u tukultmoʼ» (Apo. 17:1-3, 15-17).

20. ¿Baʼax eʼesik jach tu jaajil yaan u xuʼulsaʼal le Nojoch Babiloniaoʼ?

 ²⁰ Bey túunoʼ Jéeobaeʼ yaan u meyajtiʼ le gobiernoʼob utiaʼal u xuʼulsik tuláakal le religiónoʼob maʼatech u kaʼanskoʼob u jaajiloʼ, tak le táakaʼanoʼob ichil le cristiandadoʼ. Yaan u xuʼulsaʼal le Nojoch Babiloniaoʼ. U libroil Apocalipsiseʼ ku yaʼalikeʼ «mix bikʼin kun kaʼa ilbil» (Apo. 18:21). Tak le ángeloʼoboʼ yaan u kiʼimaktal u yóoloʼob kéen xuʼulsaʼak, le oʼolal yaan u yaʼalikoʼob: «¡Alabarteʼex Jéeoba! U buutsʼil le kaajaʼ yaan u naʼakal utiaʼal kʼiinoʼob minaʼan u xuul» (Apo. 19:3). Kéen úuchuk lelaʼ maʼ tun kaʼa antal mix junpʼéel religión ka u kʼaskúunt le adoración ku tsʼaʼabal tiʼ Jéeobaoʼ. ‹U buutsʼil le kaaj ku naʼakal utiaʼal kʼiinoʼob minaʼan u xuuloʼ› ku yeʼesikeʼ mix bikʼin kun kaʼa líikʼil le kaajaʼ.

21. ¿Baʼax kun káajal le kéen xuʼulsaʼak le Nojoch Babiloniaoʼ? ¿Bix kun tsʼoʼokol leloʼ?

²¹ Kéen xuʼulsaʼak le Nojoch Babilonia tumen le gobiernoʼoboʼ u jaajileʼ táan u tsʼoʼokbeskoʼob junpʼéel baʼax u yaʼalmaj Jéeoba. Le baʼax kun úuchlaʼ yaan u yáantaj utiaʼal u béeytal le baʼax u tukultmoʼ. Teʼ kʼiinoʼob jeʼeloʼ yaan u káajal le nojoch muʼyajiloʼ, lelaʼ mix  juntéen ilaʼak desde ka káaj yóokʼol kaab (Mat. 24:21). Le nojoch muʼyajiloʼ yaan u tsʼoʼokol Armagedón, u baʼateʼel le Dios jach táaj yaan u poder tu contra le kʼasaʼan yóokʼol kaabaʼ (Apo. 16:14, 16). Teʼ xookoʼob ku segueroʼ yaan k-ilik baʼaxoʼob tu yaʼalaj Ezequiel kun úuchul teʼ kʼiinoʼoboʼ. Chéen baʼaleʼ táanileʼ yaan k-ilik baʼaxoʼob ku kaʼansiktoʼon le capítulo 16 yéetel 23 tiʼ u libroil Ezequieloʼ.

22, 23. Le baʼax ku yaʼalik Ezequiel yéetel Apocalipsis yoʼolal le x-prostitutaʼoboʼ, ¿bix u yáantkoʼon utiaʼal k-adorart chéen Jéeoba?

²² Satanáseʼ jach uts tu tʼaan u kʼaskúuntik le máaxoʼob adorartik Jéeobaoʼ. Letiʼeʼ jach taak u náachkuntkoʼon tiʼ Jéeoba utiaʼal ka k-beet jeʼex le kaʼatúul x-prostitutaʼob ku yaʼalik u libroil Ezequieloʼ. Le oʼolaleʼ mantatsʼ unaj k-kʼaʼajsikeʼ Jéeobaeʼ u pʼeek u traicionartaʼal yéetel u adorartaʼal yaanal diosoʼob (Núm. 25:11). Unaj k-ilik xan maʼ ‹k-machik mix junpʼéel baʼal maʼ limpio yanil› tu táan Jéeobaiʼ (Isa. 52:11). Ichil lelaʼ táakaʼan maʼ u yoksikuba máak tiʼ política mix tiʼ uláakʼ baʼaloʼob ku beetik le máakoʼob utiaʼal u tsʼáaikubaʼob tu contra le gobiernoʼoboʼ (Juan 15:19). Tsʼoʼoleʼ maʼatech k-tuklik wa maas maʼalob le luʼum tuʼux kajaʼanoʼon tiʼ uláakʼ luʼumoʼoboʼ tumen k-ojleʼ lelaʼ uláakʼ baʼax ku meyaj tiʼ Satanás.

²³ Maʼ unaj k-tuʼubsikeʼ minaʼan uláakʼ baʼax maas jatsʼuts jeʼex k-adorartik Jéeoba tu kiʼichkelem templooʼ. Le oʼolaleʼ cada juntúul tiʼ toʼoneʼ unaj u chʼaʼtuklik maʼ u yantal mix baʼal u yil yéetel le baʼaloʼob kʼaastak ku beetik le religiónoʼob maʼatech u kaʼanskoʼob u jaajiloʼ.