1, 2. 1) ¿Baʼaxten tuláakal máax táan kaʼach u yilik baʼax ku beetik Ezequiel? (Ilawil le dibujo yaan tu káajbal le xookaʼ). 2) ¿Baʼax tu chíikbesaj le baʼaloʼob tu beetoʼ?

TULÁAKAL máak ku tʼaan tiʼ le baʼax táan u beetik Ezequieloʼ. Le judíoʼob bisaʼanoʼob Babiloniaoʼ táan u jach ilkoʼob le baʼax ku beetkoʼ. Tsʼoʼok u máan junpʼéel semana maʼ tu tʼaan, chéen kulukbal yéetel bey saatal u yóoleʼ. Chéen baʼaleʼ ku téek waʼataleʼ yéetel ku bin u kʼaluba tu yotoch. Mix máak naʼatik baʼax ku yúuchultiʼ. Chéen ka jáan ilaʼab u jóokʼol tu yotoch, tu chʼaʼaj junpʼéel ladrilloeʼ ka tu beetaj junpʼéel dibujo tu yóokʼol. Tsʼoʼoleʼ joʼopʼ u tsʼáaik baʼaloʼob utiaʼal u kʼalik tuláakal u baʼpach le ladrillooʼ (Eze. 3:10, 11, 15, 24-26; 4:1, 2).

² Le máaxoʼob ku waʼatal u chaʼantoʼob baʼax ku beetkoʼ maʼ xaaneʼ ku tuklikoʼob: «¿Baʼax túun u kʼáat u yaʼal le baʼax ku beetkaʼ?». Kéen máanak kʼiineʼ le judíoʼob bisaʼanoʼob Babiloniaoʼ yaan u kʼuchul u naʼatoʼob baʼax u kʼáat u yaʼal le baʼaxoʼob ku beetik Ezequieloʼ. Yaan u naʼatkoʼobeʼ le baʼax tu beetoʼ táan kaʼach u yeʼesik le nojoch castigo ken u taas Jéeobaoʼ. ¿Baʼax túun le ku taal u kʼiinil u yúuchloʼ? ¿Baʼax kun úuchul tiʼ u kaajil Israel? ¿Yaan wa baʼax jeʼel k-kanik tiʼ le jeʼeloʼ?

3, 4. 1) ¿Máakalmáak le óoxpʼéel baʼal tu yeʼesaj Ezequiel kun úuchloʼ? 2) ¿Bix tu yeʼesil Ezequiel bix kun baʼpachtbil Jerusalén?

³ Kex bey tu añoil 613 t.t.J., Jéeobaeʼ tu yaʼalaj tiʼ Ezequiel ka u beet óoxpʼéel baʼaloʼob utiaʼal u yeʼesik bix le castigo ken u taas tu contra Jerusalénoʼ. Yaan u yeʼesik bix kun baʼpachtbil le kaajoʼ, bix kun muʼyaj u kajnáaliloʼob yéetel bix kun xuʼulsbil le kaaj bey xan u kajnáaliloʼoboʼ. * Koʼox ilik baʼaxoʼob tu beetaj Ezequiel utiaʼal u yeʼesik bix kun béeytaloʼob.

⁴ Bix kun baʼpachtbil Jerusalén. Jéeobaeʼ tu yaʼalaj tiʼ Ezequiel: «Chʼaʼ junpʼéel ladrilloeʼ ka a tsʼáa ta táan utiaʼal a dibujartik u kaajil Jerusaléniʼ. Tsʼáa baʼaloʼob utiaʼal a kʼalik tuláakal u baʼpach le ladrillooʼ» (xok Ezequiel 4:1-3). Le ladrillooʼ ku chíikbesik u kaajil Jerusalén, Ezequieleʼ ku chíikbesik u soldadoiloʼob Babilonia, le máaxoʼob kun béeykuntik le baʼax u tukultmaj Jéeobaoʼ. Aʼalaʼab xan tiʼ ka u tsʼáa baʼaloʼob utiaʼal u kʼalik tuláakal u baʼpach le ladrillooʼ, ka u beet junpʼéel rampa yéetel ka u baʼpacht yéetel nuʼukuloʼob ikil u juʼutul pakʼ. Ezequiel túuneʼ tu beetaj le baʼax aʼalaʼabtiʼoʼ. Le baʼaloʼobaʼ tu yeʼesoʼob bix kun baʼpachtbil yéetel bix kun atacarbil u kaajil Jerusalén. Utiaʼal u yeʼesik jach yaan u páajtalil u enemigoʼoboʼ Ezequieleʼ tu chʼaʼaj «junxóotʼ fierro bey xamacheʼ» ka tu tsʼáaj chúumuk tiʼ letiʼ yéetel tiʼ le ladrillo wa le kaajoʼ, le ka tsʼoʼokeʼ tu táaʼpaktaj le ladrillooʼ. Tuláakal le baʼaloʼobaʼ meyajnaj utiaʼal u yeʼesaʼal «tiʼ le israelitaʼob baʼax ku taal u kʼiinoʼ». Tiʼ Jéeobaeʼ yaan u meyaj u soldadoiloʼob Babilonia utiaʼal u beetik u baʼpachtaʼal Jerusalén, le kaaj tuʼux yaan u templooʼ.

5. ¿Bix tu yeʼesil Ezequiel baʼax ken u muʼyajt u kajnáaliloʼob Jerusalén?

⁵ Bix kun muʼyaj u kajnáaliloʼob Jerusalén. Jéeobaeʼ tu yaʼalaj tiʼ Ezequiel: «Unaj a chʼaʼik trigo, cebada, haba, lenteja, mijo yéetel espelta. Le kéen tsʼoʼokkeʼ [...] ka beetik a woʼoch waaj tu yéeteloʼob». Tu yaʼalaj xan tiʼ: «Sáamsamal unaj a pʼisik kex 230 gramos waaj utiaʼal a jaante». Tsʼoʼoleʼ Jéeobaeʼ tu yaʼalaj: «Yaan in beetik u xuʼupul le baʼaloʼob utiaʼal jaantbil[oʼ]» (Eze. 4:9-16). Teʼ vezaʼ Ezequieleʼ ku chíikbesik u kajnáaliloʼob Jerusalén maʼ u soldadoiloʼob Babiloniaiʼ. Le baʼax tu beetaj le profetaaʼ tu yeʼeseʼ le kéen baʼpachtaʼak le kaajoʼ yaan u pʼáatal minaʼan baʼal jaantbiliʼ. Úuchik u xaʼakʼtik jejeláas baʼaloʼob utiaʼal u jaanteʼ tu yeʼeseʼ le máakoʼoboʼ yaan u jaantikoʼob jeʼel baʼaxak ka u kaxtoʼobeʼ. ¿Jach wa tu jaajil yaan u pʼáatal minaʼan mix baʼal utiaʼal jaantbil? Ezequieleʼ tu yaʼalaj: «Ichileʼexeʼ yaan taatatsiloʼob ken u jaant u paalaloʼob, yéetel yaan paalaloʼob ken u jaant u taataʼob». Le wiʼijiloʼ yaan u xuʼulskoʼob jeʼex u «xuʼulsaʼal tiʼ máak tumen flechaʼobeʼ», yaan u muʼyajoʼob yéetel yaan u kʼakʼalbaaktaloʼob (Eze. 4:17; 5:10, 16).

6. 1) ¿Máakalmáak le kaʼapʼéel baʼal tu chíikbesaj Ezequieloʼ? 2) ¿Baʼax tu chíikbesaj úuchik u yaʼalaʼal tiʼ Ezequiel ka u pʼis u tsoʼotsel u pool yéetel ka u jaatse?

⁶ Bix kun xuʼulsbil Jerusalén yéetel u kajnáaliloʼob. Teʼ vezaʼ le baʼax tu beetaj Ezequieloʼ kaʼapʼéel baʼal tu chíikbesaj. Yáaxeʼ  tu yeʼesaj le baʼax ken u beet Jéeobaoʼ. Letiʼeʼ tu yaʼalaj tiʼ Ezequiel: «Chʼaʼ junpʼéel espada yaan u yejeʼ ka a tsʼikaba tu yéetel jeʼex u tsʼikkuba máak yéetel navajaeʼ» (xok Ezequiel 5:1, 2). Le kʼab tuʼux u machmaj le espadaoʼ tu chíikbesaj u kʼab Jéeoba wa le castigo ken u taas yóokʼol Jerusalénoʼ. Le castigoaʼ yaan u beetik u taasaʼal tumen u soldadoiloʼob Babilonia. U kaʼapʼéel baʼax tu yeʼesaj Ezequieleʼ letiʼe baʼaxoʼob ken u muʼyajt le judíoʼoboʼ. Jéeobaeʼ tu yaʼalajtiʼ: «Unaj a tsʼikik a pool yéetel a meʼex». Leloʼ tu yeʼesaj yaan u atacartaʼal le judíoʼoboʼ yéetel jach yaʼab tiʼ letiʼob kun kíimsbiloʼobiʼ. Jéeobaeʼ tu yaʼalaj xan tiʼ: «Kéen tsʼoʼokkeʼ ka pʼisik tiʼ junpʼéel balanza le tsoʼotsoʼ, tsʼoʼoleʼ ka jóoʼsik óoxjaats». Leloʼ tu yeʼeseʼ Jéeobaeʼ maʼ chéen minaʼan u cuentail ken u taas le castigooʼ, baʼaxeʼ u tukultmaj tubeel bix ken u beetil.

7. ¿Baʼax tu beetaj Ezequiel yéetel cada jaats tiʼ le tsoʼotsoʼ yéetel baʼaxten bey tu beetiloʼ?

 ⁷ Jeʼex tsʼoʼok k-ilkoʼ Jéeobaeʼ tu yaʼalaj tiʼ Ezequiel ka u jóoʼs óoxjaats tiʼ le tsoʼotsoʼ, tiʼ cada jaatseʼ yaanal baʼax ken u beettiʼ (xok Ezequiel 5:7-12). Yáaxeʼ Ezequieleʼ tu tóokaj junjaats tiʼ le tsoʼots «ichil le kaajoʼ», lelaʼ tu beetaj utiaʼal ka ilaʼakeʼ yaan tiʼ u kajnáaliloʼob Jerusaléneʼ yaan u kíimloʼob ichil le kaajoʼ. Uláakʼ u jaats tiʼ le tsoʼotsoʼ tu xoʼoxotaj yéetel espada «tu baʼpach le kaajoʼ», lelaʼ tu beetaj utiaʼal u yeʼesik yanoʼobeʼ paach kaaj kun kíimsbiloʼob. Le u tsʼook jaatsoʼ tu kʼíitchʼintaj «utiaʼal ka bisaʼak tumen iikʼ», leloʼ tu yeʼeseʼ junjaats tiʼ u kajnáaliloʼob Jerusaléneʼ yaan u kʼiʼitbesaʼaloʼob ichil uláakʼ kaajoʼob. Chéen baʼaleʼ junpʼéel espadaeʼ yaan u «bin tu paachoʼob». Leloʼ u kʼáat u yaʼaleʼ jeʼel tuʼuxak ka xiʼikoʼobeʼ maʼ tun yantaltiʼob jeetsʼelil.

8. 1) ¿Baʼax tu yeʼesaj Ezequiel úuchik u toʼik tu nookʼ junpʼíit tiʼ le tsoʼotsoʼ? 2) ¿Bix béeychajik le baʼax tu beetoʼ?

⁸ Chéen baʼaleʼ yaan uláakʼ baʼax tu beetaj Ezequiel tu yeʼesaj maʼ bey kun tsʼoʼokol tiʼ tuláakal le judíoʼoboʼ. Jéeobaeʼ tu yaʼalajtiʼ: «Chʼaʼ xan junpʼíit tiʼ le tsoʼotsoʼ ka a toʼo yéetel a nookʼ» (Eze. 5:3). Leloʼ tu yeʼeseʼ yaan jujuntúul tiʼ le judíoʼob kʼiʼitbesaʼanoʼoboʼ maʼ tun kíimloʼob. Ichil le «junpʼíit» tsoʼots aʼalaʼaboʼ tiaʼan le judíoʼob bisaʼaboʼob Babilonia kun suutoʼob Jerusalén kéen tsʼoʼokok le 70 años aʼalaʼaboʼ (Eze. 6:8, 9; 11:17). ¿Béeychaj wa túun lelaʼ? Béeychaji. Ka máan wa jaypʼéel años xuʼuluk u esclavizartaʼal le israelitaʼob tu kaajil Babiloniaoʼ, profeta Ageoeʼ tu yaʼaleʼ yaan jujuntúul judíoʼobeʼ tsʼokaʼaniliʼ u suutoʼob Jerusaléneʼ. Tiʼ letiʼobeʼ ku yaʼalaʼal kaʼach «le máaxoʼob tsʼoʼok u chʼíijloʼob yéetel u yilmoʼob le naj úuchjeakiloʼ» wa le templo tu beetaj Salomónoʼ (Esd. 3:12; Ageo 2:1-3). Jéeobaeʼ tu cumplirtaj le baʼax u yaʼalmoʼ, maʼ tu chaʼaj u xuʼulul u yantal máaxoʼob adorarkiʼ. Teʼ xook 9 tiʼ le libroaʼ yaan k-ilik bix káajik u kaʼa adorartaʼal chéen Jéeoba tumen u kaajal (Eze. 11:17-20).

9, 10. ¿Baʼax ku kʼaʼajsiktoʼon u profecía Ezequiel yoʼolal le baʼax kun úuchul ichil junpʼíit kʼiinoʼ?

⁹ Le baʼaxoʼob tu beetaj Ezequieloʼ ku kʼaʼajsiktoʼon le baʼaxoʼob ku yaʼalik le Biblia kun úuchul ichil junpʼíit kʼiinoʼ. ¿Baʼaxoʼob kun úuchul? Jeʼex úuchik u beetik Jéeoba u atacartaʼal Jerusaléneʼ bey xan ken u beet u atacartaʼal le religiónoʼob maʼatech u kaʼanskoʼob u jaajiloʼ, kex mix máak páaʼtikeʼ yaan u beetik u atacartaʼaloʼob tumen le gobiernoʼoboʼ (Apo. 17:16-18). Le bix úuchik u xuʼulsaʼal Jerusalénoʼ «junpʼéel nojoch loob mix juntéen ilaʼak» u yúuchul. Le «sen muʼyaj» xan kun antal yéetel kun tsʼoʼokol yéetel Armagedóneʼ «mix juntéen» xan ilaʼak (Eze. 5:9; 7:5; Mat. 24:21).

¹⁰ Le Bibliaoʼ ku yaʼalikeʼ le kéen xuʼulsaʼak tiʼ le religiónoʼob maʼatech u kaʼanskoʼob u jaajiloʼ u maas yaʼabil tiʼ le máaxoʼob yanoʼob ichiloʼ maʼ kun kíimloʼob. Chéen baʼaleʼ letiʼobeʼ yaan u sen sajaktaloʼob, le oʼolal yaan u kaxtik tuʼux u taʼakikubaʼob. Yaan tak u taʼakikubaʼob yéetel u jejeláas clasesil máakoʼob (Zac. 13:4-6; Apo. 6:15-17). Lelaʼ ku kʼaʼajsiktoʼon le israelitaʼob kʼiʼitbesaʼaboʼob le ka xuʼulsaʼab Jerusalénoʼ. Jeʼex t-ilaj teʼ  xóotʼol 7, kex tu salvartubaʼobeʼ Jéeobaeʼ tu beetaj u bin «junpʼéel espada» tu paachoʼob (Eze. 5:2). Bey túun xanoʼ le máaxoʼob ken u salvartubaʼob kéen xuʼulsaʼak le religiónoʼoboʼ maʼ kun antal tuʼux u taʼakikubaʼob tiʼ u «espada» Jéeoba. Tu guerrail Armagedóneʼ yaan u xuʼulsaʼaloʼob paʼteʼ yéetel le uláakʼ máakoʼob beyoʼob «chivoʼoboʼ» (Eze. 7:4; Mat. 25:33, 41, 46; Apo. 19:15, 18).

11, 12. 1) ¿Bix u yáantkoʼon u profecía Ezequiel utiaʼal k-ilik u kʼaʼabéetil k-áantik u maasil máakoʼob? 2) ¿Bix kun kʼexpajal le baʼax k-tsikbaltik kéen káajak le nojoch muʼyajiloʼ?

¹¹ K-naʼatik le profecíaaʼ ku yáantkoʼon k-il jach kʼaʼabéet k-áantik le máakoʼob utiaʼal ka u meyajtoʼob Jéeobaoʼ. Le meyajaʼ jach kʼaʼabéet u beetaʼal teʼ kʼiinoʼobaʼ. ¿Baʼaxten? Tumen maʼ yaʼab tiempo pʼaatal utiaʼal u kaʼansaʼal «u kajnáaliloʼob tuláakal le kaajoʼoboʼ» (Mat. 28:19, 20; Eze. 33:14-16). Kéen atacartaʼak le religiónoʼob tumen «le cheʼ» wa le gobiernoʼoboʼ toʼoneʼ yaan u xuʼulul k-aʼalik tiʼ le máakoʼob bix jeʼel u salvarkubaʼobeʼ (Eze. 7:10). Yaan u xuʼulul k-tsikbaltik le maʼalob baʼaloʼob ken u beet Diosoʼ. Jeʼel u páajtal u yaʼalaʼaleʼ yaan u pʼáatal bey maʼ tu páajtal k-tʼaan jeʼex úuchik tiʼ Ezequieleʼ (Eze. 3:26, 27; 33:21, 22). Kéen tsʼoʼokok u xuʼulsaʼal le religiónoʼoboʼ le máakoʼoboʼ yaan u kʼáatkoʼob «tiʼ juntúul profeta baʼax tsʼoʼok u tsʼaʼabal u yile», lelaʼ u kʼáat u yaʼaleʼ yaan u máan u kaxtoʼob máax jeʼel u yaʼaliktiʼob baʼax unaj u beetkoʼob utiaʼal u salvarkubaʼobeʼ. Chéen baʼaleʼ mix máak kun aʼaliktiʼob baʼax unaj u beetkoʼob (Eze. 7:26). Tsʼokaʼantiʼob beyoʼ, tsʼokaʼaniliʼ u máan u tiempoil u yaʼalaʼal bix jeʼel u beetkuba máak u discípulo Cristoeʼ.

¹² ¿U kʼáat wa túun u yaʼal bey kun tsʼoʼokol le meyaj kʼubéentaʼantoʼonoʼ? Maʼ, tumen le kéen káajak le nojoch muʼyajiloʼ maʼ xaaneʼ yaan k-tsʼáaik ojéeltbil le castigo ken u taas Diosoʼ, lelaʼ ku keʼetel yéetel «bat» ku kʼáaxal yóokʼol le máakoʼoboʼ. Le baʼax ken  k-tsikbaltaʼ yaan u yeʼesik jach nukaʼaj xuʼulsbil le kʼasaʼan yóokʼol kaabaʼ (Apo. 16:21).

13. ¿Baʼax tu yeʼesaj Ezequiel úuchik u chital tu x-tsʼíik yéetel tu x-noʼoj kʼaboʼ?

¹³ Ezequieleʼ maʼ chéen tu yeʼesaj bix kun xuʼulsbil Jerusaléniʼ tu yeʼesaj xan baʼax kʼiin kéen úuchuk. Jéeobaeʼ tu yaʼalajtiʼ ka tséel chilak tu tojil u x-tsʼíik kʼab 390 días, yéetel le kéen tsʼoʼokkeʼ ku chital tu tojil u x-noʼoj kʼab 40 días. Ezequieleʼ sáamsamal ku beetik kaʼach lelaʼ, chéen baʼaleʼ maʼ bul kʼiiniʼ. Cada kʼiineʼ ku chíikbesik junpʼéel año (xok Ezequiel 4:4-6; Núm. 14:34). Le baʼax tu beetoʼ tu yeʼesaj jach baʼax año kun xuʼulsbil Jerusalén. Le 390 años tu beetaj baʼax maʼ maʼalob Israel tu táan Jéeobaoʼ káaj tu añoil 997 t.t.J. Teʼ año jeʼeloʼ letiʼe ka jóokʼ kaʼa jaats tiʼ le 12 tribuʼob yanoʼob Israeloʼ (1 Rey. 12:12-20). Le 40 años kʼebanchaj u kaajil Judáoʼ maʼ xaaneʼ káaj tu añoil 647 t.t.J. Teʼ año jeʼeloʼ Jéeobaeʼ tu túuxtaj Jeremías u yaʼal tiʼ u kajnáaliloʼob Judá naatsʼ yanil u kʼiinil u xuʼulsaʼaloʼob,  letiʼeʼ juntaatsʼ úuchik u yaʼaliktiʼob (Jer. 1:1, 2, 17-19; 19:3, 4). Wa k-jóoʼsik k-cuentaeʼ le 390 años yéetel le 40 añosoʼ tsʼoʼokoʼob tu añoil 607 t.t.J. Teʼ año jeʼeloʼ xuʼulsaʼab u kaajil Jerusalén jach jeʼex u yaʼalmil Jéeobaoʼ. *

14. 1) ¿Bix tu yeʼesil Ezequiel u yojel Jéeobaeʼ yaan u taasik le castigo jach teʼ kʼiin u yaʼalmoʼ? 2) ¿Baʼax kun úuchul táanil tiʼ u xuʼulsaʼal Jerusalén?

¹⁴ Maʼ xaaneʼ mix Ezequiel naʼat baʼax kʼiin kun béeytal le profecía yoʼolal le 390 días yéetel le 40 díasoʼ. Kex beyoʼ le maʼ yaʼab u bin u xuʼulsaʼal tiʼ Jerusalénoʼ Ezequieleʼ tu sen aʼalaj tiʼ le judíoʼob tsʼoʼok u náatsʼal u kʼiinil u castigartaʼaloʼoboʼ, tu yaʼalaj: «Tsʼoʼok u kʼuchul u kʼiinil a xuʼulsaʼal» (xok Ezequiel 7:3, 5-10). Ezequieleʼ u yojel Jéeobaeʼ yaan u taasik le castigo jach teʼ kʼiin u yaʼalmoʼ (Isa. 46:10). Letiʼeʼ tu yaʼalaj xan baʼax kun úuchul táanil tiʼ u xuʼulsaʼal Jerusalén: «Tu paach junpʼéel loobeʼ tiʼ kun taal uláakʼ loobiʼ». Le baʼaxoʼob kun úuchloʼoboʼ yaan u beetik u maas kʼastal le máakoʼoboʼ, le bix u adorartaʼal Diosoʼ bey xan le gobiernooʼ (Eze. 7:11-13, 25-27).

15. ¿Bix káajik u béeytal u profecía Ezequiel tu añoil 609 t.t.J.?

¹⁵ Ka máan wa jaypʼéel años u yaʼal Ezequiel yaan u xuʼulsaʼal Jerusaléneʼ káaj u béeytal le profecía tu yaʼaloʼ. Teʼ año 609 t.t.J., Ezequieleʼ tu yojéelteʼ tsʼoʼok u káajal u atacartaʼal u kaajil Jerusalén. Teʼ año jeʼeloʼ ustaʼab le trompeta utiaʼal u muchʼkuba le máakoʼob u defendertoʼob u kaajaloʼoboʼ, chéen baʼaleʼ úuch le baʼax u yaʼalmaj le profetaoʼ: «Mix máak ku jóokʼol baʼateʼel» (Eze. 7:14). U kajnáaliloʼob Jerusaléneʼ maʼ tu muchʼubaʼob utiaʼal u baʼateloʼob tu contra le babilonioʼoboʼ. Maʼ xaaneʼ yaan tiʼ letiʼobeʼ tu tukloʼob yaan u salvartaʼaloʼob tumen Jéeoba jeʼex úuchik u salvartaʼaloʼob tu kʼab Asiriaeʼ. Teʼ kʼiin jeʼeloʼ u ángel Jéeobaeʼ tu xuʼulsaj le soldadoʼob asirioʼoboʼ (2 Rey. 19:32). Chéen baʼaleʼ teʼ vezaʼ maʼ áantaʼaboʼob tumen le ángeloʼoboʼ. Le ka baʼpachtaʼab le kaajoʼ tu séebaʼanil pʼáat bey junpʼéel «olla» tsʼaʼan «teʼ kʼáakʼoʼ» yéetel u kajnáaliloʼobeʼ beyoʼob u «xéexetʼal bakʼ» táan u chaʼakloʼob ichileʼ (Eze. 24:1-10). Dieciocho meses táan u sen muʼyajoʼob tak ka xuʼulsaʼab le kaajoʼ.

16. ¿Bix jeʼel k-eʼesik k-creertik de ke u castigo Jéeobaeʼ yaan u taal jach tu kʼiinil?

¹⁶ ¿Baʼax k-kanik tiʼ le junjaats profecíaʼobaʼ? ¿Baʼax yaan yil yéetel le baʼaxoʼob k-tsikbaltik tiʼ le máakoʼob bey xan yéetel le bix u kʼamkoʼoboʼ? Jéeobaeʼ tsʼoʼok u chʼaʼtuklik baʼax kʼiin kéen u xuʼuls tiʼ le religiónoʼob maʼatech u kaʼanskoʼob u jaajiloʼ, yaan u xuʼulskoʼob jach teʼ kʼiin u chʼaʼtukultmoʼ (2 Ped. 3:9, 10; Apo. 7:1-3). Toʼoneʼ maʼ k-ojel jach baʼax kʼiin kéen úuchuk leloʼ. Chéen baʼaleʼ jeʼex tu beetil Ezequieleʼ yaan k-beetik le meyaj tsʼaʼantoʼonoʼ, yaan u seguer k-aʼalik tiʼ le máakoʼoboʼ: «Tsʼoʼok u kʼuchul u kʼiinil a xuʼulsaʼal». ¿Jach wa túun kʼaʼabéet u seguer k-aʼalik tiʼ le máakoʼoboʼ? Jach kʼaʼabéet. * Tu kʼiiniloʼob Ezequieleʼ óoliʼ mix máak creert wa  yaan u xuʼulsaʼal Jerusalén (Eze. 12:27, 28). Chéen baʼaleʼ yaan tiʼ le judíoʼob bisaʼaboʼob Babiloniaoʼ taakchaj u adorarkoʼob Dios jeʼex u kʼáatoʼ yéetel ka tsʼoʼokeʼ suunajoʼob tu luʼumoʼob (Isa. 49:8). Teʼ kʼiinoʼob xanaʼ óoliʼ mix máak u kʼáat u creert wa yaan u xuʼulsaʼal le yóokʼol kaabaʼ (2 Ped. 3:3, 4). Chéen baʼaleʼ mientras maʼ kʼuchuk le kʼiin jeʼeloʼ unaj u seguer k-áantik le máakoʼob uts u puksiʼikʼaloʼob utiaʼal ka yanaktiʼob le kuxtal minaʼan u xuuloʼ (Mat. 7:13, 14; 2 Cor. 6:2).

17. ¿Baʼax kun úuchul le táan le nojoch muʼyajiloʼ?

¹⁷ U profecía Ezequieleʼ ku kaʼansik xan toʼoneʼ le kéen xuʼulsaʼak le religiónoʼoboʼ «mix máak [kun] jóokʼol baʼateʼel», mix máak ken u defendert u religión. Baʼaxeʼ utiaʼal ka áantaʼakoʼobeʼ yaan u yawtikoʼob: «Yuumtsil, Yuumtsil». Le kéen u yiloʼob mix máak áantkoʼobeʼ «yaan u pʼáatal minaʼan u [muukʼoʼob]» yéetel yaan u «sen sajaktaloʼob» (Eze. 7:3, 14, 17, 18; Mat. 7:21-23). ¿Baʼax uláakʼ ken u beetoʼob? (Xok Ezequiel 7:19-21). Jéeobaeʼ tu yaʼaleʼ «le plata  yaantiʼoboʼ yaan u píikchʼintkoʼob teʼ bejoʼoboʼ». Lelaʼ ku yeʼesik baʼax kun úuchul le táan le nojoch muʼyajiloʼ. Teʼ kʼiinoʼoboʼ yaan u tsʼáaikoʼob cuentaeʼ le taakʼin yaantiʼoboʼ mix baʼal u biilal tumen maʼ kun salvarbiloʼob.

18. ¿Baʼax ku kaʼansiktoʼon u profecía Ezequiel tsʼoʼok k-ilkoʼ?

¹⁸ ¿Ka tsʼáaik wa cuenta baʼax ku kaʼansiktoʼon u profecía Ezequiel tsʼoʼok k-ilkoʼ? Ku kaʼansiktoʼon baʼaxoʼob unaj k-tsʼáaik táanil ichil k-kuxtal. Tuukulnen tiʼ lelaʼ. U kajnáaliloʼob Jerusaléneʼ káaj u kaxtikoʼob u yáantaj Jéeoba hasta ka tu tsʼáajoʼob cuenta yaan u xuʼulsaʼal le kaaj yéetel maʼ kun salvarbiloʼob tumen u ayikʼaliloʼoboʼ. Letiʼobeʼ tu xúumpʼattoʼob le baʼaxoʼob yaantiʼoboʼ ka joʼopʼ u kʼáatkoʼob tiʼ «juntúul profeta baʼax tsʼoʼok u tsʼaʼabal u yile». Chéen baʼaleʼ le ka kʼaʼaj u yiikʼoʼobeʼ tsʼoʼok u kʼuchul u kʼiinil u xuʼulsaʼaloʼob (Eze. 7:26). Toʼoneʼ maʼ kun úuchultoʼon beyoʼ tumen k-ojel tsʼoʼok u kʼuchul u kʼiinil u xuʼulsaʼal le kʼasaʼan yóokʼol kaabaʼ. K-ojel jach yaan u béeytal le baʼax u yaʼalmaj Diosoʼ, le oʼolal k-tsʼáaik táanil ichil k-kuxtal k-meyajtik. Táan k-muchʼkíintik ayikʼaliloʼob teʼ kaʼanoʼ tumen k-ojel le ayikʼaliloʼobaʼ mix bikʼin kun píikchʼintbiloʼob «teʼ bejoʼoboʼ» (xok Mateo 6:19-21, 24).

19. ¿Bix u yáantkoʼon u profecía Ezequiel ku tʼaan tiʼ bix kun xuʼulsbil Jerusalénoʼ?

¹⁹ ¿Bix u yáantkoʼon u profecía Ezequiel ku tʼaan tiʼ bix kun xuʼulsbil Jerusalénoʼ? Ku kʼaʼajsiktoʼoneʼ chéen junpʼíit kʼiin pʼaataltoʼon utiaʼal k-áantik le máakoʼob u adorartoʼob Diosoʼ. Le oʼolal jach maʼ t-perdertik k-tiempo utiaʼal k-áantik le máakoʼoboʼ. Jach ku kiʼimaktal k-óol kéen k-il bix u joʼopʼol u adorartaʼal Jéeoba tumen le máaxoʼob uts u puksiʼikʼaloʼoboʼ. Tsʼoʼoleʼ kex yaʼab máaxoʼob maʼ u kʼáat u meyajtoʼob Dioseʼ toʼoneʼ maʼ kun xuʼulul k-aʼaliktiʼob le baʼax tu yaʼalaj Ezequielaʼ: «Tsʼoʼok u kʼuchul u kʼiinil a xuʼulsaʼal» (Eze. 3:19, 21; 7:3). Tsʼoʼoleʼ maʼ kun xuʼulul k-confiar tiʼ Jéeoba yéetel mantatsʼ ken k-tsʼáa táanil ichil k-kuxtal k-adorarte (Sal. 52:7, 8; Pro. 11:28; Mat. 6:33).