1-3. 1) Tsol baʼax ku yilik yéetel ku yuʼubik Ezequiel. (Ilawil le dibujo yaan tu káajbal le xookaʼ). 2) ¿Baʼax beet u yilik Ezequiel junpʼéel baʼal mix juntéen ilaʼak, yéetel bix tu yuʼubiluba?

EZEQUIELEʼ waʼalakbal, táan kaʼach u paakat tu tojil le desiertooʼ tumen bey yaan baʼax ku yilkeʼ, hasta u pʼichmaj u yich utiaʼal u yilik baʼaxiʼ. Letiʼ túuneʼ tu yileʼ teʼ náachiloʼ táan u taal junpʼéel kʼaʼamkach iikʼ, chéen baʼaleʼ maʼ bey jeʼex le suuk u yilik kaʼachoʼ. Le kʼaʼamkach iikʼ ku taal desde teʼ xamanoʼ ku wiltik u nookʼ yéetel u tsoʼotsel u pool. Letiʼ túuneʼ ku yilik junwóol múuyal yéetel junpʼéel kʼáakʼ ku jóopbal ichil, le múuyaloʼ ku léetsʼbal jeʼex u léetsʼbal le sak orooʼ. * Jeʼex u bin u maas náatsʼal le múuyal tu yiknal Ezequieloʼ bey u bin u maas kʼaʼamtal u yuʼubik junpʼéel ruido. Le ruidoaʼ bey jeʼex le ku yuʼubaʼal kéen xíimbalnak u soldadoiloʼob junpʼéel nuxiʼ ejércitoeʼ (Eze. 1:4, 24).

² Teʼ kʼiinoʼoboʼ 30 años yaan tiʼ Ezequiel, lelaʼ letiʼe yáax junpʼéel tiʼ le yaʼabkach baʼaloʼob kun úuchul ichil u kuxtaloʼ. Beoraaʼ ku yuʼubik tiaʼan «u poder Jéeoba» tu yóokʼoleʼ. Le poderaʼ yaan u beetik u yilik yéetel u yuʼubik junpʼéel baʼal jach mix juntéen ilaʼak, hasta yaan u yuʼubik bey jach tu jaajil táan u yúuchul le  baʼax ken u yiloʼ, hasta maas kʼaʼam tiʼ le efectos ku tsʼaʼabal teʼ películaʼoboʼ. Le baʼax ken u yilaʼ yaan u beetik u péek u yóol, le oʼolal yaan tak u xoltal yéetel u chintal luʼum (Eze. 1:3, 28).

³ Chéen baʼaleʼ Jéeobaeʼ maʼ chéen u kʼáat u beet u jaʼakʼal u yóol Ezequieliʼ. Le yáax baʼax tsʼaʼab u yiloʼ, bey xan le uláakʼoʼob ku chíikpajal teʼ libroaʼ, yaan baʼaxoʼob tu kaʼansajtiʼ yéetel yaan xan baʼaxoʼob ku kaʼansiktoʼon teʼ kʼiinoʼobaʼ. Le oʼolaleʼ koʼox xakʼaltik le baʼax tu yilaj yéetel tu yuʼubaj Ezequieloʼ.

4, 5. Tsol baʼaxoʼob táan kaʼach u yúuchul tu kʼiiniloʼob Ezequiel.

⁴ Xok Ezequiel 1:1-3. Táanileʼ koʼox ilik baʼax táan kaʼach u yúuchul tu kʼiiniloʼob Ezequiel. Lelaʼ úuch tu añoil 613 t.t.J. Jeʼex t-ilaj teʼ xook manikoʼ Ezequieleʼ tiaʼan kaʼach Babilonia yéetel le u maasil judíoʼob bisaʼanoʼoboʼ. Letiʼeʼ kajaʼan tiʼ junpʼéel chan kaaj yaan náatsʼ tiʼ le río Kebaroʼ. U jaajileʼ le ríoaʼ páanbil úuchik u beetaʼal, u jaʼiloʼobeʼ ku taaloʼob tiʼ le río Éufratesoʼ yéetel tiʼ ku kaʼa suutoʼobiʼ.

⁵ Jerusalén, u kaajal le judíoʼoboʼ, 800 kilómetros yanil tiʼ Babilonia. * Teʼ templo tuʼux ku meyaj kaʼach u papá Ezequieloʼ chéen baʼaloʼob kʼaastak ku beetaʼaliʼ, chéen uláakʼ diosoʼob ku adorartaʼaliʼ. Teʼ lugar tuʼux gobernarnaj maʼalob reyoʼob jeʼex David yéetel Salomóneʼ, beoraaʼ chéen kʼasaʼan reyoʼob ku gobernaroʼobiʼ. Le kʼasaʼan rey Joaquínoʼ bisaʼan Babilonia yéetel tu jeeleʼ tsʼaʼan Sedequías, uláakʼ kʼasaʼan rey chéen ku beetik baʼax ku yaʼalaʼaltiʼ tumen u reyil Babilonia (2 Rey. 24:8-12, 17, 19).

6, 7. ¿Baʼaxten maʼ chéen chʼaʼabil úuchik u muʼukʼaʼankúuntik u fe Ezequieliʼ?

 ⁶ Teʼ kʼiinoʼob jeʼeloʼ maʼ xaaneʼ Ezequieleʼ maʼ chéen chʼaʼabil tu yilil u muʼukʼaʼankúuntik u fejiʼ. Tsʼoʼoleʼ maʼ xaaneʼ yaʼab tiʼ le judíoʼob bisaʼanoʼoboʼ tu tukloʼob tsʼoʼok u tuʼubsaʼaloʼob tumen Jéeoba. Tu tukloʼob waleʼ u kaajil Babiloniaeʼ yaan u beetik u xuʼulul u adorartaʼal Jéeoba yéetel yaan u beetik u xuʼulul u gobernar way Luʼumeʼ.

⁷ Beora tsʼoʼok a wojéeltik tuláakal lelaʼ maʼalob ka káajak a xakʼaltik le yáax baʼax tsʼaʼab u yil Ezequieloʼ (Eze. 1:4-28). Le táan a xakʼaltikoʼ tukult bey tiaʼanechiʼ, tratart a wilik yéetel a wuʼuyik le baʼax tu yilaj yéetel tu yuʼubaj Ezequieloʼ.

8. ¿Baʼax tsʼaʼab u yil Ezequiel, yéetel baʼax ku chíikbesik?

⁸ ¿Baʼax tu yilaj Ezequiel? Tu yilaj junpʼéel baʼal jach nojoch yaan u ruedasil, junpʼéel baʼal jach kiʼichkelem. Yaan cuatro u ruedasil, tsʼoʼoleʼ jach táaj nuuktakoʼob, tu tséeloʼobeʼ «yaan baʼaloʼob kuxaʼanoʼobiʼ», leloʼobaʼ querubínoʼob (Eze. 10:1). Tu yóokʼol u pooloʼobeʼ yaan junpʼéel baʼaliʼ, lelaʼ chíikaʼan tiʼ junpʼéel piso ku léetsʼbal jeʼex u léetsʼbal le cristaloʼ. Tu yóokʼol le pisoaʼ tiaʼan junpʼéel kiʼichkelem tronoiʼ, ¡tsʼoʼoleʼ le máax kulukbaloʼ Jéeoba! ¿Baʼax ku chíikbesik le nojoch baʼal yaan u ruedasiloʼ? Tiʼ lelaʼ ku  yaʼalaʼaltiʼ u carro Jéeoba yéetel ku chíikbesik wa ku representartik tuláakal le máaxoʼob adorartik teʼ kaʼanoʼ. ¿Baʼaxten k-aʼalik leloʼ? Koʼox ilik óoxpʼéel baʼaloʼob eʼesik baʼaxten.

9. ¿Baʼax u kʼáat u yaʼal u yantal Jéeoba yóokʼol le querubínoʼoboʼ?

⁹ Jéeobaeʼ tiaʼan yóokʼol le máaxoʼob meyajtik teʼ kaʼanoʼ. Kʼaʼajaktoʼoneʼ u trono Jéeobaeʼ tiaʼan yóokʼol le querubínoʼoboʼ. Uláakʼ libroʼob tiʼ le Bibliaoʼ láayliʼ ku yaʼalikoʼob Jéeobaeʼ kulukbal tiʼ junpʼéel trono yaan yóokʼol querubínoʼob wa kulukbal chúumuk tiʼ letiʼob (xok 2 Reyes 19:15; Éxo. 25:22; Sal. 80:1). Jach u jaajileʼ Jéeobaeʼ maʼ kulukbal yóokʼol le querubínoʼoboʼ tumen letiʼeʼ maʼ kʼaʼabéet u bisaʼal tuʼux taak u biniʼ. U yantal tu yóokʼoloʼobeʼ u kʼáat u yaʼaleʼ le querubínoʼoboʼ ku tsʼáaikubaʼob tu tséel u gobernación, u kʼáat xan u yaʼaleʼ jeʼel u páajtal u túuxtikoʼob jeʼel tuʼuxak utiaʼal u béeykuntkoʼob le baʼax u kʼáatoʼ. Le querubínoʼoboʼ ku múul meyajtikoʼob Jéeoba yéetel u maasil ángeloʼoboʼ yéetel ku tsʼoʼokbeskoʼob le baʼax ku yaʼalikoʼ (Sal. 104:4). Le oʼolal jeʼel u páajtal u yaʼalaʼaleʼ Jéeobaeʼ tiaʼan tu yóokʼol tuláakal le máaxoʼob yanoʼob teʼ kaʼanoʼ tumen letiʼ nuʼuktikoʼob yéetel letiʼ gobernarkoʼob. Tuláakloʼobeʼ ku chíikbeskoʼob u carro Jéeoba.

10. ¿Baʼaxten k-aʼalikeʼ le carrooʼ maʼ chéen letiʼe querubínoʼob ku chíikbesikoʼ?

¹⁰ Le carrooʼ maʼ chéen letiʼe querubínoʼob ku chíikbesikoʼ. Ezequieleʼ tu yilaj kantúul querubínoʼob. Teʼ Bibliaoʼ le número cuatrooʼ  ku meyaj utiaʼal u tsʼaʼabal naʼatbil «tuláakal», «tu pʼiis yanil» wa «chúukaʼan». Le oʼolaleʼ le kantúul querubínoʼob tu yilaj Ezequieloʼ ku chíikbeskoʼob tuláakal le máaxoʼob adorartik Dios teʼ kaʼanoʼ. Tsʼoʼoleʼ le nukuch ruedasoʼ chuupoʼob yéetel ichoʼob, tak u wíinklil le querubínoʼob chuup yéetel ichoʼoboʼ. Lelaʼ ku yeʼesikeʼ tuláakal le máaxoʼob yanoʼob teʼ kaʼanoʼ ku yilkoʼob tuláakal baʼal ku yúuchul, maʼ chéen le kantúul querubínoʼoboʼ. Ezequiel xaneʼ tu yileʼ u carro Jéeobaeʼ jach táaj nojoch, hasta mejentak u yilaʼal le querubínoʼob tu tséeloʼ (Eze. 1:18, 22; 10:12). Lelaʼ ku yeʼesikeʼ le u jaats u kaajal Jéeoba yaan teʼ kaʼanoʼ jach táaj nojoch, maʼ chéen kantúul querubínoʼob táakaʼaniʼ.

11. ¿Tiʼ baʼax chíikaʼan le baʼax tsʼaʼab u yil Daniel tiʼ le baʼax tu yilaj Ezequieloʼ?

¹¹ Le baʼax tu yilaj Danieloʼ chíikaʼan tiʼ le baʼax tu yilaj Ezequieloʼ. Le profeta Danieloʼ kuxlaj tu kaajil Babilonia tuláakal le años esclavizartaʼan le judíoʼoboʼ. Tiʼ junpʼéel tiʼ le baʼaxoʼob tsʼaʼab u yiloʼ chíikpaj u trono Jéeoba, tsʼoʼoleʼ yaan xan u ruedasil. Chéen baʼaleʼ tiʼ letiʼeʼ maases táan kaʼach u yeʼesaʼal bukaʼaj u yaʼabil le máaxoʼob adorartik Dios teʼ kaʼanoʼ. Letiʼeʼ tu yileʼ jach táaj yaʼab ángeloʼob yanoʼob teʼ kaʼanoʼ, le oʼolal tu yaʼaleʼ «junpʼéel millón ángeloʼob meyajtik» Dios, «yéetel tu táaneʼ yaan cien millones ángeloʼobiʼ». Tu yileʼ cada juntúuleʼ ku kutal tu lugar táanil tiʼ u káajal junpʼéel juicio (Dan. 7:9, 10, 13-18). Lelaʼ ku yeʼesikeʼ le carro tsʼaʼab u yil Ezequieloʼ ku chíikbesik xan tuláakal le máaxoʼob adorartik Jéeoba teʼ kaʼanoʼ.

12. ¿Baʼaxten k-aʼalik ku yáantkoʼon k-xakʼaltik le baʼax tsʼaʼab u yil Ezequieloʼ?

¹² Jéeobaeʼ u yojleʼ utiaʼal k-kanáantik k-tuukuleʼ unaj k-tuukul tiʼ «le baʼaloʼob maʼatech u yilaʼaloʼoboʼ». ¿Baʼaxten? Tumen toʼoneʼ maases chéen ku chʼíikil k-tuukul tiʼ «le baʼaloʼob ku yilaʼaloʼoboʼ», tiʼ baʼaloʼob ku xuʼululoʼob jeʼex le baʼaxoʼob kʼaʼabéettoʼon sáamsamaloʼ wa uláakʼ chiʼichnakiloʼob (xok 2 Corintios 4:18). Satanáseʼ u yojel lelaʼ, le oʼolal ku beetik tuláakal le ku páajtal utiaʼal ka xiʼikoʼon tu paach chéen le baʼaxoʼob k-tsʼíiboltikoʼ. Chéen baʼaleʼ Jéeobaeʼ jach u yaabiltmoʼon, le oʼolal ku yáantkoʼon. Yéetel le baʼax tu tsʼáaj u yil Ezequieloʼ ku kʼaʼajsiktoʼon bukaʼaj nojchil u familia yaan teʼ kaʼanoʼ. ¿Máasaʼ jach kiʼichkelem le u jaats u familia yaan teʼ kaʼanoʼ?

13, 14. 1) ¿Bix le ruedas tu yilaj Ezequieloʼ? 2) ¿Baʼaxten u trono Jéeobaeʼ yaan u ruedasil?

¹³ Yáaxeʼ Ezequieleʼ tʼaanaj tiʼ le kantúul querubínoʼoboʼ. Teʼ tu kanpʼéel xookil le libroaʼ yaan k-ilik baʼax ku kaʼanskoʼobtoʼon yoʼolal Jéeoba bey xan baʼax ku kaʼansiktoʼon le bix u yilaʼaloʼoboʼ. Ezequieleʼ tu yilaj xaneʼ tu tséel cada querubíneʼ yaan junpʼéel ruedaiʼ, le kanpʼéel ruedas tu yiloʼ ku formarkoʼob junpʼéel nuxiʼ cuadrado (xok Ezequiel 1:16-18). Le ruedasoʼ ku léembaloʼob jeʼex u  léembal u jatsʼuts tuunichil crisólitoeʼ, le tuunich jeʼelaʼ sáaskʼaleʼen, u coloreʼ kʼaankʼan wa yaʼax kʼaankʼan. ¡Jach táaj jatsʼuts!

¹⁴ Le ka tu tsʼíibtaj Ezequiel le baʼax tsʼaʼab u yiloʼ jach tʼaanaj tiʼ u ruedasil le carrooʼ. U jaajileʼ maʼ suuk u yilaʼal junpʼéel trono yaan u ruedasiliʼ tumen u trono le reyoʼoboʼ u suukileʼ maʼatech u péekoʼob teʼ tuʼux yanoʼoboʼ. Letiʼobeʼ minaʼantiʼob autoridad tuʼux maʼ u territorioʼobiʼ. Chéen baʼaleʼ Jéeobaeʼ tuláakal tuʼux yaan autoridad tiʼ. Ezequieleʼ yaan u tsʼáaik cuentaeʼ Jéeobaeʼ minaʼan u xuul u páajtalil yéetel chéen letiʼ ku merecertik ka adorartaʼak tuláakal tuʼux (Neh. 9:6). Chéen tukle, ¡le Reyaʼ tuláakal tuʼux yaan páajtalil tiʼ!

15. ¿Baʼax uláakʼ tu yaʼalaj Ezequiel yoʼolal le ruedasoʼ?

¹⁵ Ezequieleʼ jach jaʼakʼ u yóol ka tu yilaj bukaʼaj nojchil le ruedasoʼ. Letiʼeʼ tu yaʼalaj: «Le kanpʼéel ruedasoʼ jach táaj nuuktakoʼob». Maʼ xaaneʼ Ezequieleʼ hasta anchaj u jawik u yich utiaʼal u paktik le nuxiʼ ruedas ku léembaloʼoboʼ. Letiʼeʼ tu yilaj xaneʼ le kanpʼéel ruedasoʼ «chuupoʼob yéetel ichoʼob». Chéen baʼaleʼ le baʼax maas jelaʼan tiʼ le ruedasoʼ letiʼe baʼax tu yaʼalaj Ezequiel tu yoʼolaloʼobaʼ: «Ichil cada junpʼéel ruedaeʼ bey yaan uláakʼ rueda kʼatakbal ichileʼ». ¿Baʼax u kʼáat u yaʼal leloʼ?

16, 17. 1) Chúumuk tiʼ cada ruedaeʼ yaan uláakʼ kʼatakbaliʼ, ¿baʼax u kʼáat u yaʼal leloʼ? 2) ¿Baʼax k-kanik yoʼolal le bix u péek le ruedasoʼ?

¹⁶ Jeʼex k-ilkoʼ chúumuk tiʼ cada ruedaeʼ yaan uláakʼ kʼatakbaliʼ. Lelaʼ ku yáantkoʼon k-naʼat baʼaxten ku páajtal u péekoʼob jeʼex tu yaʼalil Ezequielaʼ: «Le kéen péeknakoʼobeʼ ku binoʼob jeʼel tuʼuxakeʼ, maʼ kʼaʼabéet u sutkubaʼobiʼ». Le baʼax tu yaʼalaʼ, ¿baʼax ku kaʼansiktoʼon yoʼolal u carro Jéeoba?

¹⁷ Tumen jach táaj nuuktak le ruedasoʼ wa ka balakʼnakoʼob kex chéen juntéeneʼ jach náach tuʼux jeʼel u kʼuchloʼobeʼ. Ezequieleʼ tu yileʼ jach táaj séeb u péek u carro Jéeoba, bey junpʼéel rayoeʼ (Eze. 1:14). Tsʼoʼoleʼ le ruedasoʼ ku páajtal u péekoʼob jeʼel tuʼuxakeʼ yéetel kex táaj nuuktakoʼobeʼ jach chéen chʼaʼabil u nuʼuktaʼaloʼob. Lelaʼ junpʼéel baʼal taak u beetik le ingenieroʼoboʼ pero mix bikʼin kun páajtal u beetkoʼob. Kex jeʼel bukaʼaj chichil u bin le carroaʼ maʼ kʼaʼabéet u frenar mix u tsʼáaik vuelta utiaʼal u bin yaanal tuʼuxiʼ. Tsʼoʼoleʼ como chuup le ruedas yéetel ichoʼoboʼ jeʼel u páajtal u yaʼalaʼaleʼ ku páajtal u yilkoʼob tuláakal baʼax ku yúuchul tu baʼpachoʼob.

18. Le ruedas jach nuuktakoʼob yéetel chupoʼob yéetel ichoʼoboʼ, ¿baʼax ku kaʼansiktoʼon?

¹⁸ ¿Baʼax u kʼáat u kaʼans Jéeoba tiʼ Ezequiel yéetel tiʼ tuláakal le máaxoʼob meyajtikoʼ? Koʼox kʼaʼajsik baʼax tsʼoʼok k-kanik yoʼolal u carro Jéeoba. Tsʼoʼok k-ilkeʼ sen nojoch yéetel jach kiʼichkelem, bey u yeʼesik u nojchil le ruedasoʼ yéetel le bix u léetsʼbaloʼoboʼ. Tsʼoʼok xan k-kanikeʼ ku páajtal u yilik tuláakal baʼax ku yúuchul, bey u yeʼesik le yaʼabkach ichoʼob yaan tiʼ le ruedasoʼ. Kʼaʼajaktoʼoneʼ u  yichoʼob Jéeobaeʼ tiaʼan tuláakal tuʼuxeʼ (Pro. 15:3; Jer. 23:24). Tsʼoʼoleʼ Jéeobaeʼ yaan u millonesil ángeloʼob yáanal u kʼab, letiʼobeʼ ku binoʼob jeʼel tuʼuxak ka aʼalaʼaktiʼobeʼ, ku yilkoʼob baʼax ku yúuchul yéetel ku suut u yaʼaloʼob (xok Hebreos 1:13, 14).

19. Le carro jach séeb u péek yéetel chéen chʼaʼabil u nuʼuktaʼaloʼ, ¿baʼax ku yeʼesik yoʼolal Jéeoba yéetel u kaajal?

¹⁹ T-kanaj xaneʼ le carroaʼ jach séeb u péek yéetel chéen chʼaʼabil u nuʼuktaʼal. Le jaats tiʼ u kaajal Diosaʼ jach jelaʼan tiʼ bix u meyaj le gobiernoʼob yéetel le organizaciónoʼob way yóokʼol kaabaʼ. Letiʼobeʼ maʼ tu tsaʼayal u yutskíintoʼob le problemasoʼ yéetel wa yaan baʼax ku kʼexpajleʼ maʼ tu kaxtik baʼax u beetoʼob, le oʼolal kéen máanak kʼiineʼ ku luʼsaʼaloʼob wa ku xuʼululoʼob. Chéen baʼaleʼ u carro Jéeobaeʼ ku yeʼesik jach bix letiʼ, letiʼeʼ jeʼel u kʼuchul u beetuba jeʼel baʼaxak u kʼáat utiaʼal u béeykuntik le baʼax u tukultmoʼ (Éxo. 3:13, 14). Letiʼeʼ jeʼel xan u sutkuba juntúul Dios ku baʼateʼel utiaʼal u kanáantik u kaajaleʼ, chéen baʼaleʼ jeʼel xan u beetkuba juntúul Dios ku chʼaʼik óotsilil, ku perdonartik yéetel ku líiʼsik u yóol le máax jach tu jaajil ku arrepentiroʼ (Sal. 30:5; Isa. 66:13).

20. ¿Baʼaxoʼob unaj k-kʼaʼajsik mantatsʼ yoʼolal u carro Jéeoba?

²⁰ Yoʼolal le baʼax tsʼoʼok k-ilik tak beoraaʼ cada juntúul tiʼ toʼoneʼ maʼalob ka u tukle: «Le baʼax tsʼoʼok in kanik yoʼolal u carro Jéeobaaʼ, ¿ku péeksiken wa in maas respetarte?». Kʼaʼajaktoʼoneʼ u carro Jéeobaeʼ tak bejlaʼaʼ táan u péekeʼ. Le oʼolal mix juntéen unaj k-tuklik wa Jéeoba, Jesús yéetel le ángeloʼoboʼ chéen táan u yilkoʼob baʼax k-muʼyajtik. Maʼ unaj xan k-tuklik wa Dioseʼ maʼ ken u tsʼáatoʼon le baʼaxoʼob kʼaʼabéettoʼonoʼ, yéetel maʼ unaj k-tuklik xan wa u kaajaleʼ yaan u xuʼulul u meyaj yoʼolal jeʼel baʼaxak ka jáan úuchkeʼ. Maʼalob ka k-kʼaʼajseʼ u carro wa u kaajal Jéeobaeʼ mantatsʼ táan u péek. Ezequieleʼ tu yuʼubaj junpʼéel tʼaan ku yaʼalik tiʼ le ruedasoʼ: «¡Péekneneʼex!» (Eze. 10:13). ¿Máasaʼ jach ku beetik u jaʼakʼal k-óol kéen k-naʼat bix u péek u kaajal Jéeoba? Chéen baʼaleʼ Jéeoba, le máax nuʼuktik le carrooʼ, letiʼ beetik u maas jaʼakʼal k-óol.

21, 22. Tsol baʼax beetik u péek le carrooʼ.

²¹ Beoraaʼ Ezequieleʼ ku tʼaan tiʼ le baʼal yaan yóokʼol le ruedasoʼ, «lelaʼ chíikaʼan tiʼ junpʼéel piso ku léetsʼbal jeʼex u léetsʼbal le cristaloʼ» (Eze. 1:22). Yóokʼol le querubínoʼoboʼ tiaʼan le nuxiʼ plataforma sáaskʼaleʼen táan u léetsʼbaloʼ. Maʼ xaaneʼ le máaxoʼob u yojloʼob bix u meyaj junpʼéel ruedaeʼ ku tuklikoʼob: «¿Bix u núupul le plataforma tiʼ le ruedasoʼ? ¿Bix u meyaj le ruedas wa minaʼan u ejesiloʼoboʼ?». Kʼaʼajaktoʼoneʼ le carroaʼ chéen táan u yeʼesik le baʼaloʼob yanoʼob teʼ kaʼanoʼ, maʼ tu meyaj jeʼex le baʼaxoʼob yanoʼob way Luʼum k-kʼaj óoloʼoboʼ. Unaj xan k-chʼaʼik en cuenta  le baʼax tu yaʼalaj Ezequielaʼ: «Tumen le u poder Dios nuʼuktikoʼoboʼ letiʼ xan nuʼuktik le ruedasoʼ» (Eze. 1:20, 21).

²² Minaʼan uláakʼ poder jeʼex le yaan tiʼ Jéeobaoʼ. Le u poder Diosaʼ letiʼe baʼax beetik u péek le carrooʼ. Letiʼe baʼax nupik le plataforma yéetel le ruedasoʼ yéetel letiʼe baʼax ku meyajtiʼ utiaʼal u nuʼuktikoʼ. Beoraaʼ Ezequieleʼ ku tʼaan tiʼ le máax nuʼuktik le carrooʼ. Koʼox ilik baʼax tu yaʼalaj tu yoʼolal.

23. ¿Baʼax tʼaanoʼob jach meyajnaj tiʼ Ezequiel, yéetel baʼaxten jach yaʼab u téenel tu yaʼalaj?

²³ Xok Ezequiel 1:26-28. Le táan u yaʼalik le baʼax tu yiloʼ Ezequieleʼ meyajnajtiʼ tʼaanoʼob jeʼex «bey», «chíikaʼan tiʼ» yéetel «bey jeʼex». Chéen baʼaleʼ teʼ versículoʼobaʼ jach ku meyajtiʼ le tʼaanoʼobaʼ tumen bey táan u kaxtik bix u tsolik junpʼéel baʼal maʼ tu páajtal u tsoʼolol jach bixeʼ. Letiʼeʼ tu yilaj «junpʼéel baʼal bey u jatsʼuts tuunichil zafiroeʼ yéetel chíikaʼan tiʼ junpʼéel trono[eʼ]». Máans ta tuukul junpʼéel nuxiʼ trono póolaʼan tiʼ junpʼéel u nuxiʼ tuunichil zafiro de color box azul. Yóokʼol le tronooʼ yaan máax kulukbaliʼ, letiʼeʼ «chíikaʼan tiʼ juntúul máak».

24, 25. 1) ¿Baʼax ku kʼaʼajsiktoʼon le arco iris yaan tu baʼpach u trono Jéeobaoʼ? 2) ¿Bix áantaʼabik uláakʼ profetaʼob yoʼolal le baʼax tsʼaʼab u yiloʼoboʼ?

²⁴ Le máax kulukbal teʼ tronooʼ maʼ tu páajtal u jach ilaʼal bixiʼ. Maʼ tu páajtal u yilaʼal tumen tuláakal u wíinklileʼ táan u juul  yéetel táan u léetsʼbal jeʼex u léetsʼbal le kʼáakʼoʼ. Maʼ xaaneʼ Ezequieleʼ u wéej mutsʼmaj u yich, hasta u wéej pixmaj yéetel u kʼab utiaʼal u páajtal u seguer u paakat. Tu tsʼookeʼ tu yilaj uláakʼ baʼal jach kiʼichkelem, letiʼeʼ ku yaʼalik: «Tu baʼpacheʼ yaan junpʼéel baʼal ku léembaliʼ. Lelaʼ bey jeʼex le arco iris ku jóokʼol teʼ kaʼan tu kʼiinil táan jaʼoʼ». ¿Máasaʼ yaan kʼiineʼ hasta ku pʼáatal jaajap u chiʼ máak kéen u yil junpʼéel arco iris? Lelaʼ ku kʼaʼajsiktoʼon bukaʼaj kiʼichkelmil le Máax beetmiloʼonoʼ. Ku kʼaʼajsik xan toʼon le pacto tu beetaj Jéeoba le ka tsʼoʼok le Búulkabaloʼ, le pacto utiaʼal ka yanak jeetsʼeliloʼ (Gén. 9:11-16). Jeʼex k-ilkoʼ Jéeobaeʼ minaʼan u xuul u páajtalil yéetel u Diosil jeetsʼelil (Heb. 13:20). U puksiʼikʼaleʼ chuup yéetel jeetsʼelil, le oʼolal ku tsʼáaik xan tiʼ le máaxoʼob adorarkoʼ.

²⁵ ¿Baʼax tu beetaj Ezequiel yoʼolal le baʼax tu yiloʼ? Letiʼeʼ ku yaʼalik: «Le ka tin wileʼ xolajeneʼ ka chinlajen». Ezequieleʼ xolaji tumen jaʼakʼ u yóol yéetel tu chʼaʼaj saajkil tiʼ Dios. Láayliʼ bey úuch tiʼ uláakʼ profetaʼob yaan baʼax tsʼaʼab u yiloʼob tumen Jéeobaoʼ. U jaajileʼ wa ka úuchuktoʼon xan beyoʼ láayliʼ bey jeʼel k-uʼuyikbaoʼ (Isa. 6:1-5; Dan. 10:8, 9; Apo. 1:12-17). Le baʼax tsʼaʼab u yiloʼoboʼ jach tu muʼukʼaʼankúuntaj u fejoʼob. Ezequiel xaneʼ muʼukʼaʼanchaj u fe. Kux túun toʼon, ¿bix k-uʼuyikba kéen k-xok le baʼaxoʼob tsʼaʼab u yil le profetaʼoboʼ?

26. ¿Baʼaxten líiʼsaʼab u yóol Ezequiel yoʼolal le baʼax tsʼaʼab u yiloʼ?

²⁶ Maʼ xaaneʼ Ezequieleʼ chiʼichnak yoʼolal baʼax ku muʼyajtik u kaajal Dios bisaʼan Babiloniaoʼ, chéen baʼaleʼ le baʼax tsʼaʼab u yiloʼ jach tu líiʼsaj u yóol. Jeʼel tuʼuxak ka yanak u kaajal Jéeobaeʼ letiʼeʼ jeʼel u páajtal u yáantkoʼobeʼ. Mix Satanás yéetel le demonioʼob jeʼel u páajtal u tsʼáaikubaʼob tu contra Jéeoba, le máax nuʼuktik le carrooʼ (xok Salmo 118:6). Tsʼoʼoleʼ Ezequieleʼ tu yileʼ le carrooʼ maʼ náach yanil tiʼ le máakoʼob kajaʼanoʼob way Luʼumeʼ. Le oʼolal u ruedailoʼobeʼ hasta ku náakloʼob luʼum (Eze. 1:19). Jeʼex k-ilkoʼ Jéeobaeʼ táan kaʼach u yilik baʼax ku yúuchul tiʼ u kaajal bisaʼan Babiloniaoʼ. Letiʼobeʼ mantatsʼ kun kanáantbiloʼob tumen Jéeoba, le máax jach yaabiltmiloʼoboʼ.

27. ¿Yaan wa baʼax jeʼel k-kanik tiʼ le baʼax tsʼaʼab u yil Ezequieloʼ?

²⁷ ¿Yaan wa baʼax jeʼel u páajtal k-kanik tiʼ le baʼax tsʼaʼab u yil Ezequieloʼ? Yaan. Kʼaʼajaktoʼoneʼ Satanáseʼ yaʼab baʼaloʼob ku beetik utiaʼal ka xuʼuluk u adorartaʼal chéen Jéeoba. Letiʼeʼ jach u kʼáat ka k-tukleʼ chéen t-juunal yaniloʼon, mix máak áantkoʼon, náach yaniloʼon tiʼ Jéeoba yéetel tiʼ u kaajal. ¡Junpuliʼ maʼ unaj k-chaʼik u táabal t-puksiʼikʼal yéetel t-tuukul le tuusoʼobaʼ! (Sal. 139:7-12). Jeʼex Ezequieleʼ toʼon xaneʼ yaʼab baʼaxoʼob beetik u taaktal k-maas  k-respetartik Jéeoba. Maʼ xaaneʼ maʼ ken k-xoltal jeʼex tu beetil Ezequieloʼ. Chéen baʼaleʼ jach ku jaʼakʼal k-óol kéen k-il bix u meyaj le jaats tiʼ u kaajal Jéeoba yaan teʼ kaʼanoʼ. Ku jaʼakʼal k-óol kéen k-il u kiʼichkelmil, u poder, u séebaʼanil u péek, le bix u nuʼuktaʼal utiaʼal ka xiʼik jeʼel tuʼuxakeʼ bey xan tumen k-ojel maʼ tun xuʼulul u péek kex jeʼel baʼalak ka úuchkeʼ.

28, 29. ¿Baʼax eʼesik u carro Jéeobaeʼ láayliʼ táan u péekeʼ?

²⁸ Kʼaʼajaktoʼoneʼ yaan xan junjaats tiʼ u kaajal Jéeoba way Luʼumeʼ. U jaajileʼ le máaxoʼob yanoʼob ichiloʼ kʼeban máakoʼob, chéen baʼaleʼ Jéeobaeʼ yaʼab baʼaloʼob tsʼoʼok u beetik ka úuchuk ichil u kaajal. Tiʼ tuláakal yóokʼol kaabeʼ tsʼoʼok u yáantik máakoʼob u beetoʼob baʼaloʼob mix juntéen tuklaʼab wa jeʼel u páajtal u beetkoʼobeʼ (Juan 14:12). Teʼ libro ¡U Reino Dioseʼ táan u gobernar! ku tsoʼolol baʼaxoʼob tsʼoʼok u beetaʼal utiaʼal u tsʼaʼabal ojéeltbil le maʼalob noticiaʼob tu yáamil le 100 años tsʼoʼok u máanoʼobaʼ. Ku tsoʼolol xan baʼaxoʼob tsʼoʼok u beetik u kaajal Jéeoba utiaʼal u kaʼansik le máakoʼoboʼ, bix tsʼoʼok u ganartaʼal juicioʼob tu táan le juezoʼoboʼ yéetel bix u meyaj le tecnología utiaʼal u beetaʼal baʼax u kʼáat Diosoʼ.

²⁹ Jeʼex k-ilkoʼ teʼ tu tsʼook kʼiinoʼobaʼ yaʼab baʼaloʼob táan u beetaʼal utiaʼal u adorartaʼal chéen Jéeoba. Jach chíikaʼan u yilaʼal u carro Jéeobaeʼ táan u péek. ¿Máasaʼ jach ku kiʼimaktal k-óol k-adorartik yéetel k-antal ichil u kaajal? (Sal. 84:10).

30. ¿Baʼax ken k-il teʼ tuláakʼ xookoʼ?

³⁰ Yaan uláakʼ baʼaloʼob jeʼel k-kanik tiʼ le baʼax tsʼaʼab u yil Ezequieloʼ. Teʼ tuláakʼ xookoʼ yaan k-ilik baʼax uláakʼ tu yaʼalaj Ezequiel yoʼolal le kantúul «baʼaloʼob kuxaʼanoʼob» wa le querubínoʼob tu yiloʼ. ¿Baʼax ku kaʼansiktoʼon le querubínoʼob yoʼolal Jéeobaoʼ?